Yãmb sokdame t’‘a Zeova bee yɛ’ bɩ?
Yãmb sokdame t’‘a Zeova bee yɛ’ bɩ?
“Y yaab rãmba . . . zãag[a] ne maam . . . Bãmb ka sok tɩ: ‘[a Zeova] bee yɛ ye?’ ”—ZEREMI 2:5, 6.
1. Nebã sã n wa sokdẽ tɩ “Wẽnnaam bee yɛ?,” tõe tɩ yaa bõe n be b yamẽ?
“WẼNNAAM bee yɛ?” Woto la neb wʋsg sokda. Kẽer baoodame bal n na n bãng Naandã sẽn be zĩig ninga. Kẽer soka sok-kãngã, yel-beed sẽn paam neb wʋsg poore, bɩ bãmb mengã sẽn da wa n be zu-loe-kãseng pʋgẽ, n pa wʋmd Wẽnnaam sẽn pa kẽes a toog n sõng-bã võorã. La neb a taab yẽ pa baood n na n bãng baa bilf ye, bala b pa tẽed tɩ Wẽnnaam beeme ye.—Yɩɩl Sõamyã 10:4.
2. Ãnd dãmb n tõe n bao Wẽnnaam n sɩd yã-a?
2 Yaa sɩd tɩ neb ka tɛk sak n deega kaset wʋsg sẽn wilgd tɩ Wẽnnaam beeme wã. (Yɩɩl Sõamyã 19:2; 104:24) Bãmb kẽer tagsdame tɩ f sã n tar tũudum bala, sekame. La neb milyõ rãmb sẽn yit tẽns toor-toor pʋsẽ sẽn nong sɩdã wʋsgã, kɩtame tɩ b bao sɩd Wẽnnaamã. B modgrã pa yɩ zaalem ye, bala a “ka zãr ne tõnd fãa ye.”—Tʋʋma 17:26-28.
3. a) Wẽnnaam bee zĩ-bʋgo? b) Gʋlsg Sõamyã sẽn sok t’a ‘Zeova bee yɛ wã’ võor yaa bõe?
3 Ned sã n sɩd wa yã a Zeova, a mikdame tɩ “Wẽnnaam yaa vʋʋsem,” sẽn dat n yeel tɩ ninsaal nif pa tõe n yã-a ye. (Zã 4:24, NW ) A Zezi goma sɩd Wẽnnaamã yell n yeel tɩ, ‘mam Ba sẽn be saasẽ.’ Woto rat n yeelame tɩ bõe? Tɩ tẽebã wɛɛngẽ, tõnd saasẽ Ba wã sẽn be zĩig ningã zãntame, wala sa-gãongã sẽn zẽk wʋsg to-to wã. (Matɩe 12:50; Ezai 63:15) Baa ne tõnd sẽn pa tõe n yã Wẽnnaam ne d nifã, a kɩtame tɩ d tõe n bãng yẽ ne a raabã wʋsgo. (Yikri 33:20; 34:6, 7) A leokda pʋ-peelem dãmbã sẽn baood n dat n bãng vɩɩmã võorã sogsgo. Yɛl nins sẽn tɩ loe ne tõnd vɩɩmã wɛɛngẽ, a kõta tikr sẽn zems tɩ d bãng a tagsgo, sẽn dat n yeel t’a sẽn get yel-kãens to-to wã, la d bãng tõnd tʋlsmã sã n zemsa ne a raabã. A ratame tɩ tõnd sok bõn-kãens zut la d modg ne d sũy fãa n paam b leoore. A Zeova tʋma no-rɛɛs a Zeremi t’a tɩ keoog pĩnd wẽndẽ Israɛllã neba, b sẽn pa maan woto wã yĩnga. B ra mii Wẽnnaam yʋʋrã, la b pa sok ‘t’a Zeova bee yɛ ye?’ (Zeremi 2:6) Pa a Zeova raabã n da pak-b n yɩɩd ye. B ra pa baood a sor-wilgr ye. Yãmb sã n wa segd n yãk yam sẽn tɩ loe ne yel-kãsems bɩ yel-kɩdse, y sokdame t’a “Zeova bee yɛ” bɩ?
Neb nins sẽn bao Wẽnnaam sor-wilgrã
4. Wãn to la a Davɩɩd sẽn kõ mak-sõng n bao n na n bãng a Zeova raabã tõe n naf tõndo?
4 A Zese biribl a Davɩɩd sẽn da ket n yaa bi-bɩɩga, a talla tẽeb sẽn tar pãng ne a Zeova. A ra miime t’a Zeova n yaa “Wẽnnaam sẽn vɩyã.” A Davɩɩd mengã yãa a Zeova sẽn kogl-a to-to. Tẽeb la nonglem ne ‘a Zeova yʋʋrã’ kɩtame t’a Davɩɩd tõog n kʋ Filisti nin-wobg a Goliat sẽn da raool a meng ne zab-teed wʋsgã. (1 Sãmwɛll 17:26, 34-51) La a Davɩɩd tõogrã pa kɩt t’a teeg a meng ye. A pa tags tɩ baa yẽ sẽn maaneg fãa masã, a Zeova na n ning-a-la bark ye. Yʋʋm nins sẽn pʋglã sasã, naoor wʋsgo a Davɩɩd baoome n na n bãng a Zeova tagsgo, n yaool n yãk yam. (1 Sãmwɛll 23:2; 30:8; 2 Sãmwɛll 2:1; 5:19) A talla pʋʋsg woto: “Zusoaba, kɩt-y tɩ mam bãng yãmb soɛya. Bɩ y zãms maam tɩ m tũ yãmba. Tall-y maam yãmb sɩda pʋgẽ, la y zãms maam. Tɩ bõe, yãmb yaa Wẽnnaam sẽn fãagd maam. Mam tẽeda yãmb daarã fãa.” (Yɩɩl Sõamyã 25:4, 5) Ad woto sɩd yaa mak-sõng n kõ tõndo!
5, 6. Wãn to la a Zozafat bao a Zeova a yɛl toɛy-toɛy pʋsẽ?
5 Rĩm a Zozafat sẽn da ya a Davɩɩd roogã rĩm a nu soabã zãmaanẽ, tẽns a tãab tãb-biis n sũ taab n na n wa zab ne Zida. Buudã sẽn da wa n be zu-loe-kãngã taoor n dat sõngrã a Zozafat ‘baoa a Zeova.’ (2 Kɩbaya 20:1-3) Woto ra pa pipi a Zozafat sẽn bao a Zeova ye. Rĩma laka a meng ne-a Baall balengã Israɛll rɩtg rĩunga sẽn da kẽes a meng a pʋgẽ wʋsgã. A yãkame n na n kẽn a Zeova soayã pʋsẽ. (2 Kɩbaya 17:3, 4) Woto masã, a Zozafat sẽn wa n be zu-loɛɛg taoore, wãn to la ‘a bao a Zeova’?
6 Pʋʋsg a Zozafat sẽn maan zãma sʋk Zerizalɛm wakat kãng sẽn yɩ toogã wilgame t’a ra tẽrame t’a Zeova pãngã tõee fãa. A tagsa a Zeova sẽn wilg a raabã sẽn puki, a sẽn dig tẽns a taab n dɩk b zĩis kẽer n kõ Israɛll nebã tɩ b soogã yelle. Rĩma sak n deegame t’a Zeova sõngr yaa tɩlae ne-a. (2 Kɩbaya 20:6-12) A Zeova basame tɩ b yã-a rẽ sasa bɩ? N-ye. A Zeova vẽnega Levi ned a Zahazɩɛll t’a togs-b b sẽn segd n maanegã takɩ, la vẽk-n-beoogã, a kɩtame t’a nin-buiidã tõog zabrã. (2 Kɩbaya 20:14-28) Wãn to la y tõe n kɩs sɩd t’a Zeova na n basa yãmb me tɩ y yã-a, y sã n bao a sõngre?
7. Ãnd dãmb pʋʋsg la Wẽnnaam kɛlgda?
7 A Zeova pa tũusd neb ye. A boonda tẽnsã fãa neb tɩ b bao-a pʋʋsg pʋgẽ. (Yɩɩl Sõamyã 65:3; Tʋʋma 10:34, 35) A mii bũmb ning sẽn be neb nins sẽn pʋʋsd n kot-a wã sũyẽ. A kõta tõnd bas-m-yam t’a wʋmda nin-tɩrsã pʋʋsgo. (Yelbũna 15:29) A basdame tɩ neb kẽer sẽn da pa sokd a yell pĩndã, la sẽn sik b mens masã n baood a sor-wilgrã yã-a. (Ezai 65:1) A pʋd n wʋmda neb nins sẽn kɩɩs a noorã n yaool n tek yam n kos sugr ne sik-m-mengã pʋʋsgo. (Yɩɩl Sõamyã 32:5, 6; Tʋʋma 3:19) La ned sã n pa sakd Wẽnnaam, a pʋʋsg yaa zaalem. (Mark 7:6, 7) Ges-y makr a wãna.
B pʋʋsame la pa reeg ye
8. Bõe n kɩt t’a Zeova pa reeg rĩm a Sayull pʋʋsgã?
8 No-rɛɛs a Sãmwɛll sẽn yeel rĩm a Sayull tɩ Wẽnnaam da zãgs-a-la a kɩɩsgã yĩngã poore, a Sayull wõgemda a Zeova taoore. (1 Sãmwɛll 15:30, 31) La a pa maan woto ne pʋ-peelem ye. A Sayull sɩd ra pa baood n na n sak Wẽnnaam ye, la a sẽn da ratã yaa tɩ nin-buiidã waoog-a. Rẽ poore, Filisti nebã sẽn da wa n zabd ne Israɛllã, a Sayull soka a Zeova a wee n sok-a bala. La Wẽnnaam sẽn pa leok-a wã, a kẽng n tɩ bʋga bagre, baa ne a sẽn mi t’a Zeova ra gɩdga woto maanegã. (Tõodo 18:10-12; 1 Sãmwɛll 28:6, 7) Pipi Kɩbaya 10:14 kʋmsa kɩbarã n yeel a Sayull wɛɛngẽ tɩ: ‘Yẽ ka bao a Zeova ye.’ Bõe yĩnga? Ya a Sayull sẽn da pa pʋʋsd ne tẽebã yĩnga. Rẽnd yaa wa a sẽn da pa pʋʋs ye.
9. Bõe n da pa zems a Sedesias kosgã pʋgẽ, a sẽn da wa n baood a Zeova sor-wilgrã?
9 Woto me, Zida rĩungã saab sẽn da wa n kolgdẽ wã, pʋʋsg wʋsg la b ra maanda, la b ra sokd a Zeova no-rɛɛsdbã. La nin-buiidã ra yetame tɩ b waoogda a Zeova n yaool n da ket n pʋʋsd wẽn-naandse. (Sofoni 1:4-6) Baa ne b sẽn sok Wẽnnaamã, b ra pa segl b sũyã n na n sak a raabã ye. Rĩm a Sedesias bõosa a Zeremi t’a tɩ sok a Zeova n kõ-a. A Zeova ra zoe n togsa rĩma a sẽn da segd n maanega. La a sẽn da pa tar tẽeb la a ra zoet ninsaalbã yĩnga, rĩmã pa sak a Zeova noor ye, tɩ yẽ me pa leok rĩmã sokr ye.—Zeremi 21:1-12; 38:14-19.
10. Bõe yĩng t’a Zoana sẽn bao a Zeova sor-wilgrã to-to wã pa zemse, la bõe la a kongrã zãmsd tõndo?
10 B sẽn da wa n sãam Zerizalɛm tɩ Babilon tãb-biisã loog ne Zʋɩf rãmbã yembdã poore, a Zoana seglame n na n peeg Zʋɩf rãmb sul-bil sẽn da kell n pa Zida n na n kẽng Ezipti. B ra maana b gɛɛla, la nand tɩ b looge, b kosa a Zeremi t’a pʋʋs b yĩng la a bao a Zeova sor-wilgri. La b sẽn ka paam leokr ning bãmb sẽn da ratã yĩnga, b kell n maana b sẽn da geel bũmb ningã. (Zeremi 41:16–43:7) Yãmb neeme tɩ yel-kãensã tara zãmsg sẽn tõe n naf-yã, tɩ y sã n wa baood a Zeova, bɩ a sak tɩ y yã-a bɩ?
Ket-y n ‘makd n bãngd sẽn tat Zusoabã yam’
11. Bõe yĩng tɩ d segd n tũ Efɛɛz rãmba 5:10 saglgã?
11 Baleng hakɩkã pa d sẽn na n deeg koom lisg sẽn na yɩl n wilg tɩ d rɩka d meng n kõ Wẽnnaam, n debd tigingã tigiss la d moond koe-noogã bal ye, yɩɩda woto. A tɩ loee ne tõnd vɩɩmã nens fãa. Daar fãa, d segda weoogr toor-toore, tɩ kẽer bãngr yaa toogo, t’a taab pukd vẽenega, tɩ rẽ tõe n kɩt tɩ d bʋdg n bas wẽn-zoeerã sore. Tõnd manesem na n yɩɩ wãn to weoog-kãens taoore? Tʋm-tʋmd a Poll sẽn da wa n gʋlsd Efɛɛz kiris-nebã sẽn tar kɩs-sɩdã a sagl-b-la woto: “Bɩ y mak n bãng sẽn tat Zusoaba yam.” (Efɛɛz rãmba 5:10) Yɛl wʋsg b sẽn gʋls tɩ be Gʋlsg Sõamyã pʋgẽ wilgdame tɩ rẽ maaneg yaa yam tʋʋmde.
12. Bõe yĩng t’a Zeova sũur pa yɩ noogo, a Davɩɩd sẽn da kɩt tɩ b rɩk kaoolã koglg n debd ne Zerizalɛmã sasa?
12 B sẽn da tall kaoolã koglg n tɩ lebs Israɛll t’a kaoos yʋʋm wʋsg Kiriat-zearimmã poore, rĩm a Davɩɩd tʋlgame tɩ b tall-a n wa Zerizalɛm. A yẽsa ne nin-buiidã nanambs la a yeel tɩ b rɩk koglgã n looge, ‘a sã n noom bãmba la a sã n ta a Zeova yam.’ La a pa bao n bãng a Zeova raab sẽn da ya a soab sõma yellã zug ye. A sã n da maanẽ-la woto, b kõn saagẽ n dɩk koglgã ne sarɛt ye. Ra yaa Levi neb nins sẽn yaa Kohat buudã nebã n da segd n palg-a ne b bãgd wa Wẽnnaam sẽn da kõ noor tɩ yaa vẽenegã. Baa ne a Davɩɩd sẽn sok a Zeova naoor wʋsgã, yel-kãngã taoore, a pa maan woto tɩ zems ye. Rẽ waa ne yel-beedo. Kaoosg poore a Davɩɩd sak n deega woto: ‘[A Zeova] tãsa tõndo. Bala, tõnd da ka bao n bãng d sẽn tog n maan to-to ye.’—1 Kɩbaya 13:1-3; 15:11-13; Sõdbo 4:4-6, 15; 7:1-9.
13. B sẽn wa n tall kaoolã koglgã n loog tɩ yell pa zĩndã sasa, tẽeg bʋg n be yɩɩll ning b sẽn yɩɩlã pʋgẽ?
13 Levi nebã sẽn wa n baas n yiis kaoolã koglg a Obɛd-Edom yirã n tall n kẽng Zerizalɛmã, yɩɩll a Davɩɩd sẽn maan la b yɩɩl-yã. Yɩɩllã ra tara tẽeg-kãngã: “Bɩ y bao [a Zeova] ne y pãngã, bɩ y bao bãmb n da bas ye. . . . Bɩ y tẽeg bãmb tʋʋm-kãsemsa bãmb sẽn maana yelle, la bãmb bõn-bãna ne b noora bʋʋd kaoob yelle.”—1 Kɩbaya 16:11-13.
14. Wãn to la a Salomo mak-sõngã la a sẽn kong to-to kaoosg poor a vɩɩmã pʋgẽ wã tõe n yɩ zãmsg sẽn nafd tõndo?
14 Sẽn deng a Davɩɩd kũumã, a sagla a biribl a Salomo woto: “Fo sã n bao [a Zeova], fo na n yã-b lame.” (1 Kɩbaya 28:9) A Salomo sẽn wa n zomb naama geere, a kẽnga Gabaõ, zĩig ning sɛk fu-roogã sẽn da beẽ wã, n maan maoong n kõ a Zeova. Beenẽ, a Zeova soka a Salomo tɩ: “Fo ratame tɩ m maan bõe n kõ-fo?” A Zeova reega a Salomo pʋʋsgã n kõ-a yam la bãngr wʋsg sẽn na yɩl n kao Israɛll bʋʋdo, la a leb n paas-a arzɛk la ziiri. (2 Kɩbaya 1:3-12) A Salomo gesa meebã mamsg a Zeova sẽn kõ a Davɩɩdã n me wẽn-do-neere. La sã n yaa ne a Salomo mengã kãadem wɛɛngẽ, a pa bao a Zeova ye. A Salomo kẽe kãadem ne pagb sẽn da pa balemd a Zeova. A kʋʋlem wakate, pʋg-kãens kɩtame t’a pa kell n gãd a Zeova ne a sũurã fãa ye. (1 Rĩm dãmba 11:1-10) Baa tõnd yʋʋrã sẽn yi to-to, d yama sẽn waoog to-to bɩ d bãngrã sẽn ta zĩig ning fãa, tara yõod tɩ d ‘ket n makd n bãngd sẽn tat Zusoabã yam.’
15. Etiopi ned a Zeera sẽn wa n zab ne Zida wã, bõe yĩng t’a Aza ra tõe n pʋʋs ne bas-yard t’a Zeova ra na n fãaga Zida?
15 D sã n ges a Aza sẽn yɩ a Salomo yagengã naam, d sɩd bãngdame tɩ rẽ maaneg tara yõodo. A Aza sẽn lebg rĩm tɩ yʋʋm 11, Etiopi ned a Zeera waa ne sodaas milyõ n na n zab ne Zida. A Zeova na n fãaga Zida bɩ? Yʋʋm 500 sẽn deng rẽ, a Zeova ra togsa bũmb ning a nin-buiidã sẽn da tõe n paam b sã n da sak n kelg-a la b tũ a noyã, la yell ning sẽn da na n paam-b me, b sã n da pa maan woto. (Tõodo 28:1, 7, 15, 25) A Aza naama sɩngrẽ, a yiisa tẽn-kugã la ra-lugdsã b sẽn tũnug ne ziri balengã pʋgẽ Zida wã. A sagla nin-buiidã tɩ b ‘bao a Zeova.’ A Aza ra pa gũ tɩ yel-beed wa t’a yaool n maan woto ye. Rẽnd a sẽn tar tẽeb ne a Zeova wã yĩnga, a Aza ra tõe n pʋʋs-a lame t’a maan bũmb n sõng-ba. Baasa wãn to? Wẽnnaam kɩtame tɩ Zida tõog a bɛɛbã sõma.—2 Kɩbaya 14:1-11.
16, 17. a) Baa ne a Aza sẽn tõog zabrã pʋgẽ wã, bõe la a Zeova tẽeg-a? b) A Aza sẽn maan yalemdã, wãn to la b bao n na n sõng-a, la a manesem yɩɩ wãn to? d) Bõe la a Aza manesmã tõe n zãms tõndo?
16 Ne rẽ fãa, a Aza sẽn tõog zabrã n lebgã, a Zeova tʋma a Azaria t’a seg rĩmã n yeel-a: “Aza ne Zida neba la Bẽnzame neba fãa, kelg-y-yã. Yãmb sã n be ne [a Zeova], bãmb bee ne yãmba. Yãmb sã n bao bãmba, y na n yã-b lame. La yãmb sã n bas bãmba, bãmb me na n basa yãmba.” (2 Kɩbaya 15:2) A Aza leb n teela sɩd balengã ne yẽesem n paase. La yʋʋm 24 loogr poore, a sẽn da wa n be zabr taoor yɛsa, a Aza pa bao a Zeova ye. A pa bao n bãng sẽn be Wẽnnaam Gomdẽ wã ye, la a pa tẽeg a Zeova sẽn da maan bũmb ninga, Etiopi tãb-biisã sẽn da wa n pig Zida wã ye. A maana yalemd n maan kaool ne Siiri.—2 Kɩbaya 16:1-6.
17 Woto kɩtame t’a Zeova tʋm bãngd a Hanani t’a tɩ keoog a Aza. Baa sasa kãngã, b sẽn wa n wilg a Zeova tagsg sẽn yaa to-to yellã zugã, ra tõe n sõnga a Aza. La a pa sak ye, a sũur yikame t’a kɩt tɩ b balg a Hanani bãens roogẽ. (2 Kɩbaya 16:7-10) Ad sɩd yaa kaeto menga! Yaa wãn to ne tõndo? Tõnd baooda Wẽnnaam, n yaool n wa zãgsd saglsã bɩ? Dũniyã yɛl sã n gĩd tõnd tɩ kãsem soab dat tõnd neer n kõ-d sagls sẽn yit Biiblã pʋgẽ, d tara mi-beoog a sẽn sõng tõnd ne nonglmã n kɩt tɩ d bãng “sẽn tat Zusoaba yama” bɩ?
Ra yĩm-y n pa sok a Zeova ye
18. Wãn to la sagls nins a Eliyu sẽn kõ a Zoobã tõe n naf tõndo?
18 Ned sã n wa be zu-loees pʋgẽ, ba a soab sã n da talla yẽesem a Zeova raabã maaneg pʋgẽ, a tõe n wa kongame. Bã-kɛgeng sẽn da wa n namsd a Zoobe, t’a kambã ki t’a arzɛkã sãama, a zo-rãmbã ning-a-la taal zaalem, tɩ kɩt t’a ra tagsd a meng yell bala. A Eliyu tẽeg-a-la woto: “La bãmb ned ba a ye ka sokd tɩ Wẽnnaam sẽn naana bãmba bee yɛ ye.” (Zoob 35:10) A Zoob ra segdame n tags a Zeova yell wʋsgo, la a bao n bãng a sẽn tagsd to-to ne yellã. Ne sik-m-menga, a Zoob saka b sẽn tẽeg-a rẽ wã, la a mak-sõngã tõe n sõnga tõnd me tɩ d maan woto.
19. Bõe la Israɛll nin-buiidã pa maan naoor wʋsgo?
19 Israɛll nin-buiidã ra mii a Zeova sẽn tall manesem ning ne b buudã. La naoor wʋsgo, b pa tẽeg rẽ yelle, b sẽn da wa n be yɛl takɩ pʋsẽ ye. (Zeremi 2:5, 6, 8) B sẽn wa n segd n yãk yam ne b sẽn na n maanegã, b baoa b mens yõ-noogre, n pa sok ‘t’a Zeova bee yɛ ye.’—Ezai 5:11, 12.
Ket-y n sokdẽ t’a ‘Zeova bee yɛ’?
20, 21. a) Rũndã-rũndã, ãnda rãmb n tall a Elize tagsgã buud n bao a Zeova sor-wilgri? b) Wãn to la d tõe n dɩk togs-n-taar ne b tẽebã mak-sõng tɩ naf-do?
20 A Eli no-reesemdã tʋʋmd sẽn wa n sa wã, a sõangd a Elize rɩka a Eli no-reesemdã fuug n kẽng Zʋrdẽ kʋɩlgẽ wã, n tɩ wẽ koomã n soke: “A Eli [Wẽnnaam a Zeova] bee yɛ?” (2 Rĩm dãmba 2:14) A Zeova leokame n wilg t’a vʋʋsma ra bee a Elize zug masã. Bõe la yel-kãngã tõe n zãms tõndo?
21 Bũmb sẽn wõnd woto n zĩnd tõnd wakatã. Kiris-neb kẽer sẽn zae ne vʋʋsem sõngã sẽn da lʋɩ taoor moonegã tʋʋmd pʋgẽ wã maana kaalem. Neb nins b sẽn bobl yɛl-gesg tʋʋmdã vaeesa Gʋlsg Sõamyã la b pʋʋs a Zeova n kos a sor-wilgri. Wakat fãa b ra sokdame tɩ: “A Zeova bee yɛ?” Rẽ kɩtame t’a Zeova kell n wilg a nin-buiidã sor la a ning b tʋʋmdã barka. Tõnd rɩkda togs-n-taar ne b tẽebã bɩ? (Hebre dãmba 13:7) Sã n yaa woto, d na n kell n paa a Zeova siglgã pʋgẽ, n sak a sor-wilgrã, la d tʋm tʋʋmd ning a Zezi Kirist sẽn getã ne d sũur fãa.—Zakari 8:23.
Y na n leokame tɩ bõe?
• Bõe yĩng tɩ d segd n sokdẽ t’a ‘Zeova bee yɛ’?
• Rũndã-rũndã, wãn to la d tõe n paam sokr sẽn yaa: ‘A Zeova bee yɛ’ wã leokre?
• Bõe yĩng tɩ kẽer sẽn pʋʋs n bao Wẽnnaam sor-wilgrã pa paam leokre?
• Biiblã mak-bʋs n wilgd tɩ yaa tɩlae tɩ d ket n ‘makd n bãngd sẽn tat Zusoaba yam’?
[Zãmsgã sogsgã]
[Foto, seb-neng 18]
Bõe yĩng t’a Sayull tɩ bʋg bagre?
[Foto rãmba, seb-neng 20]
Pʋʋs-y, zãms-y la y bʋgs sẽn na yɩl n sɩd bãng ‘a Zeova sẽn beẽ’