A Zeova wilgda tõnd d sẽn segd n sõd d rasma to-to
A Zeova wilgda tõnd d sẽn segd n sõd d rasma to-to
“Bɩ y wilg tõnd tɩ d sõd tõnd dasma neere tɩ d sũyã zãms yam.”—YƖƖL SÕAMYÃ 90:12.
1. Bõe yĩng tɩ zems tɩ d kos a Zeova t’a wilg tõnd d sẽn segd n “sõd tõnd dasma” to-to?
WẼNNAAM A ZEOVA yaa tõnd Naanda la Vɩɩm-Kõta. (Yɩɩl Sõamyã 36:10; Wilgri 4:11) Rẽ n so, tɩ ned ba a ye pa tõe n wilg tõnd d sẽn na n dɩk d yʋʋmã n tʋm ne yam to-to n yɩɩd yẽ ye. Rẽnd zemsame la yɩɩl-gʋlsdã sẽn kos Wẽnnaam woto wã: “Bɩ y wilg tõnd tɩ d sõd tõnd dasma neere tɩ d sũyã zãms yam.” (Yɩɩl Sõamyã 90:12) Sɩd zemsame tɩ d maag d yĩns n vaees Yɩɩl Sõamyã 90 wã, a soab ning pʋgẽ d sẽn yãt kos-kãngã wã. La pipi, bɩ d ges yɩɩn-kãngã Wẽnnaam sẽn vẽneg tɩ b gʋlsã tags-kãsems koɛɛg-koɛɛga.
2. a) Ãnd n maan Yɩɩl Sõamyã 90 soabã, la tõeeme tɩ yaa wakat bʋg la b gʋls-a? b) Wãn to la Yɩɩl Sõamyã 90 soabã segd n kɩt tɩ tõnd ges vɩɩmã?
2 Yɩɩl Sõamyã 90 soabã zugẽ goamã yetame tɩ yaa “Wẽnnaam dao a Moiiz pʋʋsgo.” Sẽn mik tɩ yɩɩn-kãng wilgda vẽeneg tɩ ninsaal vɩɩmã yaa koɛɛgã yĩnga, yaa wa b gʋls-a-la Israɛll nebã sẽn paam fãagr ne Ezipt yembdã poore, la b yʋʋm 40 so-toakã rasempʋɩɩgẽ wã sasa, sẽn yɩ wakat ning zãmaan kɩɩsdã neb tusa sẽn ki n sa wã poore. (Sõdbo 32:9-13) Sẽn yaa to-to fãa, Yɩɩl Sõamyã 90 soabã wilgdame tɩ ninsaalbã sẽn pa zems zãngã yõy yaa koeese. Rẽ yaa vẽeneg tɩ d segd n dɩka d rayã sẽn tar yõodã n tʋm ne yam.
3. Yaa kɩba-kãsems bʋs n be Yɩɩl Sõamyã 90 soabã pʋgẽ?
3 Yɩɩl Sõamyã 90 wã pʋgẽ, verse a 1 n tɩ ta a 6 wilgdame tɩ ya a Zeova n yaa tõnd wakat sẽn kõn sa zĩndg zĩiga. Verse a 7 n tɩ ta 12 wilgda bũmb ning sẽn tõe n sõng tõnd tɩ d rɩk d yʋʋmã sẽn loogd tao-tao wã n tʋm tɩ ta a yam. La wa b sẽn wilg verse 13 n tɩ ta 17 wã, d tʋlla ne d sũur fãa n dɩ a Zeova nonglmã sẽn naag ne sõmblmã la a barka nafre. Yaa sɩd tɩ yɩɩn-kãngã pa rengd n togsd tõnd mengã sẽn na n maan bũmb ning a Zeova balengã pʋgẽ ye. Baasg zãnga, tõnd ned kam fãa segd n talla wẽn-zoeer tagsg ning sẽn be yɩɩn-kãngã pʋgẽ wã ne d sũur fãa. Woto yĩnga, bɩ d ges Yɩɩl Sõamyã 90 soabã wala neb sẽn dɩk b mens n kõ Wẽnnaam sẽn segd n ges-a to-to.
A Zeova yaa tõnd ‘laafɩ zĩiga’
4-6. Wãn to la a Zeova yaa “laafɩ zĩig” n kõ tõndo?
4 Yɩɩl-gʋlsdã sɩngda ne gom-kãensã: “[Zeova, NW ] yãmb yaa tõnd laafɩ zĩig zamaan fãa. Hal sẽn deng tãens sẽn nan ka naane, la yãmb sẽn nan ka naan tẽnga ne dũniyã [wala ne pag rogem toogo, NW ], yãmb yaa Wẽnnaam wakat sẽn ka sɩngr tɩ ta wakat sẽn ka sɛɛbo.”—Yɩɩl Sõamyã 90:1, 2.
5 Ne tõndo, “Wẽnnaam sẽn ka sɛɛb” a Zeova n yaa tõnd “laafɩ zĩig[a],” tẽeb zĩ-lilldga. (Rom dãmba 16:26) D tara bãane, bala d miimi tɩ wakat fãa a bee tõnd sõngr yĩnga, n ‘wʋmd d pʋʋsgo.’ (Yɩɩl Sõamyã 65:3) Tõnd sẽn dɩk d yɩɩrã fãa n dogl d yĩngr Ba wã a Biribl nongrã maasem yĩngã, ‘Wẽnnaam laafɩ sẽn yɩɩd neba bãngr fãa gũuda tõnd sũyã la tõnd tagsgo.’—Filip rãmba 4:6, 7; Matɩe 6:9; Zã 14:6, 14.
6 Tõnd tara tẽeb bãane, bala makr wɛɛngẽ, a Zeova yaa “laafɩ zĩig” n kõ tõndo. A leb n kõt-d-la ‘roto.’ Ro-kãens makda a nin-buiidã tigimsi, sẽn yaa tẽeb bãan zĩisi, pe-kɩɩmb sẽn tar nonglmã sẽn sõngdẽ wʋsg tɩ tõnd tall bãanã. (Ezai 26:20; 32:1, 2; Tʋʋma 20:28, 29, Sebr Sõngo) Sẽn paase, tõnd neb kẽer sẽn yɩ Wẽnnaam sõgen dãmb n kaoos bee kiris-neb zags pʋsẽ, n yã d toor t’a yaa ‘laafɩ zĩig zãmaan fãa.’
7. Wãn to la b ‘naan’ tãensã la b naan tẽngã “wala ne pag rogem toogo”?
7 A Zeova ra beeme tɩ b nan ka ‘naan’ tãensã, bɩ tɩ b nan ka naan tẽngã ‘wala ne pag rogem toog’ ye. Ne ninsaal nif gesgo, tẽngã la bũmb nins sẽn be a zugã võor wʋmb sẽn yaa toogã fãa maaneg tũu ne modgr sẽn yaa kãsenga. La yɩɩl-gʋlsdã sẽn yet tɩ b ‘naana’ tãensã la tɩ b naana tẽngã ‘wala ne pag rogem toogã,’ a wilgda waoogr sẽn yaa kãseng ne tʋʋm kẽeng ning b sẽn maane, a Zeova sẽn wa n naan bõn-kãensã wã. Tõnd me pa segd n tall waoogr la mi-beoog woto ne Naandã nug-tʋʋmd sɩda?
A Zeova bee tõnd sõngr yĩng wakat fãa
8. B sẽn yet t’a Zeova yaa Wẽnnaam ‘wakat sẽn ka sɩngr n tɩ ta wakat sẽn ka saabã’ rat n yeelame tɩ bõe?
8 “Yãmb yaa Wẽnnaam wakat sẽn ka sɩngr tɩ ta wakat sẽn ka sɛɛbo [“sẽn ka yãk tɛka,” NW ],” woto la yɩɩl-gʋlsdã yɩɩl-yã. “Wakat sẽn ka yãk tɛka” tõe n gomda yɛl sẽn tar tɛk yelle, tɩ b pa wilg a kaoosgã takɩ ye. (Yikri 31:16, 17, NW; Hebre dãmba 9:15, NW ) Yɩɩl Sõamyã 90:2 la zĩis a taab Hebre Gʋlsg Sõamyã pʋgẽ, ‘wakat sẽn ka sɛɛbã [“sẽn ka yãk tɛka,” NW ]’ sɩd rat n yeelame tɩ “wakat sẽn ka sɛɛbo.” (Koɛɛg Soaba 1:4) Tõnd yamã pa tõe n wʋm wãn to la Wẽnnaam tõog n be wakat fãa ye. La a Zeova yaool n pa tar sɩngre a pa na n tall saab me. (Habakuk 1:12, Sebr Sõngo) A na n vɩɩ wakat fãa la a be tõnd sõngr yĩnga.
9. Ne wakat a wãn la yɩɩl-gʋlsdã mak ninsaal vɩɩm yʋʋm tusri?
9 Yɩɩl-gʋlsdã paama vʋʋsem sõngã vẽnegr n na n wilg tɩ ninsaal vɩɩm yʋʋm tusr yaa wakat koɛɛg Naandã sẽn pa tar saabã taoore. A goma ne Wẽnnaam n yeel woto: “Yãmb kɩtdame tɩ ninsaalba leb n lebg tẽng tom, la yãmb yetame: ‘Ninsaalba, bɩ y leb n lebe.’ Tɩ bõe, yʋʋm tusr yaa wa daar a ye bal yãmb nifĩ. Zaamẽ sẽn loog wẽnda yʋng a ye bala.”—Yɩɩl Sõamyã 90:3, 4.
10. Wãn to la Wẽnnaam maand tɩ ninsaal ‘leb tẽng tomẽ’?
10 Ninsaal yaa kiida, tɩ Wẽnnaam maan t’a ‘lebd tẽng tomẽ.’ Sẽn dat n yeel tɩ ninsaal lebgda ‘tom,’ wa tãn-dagr sẽn wer bɩ sẽn bʋke. Sɩda, a Zeova yeelame: ‘Lebg tẽnga tom fo sẽn yi a pʋgẽ wã.’ (Sɩngre 2:7; 3:19) Rẽ paka nebã fãa, pãens rãmb la ka pãng rãmba, arzɛk rãmb la naong rãmba, bala ninsaalba sẽn pa zems zãngã, b ba a ye ‘ka tõe n yao a saam-biig fãagr yĩng ye, walla kõ Wẽnnaam sẽn zems a fãagr yaood ye, tɩ yẽ kell n vɩɩmd n kaoos n ka yã kɩɩm-kulg ye.’ (Yɩɩl Sõamyã 49:7-10) La ad d sɩd tara mi-beoogo, ‘Wẽnnaam sẽn kõ b Biigã sẽn-ka-to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn-ka-sɛta’ yĩnga!—Zã 3:16; Rom dãmba 6:23.
11. Bõe yĩng tɩ d tõe n yeel tɩ wakat sẽn kaoos wʋsg ne tõnd yaa koɛɛg wʋsg ne Wẽnnaam?
11 A Zeova nifẽ, a Metusela mengã sẽn vɩɩmd yʋʋm 969 wã pa vɩɩmd tɩ ta daar a yembr ye. (Sɩngre 5:27) Wẽnnaam nifẽ, yʋʋm tusr pa yɩɩd wa zaamẽ sẽn loogã, sẽn yɩ lɛɛr 24 ye. Yɩɩl-gʋlsdã leb n wilgame tɩ ne Wẽnnaam, yʋʋm tusr yaa wala gũud sẽn gũ lɛɛr a naas sik zĩigẽ. (Bʋkaoodba 7:19) Rẽnd vẽenega, wakat sẽn kaoos wʋsg ne tõnd yaa koɛɛg wʋsg ne Wẽnnaam a Zeova sẽn be wakat sẽn ka sɩngr la ka saabã.
12. Wãn to la Wẽnnaam ‘dɩkd’ ninsaalbã?
12 Sẽn yaa lebend ne Wẽnnaam sẽn be wakat sẽn pa satã, ninsaal vɩɩmã masã sɩd yaa koɛɛga. Yɩɩl gʋlsdã yeelame: “Yãmb dɩkda bãmb n loogd wa ko-zoetem, bãmb yaa gõeem. Yibeoogo bãmb yita wa moodo. A tobda yibeoogo n ningd puudu, la zaabre a zelgdame n kʋɩtẽ.” (Yɩɩl Sõamyã 90:5, 6) A Moiiz yãa Israɛll neb tusa sẽn ki we-raoogẽ wã, tɩ Wẽnnaam ‘dɩk-b’ wa ko-zoetem. Yɩɩllã bab-kãngã b ning-a-la woto: ‘Fo rɩka ninsaal n kẽes kũum gõeem pʋgẽ.’ (Yɩɩl Sõamyã 90:5, 6, New International Version) Sẽn paase, ninsaalb sẽn pa zems zãngã yõor kaoosg yaa “gõeem” bal sẽn kaoosd wakat bilfu, wala yʋng suusg bala.
13. Wãn to la d yaa wa ‘mood’ bala, la wãn to la rẽ segd n toeem tõnd tagsgã?
13 Tõnd yaa wa ‘yibeoog mood sẽn ningd puudu,’ la sẽn zelgd n kʋɩt zaabre, wĩntoogã tʋʋlg sẽn yaa wʋsgã yĩnga. N-ye, tõnd vɩɩmã yaa koɛɛg wa mood sẽn zelgd n kʋɩt daar n yɛnga. Woto yĩnga, bɩ d ra sãam vɩɩmã yʋʋm sẽn tar yõod wʋsgã ye. Sẽn yaa lebende, d segd n baoa Wẽnnaam sor-wilgr n bãng d sẽn na n tʋm to-to ne d yʋʋmã sẽn ketã zãmaan kãngã pʋgẽ.
A Zeova sõngda tõnd tɩ d ‘sõd d rasma’
14, 15. Yɩɩl Sõamyã 90:7-9 pidsa wãn to Israɛll nebã zutu?
14 Yɩɩl gʋlsdã paasa woto Wẽnnaam wɛɛngẽ: “Yãmb sũura puugame tɩ y namsd [“baas,” NW ] tõndo, la yãmb sũ-yikra yɩkda tõnd pelense. Yãmb pukda tõnd yel-wẽna yãmb taoore, la bũmb nins tõnd sẽn soos n maana pukda yãmb neng vẽenem pʋgẽ. Tõnd dasma fãa loogda yãmb sũ-yikra yĩnga la tõnd yʋʋma menema wa siri.”—Yɩɩl Sõamyã 90:7-9.
15 ‘Wẽnnaam sũurã puugame t’a baas’ Israɛll nebã sẽn pa tar kɩs-sɩdã. ‘A sũ-yikrã yɩka b pelense.’ Kẽer “kii weooga pʋgẽ,” Wẽnnaam sẽn sɩbg-b yĩnga. (1 Korẽnt dãmba 10:5) A Zeova ‘puka b yel-wẽna b taoore.’ A kɩtame tɩ b kolg n togs b wẽngã b sẽn maan zãma sʋkã yĩnga, la baa b ‘sẽn soos n maan bũmb ninsã,’ bɩ b yel-wẽn sẽn solgã ra ‘pukda yẽ neng vẽenem taoore.’ (Yelbũna 15:3) Wẽnnaam sũur yika ne Israɛll nebã sẽn pa tek yam n kos sugrã, tɩ ‘b yʋʋma menem wa siri.’ Yel-kãngã wɛɛngẽ, tõnd mengã vɩɩm sẽn yaa koɛɛgã yaa wala vʋʋsem sẽn yit tõnd no-bɩmsẽ wã n wõnd sir bala.
16. Neb kẽer sã n solgd n maand yel-wẽna, yaa bõe la b segd n maane?
16 Ned sã n be tõnd sʋkã n solgd n maand yel-wẽnã, a tõe n solg-a-la neb a taabã wakat bilf pʋgẽ. La tõnd wẽngã d sẽn solg n maandẽ wã bee ‘a Zeova neng vẽenem taoore,’ la tõnd tʋʋmã na n sãama zems-n-taar d sẽn tar ne-a wã. Sẽn na yɩl n lebs n paam zood ne a Zeova, d segd n pʋʋsame n kos-a sugri, n bas d yel-wẽnã, la d sak tigingã kãsem dãmbã sõngr tẽebã wɛɛngẽ ne mi-beoogo. (Yelbũna 28:13; Zak 5:14, 15) Ad woto sɩd são wʋsg n yɩɩd d ‘yʋʋmã sẽn na n menem wa siri,’ n wa kɩt tɩ d kong vɩɩm sẽn pa satã!
17. Naoor wʋsgo nebã vɩɩmdedame n ta yʋʋm a wãna, la tõnd yʋʋmã pida ne bõe?
17 Yɩɩl-gʋlsdã yeela woto ninsaal yõorã woglem wɛɛngẽ: “Tõnd yʋʋma tõnd vɩɩm wakat yaa yʋʋm pis-yopoe, la yĩns keelem sã n beẽ, b tõe n taa pis-nii. La baa bãmb sõor woglem sẽn yaa woto wã, yaa toog ne sũ-sãoong bala; tɩ bõe, bãmb loogda tao-tao, tõnd loogdame.” (Yɩɩl Sõamyã 90:10) Naoor wʋsgo, nebã vɩɩmdame tɩ kaoos n ta yʋʋm 70, la a Kalɛɛb sẽn da wa n tar yʋʋm 85, a togsame t’a ra ket n tara pãng wʋsgo. Neb a taab yʋʋm sẽn yɩɩg rẽ wʋsg yɩɩ a Aarõ (123), a Moiizi (120), la a Zozue (110). (Sõdbo 33:39; Tõodo 34:7; Zozue 14:6, 10, 11; 24:29) La zãmaan ning sẽn yi Eziptã sẽn pa tall tẽebã, b rãmb nins b sẽn sõd yʋʋm sẽn ta 20 la sẽn yɩɩd rẽ wã kii yʋʋm 40 pʋgẽ. (Sõdbo 14:29-34) Rũndã-rũndã, tẽns wʋsg pʋsẽ, naoor wʋsgo, ninsaalbã vɩɩm kaoosg ket n zemsa wa yɩɩl-gʋlsdã sẽn bilgã bala. Tõnd vɩɩmã pida ne “toog la sũ-sãoong bala.” B loogda tao-tao, tɩ ‘tõnd looge.’—Zoob 14:1, 2.
18, 19. a) “Sõd tõnd dasma neere tɩ tõnd sũyã zãms yam” rat n yeelame tɩ bõe? b) Tõnd sã n tall yam na n tusa tõnd tɩ d maan bõe?
18 Yɩɩl-gʋlsdã yɩɩla woto n paase: “Ãnda n dag n na n bãng yãmb sũ-puugra pãnga n zoe rabeem wa sẽn zems yãmb sũ-yikrã? Bɩ y wilg tõnd tɩ d sõd tõnd dasma neere tɩ d sũyã zãms yam.” (Yɩɩl Sõamyã 90:11, 12) Tõnd ned ba a yembr pa mi Wẽnnaam sũ-yikrã bɩ a sũ-puugrã pãng sẽn tõe n ta zĩig ning ye, la rẽ segd n kɩtame tɩ tõnd zoe a Zeova ne waoogr zoees n paase. Sɩda, rẽ segd n tusa tõnd tɩ d kos-a t’a wilg-d “d [sẽn tõe n maan to-to n] sõd tõnd dasma neere tɩ d sũyã zãms yam.”
19 Yɩɩl gʋlsdã goam yaa pʋʋsg a sẽn maan n kos a Zeova t’a zãms a nin-buiidã tɩ b bãng n mag b rasmã sẽn ketã n dɩk-b n tʋm tɩ ta a yam. Ned sã n vɩɩmd yʋʋm 70, yaa rasem 25 500 la a vɩɩmd-yã. La baa tõnd yʋʋmã sẽn yaa to-to, ‘tõnd ka mi beoog yell ye. Tõnd vɩɩm yaa bõe? Tõnd wẽnda wa wulug sẽn be wakat bilf bala n yaool n loogdẽ.’ (Zak 4:13-15) Sẽn mik tɩ ‘wakat la yel-lingdim n paamd tõnd fãa’ wã yĩnga, d pa tõe n bãng d sẽn na n vɩɩmd n kaoos to-to ye. Woto yĩnga, bɩ d pʋʋs n paam yam n mao ne yel-toodã, n tall manesem sẽn zems ne neb a taabã, la d maan d sẽn tõe a Zeova tʋʋmdã pʋgẽ masã menga, rũndã! (Koɛɛg Soaba 9:11, NW; Zak 1:5-8) A Zeova tũnugda ne a Gomdã, a vʋʋsem sõngã la a siglgã n wilgd tõnd sore. (Matɩe 24:45-47; 1 Korẽnt dãmba 2:10; 2 Tɩmote 3:16, 17) D sã n tar yam, tusda tõnd tɩ d ‘reng n bao Wẽnnaam soolem,’ la d rɩk d rasmã n ning a Zeova ziir la d noog a sũuri. (Matɩe 6:25-33; Yelbũna 27:11) Yaa sɩd tɩ pa d sẽn na n balemd-a ne d sũur fãa wã la d zu-loeesã fãa na n sa ye, la rẽ sɩd wata ne sũ-no-kãsenga.
A Zeova barkã kõta tõnd sũ-noogo
20. a) Wãn to la Wẽnnaam ‘zoet nimbãanega’? b) A Zeova manesem na n yɩɩ wãn to ne tõndo, d sã n beeg beeg-kãseng n tek yam n kos sugri?
20 Ad sɩd ra na n yɩẽ-la sõma wʋsgo, d sã n da tõe n kɩdem d vɩɩmã sẽn ketã fãa sasa! Rẽ wɛɛngẽ wã a Moiiz kosa woto: “Zusoaba, bɩ y leb n wa. A na n taa dabʋre? Bɩ y zoe yãmb tʋm-tʋmdba nimbãanega. Pid-y tõnd ne yãmb nonglem yibeoog fãa tɩ tõnd tɩge, la tõnd na n kaasame n maan sũ-noog d vɩɩma tɛka.” (Yɩɩl Sõamyã 90:13, 14; tẽngr notã) Wẽnnaam pa kongd ye. Baasg zãnga, a ‘zoeta nimbãanega,’ ‘n sigsd a sũur’ n bas sɩbgrã, sã n mik t’a sẽn yeel t’a na n waa ne sɩbgrã kɩtame tɩ wẽng maandbã tek yam n kos sugr n toeem b manesmã. (Tõodo 13:18) Woto, baa tõnd sã n beega beeg-kãsenga, n yaool n sɩd tek yam n kos sugri, a Zeova na n ‘pida tõnd ne a nonglem,’ la d na n paama bʋʋm n ‘kaas ne sũ-noogo.’ (Yɩɩl Sõamyã 32:1-5) La d sã n tar vɩɩm manesem sẽn yaa tɩrga, d na n mikame tɩ Wẽnnaam nong-d-la wakat fãa, la d na n tõogame n “maan sũ-noog d vɩɩma tɛka.”
21. Tõeeme tɩ bõe la a Moiiz ra kot Yɩɩl Sõamyã 90:15, 16 pʋgẽ?
21 Yɩɩl-gʋlsdã pʋʋsa woto ne a sũur fãa: “Bɩ y kõ tõnd sũ-noog sẽn zemsd dasem nins yãmb sẽn da sɩbg tõndã, la yʋʋm nins tõnd sẽn yã wẽngã. Bɩ y kɩt tɩ yãmb tʋm-tʋmdba yã y tʋʋmde, la tɩ y naama zĩnd b kamba zutu.” (Yɩɩl Sõamyã 90:15, 16) A Moiiz ra kota Wẽnnaam t’a ning Israɛll bark n kõ-a sũ-noog tɩ ta, bɩ tɩ kaoos wa wakat ning b sẽn da paam toogã, b sẽn da wa n be yel-beedã pʋgẽ wã. A kosame tɩ ‘tʋʋmd’ ning Wẽnnaam sẽn maand n ningd Israɛll nebã barkã lebg vẽeneg ne A sõgen dãmbã, la a maan t’A ziirã yɩ vẽeneg ne b komdibli wã bɩ b yagensã. Wa sẽn zemse, d tõe n pʋʋsame tɩ bark wa ãdem-biis sẽn yaa sakdbã zut Wẽnnaam dũni paalgã pʋgẽ.—2 Pɩɛɛr 3:13.
22. Sã n yaa ne Yɩɩl Sõamyã 90:17, zemsame tɩ d pʋʋs n kos bõe?
22 Yɩɩl Sõamyã 90 soabã baasda ne bõos-kãngã: “La bɩ Zusoaba tõnd Wẽnnaam maan tõnd neere tɩ d nus tʋʋmd yalse. N ye, bɩ y kɩt tɩ tõnd nus tʋʋma yalse.” (Yɩɩl Sõamyã 90:17) Gom-kãensã wilgdame tɩ zemsame tɩ d pʋʋs Wẽnnaam t’a ning modgr nins d sẽn maand a tʋʋmdã pʋgẽ wã barka. D yaa kiris-neb sẽn zaeyã bɩ d yaa b tũud-n-taasã sẽn yaa “piis a taab[ã],” d sũy nooma ‘Wẽnnaam sẽn maan tõnd neerã’ yĩnga. (Zã 10:16) Ad d sũy sɩd yaa noogo, Wẽnnaam sẽn ‘maan tõnd neer tɩ d nus tʋʋma yals’ Rĩungã mooneg pʋgẽ la ne manesem a taabã!
Bɩ d ket n sõt d rasma
23, 24. Wãn to la d tõe n dɩ Yɩɩl Sõamyã 90 soabã zug bʋgsg nafre?
23 Tõnd sẽn bʋgs Yɩɩl Sõamyã 90 soabã zugã segd n kɩtame tɩ d teeg a Zeova sẽn yaa tõnd “laafɩ zĩigã” n paase. D sã n tags a sẽn wilg vɩɩmã sẽn yaa koɛɛg to-to wã zugu, d segd n bãnga sõma n paas tɩ d rata Wẽnnaam sor-wilgr sẽn na yɩl n bãng n sõd d rasmã. La d sã n pẽdg n ket n baood yam ning sẽn yit Wẽnnaam nengẽ wã, la d puk-a, d tõe n kɩsa sɩd tɩ d na n dɩɩ a Zeova nonglmã sẽn naag ne sõmblmã la a barkã nafre.
24 A Zeova na n ket n wilgda tõnd d sẽn na n sõd d rasma to-to. Tõnd sã n sak a zãmsgã, d na n tõog n ket n sõta d rasma wakat sẽn kõn sa yĩnga. (Zã 17:3) La d sã n sɩd rat vɩɩm sẽn pa satã, rẽnda d maan t’a Zeova yɩ d zĩ-lilldga. (Ziid 20, 21) Wa tõnd sẽn na n yã sõsg ning sẽn pʋgdã pʋgẽ wã, b wilga rẽ vẽeneg wʋsg Yɩɩl Sõamyã 91 soabã goam sẽn kengd raoodã pʋgẽ.
Wãn to la y na n leokẽ?
• Wãn to la a Zeova yaa ‘laafɩ zĩig’ ne tõndo?
• Bõe yĩng tɩ d tõe n yeel t’a Zeova bee tõnd sõngr yĩng wakat fãa?
• Wãn to la a Zeova sõngd tõnd tɩ d “sõd d rasma”?
• Bõe n kɩtd tɩ d tõe n “kaas ne sũ-noog d vɩɩmã tɛka”?
[Zãmsgã sogsgã]
[Foto, seb-neng a 8]
A Zeova yaa Wẽnnaam “hal sẽn deng tãens sẽn nan ka naane”
[Foto, seb-neng 10]
A Zeova nifẽ, a Metusela sẽn vɩɩmd yʋʋm 969 wã pa vɩɩmd tɩ ta daar a yembr ye
[Foto rãmba, seb-neng 12]
A Zeova ‘lugla tõnd nug tʋʋmda kãn-kãe’