Yãmb na n kẽna ne Wẽnnaam bɩ?
Yãmb na n kẽna ne Wẽnnaam bɩ?
“Kẽn ne f Wẽnnaamã ne sik-m-menga.”—MIISE 6:8, NW.
1, 2. Zĩ-bʋg wɛɛngẽ la a Zeova sẽn tar manesem ning ne tõndã wõnd roagd sẽn zãmsd a biig kẽn manesem?
BIIG sẽn kademd n yik n yaas n tees a nus a ba bɩ a ma, n sɩng a pipi na-yakmã. Rẽ tõe n wõnda yel-yaalga, la ne biigã ba la a ma, woto yaa bõn-kãseng menga, la kɩtdame tɩ b tall saagr tɩ biigã na n yẽegame. Roagdbã zoe n tagsda b sẽn na n wa gãd b biigã nug n kẽnd ne-a, kiis la yʋʋm nins sẽn watã. Zĩis wʋsg pʋsẽ, b saagdame n na n kõ b biigã sor-wilgr la sõngr sẽn na n kaoos yʋʋm wʋsg sẽn wate.
2 Yaa woto me la Wẽnnaam a Zeova maand ne a tẽng zug kambã. Vugri a yeela Israɛll bɩ Efrayim sẽn yaa a nin-buiidã woto: “Yaa maam n zãms Efrayim neba kẽna. Yaa maam n bug bãmba . . . Mam tɛɛ bãmb ne nimbãaneg la nonglem wĩyã.” (Oze 11:3, 4) Ka wã, a Zeova bilgda a meng wa nonglem ba sẽn maag a meng n zãmsd a biig kẽna, t’a sã n lʋɩ bɩ a põk-a. A Zeova sẽn yaa Ba-sõng sẽn ka to wã rata ne a sũur fãa n zãms tõnd kẽna. Baa d sã n wa bãng kẽna, a ket n yãagd-d-la ne sũ-noogo. Wala tõnd verse yẽgrã sẽn wilgdã, d tõe n kẽna ne Wẽnnaam! (Miise 6:8, NW) La kẽn ne Wẽnnaam dat n yeelame tɩ bõe? Bõe yĩng tɩ d segd n kẽn ne Wẽnnaam? Wãn to la d tõe n kẽn ne Wẽnnaam? La d sã n kẽnd ne Wẽnnaam, bark bʋs la d paamda? Bɩ d bao n leok sogs-kãensã a naasã ball-balle.
Kẽn ne Wẽnnaam dat n yeelame tɩ bõe?
3, 4. a) Bõe yĩng tɩ kẽn ne Wẽnnaamã yaa makr sẽn zems kɛpɩ? b) Kẽn ne Wẽnnaam dat n yeelame tɩ bõe?
3 Yaa vẽeneg tɩ ninsaal pa tõe n kẽn ne a Zeova sẽn be saasẽ wã sɩdgem-sɩdgem ye. (Yikri 33:20; Zã 4:24) Rẽnd Biiblã sã n gomd ninsaalb sẽn kẽnd ne Wẽnnaam yelle, yaa makr goama. Mak-kãngã zemsa ne tẽnsã la buud toor-toorã fãa neb minungu, la a zemsa ne zãmaan fãa neba. Zĩ-bʋg bɩ zãmaan-bʋg neb n pa mi ned sẽn tũud a to n kẽnd sẽn dat n yɛɛlga? Mak-kãngã bilgda nonglem la zoodo. D sã n tagsd woto, sõngda tõnd tɩ d bãng kẽn ne Wẽnnaam sẽn dat n yɛɛlga. La rẽnda d togs yɛlã n fasem.
4 Tẽeg-y wẽn-sakdb a Enok la a Nowe yelle. Bõe yĩng tɩ b yeel tɩ b ra kẽnda ne Wẽnnaam? (Sɩngre 5:24; 6:9) Biiblã pʋgẽ, naoor wʋsgo, gom-biig ning sẽn yaa “kẽnã” gomda vɩɩm manesem buud tallg yelle. A Enok ne a Nowe yãka vɩɩm manesem sẽn da zems ne Wẽnnaam a Zeova raabã. Bãmb pa maan wa b zãmaanã neb ye, b baoa a Zeova sor-wilgr la b sak-a, la b teeg-a. Woto rat n yeelame tɩ yaa a Zeova n maan yam-yãkr kãngã b zĩigẽ bɩ? Ayo. A Zeova naana ninsaalbã tɩ b tõe n yãk yam n maan bũmb b toore, la a ratame meng tɩ d tũnug ne d yam tagsgã d yam–yãkr fãa taoore. (Rom dãmba 12:1, NW) La d sã n wa yãkd yam n na n maan bũmbu, d segd n saka ne sik-m-menga, t’a Zeova yamã sẽn ka mak-n-taagã wilg-d d sẽn tog n tʋm to-to ne d yam tagsgã. (Yelbũna 3:5, 6; Ezai 55:8, 9) Sɩda, a Zeova yãagda tõnd vɩɩmã sor zugu.
5. A Zezi sẽn wa n gomd yõor woglg yellã, bõe yĩng t’a gom kankɩɩg paasg yelle?
5 Naoor wʋsgo, Biiblã makda vɩɩmã ne so-toak bɩ kẽna. Zĩis kẽer pʋsẽ, mak-kãngã yaa vẽenega, la zĩis a taaba, a pa pukd vẽeneg woto ye. Wala makre a Zezi yeelame: “Yãmb ned a bõe n tõe n paas a [yõor] woglem kantɩɩg a ye a vɩɩm tɛka a sẽn maand yɩɩra yĩnga?” (Matɩe 6:27) Gom-kãensã võor wʋmb tõe n yɩɩ toog ne-yã. Kãntɩɩg yaa bũmb woglem makdga, tɩ ned “vɩɩm” bɩ a yõor woglem yaool n magd ne wakate. Bõe yĩng masã t’a Zezi gomd “kãntɩɩg a ye” paasg yelle? * Vẽenega, a Zezi ra makda vɩɩmã ne so-toaka. Sɩda, a zãmsa nebã tɩ yɩɩr maaneg pa na n sõng-b tɩ b paas b yõorã woglem baa bilf ye. La d segd n kʋmb n yeelame tɩ d pa tõe n maan baa fʋɩ n wogl d yõorã n paam n kẽn ne Wẽnnaam n kaoos bɩ? Ayo! Rẽ wata ne sokr a yiib-n-soab sẽn yaa: Bõe yĩng tɩ d rat n kẽn ne Wẽnnaam?
Bõe yĩng tɩ d segd n kẽn ne Wẽnnaam?
6, 7. Ninsaalbã sẽn pa zems zãngã sɩd rata bõe, la bõe yĩng tɩ d segd n bao a Zeova sõngr sẽn na yɩl n pids ratem kãngã?
6 Bʋʋm a yembr sẽn kɩt tɩ d rat n kẽn ne Wẽnnaam a Zeova wã bee Zeremi 10:23 pʋgẽ: “Zusoaba, mam miime tɩ ninsaal ka tar noor ne a vɩɩm sẽn na n yɩ bũmb ninga ye. Ninsaal ka so a meng vɩɩm yell ye.” Woto, tõnd ninsaalbã pa tar tõog bɩ sor n na n wilg d mens vɩɩmã sor ye. Tõnd sɩd rata sor-wilgri. Neb nins sẽn pẽdgd n tũud sor ning b mens sẽn yãkã tɩ b toor kae ne Wẽnnaamã tudga wa a Ãdem ne a Hawa sẽn tudgã. A Ãdem ne a Hawa kõo b mens sor n bao n na n bãng sẽn yaa sõma la wẽng b toore. (Sɩngre 3:1-6) Vẽenega, tõnd “pa tar” so-kãng ye.
7 Yãmb pa ne tɩ y rata sor-wilgr vɩɩmã sor zug sɩda? Daar fãa d segd n yãka yam n maan yel-bõoneg bɩ yel-kãsemse. Yel-kãens kẽer yãkr sɩd yaa toogo, n tõe n toeem tõnd la d nin-nongdsã vɩɩm. La bãng-y tɩ ned yʋʋm la a yam sẽn yɩɩd tõnd wʋsg-wʋsg n be, n dat ne nonglem n wilg tõnd sor tɩ d maan yam-yãkr kãensã! Zu-bʋko, rũndã-rũndã, neb wʋsg nong n tũuda b mens tagsg la b mens sore. B pa tũud sɩd ning b sẽn togs Yelbũna 28:26 pʋgẽ wã ye. Be b wilgame tɩ: “Yaa yalem n teegd a meng tagsgo. La yaa sẽn maand-a yam n paamd fãagre.” A Zeova ratame tɩ d põs yel-beed nins ninsaal sũurã sẽn yaa zãmb soabã teegr sẽn wat ne wã. (Zeremi 17:9) A ratame tɩ d kẽn ne yam, tɩ d teeg-a wala d Sorwilgd la d Karensaamb sẽn tar yam. D sã n maan woto, d vɩɩmã sor zug kẽndã na n talla bãan la sũ-noogo.
8. Yel-wẽnã la pa-zems-zãngã tallda ninsaalbã n kẽngd yɛ, la bõe la a Zeova rat tɩ d paam?
8 Bʋʋm a to sẽn kɩt tɩ d segd n kẽn ne Wẽnnaamã yaa tõnd sẽn dat n kẽn wakat sẽn-kõn-sa wã yĩnga. Biiblã togsda bũmb sẽn yaa sɩda, baa a sã n pa be yamleoogo. D tõe n yeelame tɩ ninsaalbã fãa sẽn pa zems zãngã kẽnd n debda zĩ-yende. Koɛɛg Soaba 12:5 bilgda tood nins kʋʋlmã sẽn wat ne wã n yetẽ tɩ: “Ninsaal dabda a roog sẽn ka sɛt zĩigẽ, la yãbdba zoet n pɩʋʋmda soɛya.” La “roog sẽn ka sɛt zĩigẽ” wã yaa bõe? Yaa yaoogã, zĩig ning yel-wẽnã la pa-zems-zãngã sẽn talld tõnd n kẽngẽ wã. (Rom dãmba 6:23) Sẽn sɩng ne d rogem n tɩ ta d kũumã, yaa so-toak koɛɛg sẽn pid ne toogo. La a Zeova ratame tɩ tõnd paam sẽn são rẽ. (Zoob 14:1) Yaa tõnd sẽn na n kẽnd ne Wẽnnaam bal la d tõe n tõog n kẽn ne-a wakat sẽn-kõn-sa, wa a sẽn da rat to-to wã. Pa woto la yãmb rat sɩda? Rẽnd vẽenega, y segd n kẽna ne y saasẽ Ba wã.
Wãn to la d tõe n kẽn ne Wẽnnaam?
9. Bõe yĩng t’a Zeova solg a meng ne a nin-buiidã wakat kẽere, la bas-m-yam bʋg la a kõt Ezai 30:20 pʋgẽ?
9 D segd n gũusame n bãng sokr a tãab-n-soabã leokr neere. Sok-kãng la woto: Wãn to la d tõe n kẽn ne Wẽnnaam? D yãta a leokrã Ezai 30:20, 21 pʋgẽ: “Sẽn zãmsd-a yãmba ka na n le solg b meng ne yãmb ye, yãmb ninã na n yãa y karen-saambã. Yãmb sã n dat n kẽng rɩtg walla goabga, yãmb tʋba na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’” Verse kãensã sẽn kengd raoodã pʋgẽ, tõe t’a Zeova sẽn yeel bũmb ning tɩ be verse 20 pʋgẽ wã tẽega a nin-buiidã tɩ b sẽn wa n tõdgã, a sɩd solga a meng ne-ba. (Ezai 1:15; 59:2) La ka wã yẽ, b pa wilg t’a Zeova solga a meng ye, la b yeelame t’a vẽnega a meng ne a nin-buiidã sẽn sak-a wã. Rẽ kɩtdame tɩ d mams karen-saamb sẽn yas a karen-biis taoore, n wilgd-b bũmb a sẽn dat tɩ b bãng n maane.
10. Wãn to la y tõe n “wʋm gomd sẽn gomd yãmb poorẽ” sẽn yit y Karensaam Kãsengã nengẽ?
10 Makr a to n be verse 21 wã pʋgẽ. B bilga a Zeova sẽn pʋgd a nin-buiidã poore, n wilgd-b sor ning b sẽn tog n tũ wã. Biibl mitb wilgame tɩ tõe tɩ gom-kãngã tika pe-kɩɩm sẽn mi n pʋgd a piisã, n tãsd-b sẽn na yɩl n kok-b tɩ b ra kẽ moogã. Wãn to la mak-kãngã pak tõndo? Be neere, tõnd sã n baood sor-wilgr Wẽnnaam Gomdã pʋgẽ, yaa goam sẽn gʋls yʋʋm tusa sẽn loog la d karemda. B sẽn gʋls gom-kãensã hal sẽn kaoosã yaa wala b bee tõnd poorẽ. Ne rẽ fãa, gom-kãens tara yõod rũndã-rũndã wa b sẽn da tar yõod to-to b sẽn da wa n gʋls-b wakatã. Biiblã sagls tõe n wilga tõnd sor rũndã-rũndã d yam-yãkrã pʋgẽ, la b tõe n sõnga tõnd tɩ d geel d sẽn na n maan bũmb ning yʋʋm sẽn wat pʋgẽ. (Yɩɩl Sõamyã 119:105) D sã n baood sagl-kãens ne d sũy fãa la d tũud-ba, wakat kãnga, a Zeova yaa tõnd Sorwilgda. D kẽnda ne Wẽnnaam.
11. Sã n yaa ne Zeremi 6:16, mak-bʋg sẽn be yamleoog la a Zeova tũnug ne n sagl a nin-buiidã, la b manesem yɩɩ wãn to?
11 Tõnd sɩd basda Wẽnnaam Gomdã t’a wilgd tõnd sor sõma bɩ? Zemsame tɩ d yals wakat ning n fees d meng ne pʋ-peelem. Ges-y verse sẽn na n sõng-d tɩ d maan woto: “Zusoaba yeelame: ‘Yaas-y so-tiisẽ n gese. La y sok n bãng so-kʋda sẽn be zĩig ninga. Sok-y n bãng-y so-sõnga sẽn be zĩig ninga n kẽng be n tɩ paam laafɩ.’” (Zeremi 6:16) Gom-kãensã kɩtdame tɩ d tags so-toagd sẽn yaas so-tiisẽ n na n sok sor yelle. La tẽebã wɛɛngẽ, a Zeova nin-buiidã sẽn be Israɛll n yaa tõatbã ra segd n maana bũmb sẽn wõnd woto. B ra segd n lebga n waa “so-kʋda” zutu. ‘So-sõng’ kãng ra yaa sor ning bãmb yaab rãmb nins sẽn da sakd Wẽnnaam sẽn da tũudã, sor ning buudã sẽn maan yalemd n bʋdg n basã. Zu-bʋko, Israɛll tõdga sagl-kãngã a Zeova sẽn kõ-b ne nonglmã. Verse wã paasda woto: “La neba yeelame: ‘Tõnd ka na n kẽng be ye.’” La Wẽnnaam rũndã-rũndã nin-buiidã talla manesem sẽn yɩ toor ne sagl-kãngã.
12, 13. a) Kirist karen-biis nins sẽn paam vʋʋsem sõng zaeebã talla manesem bʋg ne saglg ning sẽn be Zeremi 6:16 pʋgẽ wã? b) Wãn to la d tõe n fees d mens n bãng tõnd kẽndã sẽn yaa to-to rũndã-rũndã?
12 Yʋʋmd 1900 wã sẽn wa n kolgdẽ, Kirist karen-biisã sẽn paam vʋʋsem sõng zaeebã saka saglg ning sẽn be Zeremi 6:16 pʋgẽ wã. B lʋɩya taoor n lebg n wa “so-kʋda” zut ne b sũy fãa. B pa maan wa kiris-neb ne yʋʋr tũudmã ye. B tũu “goam sõama wã mamsg” a Zezi Kirist sẽn luglã wakat fãa. Yaa goam sõma nins a pipi karen-biisã me sẽn tũ wakat fãa wã. (2 Tɩmote 1:13) Hal tɩ ta rũndã, sẽn paam-b vʋʋsem sõng zaeebã sõngda taaba, la b sõngd ‘piis a taabã’ sẽn yaa b tũud-n-taasã tɩ b tũud vɩɩm manesem ning sẽn yaa sõma la sẽn kõt sũ-noogã kiris-neb ne yʋʋr tũudmã sẽn basã.—Zã 10:16.
13 Tʋm-tʋmdã sull sẽn tũud sɩdã sẽn kõt tẽebã rɩɩb wakat sẽn zemsã yĩnga, b sõnga neb milyõ rãmb tɩ b yã “so-kʋdã” n kẽnd ne Wẽnnaam. (Matɩe 24:45-47) Yãmb bee neb milyõ kãensã sʋk bɩ? Sã n yaa woto, bõe la y tõe n maan n da wa bʋdg n tũ y meng sore? Yaa sõma tɩ wakat-wakat bɩ y maag y yĩng n ges y sẽn kẽnd to-to vɩɩmã sor zugã. Yãmb sã n karemd Biiblã la sɛb nins sẽn tik Biiblã zugã wakat fãa, la y wat zãmsg ning sẽn zae-bã sẽn sigl rũndã-rũndã wã, y paamda zãmsg sẽn na yɩl n kẽn ne Wẽnnaam. La y sã n tũ sagls nins b sẽn kõtã ne sik-m-menga, y sɩd kẽnda ne Wẽnnaam, n tũud “so-kʋdã.”
Kẽn-y wa y ‘nee nebã nin sẽn ka tõe n yã a soabã’
14. D sã n kɩs sɩd t’a Zeova sɩd beeme, wãn to la rẽ na n puk yɛl nins d sẽn yãkd yam n na n maanã pʋgẽ?
14 Sẽn na yɩl n kẽn ne a Zeova, rẽnda d kɩs sɩd t’a sɩd beeme. Tẽeg-y t’a Zeova kõo a pĩnd wẽndẽ kɩs-sɩd dãmbã bas-m-yam t’a ra pa solg a meng ne-b ye. Rũndã-rũndã me, a wilgda a nin-buiidã t’a sɩd yaa Karensaam Kãsenga. Yãmb kɩsa sɩd t’a Zeova sɩd beeme, tɩ yaa wa a yasa y taoor n zãmsd-y bɩ? Yaa tẽeb kãng buud la d segd n talle, d sã n dat n kẽn ne Wẽnnaam. A Moiiz ra tara tẽeb kãng buudu, bala, “yẽ talla tẽeb kãn-kãe wa a yãa neba nin sẽn ka tõe n yã a soabã.” (Hebre dãmba 11:27) Tõnd sã n kɩs sɩd t’a Zeova sɩd beeme, d pa na n yĩm a sẽn tagsd to-to yɛlã zugu, d sã n wa rat n yãk yam n maan bũmb ye. Wala makre, d pa na n saag n maan wẽnga, n yaool n bao n solg d yel-wẽnã kiris-neb kãsem dãmbã bɩ d zakã neb ye. La d na n modgame n kẽn ne Wẽnnaam, baa ninsaal baa a yembr sã n pa tõe n yã-do. Wala pĩnd wẽndẽ rĩm a Davɩɩde, d yãka yam n na n maan woto wakat fãa. A Davɩɩd yeelame: “Mam na n kẽna ne pʋ-peelem m zaka pʋgẽ.”—Yɩɩl Sõamyã 101:2.
15. Wãn to la d kiris-nin-taasã tũud-n-taar sõngd tõnd tɩ d kɩs sɩd t’a Zeova sɩd beeme?
15 A Zeova miime tɩ tõnd yaa tẽng tom, la tɩ d pa zems zãng ye, la tɩ wakat ninga tõe n yɩɩ toog ne-d tɩ d tẽ bũmb d nin sẽn pa ne. (Yɩɩl Sõamyã 103:14) A maanda yɛl wʋsg sẽn na yɩl n sõng tõnd tɩ d tõog n tẽ d nin sẽn pa ne. Wala makre, a tigma ‘neb bu-zẽmsa fãa sʋk a menga yʋʋra yĩnga.’ (Tʋʋma 15:14) Tõnd sẽn balemd-a ne zems-n-taarã, d kengda taab raoodo. D sã n wʋm a Zeova sẽn sõng tẽeb saam-biig t’a tõog pãn-komsem bɩ zu-loɛɛga, kɩtdame tɩ tõnd kɩs sɩd n paas tɩ Wẽnnaam sɩd beeme.—1 Pɩɛɛr 5:9.
16. Wãn to la d sẽn na n bao n bãng a Zezi sõngd tõnd tɩ d kẽn ne Wẽnnaam?
16 Sẽn yɩɩd fãa, a Zeova kõo tõnd a Biriblã mak-sõngo. A Zezi yeelame: “Mam yaa sore la sɩda la vɩɩm. Ned ka tõe n ta m Ba nengẽ a sã n ka mam maasem yĩng ye.” (Zã 14:6) Manesem a ye sẽn yaa sõma n yɩɩd sẽn na yɩl n kɩs sɩd n paas t’a Zeova sɩd beeme yaa d sẽn na n bao n bãng vɩɩm manesem ning a Zezi sẽn tallã neere. Bũmb ning fãa a Zezi sẽn yeel la a maanã ra pukda a saasẽ Ba wã zʋgã la a soayã tɩ zems zãnga. (Zã 14:9) D sã n wa yãkd yam n na n maan bũmbu, d segd n tagsa neer n ges yam-yãkr ning a Zezi sẽn da na n maanẽ bõn-kãng taoorã. Tõnd yam-yãkrã sã n wilgdẽ tɩ d gũusda sõma la tɩ d tagsda yellã zug neer la d pʋʋsd rẽ yĩnga, rẽnd d tũuda Kirist naoã. (1 Pɩɛɛr 2:21) Rẽ kɩtdame tɩ d kẽnd ne Wẽnnaam.
Kẽn ne Wẽnnaamã wata ne bark bʋse?
17. D sã n kẽnd a Zeova sorã zugu, laafɩ bʋg la d na n paame?
17 Kẽn ne Wẽnnaam a Zeova kõta ned vɩɩm sẽn be barka. Tẽeg-y bũmb ning a Zeova sẽn kãab a nin-buiidã, b sã n da bao “so-sõngã.” A yeelame tɩ b “kẽng be n tɩ paam laafɩ.” (Zeremi 6:16) “Laafɩ” kãng rat n yeelame tɩ bõe? Yaa laafɩ vɩɩm sẽn pid ne yõ-noogr la naar bɩ? Ayo. A Zeova kõta bũmb sẽn são woto wʋsgo, bũmb neb nins sẽn yaa arzɛgs rãmb n tɩ yɩɩd ãdem-biisã sʋkã sẽn pa wae n paamdẽ. Paam vɩɩm sẽn be laafɩ yaa f paam sũur pʋgẽ bãane, sũ-noog la tẽeb kom tɩgsgo. Laafɩ kãng rat n yeelame tɩ f tõe n kɩsa sɩd tɩ f yãka sor ning sẽn yaa sõma n yɩɩd vɩɩmã pʋgẽ. Sũur pʋgẽ laafɩ kãng yaa bark sẽn pa wae dũni kãngã sẽn pid ne yɛlã pʋgẽ.
18. Bark bʋg la a Zeova rat n kõ yãmba, la bõe la yãmb yãk yam n na n maan wakat fãa?
18 Vɩɩmã meng yaa bark kãsenga. D sã n vɩɩmd baa yaa bilfu, rẽ n são d sẽn pa vɩɩmd lae-lae. La a Zeova zɩ n tʋlg tɩ d vɩɩmd wakat bilf bala, n tall pãng d bi-bɩɩlmã wakate, n wa paam tood d kʋʋlmã wakat ye. A Zeova ratame tɩ y paam bark ning sẽn yaa kãseng n yɩɩd a taabã fãa wã. A ratame tɩ y kẽn ne-a wakat fãa yĩnga. B wilga rẽ vẽeneg Miise 4:5 (NW) pʋgẽ woto: “Nin-buiida fãa na n kẽna ned kam fãa ne a wẽnnaamã yʋʋr yĩnga, la tõndo, tõnd na n kẽna ne a Zeova tõnd Wẽnnaam yʋʋrã yĩnga wakat sẽn pa yãk tɛka, n-yẽe wakat fãa.” Y rat n paama bark kãngã bɩ? Y rat n paama bũmb ning a Zeova sẽn boond tɩ “vɩɩm hakɩɩkã” bɩ? (1 Tɩmote 6:19, Kãab-paalgã Koe-noogo) Sã n yaa woto, bɩ y maan y sẽn tõe fãa n kẽn ne a Zeova rũndã, beoogo, la daar fãa wakat sẽn-kõn-sa yĩnga!
Wãn to la y na n leoke?
• Kẽn ne Wẽnnaam dat n yeelame tɩ bõe?
• Bõe yĩng tɩ y neẽ tɩ y segd n kẽna ne Wẽnnaam?
• Bõe n na n sõng-y tɩ y kẽn ne Wẽnnaam?
• Bark bʋs la neb nins sẽn kẽnd ne Wẽnnaamã na n paame?
[Tẽngr note]
^ sull 5 Biibl lebgr sãnda basa “kãntɩɩgã” verse kãngã pʋgẽ wã n ningd wakat makdg sẽn yaa “wakat bilfu.” (The Emphatic Diaglott) bɩ “minit yɛnga” (A Translation in the Language of the People, a Charles B. Williams sẽn gʋlse). La buud-gomd ning b sẽn tũnug ne n gʋls Biiblã pʋgẽ, yaa kãntɩɩg la b ning-yã, t’a woglmã zems sãntimetr 45.
[Zãmsgã sogsgã]
[Foto rãmba, seb-neng 29]
Ne Biiblã maasem, d wʋmda a Zeova koɛɛg sẽn yet-d tɩ: “Ad sore”
[Foto, seb-neng 31]
Tigissẽ wã, d paamda tẽeb rɩɩb wakat sẽn zems sasa