“Yaa yãmb vẽenem pʋgẽ la tõnd tõe n yã vẽenem”

VẼENEM yaa bũmb tõnd sẽn get yaalg-yaalga, hal tɩ kuurã wã wa kup tɩ d sakã lebg lika. Zu-noogo, tõnd wĩntoogã sẽn yaa “vẽenem yẽgrã” pa kupd lae-lae ye. La ne wĩntoogã vẽenem maasem, d tõe n yãame, n dɩ, n vʋʋse, la d vɩɩmde.

Vẽenemã sẽn yaa tɩlae ne vɩɩmã yĩnga, pa segd n ling-du, b sẽn togs Sɩngr sebrã pʋgẽ tɩ vẽenemã puka naanegã pipi daarã ye. “Wẽnnaam yeelame: ‘Vẽenem, zĩndi!’ La vẽenem zĩndame.” (Sɩngre 1:3) Neb sẽn yɩ wẽn-tũudb wala Rĩm a Davɩɩd sak n deega wakat fãa t’a Zeova yaa vɩɩmã la vẽenemã yẽgre. A Davɩɩd gʋlsame: “Tɩ bõe, vɩɩm ko-bundim zĩig bee ne yãmba. Yaa yãmb vẽenem pʋgẽ la tõnd tõe n yã vẽenem.”—Yɩɩl Sõamyã 36:10.

A Davɩɩd goama paamda pidsg sɩd-sɩd la makr wɛɛngẽ. Sebr a yembr (Encyclopædia Britannica) yetame: “Sɩd-sɩda, yaa vẽenemã n yaa sabab tɩ tõnd tõe n yã.” Seb-kãng paasda woto: “Kɩbayã sẽn tat ninsaal kalkõtã tũnugda ne ninã n yɩɩd bũmb a to fãa.” Sẽn mik tɩ bũmb wʋsg tõnd sẽn zãmsd bee ne nifr sẽn dat vẽenem sẽn na yɩl n yã sõma wã yĩnga, b tũnugda ne vẽenemã me Gʋlsg Sõamyã pʋgẽ makr wɛɛngẽ.

Woto, a Zezi yeela a karem-biisã: “Mam yaa dũniyã vẽenem. Ned ninga sẽn tũud maam, a kõn kẽn lik pʋgẽ ye, la a na paam vɩɩm vẽenem.” (Zã 8:12) Makr vẽenem kãng a Zezi sẽn gom a yellã ra yaa sɩdã koɛɛg a sẽn moona, sẽn da tõe n vẽneg a kɛlgdbã yam la b sũyã. Yʋʋm wʋsg lik poore, a Zezi karen-biisã ra tõee masã n wʋm Wẽnnaam daabã a sẽn yãk ãdem-biisã yĩngã la saagr ning Rĩungã sẽn kõtã võore. Sɩd ra yaa “vɩɩm vẽenem,” bala bãng-kãng ra tõe n tall-b lame n kẽng vɩɩm sẽn pa sat zĩigẽ. A Zezi yeela woto pʋʋsg a sẽn taas a saasẽ Ba wã pʋgẽ: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” (Zã 17:3) Bɩ d ra tol n ges tẽeb vẽenem kãng wa bõn-zaalg ye!