Tall-y raood wa a Zeremi
Tall-y raood wa a Zeremi
“Maan tẽeb ne Zusoabã, yals kãn-kãe n keng f sũuri. Maan tẽeb ne Zusoabã.”—YƖƖL SÕAMYÃ 27:14.
1. Bark wʋsg bʋs la a Zeova Kaset rãmbã tara?
A ZEOVA KASET RÃMBÃ bee tẽeb arzãn pʋgẽ. (Ezai 11:6-9) Dũni kãnga sẽn gudg wʋsgã pʋgẽ, bãmb tara tẽeb sẽn pa wõnd neb a taabã rẽnd ye. B tara laafɩ ne Wẽnnaam a Zeova la ne taaba. (Yɩɩl Sõamyã 29:11; Ezai 54:13) La b tẽeb arzãnã tara yalgre. Neb nins fãa sẽn ‘maand Wẽnnaam daabã ne b sũur fãa’ wã sõngd n yalgda tẽeb arzãnã. (Efɛɛz rãmba 6:6) Wãn to? Yaa b sẽn vɩ tɩ zemsd ne Biiblã noy la b sẽn zãmsd neb a taabã tɩ b maan wa bãmba, tɩ ne woto bɩ b boond-b tɩ b wa paam bark wʋsg nins sẽn be arzãn kãng pʋgẽ wã.—Matɩe 28:19, 20; Zã 15:8.
2, 3. Zu-loe-bʋs la kiris-neb hakɩkã segd n mao ne?
2 La tõnd sẽn vɩ tẽeb arzãn pʋgẽ wã pa rat n yeel tɩ d pa tar zu-loees ye. D ket n yaa neb sẽn pa zems zãnga, la d namsda bãas la kʋʋlem yĩnga, n wa baas ne kũum. Sẽn paase, d tara kaset tɩ bãngr-goam nins sẽn tɩ loe ne ‘yaoolem wakatã’ pidsdame. (2 Tɩmote 3:1) Zabã, bi-beerã, bãasã, komã la tood a taab namsda ãdem-biisã fãa, la a Zeova Kaset rãmbã me pa põsd rẽ ye.—Mark 13:3-10; Luk 21:10, 11.
3 Rẽ fãa toor sẽn ka be, d mii vẽeneg tɩ neb nins sẽn pa be tẽeb arzãnã pʋgẽ wã na n ket n kɩɩsda tõndo. A Zezi keooga a karen-biisã tɩ: “La yãmb ka dũniyã rẽnd ye, la mam tũusa yãmb dũniyã neba sʋka; yaa woto n kɩt tɩ dũniyã kis yãmba. Tẽeg-y goam nins mam sẽn da togs yãmbã. Tʋm-tʋmd ka yɩɩd a zu-soab ye. Bãmb sã n nams maam, b na n namsa yãmb me.” (Zã 15:18-21) Ket n yaa woto rũndã-rũndã me. Neb wʋsg ket n pa wʋmd tõnd balengã võore, bɩ b pa nong-a ye. Kẽer sãbsda tõndo, n laad tõndo, bɩ b kis-d menga, wa a Zezi sẽn da pĩnd n togsã. (Matɩe 10:22) Naoor wʋsgo, b yelgda kɩba-wẽns sẽn pa sɩd n na n maan tõnd wẽnga. (Yɩɩl Sõamyã 109:1-3) N-ye, tõnd fãa segda yel-toodo, tɩ tõnd neb kẽer tõe n sɩng n komsd raoodo. Wãn to la d tõe n da koms raoodo?
4. Yɛ la tõnd baood sõngr n na n yals kãn-kãe?
4 A Zeova na n sõnga tõndo. Yɩɩl gʋlsda paama Wẽnnaam vẽnegr n gʋls woto: “Nin-tɩrg paamda tood wʋsgo, la Zusoaba yiisda yẽnda bãmb fãa pʋgẽ.” (Yɩɩl Sõamyã 34:20; 1 Korẽnt dãmba 10:13) Tõnd wʋsg tõe n kɩsa kaset tɩ d sã n teeg a Zeova, a kõt-d-la pãng tɩ d reeg toog buud fãa. Tõnd sẽn tar nonglem ning ne-a wã, la sũ-noog ning sẽn be tõnd taoorã sõngda tõnd tɩ d ra koms raoodo, la d ra zoe rabeem ye. (Hebre dãmba 12:2) Woto, zu-loeesã taoore, d kelld n yalsa kãn-kãe.
Wẽnnaam Gomdã kõo a Zeremi pãnga
5, 6. a) Wẽnnaam balemdb hakɩk sẽn yals kãn-kãe toog pʋgẽ mak-bʋs la d tara? b) A Zeremi manesem yɩɩ wãn to, b sẽn wa n yeel-a t’a yɩ no-rɛɛsã?
5 Wakat buud fãa, a Zeova sõgen dãmb hakɩkã paama sũ-noog baa ne zu-loeesã. Kẽer vɩɩmda sasa nins a Zeova sũur sẽn yik t’a kao kɩɩsdbã bʋʋdo. A Zeremi ne yẽ wakatẽ neb kẽere, n paas pipi kiris-nebã ra bee wẽn-sakdbã sʋka. Mak-kãensã gʋlsa Biiblã pʋgẽ sẽn na yɩl n keng tõnd raoodo, la d tõe n zãmsa yɛl wʋsgo, d sã n vaees-ba. (Rom dãmba 15:4) D rɩk a Zeremi makrã.
6 A Zeremi sẽn da nan yaa bi-bɩɩga, Wẽnnaam yãk-a lame t’a yɩ a no-rɛɛs Zida. Ra pa tʋʋm-nana ye. Neb wʋsg ra balemda ziri wẽnnaam dãmba. Baa ne a Zozɩas sẽn da yaa wẽn-sakd sẽn da rɩt naam a Zeremi no-reesemdã sɩngrẽ wã, rĩm dãmb nins fãa sẽn pʋglã yɩɩ wẽn-kɩɩsdba, la neb nins sẽn da segd n zãms nin-buiidã, sẽn dat n yeel tɩ no-rɛɛsdbã la maan-kʋʋdbã ra pa tũud sɩd ye. (Zeremi 1:1, 2; 6:13; 23:11) La a Zeremi tagsg yɩɩ wãn to, a Zeova sẽn wa n yeel-a t’a yɩ a no-rɛɛsã? Rabeem n yõk-a! (Zeremi 1:8, 17) A Zeremi tẽra a manesma sẽn yɩ to-to pipi: “La mam yeelame: ‘Zusoab a Wẽnnaam, mam ka mi goam ye, mam nan yaa biig bala.’ ”—Zeremi 1:6.
7. Neb nins a Zeremi sẽn moonã talla manesem bʋgo, la a manesem yɩɩ wãn to?
7 Neb wʋsg a Zeremi sẽn moonã ra pa kelgd ye, la naoor wʋsgo yaa kɩɩsg sẽn tar pãng la a seg-yã. Vugri, maan-kʋʋd a Pasuur wẽ-a lame n kɩt tɩ b balg-a. A Zeremi wilga a sẽn da tagsd to-to rẽ wẽnd n yet tɩ yẽ ra yeelame t’a ‘ka na n le togs [a Zeova] yelle, walla a gom a yʋʋra’ yell ye. Tõe tɩ wakat ninga, y tagsa woto, n dat n base. Ges-y bũmb ning sẽn sõng a Zeremi t’a kell n kẽng taoore. A yeelame: “[Wẽnnaam koɛɛgã] lebgda wa bugum m sũura pʋgẽ, a bee m kõab pʋsẽ. M maoodame n dat n sĩndi, la m ka tõe ye.” (Zeremi 20:9) Wẽnnaam goamã tara pãng woto yãmb zug bɩ?
A Zeremi tũud-n-taasã
8, 9. a) Pãn-komsem bʋg la no-rɛɛs a Uri tall-yã, la baasa wãn to? b) Bõe yĩng t’a Baruk koms raoodo, la wãn to la a paam sõngre?
8 A Zeremi ra pa a yembr a no-reesemdã tʋʋmdẽ ye. A ra tara tũud-n-taase, la woto ra segd n yɩɩ bũmb sẽn keng a raoodo. La pa wakat fãa la a tũud-n-taasã tʋm ne yam ye. Wala makre, a no-rɛɛs taag a Uri ra keoogda Zerizalɛm ne Zida nebã “wa a Zeremi sẽn gomã.” La rĩm a Zehoyakim sẽn kõ noor tɩ b kʋ a Uri wã, no-rɛɛsã yɛɛsame n zoe n kẽng Ezipti. La rẽ pa fãag-a ye. Rĩmã neb rig-a lame n yõke, n tall-a n lebg n wa Zerizalɛm tɩ b kʋ-a be. Ad woto sɩd ra segd n sãama a Zeremi sũur wʋsgo!—Zeremi 26:20-23.
9 A Zeremi tũud-n-taag a to ra ya a gʋlsd a Baruki. A Baruk sɩd sõnga a Zeremi wʋsgo, la vugri yẽ me ra basame n da pa get yɛla ne tẽeb nin ye. A sɩngame n yẽgemd n yetẽ: “Kato! Zusoaba kõo maam toog n paas sũ-sãoongo. Mam wõosdame tɩ m pãng sɛ la m ka paam vʋʋsg ye.” A Baruk komsa raood n sɩng n pa nand tẽebã yɛl wa pĩndã ye. La ne nonglem a Zeova sagla a Baruki, t’a rems a meng tagsgã. Rẽ, a paama bas-m-yam t’a na n põsa Zerizalɛm sãoongã sasa. (Zeremi 45:1-5) A Baruk sẽn dems a meng tẽebã sɩd kenga a Zeremi raood wʋsgo!
A Zeova sõnga a no-rɛɛsã
10. A Zeova pʋlmame t’a na n sõnga a Zeremi wãn to?
10 Sẽn tar yõod n yɩɩd ya a Zeova sẽn pa bas a Zeremi wã. A wʋma a no-rɛɛsã sẽn da tagsd to-to wã võore, la a kõ-a-la pãng la sõngr ning a sẽn da ratã. Wala makre, a Zeremi no-reesemdã sɩngrẽ, a sẽn da wa n tẽed t’a pa na n tõog tʋʋmdã a Zeova yeel-a lame: “Ra zoe bãmb ye; tɩ bõe, mam bee ne foom n na n fãag foom. Mam yaa Zusoaba, yaa maam n yeele.” A Zeova sẽn wilg-a yɛl nins sẽn tɩ loe ne a tʋʋmdã poore, a yeelame: “B ka tõe n tõog foom ye. Bala, mam bee ne foom n na n sõng foom. Mam yaa Zusoaba, yaa maam n yeele.” (Zeremi 1:8, 19) Ad woto sɩd kengda raoodo! La a Zeova pidsa a pʋlengã.
11. Wãn to la d mi t’a Zeova pidsa a pʋlengã n sõng a Zeremi?
11 B sẽn wa n balg-a tɩ nebã laad-a wã, a Zeremi yeela woto ne bas-m-yam: “Zusoaba bee ne maam wa gãndaoog sẽn tar pãnga. Woto, m namsdba na n lakame n lʋɩ. Bãmb ka na n tõog maam ye. Bãmb na n paama yãnd wʋsg[o].” (Zeremi 20:11) Yʋʋm loogr poore, b sẽn mak n na n kʋ a Zeremi wã, a Zeova kell n sõng-a lame, la wala a Baruki, a Zeremi põsa Zerizalɛm sãoongã sasa n paam lohorem, la neb nins sẽn da namsd yẽ n pa kelg keoogrã kiime, bɩ b yõg-b lame n tall n kẽng Babilon.
12. Baa ne yɛl wʋsg sẽn wat ne raood komsgã, bõe la d segd n ning d yamẽ?
12 Wala a Zeremi, rũndã-rũndã, a Zeova Kaset rãmb wʋsg bee tood pʋsẽ. Wa d sẽn togs zugẽ wã, tood kãens kẽer yaa tõnd mengã pãn-komsmã yĩnga, a taab yaa dũniyã sẽn be zũnd-zãnd ning pʋgẽ wã yĩnga, tɩ namsg a taab yit neb nins sẽn kɩɩsd tõnd tʋʋmdã nengẽ. Namsg a woto tõe n komsa raoodo. Wala a Zeremi, d tõe n wa sãmbda d sã n na n kell n tʋma tʋʋmdã b sẽn bobl-dã. Sɩda, yaa d bãng tɩ wakat-wakate, d na n komsa raoodo. Raood komsgã sasa, d wilgda d nonglmã ne a Zeova sẽn ta zĩig ninga. Woto, bɩ d rɩk sard sẽn pa vigsd n da bas tɩ raood komsgã kɩt tɩ d bas a Zeova tʋʋmdã wa a Uri sẽn maanã ye. D rɩk a Zeremi togs-n-taare, la d kɩs sɩd t’a Zeova na n sõng-d lame.
D sẽn na n mao ne raood komsg to-to
13. Wãn to la d tõe n tũ a Zeremi la a Davɩɩd makrã?
13 A Zeremi ra gomda ne Wẽnnaam a Zeova wakat fãa, n togsd-a a sũur tagsa la a kot-a pãnga. Woto yaa mak-sõng d sẽn segd n tũ. A Davɩɩd sẽn zĩnd pĩnd wẽndẽ wã sẽn bao pãng Wẽnnaam nengẽ wã me gʋlsame: “Zusoaba, bɩ y kelg mam goma. Bɩ y kelg mam wõosgo. Mam dĩma la m Wẽnnaam, bɩ y kelg mam boolga neere; tɩ bõe, mam pʋʋsda yãmba.” (Yɩɩl Sõamyã 5:2, 3) A Davɩɩd vɩɩmã kɩbar Wẽnnaam sẽn kɩt t’a gʋlsã pʋgẽ, d yãtame tɩ naoor wʋsgo, a Zeova reega a Davɩɩd pʋʋsgã n sõng-a. (Yɩɩl Sõamyã 18:2, 3; 21:2-6) Woto, tõnd me yɩɩrã sã n wa yaa wʋsgo, bɩ d zu-loeesã sã n wõnd b pa tar tɩɩm, d sã n pʋʋs a Zeova n togs-a sẽn be d sũurẽ wã fãa, na n yɩɩ belsg n kõ-do. (Filip rãmba 4:6, 7; 1 Tesalonik rãmba 5:16-18) A Zeova pa zãgsd tõnd kelgr ye. La a kõta tõnd bas-m-yam t’a ‘geta tõnd yelle.’ (1 Pɩɛɛr 5:6, 7) La pa na n yɩ yam bũmb tɩ d pʋʋs a Zeova n yaool n pa kelg a sẽn yetã ye.
14. A Zeova goamã talla pãn-tusd-bʋg a Zeremi zugu?
14 Wãn to la a Zeova gomd ne tõndo? Ges-y a Zeremi makrã yɛsa. A Zeremi ra yaa no-rɛɛsa, t’a Zeova gomd ne-a. A Zeremi bilga Wẽnnaam goamã sẽn da tar pãn-tusdg ning a sũura zug woto: “Mam sẽn wʋm y goama, mam deegame. Saasẽ-pãng-soab a Wẽnnaam, yaa yãmb n so maam, la y goama kõo maam sũ-noog n kɩt tɩ m kɩdem.” (Zeremi 15:16) N-ye, a Zeremi ra tara sũ-noogo, a sẽn da zãad Wẽnnaam yʋʋrã yĩnga, la Wẽnnaam goamã ra tara yõod wʋsg ne no-rɛɛsã. Woto, wala tʋm-tʋmd a Polle, a Zeremi ra rata ne a sũur fãa n moon koɛɛg ning b sẽn bobl-a wã.—Rom dãmba 1:15, 16.
15. Wãn to la d tõe n maan t’a Zeova goamã kẽ d sũurã, la yel-bʋs n na n kɩt tɩ d rɩk sard n da bas a goama togsgo?
15 A Zeova pa gomd ne ned ba a ye vẽeneg-vẽeneg rũndã-rũndã ye. La d tara Wẽnnaam goamã Biiblã pʋgẽ. Rẽ, d sã n pa reemd ne Biiblã zãmsgo, la d tagsd d sẽn karemd bũmb ningã zug neere, Wẽnnaam goamã na n kõo tõnd me ‘sũ-noog n kɩt tɩ d kɩdem.’ La d tõe n kɩdma d sẽn zãad a Zeova yʋʋrã, d sã n tɩ togsd neb a taab gom-kãensã. D ra tol n yĩm tɩ nin-buiid a to ka be dũniyã zug n moond a Zeova yʋʋrã ye. Yaa yẽ Kaset rãmbã bal n moond Wẽnnaam Rĩungã sẽn luglã koe-noogã, la b zãmsd sũ-bʋgsem dãmbã tɩ b lebg a Zezi Kirist karen-biisi. (Matɩe 28:19, 20) Ad sɩd yaa bark meng la d sẽn tarã! A Zeova sẽn bobl tõnd tʋʋmdã ne nonglmã yĩnga, d pa tõe n pa gom a yell ye.
D gũus ne d tũud-n-taasã yãkre
16, 17. Bõe la a Zeremi ra tagsd tũud-n-taasã wɛɛngẽ, la wãn to la d tõe n dɩk a togs-n-taare?
16 A Zeremi togsda bũmb a to sẽn sõng-a t’a tall raoodo. A yeelame: “Mam ka zĩnd ne ned sẽn la n maan sũ-noog ye. Mam zĩnda m toor bũmb ninga yãmb sẽn kõ maam tɩ m maana yĩnga. Tɩ bõe, yãmb kɩtame tɩ m sũur yiki.” (Zeremi 15:17) A Zeremi ra sak n na n zĩnda a yembre, n bas tũud-n-ta-wẽnsã sẽn da tõe n sãam-a wã. Rũndã-rũndã, tõnd nee yɛlã woto. D pa yĩmd tʋm-tʋmd a Poll sẽn keoog tõnd tɩ “tũud-n-ta-wẽns sãamda nin-sõamyã” wã lae-lae ye. B sãamda minim sõma nins tõnd sẽn da tar hal yʋʋm wʋsg sẽn loogã menga.—1 Korẽnt dãmba 15:33.
17 Tũud-n-ta-wẽnsã tõe n kɩtame tɩ dũniyã yam sãam tõnd tagsgã. (1 Korẽnt dãmba 2:12; Efɛɛz rãmba 2:2; Zak 4:4) Rẽ wã yĩng bɩ d modg n bãng tũud-n-ta-wẽnsã n zãag d mens ne-b zãng fasɩ. (Hebre dãmba 5:14) A Poll sã n da vɩɩ dũniyã zug rũndã-rũndã, yãmb tagsdame t’a na n yeela kiris-ned sẽn get yoobã yɛl bɩ nen-kɛglmã wall ɛspoor sẽn wilgd nen-kɛglem tɩ bõe? Sagl-bʋg la a ra na n kõ saam-biig sẽn baood tũud-n-taar ne neb a sẽn pa mi ẽntɛrnetã pʋgẽ? A tagsg ra na n yɩɩ bõe ne kiris-ned sẽn na n dɩk lɛɛr dãmb wʋsg n maan video reem bɩ n ges televiziõ wã, n yaool n pa tar minim sõma meng zãmsgã wɛɛngẽ?—2 Korẽnt dãmba 6:14b; Efɛɛz rãmba 5:3-5, 15, 16.
Pa-y tẽeb arzãnã pʋgẽ
18. Bõe n na n sõng tõnd tɩ d yals kãn-kãe tẽebã pʋgẽ?
18 Tõnd getame tɩ d tẽeb arzãnã tara yõod wʋsgo. Bũmb pa be dũniyã zug n wõnd-a rũndã-rũndã ye. Baa neb sẽn pa tẽedb gomda nonglem, waoogr la sõmblem ning kiris-nebã sẽn tar ne taabã yelle. (Efɛɛz rãmba 4:31, 32) D segd n maoa ne raood komsgã n yɩɩd pĩndã. Tũud-n-ta-sõma wã, pʋʋsgã, la Biiblã zãmsg sõma wakat fãa tõe n sõnga tõnd tɩ d kell n tall pãng tẽebã wɛɛngẽ. B na n kõo tõnd pãng tɩ d yals kãn-kãe makr buud fãa taoor ne bas-yard zãng-zãng ne a Zeova.—2 Korẽnt dãmba 4:7, 8.
19, 20. a) Bõe n na n sõng tõnd tɩ d yals kãn-kãe? b) Sõsg ning sẽn pʋgdã yaa ãnda rãmb yĩnga, la a paka ãnd dãmb me?
19 D pa segd abada n bas tɩ neb nins sẽn kis Biiblã koɛɛgã d sẽn moondã kẽes-d rabeem la b kɩt tɩ d sãam d tẽebã ye. Wala bɛɛb nins sẽn nams a Zeremi wã, neb nins sẽn zabd ne tõndã zabda ne Wẽnnaam. B pa na n tõog ye. A Zeova pãng sẽn yɩɩd tõnd bɛɛbã zĩig sẽn zãrã yeta tõndo: “Maan tẽeb ne Zusoabã, yals kãn-kãe n keng f sũuri. Maan tẽeb ne Zusoabã.” (Yɩɩl Sõamyã 27:14) D sẽn maand tẽeb ne Zusoab a Zeova ne d sũyã fãa wã yĩnga, bɩ d rɩk sard sẽn pa vigsd n da bas neer maaneg ye. Bɩ d kɩs sɩd tɩ wala a Zeremi la a Baruki, d na n paama keoore, d sã n pa ya ye.—Galat dãmba 6:9.
20 Kiris-neb wʋsg maooda ne raood komsgã wakat fãa. La kom-bɩɩsã me tara b zu-loeese. La bãmb me tara soay sẽn yaa sõma sẽn pak bãmb yĩng wʋsgo. Sõsg ning sẽn pʋgdã paka kom-bɩɩs nins sẽn be tõnd sʋkã. A leb n paka roagdbã la kãsemb nins fãa sẽn deeg lisg n be tigingã pʋgẽ wã, sẽn wilgd ne b no-goam la b mak-sõng la b teelg tɩ b tõe n sõnga kom-bɩɩs nins sẽn be tigingã pʋgẽ wã.
Y na n leokẽ lame tɩ bõe?
• Bõe yĩng tɩ yɛl sẽn komsd raoodã pa segd n ling-du, la ãnd sõngr la d segd n bao?
• Wãn to la a Zeremi tõog raood komsgã, baa ne a sẽn da tar tʋʋm-toogã?
• Bõe n na n kɩt tɩ d ‘maan sũ-noog la d kɩdem,’ baa zu-loeesã pʋsẽ?
[Zãmsgã sogsgã]
[Foto, seb-neng 19]
A Zeremi ra tagsdame t’a paooda wʋsgo, la t’a pa tar minim sẽn sek n na n yɩ no-rɛɛs ye
[Foto, seb-neng 20]
Baa ne b sẽn da namsd a Zeremi wã, a ra miime t’a Zeova ra bee ne-a “wa gãndaoog sẽn tar pãnga”