Yãmb yell sɩd paka Wẽnnaam

D SÃ N wa be yel-pakr taoore, sɩd zemsame tɩ d pʋʋs Wẽnnaam n kos a sõngre. Bala a yaa ‘kãseng n tar pãng wʋsgo. A bãngra ka tar tɛk ye.’ (Yɩɩl Sõamyã 147:5) Yaa yẽ n tõe n sõng tõnd n welg d yɛlã n yɩɩda. Rẽ toor sẽn kae, Biiblã yet-d lame tɩ d ‘pelg d pʋs’ yẽ taoore. (Yɩɩl Sõamyã 62:9) La sã n yaa woto, bõe yĩng masã tɩ neb wʋsg tagsdẽ tɩ Wẽnnaam pa reegd bãmb pʋʋsgo? Sɩd rat n yeelame tɩ b yell pa pak-a bɩ?

Sã n wõnd wa Wẽnnaam pa maand bũmb n sõngd-yã, wall tɩ y yɩ tao-tao n ning Wẽnnaam taalã, tẽeg-y yãmb sẽn da wa n yaa biigã wakate. Yãmb roagdbã sã n da pa kõ-y bũmb y sẽn dat zĩig pʋgẽ, y tagsdame tɩ yaa b sẽn pa nong yãmb yĩng bɩ? Kamb wʋsg maanda woto. La y wa n bãnga y bɩʋʋngã zugẽ tɩ nonglem wilgda ne manesem toor-toore, la tɩ f sã n sɩd nong biiga, pa a sẽn kos bũmb ning fãa la f segd n kõ-a ye.

Woto, a Zeova me sã n mi n pa reeg tõnd pʋʋsgã wa d sẽn tʋll to-to wã, pa rat n yeel tɩ d yell pa pak-a ye. Sɩda, Wẽnnaam geta tõnd fãa yell ne manesem buud toor-toor wʋsgo.

Yaa ne ‘yẽ maasem la tõnd tar vɩɩm’

Pipi, yaa ne Wẽnnaam maasem la ‘tõnd vɩya, n kẽnd la d beẽ.’ (Tʋʋma 17:28) Sãmbg sẽn ka be, a sẽn kõ-d vɩɩmã wilgdame t’a nong-d lame, la tɩ d yell pak-a lame.

Sẽn paase, a Zeova kõt-d-la bũmb nins sẽn yaa tɩlae ne-d sẽn na yɩl tɩ d vɩɩmdã. D karemda woto: “Yãmb kɩtame tɩ yamd bɩ yir dũms yĩnga, tɩ kooda me bɩt ninsaalba sõngr yĩnga, tɩ bãmb tõe n paam dɩɩb sẽn yit tẽnga pʋgẽ.” (Yɩɩl Sõamyã 104:14) Tõnd Naandã pa kõt-d bũmb nins sẽn yaa tɩlae ne-dã bal ye, a maanda sẽn yɩɩd rẽ. A maana neer n kõt-d “saag la sẽoog la bõn-bɩʋʋng tɩ rɩɩb sek [tõnd tɩ d] pid ne su-noogo.”—Tʋʋma 14:17.

La kẽer tõe n ket n sokda b mens tɩ ‘Wẽnnaam sã n sɩd nonga tõnd wʋsgo, bõe yĩng t’a bas tɩ d namsdẽ?’ Yãmb mii sok-kãngã leoor bɩ?

Yaa Wẽnnaam n wat ne tõnd zu-loeesã bɩ?

Ninsaalbã wʋsg namsg yaa bãmb mensã tʋʋm n wat ne. Wala makre, neb wʋsg miime tɩ b tʋʋm kẽer tõe n kẽes-b-la yell pʋgẽ. La ne rẽ fãa b yoodame, b yũuda rãam wʋsg la b rɩkd dorg bɩ tɩ-toos a taaba, b yũuda sɩgaare, b reemda reem sẽn tõe n tũ ne b yõore, b zoeta wʋsg ne b bõn-zombdsã, la b maand yɛl a taaba. Tʋʋm kãensã sẽn tõe n wa ne yel-beedã sã n wa kɩt tɩ ned namsdẽ, yaa ãnd yelle? Yaa Wẽnnaam bɩ yaa ned ninga sẽn pa tags la a tʋma yelle? Wẽnnaam Gomdã a sẽn vẽneg tɩ b gʋlsã yeelame: “Da belg-y yãmb mens ye; ned ka tõe n paoog Wẽnnaam ye. Ned sẽn bʋt bũmb ningã, yaa bõn-kãng la a na n wʋke.”—Galat dãmba 6:7.

Ãdem-biisã sẽn wẽnegd n maand b mensã toor sẽn ka be, b nong n maanda taab wẽng me. Wala tẽng sã n yik zabr ne tẽng a to, yaa vẽeneg tɩ b pa segd n ning Wẽnnaam taal namsg nins zabrã sẽn wa ne wã yĩng ye. Rẽ yĩnga bi-bɛɛg sã n pig ned t’a paam sãmpogr wall tũ ne a yõore, Wẽnnaam tara taal yellã pʋgẽ bɩ? Yaa vẽeneg tɩ ayo! Na-toaag sã n weoogd a nin-buiidã, n namsd-b wʋsg la a kʋʋd-ba, b tõe n ninga Wẽnnaam taal rẽ yĩng bɩ? Woto sɩd pa zems ye.—Koɛɛg Soaba 8:9.

La yaa wãn masã yẽ ne neb milyõ rãmbã sẽn vɩ talemd pʋgẽ n ka saagr bɩ n kiid koma? Yaa Wẽnnaam yell bɩ? Ayo. Tẽngã Wẽnnaam sẽn kõ tõndã pida ne rɩɩb sẽn sekd neba fãa. (Yɩɩl Sõamyã 10:2, 3; 145:16) Yaa nebã sẽn wẽgd taabã yĩng n kɩt tɩ komã la talemdã piuugã. La ãdem-biisã rat-m-yembr yĩng  kɩtame tɩ b pa tol n tõe n welg yel-kãngã ye.

Yellã yẽgr menga

Kʋʋlem sã n kɩt tɩ ned lʋɩ bãag bɩ a ki, taalã zaoa ãnd zugu? B sã n yeel-y tɩ baa yel-kãensã pʋgẽ Wẽnnaam pa tar taale, na n ling-y lame bɩ? Wẽnnaam pa naan ninsaal t’a wa kʋʋl n ki ye.

A Zeova sẽn da wa n ning a Ãdem ne a Hawa sẽn yɩ pipi ninsaalb a yiibã Edɛn zẽedẽ wã, a kõ-b-la vɩɩm sẽn-kõn-sa saagr tẽng zug arzãnẽ. La vẽenega, a ra ratame tɩ tẽngã wa pid ne neb sẽn na n tall naneb ne bũmb nins a sẽn kõ-bã. Rẽ n so t’a wilg-b bũmb b sẽn da segd n maan n tõog n vɩɩmd wakat sẽn-kõn-sa. A Ãdem ne a Hawa ra na n vɩɩmda arzãnã pʋgẽ, b sã n da kell n sak b Naandã sẽn nong-bã bala.—Sɩngre 2:17; 3:2, 3, 17-23.

Zu-bʋko, a Ãdem ne a Hawa kɩɩsame. A Hawa yãka yam n na n kelg a Sʋɩtãanã. A Sʋɩtãan yaga ziri n yeel-a tɩ Wẽnnaam mongd-a-la bũmb sẽn yaa sõma. Rẽ kɩtame t’a bao n na n soog a menga, n tʋlg n “lebg wa Wẽnnaam n mi sõama ne wẽng n bake.” A Ãdem me naag-a lame n kɩɩse.—Sɩngre 3:5, 6.

A Ãdem ne a Hawa sẽn maan woto n kɩɩsã, b wilgame tɩ b pa ye zems ne b vɩɩmd wakat sẽn-kõn-sa ye. B namsa yel-beed nins b yel-wẽndã sẽn wa ne wã yĩnga. B keelmã talla boogr tɩ b wa baas n ki. (Sɩngre 5:5) La b kɩɩsgã biis pa tek woto ye. Hal ne masã, a Ãdem ne a Hawa yel-wẽndã biis ket n namsda tõndo. Tʋm-tʋmd a Poll gʋlsame: “Rao a yembr [a Ãdmã] n wa ne yel-wẽna dũniyã tɩ kũum wa yel-wẽna yĩnga. Rẽ n kɩt tɩ kũum yõkd neba fãa, fãa sẽn maand yel-wẽna yĩnga.” (Rom dãmba 5:12) N-ye, a Ãdem ne a Hawa yel-wẽndã yĩng kɩtame tɩ yel-wẽn la kũum piuug wala bã-kʋʋdg ãdem-biisã fãa sʋka.

Kaset sẽn yaa kãseng n yɩɩd sẽn wilgd tɩ tõnd yell sɩd paka Wẽnnaamã

Rẽ yĩnga, woto rat n yeelame tɩ ninsaalbã Wẽnnaam sẽn naanã sãama wakat fãa yĩng tɩ tɩɩm kaẽ bɩ? Ayo. Rẽ kɩtame masã tɩ d na n gom kaset ning sẽn yaa kãseng n yɩɩd sẽn wilgd tɩ tõnd yell sɩd paka Wẽnnaamã yelle.  Wẽnnaam sak n monga a meng n na n kõ bũmb ning sẽn na n fãag ãdem-biisã ne yel-wẽna la kũumã. Bũmb ning a sẽn kõ tɩ yɩ rond tõnd fãagr yĩngã yɩɩ a Zezi vɩɩmã sẽn zems zãngã. (Rom dãmba 3:24) Rẽ kɩtame tɩ tʋm-tʋmd a Zã gʋls n yeel tɩ “Wẽnnaam nonga dũniyã hal tɩ b kõ b Biiga sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Nonglem tʋʋm kãngã sẽn yaa kãsengã kɩtame tɩ tõnd tõe n ye saag tɩ d na n wa vɩɩmda wakat sẽn kõn sa. A Poll gʋlsa Rom dãmbã n yeele: ‘Wa beegr a yembr sẽn wa ne bʋʋd sẽn yaa toog neba fãa yĩngã, woto me, tɩrlem tʋʋmd a yembr waa ne zemsg sẽn wat ne vɩɩm neba fãa yĩngã.’—Rom dãmba 5:18.

D tõe n talla bas-m-yam tɩ Wẽnnaam sẽn yãk wakat ningã sã n ta, toog wall kũum pa na n ye zĩnd tẽngã zug ye, yaa yɛl nins b sẽn da reng n togs Wilgr sebrã pʋgẽ wã bal n na n zĩndi. Be b yetame: “Gese, Wẽnnaam yir bee neba sʋka. La bãmb na n zĩnda ne bãmba, la bãmb na n yɩɩ bãmb neba, la bãmb menga na n paa ne bãmba. Bãmb na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.” (Wilgri 21:3, 4) La y tõe n yeta y mense: ‘Bõn-kãens pa na n wa mik tɩ mam ket n vʋɩ ye.’ Y yaool n tõe n vɩɩmd n yãa bõn-kãense. La baa y sã n ki me, Wẽnnaam tõe n vʋʋg-y lame. (Zã 5:28, 29) Yaa woto la Wẽnnaam yãk yam n na n maan tõnd yĩnga, la yaa rẽ la a na n maane. Ad yaa bũmb sẽn pa sɩd lae-lae, d sã n yeel tɩ tõnd yell pa pak Wẽnnaam ye!

“Bɩ y kolg Wẽnnaam”

Ad sɩd kengda pɛlga, d sẽn mi tɩ Wẽnnaam segendame n na n wa kɩt tɩ ninsaalbã namsg sa wakat fãa yĩngã. La rũndã-rũndã, bõe la d tõe n maane, sã n mik tɩ kũum dɩka tõnd nin-nongre, wall d biig sã n lʋɩ bãaga? Wẽnnaam sẽn yãk wakat ning n na n yiis bãasã la kũumã nan pa ta ye. Biiblã wilgame tɩ d segd n gũu bilf tɩ rẽ yaool n pidsi. La Wẽnnaam pa bas tõnd ye. Karen-biig a Zak gʋlsame: “Bɩ y kolg Wẽnnaam, la [a] na kolg yãmba.” (Zak 4:8) N-ye, tõnd Naandã kotame tɩ tõnd ned kam fãa bao zems-n-taar sẽn tar pãng ne yẽ, la a wilgame tɩ neb nins sẽn tar zems-n-taar ne yẽ wã na n paama a koglg wakat fãa, baa yel-pakr taoore.

Wãn to la tõnd kolgd Wẽnnaam? Yʋʋm tus a tã sẽn looge, Rĩm a Davɩɩd ra maana sok-kãngã buudu. A ra sokame: “Zusoaba, . . . ãnda n na n pa yãmb tãn-sõnga zugu?” (Yɩɩl Sõamyã 15:1) A Davɩɩd wẽneg n leoka a sokrã n yeele: “Yaa ned ninga sẽn kẽnd ne pʋ-peelem la a maand tɩrga la a gomd sɩd ne a sũur fãa. Yẽ ka kãnegd ned ye, la yẽ ka maand a zoa wẽng ye, la yẽ ka ningd a yak yãnd ye.” (Yɩɩl Sõamyã 15:2, 3) Sɩd-sɩda, a Zeova sakda neb nins sẽn tũud sor ning a Ãdem ne a Hawa sẽn bʋdg n basã. A kolgda neb nins sẽn maand a raabã.—Tõodo 6:24, 25; 1 Zã 5:3.

Wãn to la tõnd tõe n maan Wẽnnaam daabã? D segd n zãms n bãnga sẽn “yaa tɩrg Wẽnnaam tõnd Fãagda nifẽ,” la sẽn noom-a, la d tũ rẽ. (1 Tɩmote 2:3) Woto baoodame tɩ d paam Biiblã sẽn yaa Wẽnnaam Gomdã bãngr hakɩka. (Zã 17:3; 2 Tɩmote 3:16, 17) Biiblã kareng zugẽ-zugẽ bal pa sek ye. D segd n dɩka pipi yʋʋm kob-gĩndẽ Zʋɩf rãmb nins sẽn wʋm a Poll moonegã Beere wã togs-n-taare. Bãmb wɛɛngẽ d karemdame: “Bãmb deega Wẽnnaam koɛɛga ne b sũyã fãa. La bãmb baoo Gʋlsg Sõamyã pʋgẽ daar fãa [sẽn na yɩl n] bãng bũmb nins b sẽn yet bãmba sã n yaa tɩrga.”—Tʋʋma 17:11.

Wala woto, rũndã-rũndã, Biiblã zãmsg sõma paasda tẽeb ning tõnd sẽn tar ne Wẽnnaamã pãng la sõngd-d tɩ d tõe n tall zems-n-taar ne-a. (Hebre dãmba 11:6) Rẽ leb n sõngd-d lame tɩ d bãng takɩ t’a Zeova sẽn get ãdem-biisã yell to-to wã pa sẽn na yɩl tɩ b naf wakat bilf pʋgẽ bal ye, la sẽn yɩɩd fãa, yaa sẽn na yɩl tɩ neb nins fãa sẽn zems ne fãagrã wa naf wakat fãa yĩnga.

Kelg-y kiris-neb kẽer sẽn tar zood sõma ne Wẽnnaam sẽn yete: “Mam nonga a Zeova hal wʋsgo, la m tog n pʋʋs-a-la bark wʋsgo. A kõo  maam roagdb sẽn sɩd nong-a la sẽn zãms-m a Gomdã.” Woto la a Daniɛll sẽn yaa yʋʋm 16 bi-puglã yeel-yã. Urugwe tẽngã kiris-ned a ye gʋlsa woto: “Mam sũur pida ne mi-beoog wʋsg tɩ m dat n pʋʋs a Zeova bark a sõmblmã d sẽn pa segd ne wã la a zoodã yĩnga.” Wẽnnaam sakda kom-bõonegã menga. Yʋʋm a yopoe bi-pugl yʋʋr sẽn ya a Gabriela yeelame: “Mam nonga Wẽnnaam n yɩɩd bũmb nins fãa sẽn be dũniyã gill zugã! Mam tara m meng Biibla. M nongame n zãmsd yɛl Wẽnnaam la a Biriblã zugu.”

Rũndã-rũndã, dũniyã gill zugu, neb milyõ rãmb sak n deega gom-kãensã yɩɩl-gʋlsdã sẽn da yeelã: “La ne maam, mam sã n kolg Wẽnnaam n yaa sõama.” (Yɩɩl Sõamyã 73:28) B sõnga nin-kãensã tɩ b mao ne b zu-loeesã, la b saagda ne b sũy fãa tɩ b na n wa vɩɩmda arzãn pʋgẽ wakat sẽn kõn sa tẽngã zugu. (1 Tɩmote 4:8) Bõe yĩng tɩ y pa na n bao n “kolg Wẽnnaam”? Sɩd-sɩda d tara bas-m-yam t’a “ka zãr ne tõnd fãa ye.” (Tʋʋma 17:27) N-yẽe, ad tõnd yell sɩd paka Wẽnnaam.

[Foto rãmba, seb-neng a 5]

Zĩis wʋsg pʋsẽ d nee vẽeneg tɩ tõnd yell sɩd paka a Zeova

[Foto, seb-neng a 7]

Baa kom-bõonegã meng tõe n kolga Wẽnnaam

[Foto rãmba, seb-neng a 7]

Rũndã-rũndã, a Zeova sõngd-d lame tɩ d tõogd toogo. Wakat ning a sẽn yãkã sã n ta, a na n yiisa bãasã la kũuma