A Zeova sõgen dãmbã tara sũ-noogo
A Zeova sõgen dãmbã tara sũ-noogo
“Sũ-noog rãmb la neb nins sẽn mi tɩ b tara tẽeb ratmã.”—MATƖE 5:3,
1. Sũ-noog hakɩkã yaa bõe, la bõe la a wilgda?
A ZEOVA nin-buiidã geta b sũ-noogã wa bũmb sẽn tar yõod wʋsgo. Yɩɩl gʋlsd a Davɩɩd yeelame tɩ “neb nins Wẽnnaam sẽn ya a Zeova wã tara sũ-noogo!” (Yɩɩl Sõamyã 144:15, NW ) Tall sũ-noog yaa f vɩɩmã sẽn na n noom-fo. La yaa a Zeova barkã n kõt-d sũ-noog n yɩɩda. (Yelbũna 10:22) Sũ-no-kãngã yaa d sẽn tar zems-n-taar ne d saasẽ Ba wã, la d sẽn mi tɩ d maanda a raabã yĩnga. (Yɩɩl Sõamyã 112:1; 119:1, 2) A Zezi wilga bʋʋm a wae sẽn kɩt tɩ d tõe n tall sũ-noogo. Sõs-kãngã la sẽn pʋgd-a wã pʋgẽ, d sã n vaees bõn-kãensã sẽn kõt sũ-noogã, na n sõnga tõnd tɩ d bãng d sẽn tõe n tall sũ-noog to-to, d sã n maand “sũ-noog Wẽnnaam” a Zeova raabã ne kɩs-sɩda.—1 Tɩmote 1:11, NW.
D bãng tɩ d tara tẽeb ratem
2. Zĩ-bʋg la a Zezi zĩnd n gom sũ-noogã yelle, la a sɩnga a goamã wãn to?
2 Yʋʋmd 31, a Zezi kõo zãmsg yʋʋr sẽn yi wʋsgo. B boond-a lame tɩ Tãng zug Zãmsgã, bala yɩɩ tãng sẽn yɛgd Galile Mogrã zugu. A Matɩe sebrã yetame: “A Zezi sẽn yã neb kʋʋngã, b rʋʋ tãng zug n zĩndi, la b karen-biisa kolga bãmba. Dẽ, bãmb yaaga b noor n zãms bãmb n yeele: ‘Sũ-noog rãmb la neb nins sẽn mi tɩ b tara tẽeb ratmã, bala saasẽ rĩungã yaa bãmb rẽnda.’ ” B sã n lebg a Zezi goamã vẽeneg-vẽenega yaa woto: “Sũ-noog rãmb la neb nins sẽn be tẽeb naong pʋgẽ wã.”—Matɩe 5:1-3, Kingdom Interlinear.
3. Wãn to la sik-m-mengã paasd tõnd sũ-noogã?
3 A Zezi tãng zug zãmsgẽ wã, a wilgame tɩ ned tara sũ-noog wʋsg n yɩɩda, a sã n miẽ t’a tara tẽeb ratem. Kiris-neb nins sẽn tar sik-m-meng n sɩd mi tɩ b yaa yel-wẽn-maandbã kota a Zeova t’a kõ-b sugri, Kirist maoongã sẽn yaa rondã maasem yĩnga. (1 Zã 1:9) B sɩd paamda sũur pʋgẽ bãan la sũ-noog hakɩka. “Bark [bɩ sũ-noog] bee ne ned ninga . . . sẽn paam a yel-wẽna yiisgu, la sẽn paam sugr a kongra yĩnga.”—Yɩɩl Sõamyã 32:1; 119:165.
4. a) Wãn to la d tõe n wilg tɩ d miime tɩ tõnd mensã la neb a taabã tara tẽeb ratem? b) Yaa bõe n paasd tõnd sũ-noogã, d sã n miẽ tɩ d tara tẽeb ratem?
4 Tõnd sẽn mi tɩ d tara tẽeb ratmã na n kɩtame tɩ d karemd Biiblã daar fãa, tɩ d rɩt tẽebã rɩɩb ‘tʋm-tʋmd sẽn tũud sɩd la sẽn tar yamã’ sẽn kõt ‘wakat sẽn zems sasa’ wã, la d kẽnd kiris-neb tigissã wakat fãa. (Matɩe 24:45; Yɩɩl Sõamyã 1:1, 2; 119:111; Hebre dãmba 10:25) D sã n nong neb a taabã, d na n bãngame tɩ b bee tẽeb ratem pʋgẽ, tɩ rẽ na n kɩt tɩ d moon-b la d zãms-b Rĩungã koe-noog ne yẽesem. (Mark 13:10; Rom dãmba 1:14-16) D sã n togsd neb a taabã sɩd nins sẽn be Biiblã pʋgẽ wã, kõt-d-la sũ-noogo. (Tʋʋma 20:20, 35) Tõnd sũ-noogã paasdame, d sã n tagsd bark kãsems nins Rĩungã sẽn na n wa ne wã zutu. Sã n yaa ne ‘bãg-bilã,’ sẽn yaa kiris-neb nins sẽn paam vʋʋsem sõng zaeebã, bãmb saagdame n na n vɩɩmd saasẽ Kirist goosneema wã pʋgẽ n pa kiidẽ ye. (Luk 12:32; 1 Korẽnt dãmba 15:50, 54) Sã n yaa ne ‘piis a taabã,’ yaa vɩɩm sẽn pa sat tẽng zug arzãnã pʋgẽ, Rĩungã naam wakate.—Zã 10:16; Yɩɩl Sõamyã 37:11; Matɩe 25:34, 46.
Sũ-sãang rãmbã sẽn tõe n paam sũ-noog to-to
5. a) Gomd ning sẽn yaa “sũ-sãoong rãmbã” võor yaa bõe? b) Wãn to la nin-kãensã sũur sẽn sãamdã paamd belsgo?
5 Goam nins a Zezi sẽn tũnug ne n gom sũ-noog ning sẽn pʋgdã yellã wõnda b kɩɩsda taaba. A yeelame: “Sũ-noog rãmb la sũ-sãoong rãmba, tɩ bõe, b na n paama belsgo.” (Matɩe 5:4, NW ) Wãn to la ned sũur tõe n sãam t’a leb n tar sũ-noogo? Sẽn na yɩl n wʋm a Zezi sẽn togs bũmb ningã võore, rẽnda d bãng sũ-sãang ning yell a sẽn gomd ka wã. Karen-biig a Zak wilgdame tɩ tõnd sẽn yaa yel-wẽn-maandbã, segd n kɩtame tɩ d sũur sãame. A gʋlsame: “Yel-wẽna rãmba, bɩ y nudg y nusi. La yam a yiib rãmba, bɩ y maneg y sũyã tɩ yɩ sõama. Bɩ y ges yãmb nimbãanegã la y yãb n wiisi. Bɩ y kɩt tɩ yãmb laad lebg wiisgu, la tɩ y sũ-noog lebg sũ-sãoongo. Sik-y yãmb mens Zusoaba taoore, la bãmb na zẽk yãmba.” (Zak 4:8-10) Neb nins sũy sẽn sɩd sãame, b sẽn yaa yel-wẽn-maandbã yĩngã paamda belsgo, b sã n bãng tɩ b yel-wẽnã tõe n paama sugri, b sã n tall tẽeb ne Kirist maoongã sẽn yaa rondã, la b sã n wilg tɩ b sɩd teka yam n kos sugri, n maan a Zeova raabã. (Zã 3:16; 2 Korẽnt dãmba 7:9, 10) Woto, b tõe n paama zood ne a Zeova, la b paam saagr sẽn yaa wa vɩɩmd wakat sẽn kõn sa, n maan a raabã la b pẽg-a. Rẽ kõt-b-la sũ-noog wʋsgo.—Rom dãmba 4:7, 8.
6. Bõe yĩng tɩ neb kẽer sũy sãam, la wãn to la b paamd belsgo?
6 A Zezi goamã paka neb nins me sũy sẽn sãamde, bõn-wẽns nins sẽn maand dũniyã zugã yĩngã. A Zezi mengã wilgame tɩ Ezai 61:1, 2 bãngr-gomdã pidsa yẽ zugu. Be b yeelame: “Zusoab a Wẽnnaam sɩɩga bee ne maam. Tɩ bõe, bãmb yãka maam n tʋm maam tɩ m togs naong rãmba koe-noogo, . . . la m bels sũ-sãoong rãmba fãa.” B bobla kiris-neb nins sẽn zae ne vʋʋsem sõng n ket tẽng zugã me tʋʋm-kãngã, tɩ b tũud-n-taasã sẽn yaa ‘piis a taabã’ sõngd-bã. Makr wɛɛngẽ, b fãa ningda “neb nins fãa sẽn wõosd n yãbd bõn-wẽns nins sẽn maand tẽnga pʋgẽ wã [Zerizalɛm sẽn yaa sɩdã kɩɩsd sẽn makd kiris-neb ne yʋʋr siglsã] yĩnga rĩy bãnde.” (Ezekɩɛll 9:4) ‘Wẽnnaam soolmã koe-noog’ kõta nin-kãensã sũy sẽn sãamã belsgo. (Matɩe 24:14) B sẽn bãng t’a Zeova dũni paalgã sẽn yaa tɩrgã na n ledga a Sʋɩtãan dũni wẽngã ka la bilfã, b sũy yaa noogo.
Sũ-noog rãmb la sũ-maasem dãmbã
7. Bõe la ‘sũ-maasem’ pa rat n yeele?
7 A Zezi kẽnga taoor ne a Tãng zug Zãmsgã n yeele: “Sũ-noog rãmb la sũ-maasem dãmbã, tɩ bõe, b na n sooga dũniyã.” (Matɩe 5:5, NW ) Wakat ninga neba tagsdame tɩ sũ-maasem soab yaa ned sẽn pa tar pãnga. La yaool n pa woto ye. Biibl mit a yembr wilga gom-biig ning b sẽn lebg tɩ ‘sũ-maasmã’ võor woto: “Ned sẽn yaa sũ-maasem soab yaa ned sẽn tõe a menga. A pa ned sẽn yaa nin-sõngo, n tar nonglem, la a yaa nin-sĩndri, a sẽn ka pãng yĩng ye. Yaa ned sẽn tar pãng la a yõkd a menga.” A Zezi yeela woto a mengã wɛɛngẽ: “Mam yaa sũ-mar [bɩ sũ-maasem] soaba la m yaa nin-nana.” (Matɩe 11:29) Ne rẽ fãa, a Zezi ra teenda tɩrlmã noy ne raoodo.—Matɩe 21:12, 13; 23:13-33.
8. Sũ-maasem tɩ loee ne bõe, la bõe yĩng t’a tar yõod tõnd manesmã ne d taabã pʋgẽ?
8 Rẽnd sũ-maasem tɩ loee wʋsg ne yõk-m-menga. Sɩda, tʋm-tʋmd a Poll sẽn wa n gomd ‘vʋʋsem sõngã biis’ yellã, a rɩka sũ-bʋgsmã la yõk-m-mengã n naag taaba. (Galat dãmba 5:22, 23) Yaa ne vʋʋsem sõngã sõngr la ned paamd sũ-maasem. Sũ-maasmã yaa zʋg sẽn kɩtd tɩ kiris-ned tar laafɩ ne tigingã neb la ne neb nins sẽn pa be tigingã pʋgẽ wã me. A Poll gʋlsame: “Bɩ y paas nimbãan-zoeer wʋsgo la neerlem ne sik-m-menga la sũ-bʋgsem ne sũ-mare. Bɩ y maan sũ-mar ne taaba la y kõ taab sugri, ned sã n tar yell ne a to, a wa [a Zeova] sẽn kõ yãmb sugrã, bɩ yãmb me kõ taab sugr woto.”—Kolos rãmba 3:12, 13.
9. a) Bõe yĩng tɩ d sũ-maasmã pa tek tõnd manesmã ne neb a taabã? b) Wãn to la sũ-maasem dãmbã ‘na n soog dũniyã’?
9 La pa tõnd manesmã ne d taabã pʋgẽ bal la d segd n tall sũ-maasem ye. D sã n sakd a Zeova naam sẽn ka to wã ne yamleoogo, d wilgdame tɩ d tara sũ-maasem. Yaa a Zezi n kõ mak-sõng sẽn tɩ yɩɩd rẽ wɛɛngẽ. A sẽn da wa n be tẽng zugã, a talla sũ-maasem, la a saka a Ba wã raab zãnga. (Zã 5:19, 30) A Zezi la Wẽnnaam yãk pipi t’a soog tẽngã, bala yẽ n da segd n yɩ tẽngã Naaba. (Yɩɩl Sõamyã 2:6-8; Daniɛll 7:13, 14) Neb 144 000 la b yãk “ãdem-biisã sʋk” tɩ b yaa “pʋɩt-n-taas ne Kirist,” n na n naag-a n ‘dɩ naam dũniyã zugu.’ (Rom dãmba 8:17; Wilgri 5:9, 10; 14:1, 3, 4; Daniɛll 7:27) Kirist ne a na-rɩt-n-taasã na n dɩɩ naam rap la pagb milyõ rãmb sẽn na n yɩ sakdb wa piis zutu, tɩ yɩɩn-kãngã sẽn yaa bãngr-gomdã na n paam pidsg sẽn be yamleoog b zutu: “La sũ-maasem dãmba na n sooga dũniyã n maan sũ-noog laafɩ wʋsg yĩnga.”—Yɩɩl Sõamyã 37:11; Matɩe 25:33, 34, 46.
Sũ-noog rãmb la neb nins tɩrlem kom sẽn tarã
10. Wãn to la neb nins ‘tɩrlmã kom la a kõ-yũud sẽn tarã’ tõe n paam tɩgsgo?
10 A Zezi goma sũ-noog ning sẽn pʋgdã yelle, a sẽn da wa n be Galile tãngã zugã. A yeelame tɩ “[sũ-noog rãmb la, NW ] tɩrlem kom la ko-yũud sẽn tar-b rãmbã . . . , tɩ bõe, bãmb na tɩge.” (Matɩe 5:6) Sã n yaa ne kiris-nebã, yaa a Zeova n kõt tɩrlmã noyã. Woto yĩnga, neb nins tɩrlmã kom la a ko-yũud sẽn tarã, yaa Wẽnnaam sor-wilgrã kom la a ko-yũud n tar-ba. Nin-kãensã sɩd miime tɩ b tara yel-wẽnã, la b pa zems zãnga, n dat a Zeova lohorem ne b sũy fãa. Ad b sũy sɩd yaa noog wʋsgo, b sã n zãms Wẽnnaam Gomdã n bãng tɩ b sã n tik Kirist maoongã sẽn yaa rondã zug n tek yam n kos b yel-wẽnã sugri, b na n yɩɩ tɩrs Wẽnnaam nifẽ!—Tʋʋma 2:38; 10:43; 13:38, 39; Rom dãmba 5:19.
11, 12. a) Wãn to la kiris-neb nins sẽn paam vʋʋsem sõng zaeebã paamd zemsg sẽn wat ne vɩɩm? b) Wãn to la kiris-neb nins sẽn paam vʋʋsem sõng zaeebã tũud-n-taas tɩrlem ko-yũud paamd tɩgsgo?
11 A Zezi yeelame tɩ nin-kãensã na n paama sũ-noogo, bala b na “tɩge.” (Matɩe 5:6) B yetame tɩ kiris-neb nins sẽn paam vʋʋsem sõng zaeeb n na n “dɩ naam” ne Kirist saasẽ wã paama “zemsg sẽn wat ne vɩɩm.” (Rom dãmba 5:1, 9, 16-18) A Zeova get-b-la wa a kamb tẽebã wɛɛngẽ. B lebgda pʋɩt-n-taas ne Kirist, n na n wa yɩ rĩm dãmb la maan-kʋʋdb a saasẽ Rĩungã sẽn yaa goosneemã pʋgẽ.—Zã 3:3; 1 Pɩɛɛr 2:9.
12 B nan pa yet tɩ sẽn paam-b vʋʋsem sõng zaeebã tũud-n-taas yaa tɩrs n segd ne vɩɩmã ye. La a Zeova get-b-la wa tɩrse, tẽeb ning b sẽn tar ne Kirist zɩɩmã sẽn daagã yĩnga. (Zak 2:22-25; Wilgri 7:9, 10) B get-b-la wa nin-tɩrs sẽn ya a Zeova zo-rãmb sẽn na n paam fãagr ‘to-kãsengã’ wakate. (Wilgri 7:14) Tɩrlmã ko-yũud sẽn tar-b rãmbã ko-yũud na n paama tɩgsg ‘yĩngr paalgã’ naam wakate, b sã n wa lebg tẽn-paalgã tɩrlem sẽn na n zĩndẽ wã neba.—2 Pɩɛɛr 3:13; Yɩɩl Sõamyã 37:29.
Sũ-noog rãmb la nimbãan-zoɛtbã
13, 14. Wãn to la d segd n wilg tɩ d yaa nimbãan-zoɛtba, la wãn to la rẽ nafd tõndo?
13 A Zezi kẽnga taoor a Tãng zug Zãmsgã pʋgẽ n yeele: “[Sũ-noog rãmb la, NW ] nimbãan-zoɛtba . . . , tɩ bõe, bãmb na paam nimbãan-zoeere.” (Matɩe 5:7) Sã n yaa ne bʋ-kaoorã wɛɛngẽ, nimbãan-zoeer yaa bʋ-kaood sẽn na n bʋk sɩbgr n pa sɩbg wẽng maandã tɩ zems ne laloa wã sẽn yãk sɩbgr ningã fãa ye. La b sẽn tũnug ne gom-kãngã to-to Biiblã pipi buud-gomdẽ wã, a tɩ loee ne f to kʋmbo, bɩ sõmblem tallg ne nimbãan dãmbã tɩ kõt-b yolsgo. Rẽnd neb nins sẽn tar nimbãan-zoeerã wilgda rẽ ne b tʋʋma. Samari nin-sõngã kɩbar a Zezi sẽn togsã yaa mak-sõng ne ned sẽn ‘zoe a to nimbãanega.’—Luk 10:29-37.
14 Sẽn na yɩl n yɩ nimbãan-zoet tɩ kõ-d sũ-noogo, rẽnda d tʋm nonglem tʋʋm n sõng sẽn dat-b sõngrã. (Galat dãmba 6:10) A Zezi zoee neb nins a sẽn yã wã nimbãanega. “B nimbãanegã yõka [yẽnda]; tɩ bõe, bãmb wẽnda wa piis sẽn ka tar pe-kɩɩm ye, la [a] sɩngame n zãms bãmb bũmb wʋsgo.” (Mark 6:34) A Zezi yãame tɩ ãdem-biisã tẽeb ratem n yaa kãseng n yɩɩd ratem a taabã fãa. Tõnd me tõe n wilgame tɩ d tara nimbãan-zoeere, n togs nebã bũmb ning b sẽn dat n yɩɩdã sẽn yaa ‘Wẽnnaam soolem koe-noogã.’ (Matɩe 24:14) D leb n tõe n sõnga d kiris-nin-taas nins sẽn kʋʋlã, pʋg-kõapã la kɩɩbsã, la d “bels sũ-sãoong rãmbã.” (1 Tesalonik rãmba 5:14; Yelbũna 12:25; Zak 1:27) Rẽ pa na n kõ-d sũ-noog bal ye, la na n kɩtame me t’a Zeova zoe d nimbãanega.—Tʋʋma 20:35; Zak 2:13.
Pʋ-peelem la laafɩ rãmbã
15. Wãn to la d tõe n yɩ pʋ-peelem la laafɩ rãmba?
15 A Zezi wilga sũ-noog a yoob la a yopoe soabã woto: “Sũ-noog rãmb la pʋ-peelem dãmbã, tɩ bõe, bãmb na n yãa Wẽnnaam. Sũ-noog rãmb la laafɩ rãmbã, tɩ bõe, b na n boola bãmb tɩ ‘Wẽnnaam kamba.’ ” (Matɩe 5:8, 9, NW ) Pʋ-peelem soab yaa ned sẽn yaa yɩlemd a manesmã pʋgẽ, la a leb n yaa ned sũur sẽn pa rẽgem tẽebã wɛɛngẽ, la sẽn sakd a Zeova zãng-zãnga. (1 Kɩbaya 28:9; Yɩɩl Sõamyã 86:11) Neb nins sẽn yaa laafɩ rãmbã maanda b sẽn tõe tɛk n vɩ laafɩ pʋgẽ ne b kiris-nin-taasã, la ne b yagsã me. (Rom dãmba 12:17-21) B ‘baooda laafɩ la b tũud-a.’—1 Pɩɛɛr 3:11.
16, 17. a) Bõe yĩng tɩ b boond sẽn paam-b vʋʋsem sõng zaeebã tɩ “Wẽnnaam kamba,” la yaa wãn to la b ‘yãt Wẽnnaam’? b) Wãn to la ‘piis a taabã’ ‘yãt Wẽnnaam’? d) Wãn to, la wakat bʋg la ‘piis a taabã’ na n lebg ‘Wẽnnaam kamb’ zãng-zãnga?
16 B kãaba neb nins sẽn yaa laafɩ rãmb la pʋ-peelem dãmbã tɩ b “na n boola bãmb tɩ Wẽnnaam kamba,” la b paas tɩ b “na n yãa Wẽnnaam.” Baa b sẽn nan ket tẽng zugã sasa, kiris-neb nins sẽn paam vʋʋsem sõngã zaeebã paama rogem paalg ne vʋʋsem sõngã maasem, t’a Zeova get-b wa a ‘kamba.’ (Rom dãmba 8:14-17) B sã n wa vʋʋg n na n zĩnd ne Kirist saasẽ, b na n bee a Zeova taoor n maand a raabã, n sɩd ne-a.—1 Zã 3:1, 2; Wilgri 4:9-11.
17 ‘Piis a taabã’ sẽn yaa laafɩ rãmbã maanda a Zeova raabã Pekɩɩm Kãseng a Zezi Kirist sẽn lebg b “Ba sẽn ka kiida” sor-wilgr pʋgẽ. (Zã 10:14, 16; Ezai 9:5) A Zeova na n gesa neb nins sẽn na n yɩ burkĩmb yaoolem makrã sẽn na n zĩnd Kirist Yʋʋm Tusr Naamã poorã wa a tẽng zug kamba, tɩ b paam ‘Wẽnnaam kamba lohormã ne b ziirã.’ (Rom dãmba 8:21; Wilgri 20:7, 9) Nananda, b boonda a Zeova tɩ b Ba, bala b rɩka b vɩɩmã n kõ-a, n sak n deeg tɩ yaa yẽ la b vɩɩm Kõta. (Ezai 64:7) Wala a Zoob la a Moiiz sẽn zĩnd pĩnd wẽndẽ wã, b tõe n ‘yãa Wẽnnaam’ ne tẽeb nini. (Zoob 42:5; Hebre dãmba 11:27) Ne b ‘pʋ-tẽerã nini,’ la ne bãngr hakɩk ning b sẽn tar Wẽnnaam wɛɛngẽ wã maasem, b yãta a Zeova zʋg-kãsemsã la b modgd n na n dɩk a togs-n-taar n maan a raabã.—Efɛɛz rãmba 1:18; Rom dãmba 1:19, 20; 3 Zã 11.
18. Sã n yaa ne pipi bʋʋm a yopoe sẽn kõt sũ-noogã, a Zezi sẽn wilgã, ãnd dãmb n paamd sũ-noog hakɩkã rũndã-rũndã?
18 D yãame tɩ neb nins sẽn mi tɩ b tara tẽeb ratmã, neb nins sũy sẽn sãamdã, sũ-maasem dãmbã, neb nins tɩrlem kom la a ko-yũud sẽn tarã, nimbãan-zoɛtbã, pʋ-peelem dãmbã la laafɩ rãmbã paamda sũ-noogo, b sẽn maand a Zeova raabã yĩnga. La wakat fãa, nin-kãensã segda kɩɩsgo, bɩ namsg meng b tẽebã yĩnga. Rẽ sãamda b sũ-noogã bɩ? Sok-kãngã na n paama leokr sõsg ning sẽn pʋgdã pʋgẽ.
Lebg-n-gese
• Sũ-no-bʋg la neb nins sẽn mi tɩ b tara tẽeb ratmã paamda?
• Wãn to la neb nins sũy sẽn sãamã paamd belsgo?
• Wãn to la d wilgd tɩ d tara sũ-maasem?
• Bõe yĩng tɩ d segd n tall nimbãan-zoeere, pʋ-peelem la d yɩ laafɩ soaba?
[Zãmsgã sogsgã]
[Foto, seb-neng 23]
“Sũ-noog rãmb la neb nins sẽn mi tɩ b tara tẽeb ratmã”
[Foto rãmba, seb-neng 23]
“Sũ-noog rãmb la tɩrlem kom la a ko-yũud sẽn tar-b rãmbã”
[Foto, seb-neng 23]
“Sũ-noog rãmb la nimbãan-zoɛtbã”