Kelg-y Wẽnnaam bãngr-goamã
Kelg-y Wẽnnaam bãngr-goamã
“Tõnd tara Wẽnnaam no-rɛɛsdba goama sẽn tar võor [bãngr-goamã sẽn maan tɩ yaa sɩd, NW ] n yɩɩda. Yaa sõama yãmb sã n ges [kelg, NW ] bãmb.”—2 PƖƐƐR 1:19.
1, 2. Makr ne zɩlem-be-mesi bʋg la y tõe n kõ?
YƲƲM kob-gĩn pʋsẽ, ziri mesi rãmb n mak n na n togs beoog-daare. Yʋʋm kob-gĩnd a nu soab T.W., rao sẽn bool a meng t’a Moiiz kɩtame tɩ Zʋɩf rãmb nins sẽn be ko-sʋk tẽng ning sẽn boond tɩ Kerɛtã tẽ tɩ yẽ la Mesi wã, la t’a ra na n fãag-b-la ne weoogrã. Daar ning b sẽn yãk n yet tɩ yaa b fãagrã daarã sẽn ta, b tũ-a lame n kẽng Mediterane Mogrã noor tãng geemdẽ. A yeel-b lame tɩ b ra segdame bal n yɩg n lʋɩ mogrã pʋgẽ, tɩ mogrã ra na n welga b taoore. Wʋsg sẽn yɩg n lʋɩ mogrã pʋgẽ bõrame, tɩ ziri mesi kãngã zoe n menem.
2 Yʋʋm kob-gĩnd 12 soabẽ wã, “mesi” n puk Yemen. Kalifã, bɩ naaba yeel-a lame t’a kõ bãnd sẽn wilgd tɩ yaa yẽ la mesi wã. “Mesi” kãng yeela naaba t’a kɩt tɩ b fiuug a zugã. A togsa bãngr-gomd n yeel tɩ yẽ sẽn na n vʋʋg tao-tao wã n da na n yɩ bãndã. Kalifã sakame tɩ b maan woto, la ra yɩɩ “mesi” kãng saab la woto.
3. Mesi hakɩɩkã yaa ãnda, la bõe la a ministɛɛrã wilg-yã?
3 N-ye, ziri mesi rãmbã la b bãngr-goamã yaa faoor meng-menga, la Wẽnnaam bãngr-goamã kelgr zɩ n wa ne sũ-sãams ye. Mesi hakɩk a Zezi Kirist yɩɩ kaset vɩɩg sẽn wilgd Biiblã bãngr-goam wʋsg pidsgu. Wala makre, Evãnzill gʋlsd a Matɩe sẽn lebs n dɩkd a Ezai bãngr-gomdã gʋlsa woto: “ ‘Zabulõ ne Naftali sẽn be Zʋrdẽ rʋʋnde mogr sẽnẽ, la sẽn be bu-zẽmsa Galile, neb sẽn zĩ lik pʋgẽ yãa vẽenem kãsenga. La neb nins sẽn da zĩ kũum zĩigẽ la kũum maasmẽ, vẽenem puka bãmb yĩnga.’ Sẽn sɩng wakat kãnga, a Zezi sɩngame n moon koe-noogo n yeele: ‘Bɩ yãmb tek yam n kos sugri, tɩ arzãn soolem [saasẽ Rĩungã, NW ] kolgame.’ ” (Matɩe 4:15-17; Ezai 8:23; 9:1) A Zezi n da yaa ‘vẽenem kãseng’ kãnga. La a ministɛɛrã wilgame tɩ yẽ n da yaa Norɛɛs ning a Moiiz sẽn da reng n togs a waoongã. B na n sãama neb nins sẽn na n zãgs a Zezi kelgrã—Tõodo 18:18, 19; Tʋʋma 3:22, 23.
4. Wãn-wãn la a Zezi pids Ezai 53:12?
4 La a Zezi ra pidsa Ezai 53:12 bãngr-gomdã me: “Bãmb saka kũum. B lagma bãmb ne yel-wẽna rãmba. La bãmb reega koangdb wʋsg sɩbgre, la bãmb yõka Wẽnnaam sɛɛg yel-wẽn-maandba yĩnga.” A Zezi sẽn da mi t’a ra na n kõo a ninsaal vɩɩmã tɩ yɩ yao-n-dɛɛkã yĩnga, a paasa a karen-biisã tẽeb pãnga. (Mark 10:45) A maana woto ne manesem kãseng ne tedgrã tũnugri.
Tedgrã paasda tẽeb pãnga
5. Wãn-wãn la y na n bilg tedgrã ne y meng goama?
5 Tedgrã ra yaa reng-n-togsg ne beoog-daare. A Zezi yeelame: “Ninsaal Biiga na n waa ne b Ba naam la ne b malɛk rãmba . . . Mam yeta yãmb sɩda, tɩ yãmb neb kẽer sẽn be ka na n yãa Ninsaal Biiga sẽn wat ne bãmb [Rĩungã, NW ] naam tɩ b nan ka ki ye.” (Matɩe 16:27, 28) Tʋm-tʋmdba kẽer sɩd yãa a Zezi t’a bee a Rĩungã naam pʋgẽ n watẽ bɩ? Matɩe 17:1-7 yetame: “A Zezi sẽn gom gom-kãng tɩ rab-yoaablẽ, b peega a Pɩɛɛr ne a Zak la a ba-biig a Zã n dʋ tãn-luglug zugu. La bãmb tedga bãmb taoore.” Ad sɩd yaa yel-kãseng menga! “Bãmb nenga pɩnda wa wĩndga, la b fut yaa peels wa vẽenem. La haya! bãmb yã a Moiiz ne a Eli sẽn wa n yẽsd ne a Zezi.” Sẽn paase, “sawadg sẽn pɩnd luda bãmba,” tɩ b wʋm Wẽnnaam mengã koɛɛg sẽn yete: “ ‘Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!’ La bãmb sẽn wʋm koe-kãnga b fõgna b nens tẽnga, la rabeem kãseng yõka bãmba. La a Zezi kolgame n sɩɩs bãmb n yeele: ‘Yik-y-yã, da zoe-y rabeem ye!’ ”
6. a) Bõe yĩng t’a Zezi bool tedgrã tɩ yãabo? b) Tedgrã ra yaa reng-n-lɛmbg ne bõe?
6 Wõnda yel-yɛɛsdg kãngã zĩnda Hermon Tãngã zĩ-zãntg a yembr zugu, zĩig ning a Zezi ne a tʋm-tʋmdb a tãabã sẽn gãand be baraar yʋngã. Vẽenega, yɩɩ yʋng la tedgrã sẽn zĩndã, tɩ rẽ kɩt meng t’a tall pãng n yɩɩda. Bʋʋm a yembr n kɩt t’a Zezi bool-a tɩ “yãabo.” Yaa t’a Moiiz ne a Eli ra kii hal daar zãra, la b sɩd ra ka be ye. Ra yaa Kiristã bal n da sɩd be be. (Matɩe 17:8, 9) Pukr sẽn yɛɛsd a woto kõo a Pɩɛɛre, a Zake, ne a Zã a Zezi belmã sẽn be ziirã a Rĩungã naam pʋgẽ reng-n-lɛmbg sẽn be rasãnde. A Moiiz ne a Eli makda a Zezi rogem-pʋɩɩr-rɩt-n-taasã, la yãabã paasa kasetã a Zezi sẽn kõ a Rĩungã la a beoog-daar naamã wɛɛngẽ wã pãnga.
7. Wãn-wãn la d mi t’a Pɩɛɛr da tẽra tedgrã vẽenega?
7 Tedgrã sõngame n keng tʋm-tʋmdb a tãabã sẽn da na n lʋɩ taoor kiris-neb tigingã pʋgẽ wã tẽeb pãnga. A Zezi nengã sẽn yãgd wʋsgã, a futã peelem sẽn da pɩndã, ne Wẽnnaam mengã koɛɛg sẽn da yet t’a Zezi yaa a Biribl nongr b sẽn segd n kelgã, woto fãa pidsa a bõn-datlã hal sõma wʋsg n paase. La tʋm-tʋmdbã ra pa segd n togs ned ba a yembr yãabã, hal t’a Zezi wa vʋʋge. Yʋʋm 32 loogr poore, tedg-kãngã ra ket n yaa vẽeneg a Pɩɛɛr yamẽ wã. A sẽn gom a yell la a wilg a võorã, a gʋlsame. “La tõnd sẽn wilg yãmb Zusoab a Zezi Kirist pãngã ne b waoongã, tõnd ka togs soalem sẽn yaa belgr ye, la tõnd mens nin n yã bãmb naam. Tɩ bõe, bãmb deega waoogre ne naam sẽn yi bãmb Ba a Wẽnnaam nengẽ, bãmb sẽn wʋm koɛɛg sẽn yi naamẽ n yeele: ‘Ada yaa mam Bi-nongre, mam nonga yẽ ne m sũur fãa zãnga.’ La tõnd wʋma koe-kãng sẽn yi arzãna [saasẽ, NW ] wakat ninga tõnd sẽn da be ne bãmb tãn-sõnga zugã.”—2 Pɩɛɛr 1:16-18.
8. a) Wẽnnaam sẽn togs goam nins a Biriblã wɛɛngẽ wã wilgda bõe vẽenegã? b) Bõe la sawadgã sẽn puk tedgrã pʋgẽ wã ra wilgda?
8 Bũmb ning sẽn da tar yõod n yɩɩd yaa Wẽnnaam gom-kãngã: “Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!” Gom-kãngã wilgda tõnd vẽeneg t’a Zezi yaa Rĩm Wẽnnaam sẽn kõ naam, tɩ naanegã fãa tog n sak-a. Sawadgã ludb wilgame tɩ yãab kãngã pidsgã ra na n yɩɩ bũmb nif sẽn pa tõe n yã. Ra na n yɩɩ ne võor-wʋmbã nin bala, la neb nins sẽn na n bãng a Zezi Kirist belem nif sẽn pa ne a Rĩungã naam pʋgẽ ‘bãndã,’ ra na n bãng n welge. (Matɩe 24:3, NW ) Sɩda, a Zezi sẽn yeel tɩ b ra togs ned ba a ye yãabã hal t’a wa vʋʋgã wilgdame t’a zẽkrã la a ziirã paoong ra na n waa a vʋʋgrã poore.
9. Bõe yĩng tɩ tedgrã segd n paas tõnd tẽebã pãnga?
9 A Pɩɛɛr sẽn gom tedgrã yell poore, a yeelame: “Tõnd tara Wẽnnaam no-rɛɛsdba goama sẽn tar võor [sẽn be bas-m-yam, NW ] n yɩɩda. Yaa sõama yãmb sã n ges [kelg, NW ] bãmb wa yãmb sẽn get fɩtl sẽn yãgd lik zĩigẽ hal tɩ zĩiga wa yẽege, tɩ yibeoog ãdg [tõd-beoog ãdg, NW ] puk yãmb sũyã pʋsẽ. La sẽn yɩɩda, bɩ y bãng tɩ bãngr-goam ba a ye ka be Gʋlsg Sõng pʋgẽ ned sẽn tõe n bilg tɩ zems a meng tagsg ye. Tɩ bõe, bãngr-goama ka yɩ ne ned yam ye. La yaa Sɩɩg Sõng sẽn tʋm neb nins pʋsẽ wã n togs Wẽnnaam yĩnga.” (2 Pɩɛɛr 1:19-21) Tedgrã wilgdame tɩ d segd n kɩsa sɩd ne Wẽnnaam bãngr-gomdã. D togame n kelg gom-kãngã, la d bas “soalem sẽn yaa belgr” sẽn pa tar Wẽnnaam teelg la sẽn pa tat a yamã ye. Tedgrã segd n paasa tõnd tẽebã ne bãngr-gomdã, bala a Zezi ziirã la Rĩungã naam b sẽn deng n yã yãab kãngã pʋgẽ wã lebga bũmb sẽn yaa vẽenega. N-yẽe, tõnd tara kaset b sẽn pa tõe n kɩɩs tɩ Kirist bee rũndã-rũndã n yaa Rĩm sẽn tar pãng saasẽ.
Tõd-beoog ãdgã sẽn pukd to-to
10. “Tõd-beoog ãdgã” a Pɩɛɛr sẽn gom a yellã yaa ãnd bɩ bõe, la bõe yĩng tɩ y yet woto?
10 A Pɩɛɛr gʋlsame: “Yaa sõama yãmb sã n . . . [kelg bãngr-gomdã, NW ] wa yãmb sẽn get fɩtl sẽn yãgd lik zĩigẽ hal tɩ zĩiga wa yẽege, tɩ . . . [tõd-beoog ãdg, NW ] puk yãmb sũyã pʋsẽ.” ‘Tõd-beoog ãdga’ yaa ãnd bɩ bõe? “Tõd-beoog ãdgã” yaa gomd sẽn pukd vugr bal Biiblã pʋgẽ, la a võorã yaa yembr ne “yibeoog ãdga.” Wilgri 22:16 pʋgẽ b boonda a Zezi Kirist tɩ “yibeoog ãdg sẽn yãgda.” Yʋʋmdã sasa kẽere, yaa ãds a woto n yaa yaoolem n pukd yaanga, tɩ wĩndgã yaool n puki. Dẽ, b wilgda daar a to sɩngre. A Pɩɛɛr tũnugda ne gom-biig ning sẽn yaa ‘tõd-beoog ãdgã’ sẽn na yɩl n gom a Zezi yell A Rĩungã naam deegr poore. Wakat kãnga, a Zezi puka ãndũniyã gill pʋgẽ, n paas tõnd tẽngã! A sẽn yaa tõd-beoog ãdg sẽn yaa Mesi wã, a moonda raar bɩ wakat paalg sẽn na n wa ãdem-bi-sakdbã fãa yĩnga.
11. a) Bõe yĩng tɩ 2 Pɩɛɛr 1:19 pa rat n yeel tɩ “tõd-beoog ãdgã” pukda ninsaalbã sũy sɩd-sɩd pʋsẽ? b) Wãn-wãn la y na n wilg 2 Pɩɛɛr 1:19 võore?
11 Biiblã lebgr wʋsg teenda tagsg ning sẽn yet tɩ tʋm-tʋmd a Pɩɛɛr goam nins sẽn be 2 Pɩɛɛr 1:19 pʋgẽ wã gomda ninsaal sũur sɩd-sɩd yellã. Kãsem sũur zɩslem yaa garam 250 n digd 300 bala. Wãn to la a Zezi Kirist sẽn yaa malɛk sẽn pa kiid masã la sẽn tar ziir saasẽ wã na n tõog n puk ninsaalbã sũy sẽn yaa kɩds woto wã pʋsẽ? (1 Tɩmote 6:16) Yaa sɩd tɩ rẽ tɩ loee ne tõnd makr sũyã, bala yaa ne bãmb la d kelgd Wẽnnaam bãngr-goamã. La maag-y y yĩng n ges 2 Pɩɛɛr 1:19, tɩ y na bãng tɩ Traduction du monde nouveau wã tũnugda ne bɩsemd sẽn na yɩl n welg gomd ning sẽn be gũbsã sʋkã sẽn yaa “hal tɩ zĩig wa yẽeg tɩ tõd-beoog ãdg pukã” poorã, ne goam nins sẽn deng bãmba wã la ne gomd ning sẽn yaa “yãmb sũyã pʋsẽ” wã. B tõe n ninga verse kãngã woto: ‘Tõnd tara no-rɛɛsdba goama sẽn be bas-m-yam n yɩɩda; la yaa sõama yãmb sã n ges-a wa fɩtl sẽn yãgd lik zĩigẽ, sẽn yaa yãmb sũyã pʋsẽ, hal tɩ zĩiga yẽege la yibeoog ãdg puki.’
12. Naoor wʋsgo, ãdem-biisã sũy halhaal yaa wãn-wãn tẽebã wɛɛngẽ, la bõe n yaa sɩd ne kiris-neb hakɩɩkã sũyã?
12 Naoor wʋsgo, ãdem-biisã sẽn yaa yel-wẽn-maandbã makr sũy halhaal yaa wãn-wãna? Bãng-y tɩ b sũyã bee tẽeb lik pʋgẽ! La d sã n yaa kiris-neb hakɩɩka, yaa wa d tara fɩtl sẽn yãgd d sũyã pʋsẽ, tɩ sã n da pa woto bɩ a ra na n yɩ lika. Wala a Pɩɛɛr goamã sẽn wilgdã, yaa b sẽn na n kelg Wẽnnaam no-rɛɛsdbã goam sẽn vẽnegdã la kiris-neb hakɩɩkã tõe n pa gũusg pʋgẽ la b paam vẽnegr hal tɩ ra-paallã beoog vẽege. B ra na n bãngame tɩ tõd-beoog ãdgã ra pukame, pa ninsaalbã nems sũy pʋsẽ ye, la yaa naanega fãa taoore.
13. a) Bõe yĩng tɩ d tõe n kɩs sɩd tɩ tõd-beoog ãdgã zoe n yikame? b) Bõe yĩng tɩ kiris-nebã tõe n tõog toog yel-toodã pʋsẽ a Zezi sẽn deng n togs tõnd wakatã yĩngã?
13 Tõd-beoog ãdgã zoe n pukame! D tõe n kɩsa sɩd ne dẽ, d sã n kelg a Zezi bãngr-gom-kãsengã sẽn tɩ loe ne a belmã. Rũndã-rũndã, d nee a pidsgã ne yɛl buud sẽn da zɩ n zĩnd wala zabã, komã, tẽn-digimdgã, la koe-noogã mooneg dũniyã gill zugã. (Matɩe 24:3-14) Baa ne yel-tood nins a Zezi sẽn da reng n togs b waoongã sẽn mat tõnd sẽn yaa kiris-nebã, d tõe n tõoga toog ne laafɩ la sũ-noogo. Bõe yĩnga? Yaa d sẽn kelgd Wẽnnaam bãngr-goamã la d tar tẽeb ne a kãabsã beoog-daar yĩngã yĩnga. D miime tɩ d kolga sasa ning sẽn yaa sõma n yɩɩda sɩngre, bala d kẽe ‘sɛɛba wakat’ pʋgẽ wʋsgo! (Daniɛll 12:4) Dũniyã bee saagr kaalem pʋgẽ tɩ b reng n togs rẽ Ezai 60:2 pʋgẽ: “Tɩ bõe, gese, lik na n luda dũniyã, la lik sẽn yaa bida na n luda nebã.” Wãn-wãn la ned tõe n kẽn lik-kãngã pʋgẽ? Rẽndame tɩ f sik f meng n kelg Wẽnnaam bãngr-goamã masã, tɩ nan da kẽ n bõog ye. Pʋ-peelem dãmbã segd n baoa a Zeova Wẽnnaam sẽn yaa vɩɩmã la vẽenemã Yẽgrã. (Yɩɩl Sõamyã 36:10; Tʋʋma 17:28) Yaa f sẽn na n maand woto bal la f tõe n paam vẽenem sɩd-sɩdã la saagr sẽn na yɩl n paam beoog-daar sẽn yaa kãsengã Wẽnnaam sẽn yãk raab n na n kõ ãdem-bi-sakdbã.—Wilgri 21:1-5.
“Vẽenem waa dũniyã zugu”
14. Bõe la d segd n maan n yã Biiblã bãngr-gom-kãsems pidsgu?
14 Gʋlsg Sõamyã wilgda vẽeneg t’a Zezi Kirist rɩta naam wala Rĩm masã. A sẽn paam naama yʋʋmd 1914 yĩnga, bãngr-gom-kãsems n ket n na n paam pidsgu. Sẽn na yɩl n yã b pidsgã, d segd n yɩɩ sik-m-mens rãmb sẽn tar tẽeb ne a Zezi Kirista, n tek yam n kos sugr ne tʋʋm-wẽnsã, la yel-wẽn nins d sẽn maan zɩɩlem pʋgẽ wã. Yaa sɩd tɩ neb nins sẽn nong likã pa na n paam vɩɩm sẽn-kõn-sa wã ye. A Zezi yeelame: “La bʋʋd kãng yaa tɩ vẽenem waa dũniyã zugu, la neba nonga likã n yɩɩd vẽenem, bãmb tʋʋma sẽn yaa wẽnsa yĩnga. Tɩ bõe, ned ninga fãa sẽn maand wẽnga, a kisgda vẽenem, la a ka wat vẽenemẽ t’a tʋʋma puk ye. La ned ninga sẽn maand sɩda, a wata vẽenemẽ, tɩ vẽenemã wilg t’a maana a tʋʋma Wẽnnaam yĩnga.”—Zã 3:19-21.
15. Bõe n na n paam-do, d sã n maan yam-kaalg ne fãagr ning Wẽnnaam sẽn maan tɩ tõe n yɩ ne a Biriblã maasma?
15 Tẽebã vẽenem waa dũniyã pʋgẽ a Zezi maasem yĩnga, la yẽ kelgr tara yõod wʋsgo. A Poll gʋlsame: “Wẽnnaam sẽn da gom ne tõnd yaab rãmba wɛdg-wɛdg ne bũmb toɛ-toɛya ne bãmb no-rɛɛsdba wakat sẽn loogã, b goma ne tõnd me masã yaoolem wakata ne bãmb Biigã, bãmb sẽn yãk a soaba, t’a soog bũmb fãa wã.” (Hebre dãmba 1:1, 2) Bõe n na n paam-do, d sã n zãgs fãagr ning Wẽnnaam sẽn kɩt tɩ yaa bũmb sẽn tõe n yɩ ne a Biriblã maasmã? A Poll kẽnga taoor n yeele: “Koɛɛg ninga malɛk rãmba sẽn togsa sã n ka konge, la yel-wẽna fãa ne kɩɩsga fãa sã n paam yaood sẽn zemse, tõnd na n maana wãn n põse, tõnd sã n ka ges fãagra yell [tõnd sã n maan yam-kaalg ne fãagrã, NW ] sẽn yaa kãseng woto wã? Zusoaba ra sɩngame n gom a yell pĩnda, la neb nins sẽn wʋma wilga tõnd tɩ yaa sɩda. Wẽnnaam wilgame tɩ bãmb kaset yaa sɩda ne bãna la bõn-yɛɛsdse la bõn-bãn toɛ-toɛya la ne Sɩɩg Sõng kũuna b sẽn kõ wa sẽn zems bãmb menga raabã.” (Hebre dãmba 2:2-4) N-ye, a Zezi la bãngr-goamã gomd mooneg yãoogo.—Wilgri 19:10.
16. Bõe yĩng tɩ d tõe n tall tẽeb zãng-zãng ne a Zeova Wẽnnaam bãngr-goamã fãa?
16 Wa b sẽn wilgã, a Pɩɛɛr yeelame: “Bãngr-goam ba a ye ka be Gʋlsg Sõng pʋgẽ ned sẽn tõe n bilg tɩ zems a meng tagsg ye.” Ninsaalbã b yen-yen pa tõe n togs bãngr-goam sẽn yaa sɩd ye. La d tõe n kɩsa sɩd zãng ne Wẽnnaam bãngr-goamã fãa! B yita a Zeova Wẽnnaam meng nengẽ. Ne vʋʋsem sõngã maasem, a kɩtame t’a sõgen dãmbã wʋm Biiblã bãngr-goam sẽn paamd pidsg to-to wã võore. Sɩda, d tara mi-beoog ne a Zeova, d sẽn ne bãngr-gom-kãensã wʋsg sẽn pidsd yʋʋmd 1914 tɛkã. La d tara hakɩk tɩ bãngr-goam a taabã fãa sẽn tɩ loe ne dũni wẽng kãngã saabã na n paama pidsgu. Tara yõod wʋsg tɩ d ket n kelgd bũmb nins Wẽnnaam sẽn deng n togsã sõma-sõma la d basd d vẽenema t’a yãgda. (Matɩe 5:16) Ad d sũy yaa noogo, a Zeova Gomdã sẽn kɩtd tɩ ‘vẽenem yãgd tõnd yĩng lik bida pʋgẽ’ wã, n vẽnegd tẽngã rũndã-rũndã wã!—Ezai 58:10.
17. Bõe yĩng tɩ d rat tẽeb vẽenem ning sẽn yit Wẽnnaam nengẽ wã?
17 Vẽenem sɩd-sɩdã kɩtame tɩ tõnd tõe n yã. A kɩtdame me tɩ koodã sẽn kõt tõnd rɩɩbã buud toor-toor wʋsgã tõe n bɩ. Vẽenem sɩd-sɩd sã n kaẽ, d pa tõe n vɩɩmd ye. Yaa wãn to yẽ ne tẽebã vẽenem? A kõta tõnd sor-wilgri la a wilgd tõnd beoog-daarã wala Wẽnnaam sẽn deng n togs-a a Gomdã sẽn yaa Biiblã pʋgẽ to-to wã. (Yɩɩl Sõamyã 119:105) Ne nonglem, a Zeova Wẽnnaam ‘tʋmda a vẽenema ne a sɩda.’ (Yɩɩl Sõamyã 43:3) Sɩd-sɩda, d segd n talla naneb wʋsg ne kũun kãensã. Woto yĩnga, bɩ d maan d sẽn tõe fãa n deeg “Wẽnnaam bãngrã sẽn tar ziirã” vẽenem, sẽn na yɩl t’a vẽneg tõnd makr sũyã.—2 Korẽnt dãmba 4:6, NW; Efɛɛz rãmba 1:18, NW.
18. Bõe la a Zeova tõd-beoog ãdgã segl n na n maan masã?
18 Ad d sɩd tara barka, d sẽn mi tɩ yʋʋmd 1914, a Zezi Kirist sẽn yaa tõd-beoog ãdgã puka ãndũniyã tõr pʋgẽ n sɩng tedgrã yãab pidsgã! A Zeova tõd-beoog ãdgã bee a belmã zug masã, n segl n na n pids Wẽnnaam daabã, tɩ tedgrã babg ning sẽn pʋgdã pidsi. Bab-kãng yaa “Wẽnnaam Sẽn-tõe-fãa daar kãsenga zabre.” (Wilgri 16:14, 16) B sã n sãam dũni kʋd-kãngã poore, a Zeova na n pidsa a kãabg ning sẽn yaa wa ne “sa-paals la tẽn-paalga,” zĩig ning d sẽn na n tõog n pẽg-a la d waoog-a wakat sẽn-kõn-sa wã, a sẽn yaa ãndũniyã Soaal Sẽn-ka-to la a yaa bãngr-goam hakɩɩk Wẽnnaama yĩnga. (2 Pɩɛɛr 3:13, NW ) Hal tɩ ra-kãseng-kãnga ta, bɩ d ket n kẽnd Wẽnnaam vẽenemã pʋgẽ, n kelgd Wẽnnaam bãngr-goamã.
Wãn to la y na n leokẽ?
• Wãn-wãn la y ra na n bilg a Zezi tedgrã?
• Wãn-wãn la tedgrã kengd tẽebo?
• A Zeova tõd-beoog ãdgã yaa ãnd bɩ bõe, la yaa wakat bʋg la a puk-yã?
• Bõe yĩng tɩ d segd n gũus n kelg Wẽnnaam bãngr-goamã?
[Zãmsgã sogsgã]
[Foto, seb-neng 20]
Yãmb tõe n wilga tedgrã võor bɩ?
[Foto, seb-neng 22]
Tõd-beoog ãdgã zoe n pukame. Yãmb mi sẽn yɩ to-to la sẽn yɩ wakat ning bɩ?