“Bɩ y kɩt tɩ yãmb yel-manesem yɩ sõama neb nins sẽn ka pʋʋsd Wẽnnaama sʋka”
“Bɩ y kɩt tɩ yãmb yel-manesem yɩ sõama neb nins sẽn ka pʋʋsd Wẽnnaama sʋka”
“Bɩ y waoog neba fãa. Bɩ y nong ba-biisã. Bɩ y zoe Wẽnnaam. Bɩ y waoog rĩma.”—1 Pɩɛɛr 2:17.
1, 2. a) Bõe la kɩba-kõt yeel a Zeova Kaset rãmbã wɛɛngẽ? b) Bõe yĩng t’a Zeova Kaset rãmbã maood n na n tall yel-manesem sẽn yaa sõma wʋsgo?
YƲƲM a wãn sẽn looge, Amarillo sẽn be Etazĩni babg ning b sẽn boond tɩ Tɛgzasã kɩba-kõt a ye tɩ gesa egiliiz toɛy-toɛy babgẽ be, n wilg a sẽn yã bũmb ningã. A yãame tɩ sull a yembr n da yaa toor wʋsg ne a taabã. A yeelame: “Sẽn na maan yʋʋm a tãabo, m kẽnga a Zeova Kaset rãmbã yʋʋm-yʋʋmd tigis-kãsemsẽ zĩig ning b sẽn boond tɩ Amarillo Civic Center. M sẽn wa n be ne-bã, m ka tol n yã ned sẽn yõgen sɩgaare, sẽn pak bɩɛɛr bɩ sẽn gom gom-dẽgd ye. B ra yaa yɩlma, neb manesem sẽn yaa sõma, sẽn ningd fut tɩ zemse, kʋʋng sẽn be yamleoog mam sẽn zɩ n yã a buudu.” Yaa naoor wʋsg la b pẽg a Zeova Kaset rãmbã woto zʋrno rãmb pʋsẽ. Bõe yĩng tɩ neb sẽn pa a Zeova Kaset rãmb nong n pẽgd-ba?
2 B nong n pẽgda Wẽnnaam sõgen dãmbã b manesem sõma wã yĩnga. Neb wʋsg yel-manesem lebgda yook n paasdẽ, la a Zeova Kaset rãmbã getame tɩ yel-manesem noy sẽn yaa sõma wʋsg tũub yaa bũmb sẽn yaa tɩlae b balengã pʋgẽ. B miime tɩ b sẽn zãad b mensã to-to wã tõe n waoogame bɩ paoog a Zeova la b saam-biisã sẽn yaa kiris-nebã, la tɩ b yel-manesem sõma wã kɩtdame tɩ sɩdã b sẽn moondã tall pãng n paas nebã nifẽ. (Zã 15:8; Tɩt 2:7, 8) Woto, bɩ d ges d sẽn tõe n tall d yel-manesem sẽn yaa sõma wã to-to, tɩ rẽ kɩt tɩ d ket n teend a Zeova la a Kaset rãmbã yʋ-noogo, la d ges rẽ maaneg sẽn nafd tõnd to-to.
Kiris-neb zak pʋgẽ
3. Ne bõe la kiris-neb zagsã rat koglgo?
3 D ges tõnd manesmã zakã pʋgẽ. Sebr a yembr (Die Neuen Inquisitoren: Religionsfreiheit und Glaubensneid) a Gerhard Besier la a Erwin Scheuch sẽn gʋlsã yetame: “Sã n yaa ne [a Zeova Kaset rãmbã], zak yaa bũmb b sẽn segd n kogl sõma-sõma.” Togs-kãngã yaa sɩda, la rũndã-rũndã, zagsã rata koglg yɛl wʋsg taoore. Kamb n be n yaa “ba rãmba la ma rãmb kɩɩsdba,” tɩ kãsemb be n yaa neb “sẽn ka tar nimbãan-zoeere,” bɩ neb “sẽn ka tar yõk-m-menga.” (2 Tɩmote 3:2, 3) Zags pʋsẽ, kẽed-n-taasã pãbda taabã, tɩ roagdbã maand b kambã pãnga, n tʋʋd-ba, la b yõgd-ba bɩ b pa get-b yell ye. Kambã me yaa tõatba, dorg la sɩgaar yũudba, la yoaadba, bɩ b yit b zakẽ wã n tɩ vɩ kɛɛnga. Rẽ fãa yaa ‘zãmaana yam wẽng’ pãn-tusdg sabab yĩnga. (Efɛɛz rãmba 2:1, 2, Sebr Sõngo) D segd n kogla d zagsã ne yam-wẽng kãngã. Wãn to? Yaa d sẽn na n kelg a Zeova saglsã la a sor-wilgrã a sẽn kõ zakã neb yĩngã.
4. Wãn-wãn la kiris-neb zagsã neb segd n sõng taaba?
4 Kẽed-n-taas nins sẽn yaa kiris-nebã sak n deegame tɩ b segd n sõnga taaba, nonglmã wilgri, tẽebã, la yĩngã wɛɛngẽ. (1 Korẽnt dãmba 7:3-5; Efɛɛz rãmba 5:21-23; 1 Pɩɛɛr 3:7) Roagdb nins sẽn yaa kiris-nebã tara zɩɩb sẽn zɩs b kambã wubr wɛɛngẽ. (Yelbũna 22:6; 2 Korẽnt dãmba 12:14; Efɛɛz rãmba 6:4) La kambã me sẽn be kiris-neb zagsẽ wã sã n bɩtẽ, b bãngdame tɩ bãmb me tara zɩɩbo. (Yelbũna 1:8, 9; 23:22; Efɛɛz rãmba 6:1; 1 Tɩmote 5:3, 4, 8) Zak pʋgẽ zɩɩbã tʋkr baoodame tɩ f maan modgre, tɩ f rɩk sard sẽn ka vigsdi, la f tall nonglem la mong-m-meng yam. La zakã neb fãa na n yɩɩ bark n kõ b taabã la ne tigingã, tɩ zems ne modgr ning b sẽn maand n pidsd zɩɩb nins Wẽnnaam sẽn kõ-bã. Sẽn tar yõod n yɩɩda, b waoogda kãadmã Lugenda, sẽn yaa Wẽnnaam a Zeova wã.—Sɩngre 1:27, 28; Efɛɛz rãmba 3:15.
Kiris-neb saam-biirã
5. Bark bʋg la d paamda, d sã n maand tũud-n-taar ne d kiris-nin-taasã?
5 D sẽn yaa kiris-nebã, tõnd me tara zɩɩb n segd n pids d tẽed-n-taasã yĩng tigingã pʋgẽ, la neb nins fãa sẽn yaa “ba-biisa sẽn be dũniyã pʋgẽ wã” yĩnga. (1 Pɩɛɛr 5:9) Tõnd zems-n-taarã ne tigingã tara yõod wʋsg ne tõnd tẽebã laafɩ. Tõnd sã n tigim ne d kiris-nin-taasã, b tũud-n-taarã kengda tẽebo, la d leb n paamd tẽeb rɩɩb sẽn yaa sõma “tʋm-tʋmda sẽn tũud sɩda la sẽn tar yam” sẽn kõtã. (Matɩe 24:45-47) Tõnd sã n tar zu-loeese, d tõe n kẽnga d saam-biisã nengẽ n tɩ paam sagls sẽn yaa sõma sẽn tik Gʋlsg Sõamyã noy zutu. (Yelbũna 17:17, NW; Koɛɛg Soaba 4:9; Zak 5:13-18) Tõnd sã n be ratem pʋgẽ, d saam-biisã pa basd-d ye. Ad Wẽnnaam siglgã pʋgẽ zĩndg sɩd bee barka!
6. Wãn to la a Poll wilg tɩ d tara zɩɩb d kiris-nin-taasã wɛɛngẽ?
6 Baasg zãnga, tõnd pa be tigingã pʋgẽ n na n deegdẽ bal ye, yaa sẽn na yɩl n kõtẽ me. Sɩda, a Zezi yeelame: “Sẽn kõt-a sũ-noog yɩɩda sẽn deegd-a.” (Tʋʋma 20:35, Sebr Sõngo) Tʋm-tʋmd a Poll saglame tɩ d yɩ kõatba, a sẽn wa n gʋls tɩ: “Bɩ tõnd tall tõnd tẽeb kãn-kãe n da yuus ye; tɩ bõe, sẽn kãaba wã yaa sɩda. La bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tigingu wa neb kẽer sẽn maanda ye. La bɩ d sagl taaba, la bɩ d sagl n yɩɩd tõnd sẽn yã tɩ daar kolgdame wã yĩnga.”—Hebre dãmba 10:23-25.
7, 8. Wãn to la d wilgd tɩ yaa kõatba, d tigingã pʋgẽ la ne kiris-neb nins sẽn be tẽns a taabã?
7 Tigingã pʋgẽ, d ‘togsda d saagrã,’ (NW ) d sã n kõt leoore, bɩ d sã n kẽesd d meng tigingã sõss pʋsẽ ne manesem a taaba. Sɩd-sɩda, modgr a woto kengda d saam-biisã raoodo. D kengda b raood me d sã n sõsd ne-b sẽn deng tigisgã la a poore. Rẽ yaa sasa d sẽn tõe n tũnug ne n keng ka-pãng rãmbã tẽebo, n bels sũ-sãoong rãmbã, la bãad dãmbã. (1 Tesalonik rãmba 5:14) Kiris-neb hakɩkã yaa kõtb wʋsg zĩ-kãngã wɛɛngẽ, tɩ rẽ kɩt tɩ neb wʋsg sẽn wat tõnd tigissẽ wã pipi wã sũy noom wʋsg ne nonglem ning b sẽn ne tɩ bee d sʋkã.—Yɩɩl Sõamyã 37:21; Zã 15:12; 1 Korẽnt dãmba 14:25.
8 La pa tõnd mengã tiging neb bal la d segd n nongẽ ye. D segd n nonga dũniyã gill saam-biis fãa. Yaa rẽ n so tɩ wala makre, yamleoog kũun koglg be Rĩung Roog fãa pʋgẽ Rĩung Rotã meeb yĩngã. Tõnd mengã Rĩung Roog tõe n yaa sõma, la d miime tɩ d kiris-nin-taas tusa sẽn be tẽns a taab pa tar zĩig sẽn zems n na n tigim taab ye. Tõnd sã n maand yamleoog kũun Rĩung Rot meebã yĩnga, d wilgda d nonglem ne nin-kãensã, baa ne d sẽn tõe n pa mi-ba.
9. Bõn-kãseng bʋg yĩng n kɩt t’a Zeova Kaset rãmbã nong taaba?
9 Bõe yĩng t’a Zeova Kaset rãmbã nong taaba? Yaa a Zezi n kõ-b noor tɩ b maan woto. (Zã 15:17) La nonglem ning b sẽn tar ne taabã wilgdame tɩ Wẽnnaam vʋʋsem sõngã tʋmda b yembr-yembre, la b fãa zutu. Nonglmã bee ‘vʋʋsem sõngã sẽn womd biis ninsã’ sʋka. (Galat dãmba 5:22, 23, Sebr Sõngo) A Zeova Kaset rãmbã sẽn zãmsd Biiblã, n kẽngd kiris-neb tigissẽ wã, la b pʋʋsd Wẽnnaam wakat fãa wã, kɩtame tɩ nonglmã wilgr yaa nana ne-ba, baa ne b sẽn vɩ dũni ‘neb wʋsg nonglem sẽn lebg maasgã’ pʋgẽ wã—Matɩe 24:12.
D manesmã ne zãmaana neba
10. Sam-bʋg la d tar zãmaan-kãngã neba wɛɛngẽ?
10 A Poll sẽn gom “tõnd saagrã togsg zãma taoorã” (NW ) yell tẽegda tõnd zɩɩb a to. Zãma sʋk mooneg kãngã rat n yeelame me tɩ d moon koe-noogã neb nins sẽn nan pa tõnd saam-biis sẽn yaa kiris-nebã. (Matɩe 24:14; 28:19, 20; Rom dãmba 10:9, 10, 13-15) Mooneg kãng yaa kũun buud a to. Rẽ maaneg baooda sẽka, pãnga, seglgo, zãmsg la f meng laog kẽesg a pʋgẽ. Ne rẽ fãa a Poll gʋlsa woto n paase: “Mam tara Gerɛk rãmba ne weoog neb samde, yam dãmba la sẽn ka yam dãmb samde. Woto yĩnga, mam data ne m sũur fãa n moon Koe-noog yãmb sẽn be Roma me sʋka.” (Rom dãmba 1:14, 15) Wala a Polle, bɩ d yao ‘sam-kãng’ zãnga.
11. Gʋlsg Sõamyã no-kãsems a yiib bʋs n wilgd tõnd sor d manesma ne zãmaanã neb pʋgẽ, la baasg zãnga bõe la d sak n deege?
11 Tõnd tara zɩɩb a taab neb nins sẽn pa d tẽed-n-taasã wɛɛngẽ bɩ? Hal sõma. Yaa sɩd tɩ d sak n deegame tɩ “dũniyã fãa bee wẽng soaba nugẽ.” (1 Zã 5:19) Tõnd miime t’a Zezi yeela woto a karen-biisã wɛɛngẽ: “Bãmb ka dũniyã rẽnd wa mam sẽn ka dũniyã rẽndã.” Baasg zãnga, d vɩɩ dũniyã pʋgẽ, n baood d noor dɩɩb a pʋgẽ, la d paamd nafa toɛy-toɛy a pʋgẽ. (Zã 17:11, 15, 16) Rẽnd d tara zɩɩb zãmaan kãngã pʋgẽ. La zɩɩb bãmb la bʋse? Tʋm-tʋmd a Pɩɛɛr leoka sʋk kãngã. Sẽn deng Zerizalɛm sãoongã bilfu, a gʋlsa sebr n tool Azi Mineer kiris-nebã, la seb-kãnga zĩig a yembr sõngda tõnd tɩ d tall manesem sẽn zems ne dũniyã.
12. Zĩ-bʋg wɛɛngẽ la kiris-nebã yaa ‘sãamb la pa-weto,’ la rẽ kɩtame tɩ b segd n lak b mens ne bõe?
12 Pipi, a Pɩɛɛr yeelame: “Mam zo-nongdse, mam kota yãmba, yãmb sẽn yaa sãamb la pa-wet dũniyã ka wã yĩnga, tɩ yãmb da sak yĩnga ratem wẽnga sẽn zabd ne sɩɩga ye.” (1 Pɩɛɛr 2:11) Tẽebã wɛɛngẽ, kiris-neb hakɩkã yaa ‘sãamba la pa-weto,’ sẽn dat n yeel tɩ sẽn pak-b n yɩɩd b vɩɩmã pʋgẽ yaa vɩɩm sẽn pa satã saagre. Ne sẽn zae-b ne vʋʋsem sõngã yaa saasẽ tɩ ne ‘piis a taabã’ yaa tẽng zug arzãn sẽn wat beoog-daarã. (Zã 10:16; Filip rãmba 3:20, 21; Hebre dãmba 11:13; Wilgri 7:9, 14-17) La yĩngã tʋlsem wẽnsã yaa bõe? Yaa tʋlg n yɩ arzɛk soaba, naam tʋlsem, yoobo, la tʋlsem nins b sẽn bilg tɩ “datem wẽnse,” la ‘rat-wʋsgã.’—Kolos rãmba 3:5, Kãab-paalgã Koe-noogo; 1 Tɩmote 6:4, 9; 1 Zã 2:15, 16.
13. Wãn to la yĩngã tʋlsem wẽns ‘zabd ne tõnd sɩɩgã’?
13 Tʋlsem a woto sɩd ‘zabda ne [tõnd] sɩɩgã.’ B sãamda tõnd zems-n-taarã ne Wẽnnaam la b ningd tõnd sẽn yaa kiris-nebã saagrã (d “sɩɩgã,” bɩ d “vɩɩmã”) yell pʋgẽ. Wala makre, d sã n bɩɩs tʋlsem ne yoob yɛla, wãn to la d tõe n kõ d mensã wa “maan-vɩɩs sẽn yaa sõma la sẽn zems Wẽnnaam yam”? Tõnd sã n lʋɩ laog nonglmã bẽdg pʋgẽ, wãn to la d wilg tɩ d ‘rengd n baooda Wẽnnaam soolem’ nanda? (Rom dãmba 12:1, 2; Matɩe 6:33; 1 Tɩmote 6:17-19) Sẽn são yaa d sẽn na n tũ a Moiiz makrã, n bas dũniyã yamle-yɛlã, la d ning a Zeova tʋʋmdã pipi zĩigẽ d vɩɩmã pʋgẽ. (Matɩe 6:19, 20; Hebre dãmba 11:24-26) Woto yaa bũmb sẽn tar yõod wʋsg sẽn tõe n sõng-d tɩ d tall lagem-n-taar sẽn zems ne dũniyã.
‘Kell-y n tall yel-manesem sẽn yaa sõama’
14. Bõe yĩng tɩ d sẽn yaa kiris-nebã, d maood n na n tall yel-manesem sẽn yaa sõma?
14 Sor-wilgr a to sẽn tar yõod wʋsg n be a Pɩɛɛr goam nins sẽn pʋgdã pʋsẽ: “Bɩ y kɩt tɩ yãmb yel-manesem yɩ sõama neb nins sẽn ka pʋʋsd Wẽnnaama sʋka, tɩ baa bãmb sẽn kãnegd yãmb wa nin-wẽnsã, bãmb na waoog Wẽnnaam b waoonga daare bãmb sẽn na n yã yãmb tʋʋm sõama wã yĩnga.” (1 Pɩɛɛr 2:12) D sẽn yaa kiris-nebã, d maoodame n na n kõ mak-sõngo. Lekollẽ wã, d karemda sõma. D tʋʋm zĩigẽ, d tʋmda wʋsg ne pʋ-peelem, baa d tʋʋmdã taoor soab sã n wõnd nin-toaaga. D sã n be zak pʋgẽ tɩ kẽed-n-taasã tũudum yaa toor-toore, sɩdã bɩ pagã sẽn ya a Zeova Kaset soabã modgda wʋsg n tũud Biiblã noyã. Pa nana wakat fãa ye, la d miime tɩ d manesem sõngã tata a Zeova yam, la naoor wʋsgo rẽ tara pãn-tusdg sẽn yaa sõma neb nins sẽn pa a Zeova Kaset rãmbã zutu.—1 Pɩɛɛr 2:18-20; 3:1.
15. Wãn to la d mi tɩ neb wʋsg sak n deegame t’a Zeova Kaset rãmbã tara yel-manesem sẽn yaa sõma wʋsgo?
15 B tõe n yãame t’a Zeova Kaset rãmb wʋsg tõogd n kõta mak-sõng b manesmã pʋgẽ, d sã n ges b sẽn gom n pẽg-b yʋʋmã sẽn pʋg taabã pʋsẽ wã. Wala makre, Itali zʋrnall a yembr (Il Tempo) wilgame: “Neb nins tʋmd-n-taas sẽn ya a Zeova Kaset rãmbã wilgdame tɩ b yaa tʋmd-tʋmdb sẽn tar pʋ-peelem, sẽn kɩs sɩd ne b tẽebã hal tɩ b wõnd neb sẽn tar yẽesem sẽn loog noor b tẽebã pʋgẽ. Baasg zãnga, b zemsa ne pẽgre, b sẽn yaa burkĩmbã yĩnga.” Arzãntinni, zʋrnall a yembr (Herald) b sẽn yiisd Buenos Aires yeelame: “A Zeova Kaset rãmbã wilga yʋʋma sẽn tong taaba pʋsẽ tɩ b yaa tẽng-n-biis sẽn yaa tʋmdba, burkĩmba, laog kẽgsdba, la neb sẽn zoet Wẽnnaam.” Risi bãngd a Sergei Ivanenko yeelame: “B mii a Zeova Kaset rãmbã dũniyã gill zug wa neb sẽn tũud tẽngã noy sõma, sẽn tɩ yɩɩd fãa wa neb sẽn yaood lampo rãmbã neere.” Zimbabwe tẽngã, zĩig a yembr a Zeova Kaset rãmbã sẽn tũnug ne n maan b tigis-kãseng yel-gɛt yeelame: “Mam yãa Kaset rãmb kẽer sẽn nogd karaas la b pɛgd we-kɛɛngã zĩisi. B basa zĩigã t’a yaa yɩlemd n yɩɩd pĩndã. Yãmb kom-bɩɩsã sakd n tũuda noyã sõma. M nongẽ lame tɩ dũniyã gill pid ne a Zeova Kaset rãmba.”
Kiris-ned sakrã
16. Tõnd zems-n-taar ne dũniyã pãn-soaadb yaa wãn to, la bõe yĩnga?
16 A Pɩɛɛr me goma tõnd zems-n-taarã ne pãn-soaadbã yelle. A yeelame: “Bɩ yãmb sak dũniyã neba tõod fãa Zusoaba yĩnga, a sã n yaa rĩm dãmba sẽn so pãng fãa wala nanambs rĩma sẽn tʋm tɩ b sɩbg neb nins sẽn maand wẽnga la b waoog neb nins sẽn maand neerã. Tɩ bõe, yaa Wẽnnaam daabo tɩ yãmb sẽn maand neerã, yãmb na kɩt tɩ yalemba sĩnd ne b zɩɩlem goama.” (1 Pɩɛɛr 2:13-15) Tõnd tara mi-beoog nafa nins d sẽn paamd goosneema rãmbã sẽn maand yɛlã tɩ zũnd-zãnd ka be wã yĩnga. D tũuda a Pɩɛɛr saglsã, n sakd b noyã n yaood d lampo rãmba. Baa ne d sẽn sakd n deeg tɩ Wẽnnaam kõo sor tɩ goosneema rãmbã sɩbg noy-kɩɩsdbã, bõn-kãseng ning sẽn kɩtd tɩ d sakd dũniyã zu-soben dãmbã yaa “Zusoaba yĩnga.” Yaa Wẽnnaam daabo. Sẽn paase, d pa rat n maan tɩ b wa sɩbg-d wẽng d sẽn maan yĩnga, tɩ rẽ wa ne paoogr a Zeova yʋʋrã zug ye.—Rom dãmba 13:1, 4-7; Tɩt 3:1; 1 Pɩɛɛr 3:17.
17. Neb sẽn yaa ‘yalemb’ sã n kɩɩsd tõndo, ne bõe la d tõe n kɩs sɩda?
17 Zu-bʋko, neb sẽn tar zu-sobend la b yaa ‘yalemba’ namsda tõnd bɩ b kɩɩsd tõnd ne manesem a taaba, wala makre n kɩtdẽ tɩ b yelgd goam sẽn sãamd tõnd yʋʋrã. Ne rẽ fãa, wakat ning a Zeova sẽn yãkã sã n ta, b ziri wã wat n baas n pukdame, tɩ b sɩd sĩnd b “zɩɩlem goama.” Tõnd yel-manesmã n wilgd bãmb sẽn yetã sã n yaa sɩd bɩ pa sɩda. Yaa rẽ n so tɩ goosneema wã taoor dãmb nins sẽn tar pʋ-peelmã pẽgd tõnd d maan neerã yĩnga.—Rom dãmba 13:3; Tɩt 2:7, 8.
Wẽnnaam yembse
18. D sẽn yaa kiris-nebã, yel-bʋs pʋsẽ la d pa segd n tũnug ne d paam-m-mengã ne manesem sẽn pa zemse?
18 A Pɩɛɛr keoogda woto masã tɩ: “Yãmb sẽn yaa burkĩmbã, da sak-y tɩ yãmb lohorma yɩ wẽng lilldg ye, la bɩ y maan wa Wẽnnaam tʋm-tʋmdba.” (1 Pɩɛɛr 2:16; Galat dãmba 5:13) Rũndã-rũndã, tõnd sẽn bãng sɩd ning sẽn be Biiblã pʋgẽ wã kõo tõnd paam-m-meng ne ziri tũudmã zãmsgo. (Zã 8:32) Sẽn paase, d tara yam-yãkre, n tõe n yãk d sẽn date. La ne rẽ fãa, d pa tʋmd ne d paam-m-mengã ne manesem sẽn ka zems ye. D sã n wa yãkd tũud-n-taase, futu, meng manegre, reem, rɩɩb la bõn-yũudl menga, d tẽrame tɩ kiris-neb hakɩkã yaa Wẽnnaam yembse, sẽn pa baood n na n ta b mens yam bal ye. D basda d na yɩ d mensã yĩns tʋlsem yembse, bɩ dũni kãngã bõn-paalã la a manesem paalã sẽn pukdã yembse, n yãk n na n maan a Zeova raabã.—Galat dãmba 5:24; 2 Tɩmote 2:22; Tɩt 2:11, 12.
19-21. a) Tõnd tagsg yaa wãn-wãn ne pãn-soaadbã? b) Wãn to la kẽer tall ‘nonglem ne ba-biisã fãa’? d) Tõnd zɩɩb sẽn yaa kãseng n yɩɩdã la bʋgo?
19 A Pɩɛɛr kẽnga taoor n yeele: “Bɩ y waoog neba fãa. Bɩ y nong ba-biisã. Bɩ y zoe Wẽnnaam. Bɩ y waoog rĩma.” (1 Pɩɛɛr 2:17) Wẽnnaam a Zeova sẽn basd tɩ ninsaalbã talld zu-sobend buud toor-toorã yĩnga, d waoogda nin-kãens wa sẽn zemse. D pʋʋsda b yĩng menga, sẽn na yɩlga, tɩ d ket n tar sor n tõe n zãms nebã koe-noogã laafɩ la wẽn-sakr pʋgẽ. (1 Tɩmote 2:1-4) La wakat kãng pʋgẽ me, d ‘nonga ba-biisa fãa.’ Wakat fãa, d tʋmda d saam-biisã sẽn yaa kiris-nebã nafr yĩnga, la pa b wẽng yĩng ye.
20 Wala makre, Afirik tẽng a yembr bu-rãmb sẽn da wa n yik n zabd taab sasa, a Zeova Kaset rãmbã talla kiris-neb manesem sẽn yɩ toor vẽenega. Sʋɩss kɩbay sebr a yembr (Reformierte Presse) yeelame: “Yʋʋmd 1995, African Rights . . . tõog n wilgame tɩ egiliiz rãmbã fãa kẽesa b toog [zabrã pʋgẽ], sã n dok a Zeova Kaset rãmbã.” Yel-beedã kɩbar sẽn yelg dũniyã fãa wã, a Zeova Kaset rãmbã sẽn be Eropã yɩɩ tao-tao n tʋm dɩɩb la sõngr tɩbsgã wɛɛngẽ tɩ b tɩ kõ b saam-biisã la neb a taab sẽn be tẽn-kãnga sẽn da be toog pʋgẽ wã. (Galat dãmba 6:10) B tũu Yelbũna 3:27 sẽn yet woto wã: “Fo sã n tõe n sõng f yaka, bɩ f sõng-a la f ra zãgs ye.”
21 La zɩɩb sẽn yaa kãseng n be n yɩɩd waoogr ning d sẽn segd n kõ dũniyã zu-sobend buud fãa, la nonglem ning d sẽn segd n tall ne d saam-biisã menga. Yaa zɩɩb bʋgo? A Pɩɛɛr gʋlsame: “Bɩ y zoe Wẽnnaam.” Tõnd zɩɩbã a Zeova taoor yɩɩda tõnd zɩɩbã ninsaal buud fãa taoor zĩig sẽn zãre. Bõe yĩng tɩ yaa woto? La wãn to la d tõe n maan tɩ zemse, tõnd zɩɩbã ne Wẽnnaamã, la tõnd zɩɩbã ne pãn-soaadbã sʋka? B na n leoka sʋgs-kãensã sõsg ning sẽn pʋgdã pʋgẽ.
Y tẽrame bɩ?
• Zɩɩb bʋs la kiris-nebã tar zak pʋgẽ?
• Wãn to la d tõe n tall kũun yam tigingã pʋgẽ?
• Zɩɩb bʋs la d tar zãmaana neb wɛɛngẽ?
• Nafa bʋs la d paamda, d sã n kell n tall yel-manesem sẽn yaa sõma wʋsgo?
[Zãmsgã sogsgã]
[Foto, seb-neng 19]
Wãn to la kiris-neb zak tõe n yɩ sũ-noog sẽn yaa kãseng zĩiga?
[Foto rãmba, seb-neng 20]
Bõe yĩng t’a Zeova Kaset rãmbã nong taaba?
[Foto rãmba, seb-neng 20]
D tõe n wilga d nonglem ne d saam-biisã, baa d sã n pa mi-b bɩ?