A Zeova Gomdã vɩɩme

Pipi Kibay sebrã tags-kãsemse

YAA yʋʋm 77 masã la Zʋɩf rãmbã sẽn yi Babilon yembdã n lebg n wa b ba-yirã. Guvɛrneer a Zorobabɛll sẽn da lebs n me wẽn-doogã n sa tɩ yʋʋm 55 la woto. Bʋʋm kãseng ning sẽn kɩt tɩ Zʋɩf rãmbã lebg n wa b ba-yirã yaa sẽn na yɩl n lebs n lugl baleng hakɩkã Zerizalɛm. La nin-buiidã ra pa tar yẽesem a Zeova balengã pʋgẽ ye. B ra ratame tɩ b keng b raood tao-tao, la yaa woto bal la Pipi Kibay sebrã maan-yã.

A sẽn gom Israɛll nebã yaab rãmbã rot yell toor sẽn ka be, Pipi Kibay sebrã togsda yɛl sẽn zĩnd yʋʋm 40 pʋgẽ, sẽn sɩng ne rĩm a Sayull kũumã n tɩ ta rĩm a Davɩɩd kũumã. B tagsdame tɩ yaa maan-kʋʋd a Ɛsdras n gʋls seb-kãngã yʋʋm 460 sẽn deng a Zezi rogmã. Pipi Kibay sebrã tara yõod ne tõndo, bala a kɩtdame tɩ d bãng balengã sẽn da maand to-to wẽn-doogã pʋgẽ, la a togsd yɛlã n fasemdẽ, Mesi wã yaab rãmb rot wɛɛngẽ. Pipi Kibay sebrã sẽn be Wẽnnaam Gomdã a sẽn vẽneg tɩ b gʋlsã pʋgẽ wã yĩnga, a sẽn tar koɛɛg ningã kengda tõnd tẽebã la a kɩtdẽ tɩ d bãng Biiblã n paase.—Hebre dãmba 4:12.

YƲY SẼN TAR YÕODO

(1 Kibaya 1:1–9:44)

A Ɛsdras sẽn gʋls Israɛll buudã rot neb yʋyã vẽeneg to-to wã tara yõod zĩis a tãab pʋgẽ: Woto kɩtame tɩ b ges tɩ rap nins sẽn tar sorã bal tʋm maan-kʋʋrã tʋʋmde. Leb n sõngame tɩ b bãng buud fãa ne a pʋɩɩre, la yaab rãmb rot nins sẽn da na n tall n tõk Mesi wã. B sẽn gʋls Israɛll buudã rot neb zãmaan toɛy-toɛy yʋyã wilgda Zʋɩf rãmbã buud sẽn sɩng to-to, sẽn sɩng ne pipi rao a Ãdmã. Sẽn sɩng ne a Ãdem n tɩ ta a Nowe, yaa zãmaan piiga, la sẽn sɩng ne a Nowe n ta a Abrahaam me yaa zãmaan piiga. B sõdga a Ismaɛll komdibli wã, a Abrahaam pʋg-bil a Ketura komdibli wã la a Ezayu komdibli wã, n yaool n gom n tadg a Israɛll komdibli 12 wã yagens zugu.—1 Kibaya 2:1.

A Ɛsdras gʋlsa Zida yagensã yʋy n fasme, bala yaa bãmb nengẽ la rĩm a Davɩɩd roogã sẽn yaa rĩm dãmb roogã yi-yã. Sẽn sɩng ne a Abrahaam n tɩ ta a Davɩɩde, yaa zãmaan 14, la sẽn sɩng ne a Davɩɩd n tɩ ta Israɛll kambã sẽn wa n debd yemd Babilonnã, yaa zãmaan 14. (1 Kibaya 1:27, 34; 2:1-15; 3:1-17; Matɩe 1:17) Sẽn pʋgde, a Ɛsdras sõdga buud nins sẽn be Zʋrdẽ kʋɩlga yaang babgã yagens yʋya, la a sõdg a Levi buudã rot zãmaan toɛy-toɛy yʋya. (1 Kibaya 5:1-24, 27) Rẽ poore a Ɛsdras yaool n goma buud a taab nins sẽn be Zʋrdẽ kʋɩlgã nen-taoor babgã yell koɛɛg-koɛɛga, la a gom a Bẽnzamẽ roogã neb yell n fasme. (1 Kibaya 8:1) B sõdga neb nins sẽn yɩ pipi n zĩnd Zerizalɛm Zʋɩf rãmbã sẽn yi Babilon yembdã poorã yʋy me.—1 Kibaya 9:1-16.

 Sogsg sẽn tik verse rãmb zut n paam leokre:

1:18—Ãnd la a Sela ba? Yaa a Kainam bɩ yaa a Arpaksaade? (Luk 3:35, 36) A Sela ba yɩɩ a Arpaksaad. (Sɩngre 10:24; 11:12) Tõe tɩ yʋʋr ning sẽn yaa “Kainam” n be Luk 3:36 pʋgẽ wã, yaa “Kaldeẽ” la b ra rat n gʋlse. Sã n yaa woto, tõe tɩ sɩngrẽ wã Biiblã zĩ-kãngã ra karemda woto: “Kalde ned a Arpaksad biiga.” Bɩ tõe tɩ yʋy nins sẽn yaa Kainam la Arpaksadã yaa nin-yɛng yʋʋre. Yaa sõma tɩ d bãng tɩ gomd ning sẽn yaa “a Kainam biigã” pa be seb-kʋd nins b sẽn gʋls ne nugã kẽer pʋsẽ ye.—Luk 3:36.

2:15—A Davɩɩd ra yaa a Zese biig a yopoe-n-soab bɩ? Ayo. A Zese ra tara komdibli a nii, la ra yaa a Davɩɩd n da yaa yao-zʋʋga. (1 Sãmwɛll 16:10, 11; 17:12) A Zese biig a ye n ki n pa paam kamb ye. Yaa bi-kãng yʋʋrã sõdgr sẽn da pa tar yõodã yĩng n kɩt t’a Ɛsdras pa sõd-a n naagã.

3:17—Bõe yĩng tɩ Luk 3:27 yetẽ t’a Zekonia biig a Sealtɩɛll yaa a Neeri biiga? A Zekonia ra yaa a Sealtiɛll ba. La wõnda a Neeri rɩka a bi-pugl n kõ a Sealtiɛll t’a maan a paga. A Luk gomda a Neeri bi-puglã sɩd yell n yetẽ tɩ yaa a Neeri biiga, wala a sẽn yeel t’a Zozɛf yaa a Maari baaba biigã.—Luk 3:23.

3:17-19—Yaa bõe rogem n be a Zorobabɛll, a Pedaya la a Sealtiɛll sʋka? A Zorobabɛll ra yaa a Pedaya biribla, t’a Pedaya ra yaa a Sealtiɛll ba-biiga. La wakat ninga, Biiblã boonda a Zorobabɛll t’a Sealtiɛll biiga. (Matɩe 1:12; Luk 3:27) Tõe t’a Pedaya kiime n bas a Zorobabɛll t’a Sealtiɛll yõd n wub-a. Bɩ tõe t’a Sealtiɛll kiime n pa paam biiga, t’a Pedaya kẽ kãadem ne a Sealtiɛll pʋg-kõorã n dog a Zorobabɛll pipi.—Tõodo 25:5-10.

5:1, 2—A Zozɛf sẽn paam kãsengã rat n yeelame tɩ bõe? Ra rat n yeelame t’a Zozɛf paama rogem-pʋɩɩrã zĩis a yiibu. (Tõodo 21:17) A lebga buud a yiib ba, sẽn dat n yeel t’a Efrayim la a Manase buudã ba. Israɛll komdibli a taabã yẽ yɩɩ buud a yen-yen ba rãmba.

Zãmsg tõnd yĩnga:

1:1–9:44. Israɛll buudã neb sẽn sɩd zĩndã yaab rãmb rot b sẽn sõdgã wilgdame tɩ b sẽn da sigl yɛl nins fãa sẽn tɩ loe ne baleng hakɩkã pa tik soalem zug ye, la yaa bũmb sẽn sɩd zĩnd zugu.

4:9, 10. A Zeova kelga a Zabɛt sẽn pʋʋs-a n kos t’a kõ-a zĩ-yaleng laafɩ pʋgẽ sẽn na yɩl tɩ wẽn-zoɛtb wʋsg wa paas be wã. Tõnd me segd n pʋʋsa ne d sũyã fãa n kos tɩ Wẽnnaam balemdbã sõor fɩɩge, la d kẽes d mens ne yẽesem karen-biisã maaneg tʋʋmd pʋgẽ.

5:10, 18-22. Rĩm a Sayull naamã wakate, buud nins sẽn da be Zʋrdẽ kʋɩlgã yaangã tõogã Hagaar buudã neba, baa ne b sõorã sẽn da yaa wʋsg n yɩɩd bãmb naoor a 2 wã. Yaa b gãndaadã sẽn teeg a Zeova la b bõos a sõngrã yĩng n kɩt tɩ b tõoge. Bɩ tõnd me teeg a Zeova zãng-zãnga, d sẽn zabd tẽeb zabr ne bɛɛb sõor sẽn yɩɩd tõnd la sẽn kõt rabeemã.—Efɛɛz rãmba 6:10-17.

9:26, 27. Levi neb nins sẽn da gũud wẽn-doogã zak noorã tʋʋmd ra yaa kãsenga. B ra tara wẽn-doogã zĩ-sõng kʋɩlen-biisi. B ra pakda rig-noyã daar fãa n pa yĩmdẽ ye. B bobla tõnd me zɩɩb ning sẽn yaa bao nebã  moonegã zĩisẽ, la d sõng-b tɩ b wa tõog n balem a Zeova wã. Bɩ tõnd me yɩ neb b sẽn tõe n teeg la b kɩs sɩd ne wa Levi neb nins sẽn da gũud wẽn-doogã zak noyã.

A DAVƖƖD RƖTA NAAM

(1 Kibaya 10:1–29:30)

Kibarã sɩngda ne rĩm a Sayull la a komdibli a tãabã sẽn ki b sẽn wa n zabd ne Filisti nebã Gilboa tãngã zugã. A Zese biig a Davɩɩd lebga Zida buudã rĩmã. Israɛll buudã fãa rap kẽnga Hebrõ n tɩ kɩt t’a lebg Israɛll tẽnga fãa rĩma. (1 Kibaya 11:1-3) Rẽ poor bilfu, a reega Zerizalɛm. Kaoosg zugẽ, Israɛll nebã wa n talla kãabg koglgã n kẽng Zerizalɛm, “ne sũ-noog kelemse la bard ne tãntãad peebgo la kɛm ne koal la pends wẽebo.”—1 Kibaya 15:28.

A Davɩɩd wilgame t’a rat n mee roog n kõ sɩd Wẽnnaamã. La yaa a Salomo la a Zeova kõ zu-no-kãngã, n yaool n maan kaool ne a Davɩɩd rĩung yĩnga. A Davɩɩd sẽn da wa n zabd ne Israɛll bɛɛbã, a Zeova kɩtame t’a tõog b fãa. B sõdã Israɛll nin-buiidã tɩ yaool n da pa segda, tɩ rẽ kɩt tɩ neb 70000 ki. A Davɩɩd sẽn paam tɩ malɛk wilg-a t’a me tẽn-kugr a Zeova yĩngã, a raa zĩig ne Zebus rao a Ornan. A Davɩɩd “segla teed wʋsg” sẽn na yɩl tɩ b wa me roog sẽn yaa “kãseng la sẽn yaa sõama wʋsg” a Zeova yĩng zĩ-kãngã. (1 Kibaya 22:5) Pipi Kibay sebrã wilgda a Davɩɩd sẽn sigl Levi nebã tʋʋmd to-to wã n fasemdẽ, n yɩɩd Gʋlsg Sõamyã zĩis a taabã. Rĩmã la nin-buiidã kõo kũun wʋsg wẽn-doogã yĩnga. A Davɩɩd rɩɩ naam yʋʋm 40, “n paam arzɛk ne waoogr n yaool n ki. La a biig a Salomo n deeg naamã.”—1 Kibaya 29:28.

Sogsg sẽn tik verse rãmb zut n paam leokre:

11:11—Bõe yĩng tɩ neb nins b sẽn kʋ ne kãndã sõor yaa 300 verse kãngã pʋgẽ tɩ 2 Sãmwɛll 23:8 wã pʋgẽ b yet tɩ yaa 800? Yaa a Zasobeam bɩ a Zosɛɛb-Basebɛt n da yaa a Davɩɩd gãndaadã nanambs a tãabã pipi soaba. Gãndaad a yiib a taabã ra yaa a Eleyazaar la a Sama. (2 Sãmwɛll 23:8-11) Sõorã sẽn pa a yembr kibay a yiibã pʋgẽ wã, tõe tɩ yaa zab a yiib a Zasobeam sẽn maan yell la b gomda.

11:20, 21—A Davɩɩd gãndaad a tãabã ne a Abisayi sʋka, ãnd gãndaalem n da yɩɩde? A Abisayi ra pa be a Davɩɩd gãndaad a tãab nins sẽn yɩɩd-bã sʋk ye. Baasg zãnga, wa b sẽn wilg 2 Sãmwɛll 23:18, 19 pʋgẽ wã, yẽ n da be gãndaad 30 wã taoore, la a yʋʋrã da yiime n yɩɩd neb pis-tã wã. A Abisayi yʋʋrã da yii wa gãndaad a tãabã, bala a maana gãndaalem tʋʋmd sẽn yaa kãseng sẽn wõnd a Zosɛɛb-Basebɛt sẽn maanã.

12:9—B sẽn yeel tɩ Gaad gãndaadã nensã ra yaa wa ‘gɩgma nensã’ võor yaa bõe? Gãndaad kãensã ra bee ne a Davɩɩd weoogã pʋgẽ. B zoobdã ra yiime n lebg wogdo. B zoob-wogdã yĩng kɩtame tɩ b ra wõnd nin-toos wa gɩgma.

13:5—“Ezipt Sikorã” yaa bõe? Neb kẽer tagsame tɩ yaa Nill kʋɩlgã naoor a yembre. La neb wʋsg me tagsdame tɩ yaa “Ezipt longã ko-sore.” Ko-sor kãng yaa bok sẽn yaa woko, n yaa Kãabg tẽnga goabg la a nen-taoor sʋk toadga.—Sõdbo 34:2, 5, NW; Sɩngre 15:18.

16:30—‘Rig a Zeova taoorã’ rat n yeelame tɩ bõe? Verse kãngã pʋgẽ, ‘rigã’ yaa bilgr sẽn dat n yeel tɩ d zoe a Zeova, la d waoog-a ne waoogr sẽn yaa kãsenga.

 16:1, 37-40; 21:29, 30; 22:19—Yaa segl-bʋg la b ra maand balengã yĩng Israɛlle, b sẽn tall kãabg koglã n kẽng Zerizalɛmã tɛk n tãag wẽn-doogã meebo? A Davɩɩd sẽn tall kãabg koglgã n kẽng Zerizalɛm n tɩ ning fu-roog ning a sẽn tilga pʋgẽ wã, rẽ tɩ koglgã sẽn da pa le be sɛk roogã pʋgẽ wã yaa yʋʋm wʋsgo. B sẽn tall koglgã n wa Zerizalɛmã poore, a kell n paa fu-ro-kãng pʋgẽ. Sɛk roogã ra bee Gabaõ, maan-kʋʋdb kãsem a Zadok ne a saam-biisã sẽn da be zĩig ning n kʋʋd maandã wa Tõogã sẽn da kõ noorã. Kell n yɩɩ woto hal tɩ Zerizalɛm wẽn-doogã wa me n sa. Wẽn-doogã sẽn wa n me n sa wã, b talla sɛk roogã Gabaõ n kẽng Zerizalɛm, la b ninga kãabg Koglã wẽn-doogã Zĩ-sõng sẽn yɩɩdã pʋgẽ.—1 Rĩm dãmba 8:4, 6.

Zãmsg tõnd yĩnga:

13:11. Tõnd sã n wa mik tɩ d modgrã yaa zaalem, d pa segd n yik d sũy la d ning a Zeova taal ye, d segd n bao n bãngã bũmb ning sẽn kɩt tɩ yaa woto wã. Sãmbg sẽn ka be, segd n yaa woto la a Davɩɩd maan-yã. A rɩka yam ne a kongrã, la rẽ poore a tõog n talla kãabg koglgã n kẽng Zerizalɛm, a sẽn tũ a rɩkrã manesem wa sẽn segdã yĩnga. *

14:10, 13-16; 22:17-19. D segda wakat fãa n deng n pʋʋs a Zeova n kos a sor-wilgr n yaool n maan tʋʋmd buud fãa sẽn tõe n mad d tẽebã.

16:23-29. Yaa a Zeova balengã n segd n pak tõnd n yɩɩd d vɩɩmã pʋgẽ.

18:3. A Zeova pidsda a kãabsã. Ne a Davɩɩd maasem, wa a sẽn da kãabã, a kɩtame t’a Abrahaam yagensã soog Kanaã soolmã, “sẽn sɩng ne Ezipt kʋɩlgã hal n tɩ ta Efrat kʋɩl-kãsengã.”—Sɩngre 15:18; 1 Kibaya 13:5.

21:13-15. A Zeova yeela malɛkã t’a kɩt tɩ bã-loangdgã yalse, bala a nin-buiidã sẽn da namsdã nimbãaneg yõk-a lame. A Zeova sɩd yaa nimbãan-zoeta. *

22:5, 9; 29:3-5, 14-16. Baa sẽn pa yẽ n da segd n me a Zeova wẽn-doogã, a Davɩɩd maana kũun wʋsg rẽ yĩnga. Bõe yĩnga? Bala a ra miime tɩ yaa a Zeova sõmblmã n kɩt t’a paam bũmb nins fãa a sẽn da tarã. Mi-beoog a woto buud segd n tusa tõnd me tɩ d yɩ kõtba.

24:7-18. A Zeova malɛkã sẽn wa n na n puk a Zakari sẽn yaa Lisd a Zã ba wã taoor n deng n togs-a a Zã rogmã, tɩ b ra ket n tũuda seglg ning a Davɩɩd sẽn dɩk n kɩt tɩ b pʋɩ maan-kʋʋdbã zĩis 24. A Zakari sẽn da yit a Abia buudã neb sʋkã n da maand maan-kʋʋr tʋʋmdã wakat kãnga, bala ra gilg n ta-a lame. (Luk 1:5, 8, 9) Sɩd balengã tɩ loee ne neb sẽn sɩd zĩndi, la pa soalem neb ye. Rũndã-rũndã wã me tõnd sã n sõngd ‘tʋm-tʋmd sẽn tũud sɩd la sẽn tar yamã’ wakat fãa a Zeova balengã tʋʋmd sẽn sigl sõma wã pʋgẽ, d paamda bark wʋsgo.—Matɩe 24:45.

D balem a Zeova ne d “yam fãa”

Pipi Kibay sebrã pa gomd Israɛll neba yaab rãmb rotã yell bal ye. A leb n gomda a Davɩɩd sẽn tall kãabg koglgã n kẽng Zerizalɛmã yelle, a sẽn tõog a bɛɛbã ne tõogr kãsemsã, a sẽn segl wẽn-doogã meebã, la a sẽn zĩnig Levi zak fãa a maan-kʋʋr tʋʋmdã pʋgẽ wã yelle. A Ɛsdras sẽn gʋls bũmb ning fãa Pipi Kibay sebrã pʋgẽ wã segd n yaa bũmb sẽn naf Israɛll nebã, n sõng-b tɩ b leb n tall yẽesem a Zeova balengã yĩng wẽn-doogẽ wã.

Ad a Davɩɩd sɩd kõo mak-sõng a sẽn lʋɩɩs a Zeova balengã taoor a vɩɩmã pʋgẽ wã! Wall t’a Davɩɩd bao zu-noog tʋʋm-kãsems a meng yĩngã, a baoome n maan Wẽnnaam daabã. Bɩ d tũ a sẽn sagl tɩ d balem a Zeova ‘ne d sũur fãa la ne d yam fãa’ wã.—1 Kibaya 28:9.

[Tẽngr not rãmbã]

[Geelg taablo/Foto rãmba, se-neng 8-11]

4026 A Ãdem Sẽn sɩng ne a Ãdem n tɩ ta a

Nowe (yʋʋm 1056)

yʋʋm 130 ⇩

 

A Sɛt

 

105 ⇩

 

A Enos

 

90 ⇩

A Kenã

 

70 ⇩

A Mahalalɛll

 

65 ⇩

A Zarɛd

 

162 ⇩

A Enok

 

65 ⇩

A Metusela

 

187 ⇩

A Lamɛk

 

182 ⇩

2970 A NOWE 2970 A NOWE rogem

Sẽn sɩng ne a Nowe n tɩ ta

yʋʋm 502 ⇩ a Abrahaam (yʋʋm 952)

 

A Sɛm

KO-KÃSENGÃ Yʋʋm 2370

100 ⇩

 

A Arpaksaad

 

35 ⇩

 

A Sela

 

A Ebɛɛr

 

34 ⇩

 

A Pelɛg

 

30 ⇩

 

A Reyu

32 ⇩

 

A Serig

 

30 ⇩

 

A Nahor

 

29 ⇩

 

A Teera

 

130 ⇩

2018 A Abraham A ABRAHAAM rogem yʋʋmd 2018

Sẽn sɩng ne a Abrahaam n tɩ

yʋʋm 100 ta a Davɩɩd: zãmaan 14 (yʋʋm 911)

 

A Izaak

 

60 ⇩

 

A Zakoob

 

c.88 ⇩

 

A Zida

 

⇩

A Perɛz

 

⇩

A Hɛzrõ

 

⇩

A Ram

 

⇩

A Aminadaab

 

⇩

A Nasõn

 

⇩

 

A Salmo

 

⇩

 

A Boaaz

 

⇩

 

A Obɛd

 

⇩

 

A Zese

 

⇩

 

1107 A DAVID rogem