NEB KẼER SẼN YETE

Neb wʋsg getame tɩ par n bao ligd yaa reem b sẽn tõe n deem tɩ yell kae, sẽn yɩɩd fãa sã n pa kɩɩsd tẽngã laloa wã. Par n bao ligdã reem kẽer sẽn zems ne laloa wã, wala makre goosneema-rãmbã sẽn maand lotori ninsã, kẽesda ligd tɩ b tar n maand bũmb toor-toor sẽn nafd nin-buiidã.

BIIBLÃ SẼN YETE

Biiblã pa gomd par n bao ligdã yell ye. La goam n be Biiblã pʋgẽ n tõe n sõng tõnd tɩ d bãng Wẽnnaam tagsg sẽn yaa a soab ne par n bao ligdã.

Ned sã n pard n baood ligdi, a ratame tɩ neb a taabã bõn tɩ yẽ paame. Woto kɩɩsda Biiblã sẽn yeel tɩ d “gũus ne yão-beed buudã fãa” wã. (Luk 12:15) Sɩd-sɩda, yaa yão-beedã n kɩtd tɩ ned pard n baood ligdi. Par n bao ligdã sosiete-rãmbã maanda piblisite-rãmb n wilgd neb sẽn par n paam ligd wʋsgo, n yaool n pa sakd n togs tɩ neb nins sẽn tãood n paamdẽ wã sõor pa waoog ye. Bala b miime tɩ nebã sã n tagsdẽ tɩ b na n tão n paamame, kɩtdame tɩ b rɩkd ligd wʋsg n parda. Par n bao ligdã pa sõngd ned t’a gũus ne yão-beed ye. Pʋd n kɩtdame t’a tʋll n paam ligd nana-nana.

Ned sã n pard n baood ligdi, a rat n paama ligd ning neb a taabã sẽn na n bõnã. Woto kɩtdame t’a lebg rat-m-ye soaba. La Biiblã sagenda ned kam fãa t’a “ra baood a meng nafr ye. La bɩ a baood a taabã nafre.” (1 Korẽnt rãmbã 10:24) Sẽn paase, tõod piigã tõog a ye yeelame yaa: “Fo pa segd n tʋlg . . . bũmb nins fãa [f to] sẽn so ye.” (Yikri 20:17) Ned sã n par n dat ne a sũur fãa n paame, sɩd-sɩda, a saagdame tɩ neb a taabã na bõn b ligdã, tɩ yẽ lebg rakãagre.

Biiblã leb n yeta tõnd tɩ d pa segd n get zu-noogã wa bũmb sẽn wat ne bark ye. Pĩnd wẽndẽ Israyɛllã pʋgẽ, neb kẽer sẽn da pa tẽed Wẽnnaam n wa n yik n “dɩgend taabl Zu-noog wẽnnaamã yĩnga.” Nin-kãens sẽn da waoogd “Zu-noog wẽnnaamã” ra tata Wẽnnaam sɩd-sɩdã yam bɩ? Ayo. A yeel-b lame yaa: “Yãmb ra ket n maanda sẽn yaa wẽng mam nifẽ, la yaa sẽn pa noom maamã la yãmb yãk-yã.”—Ezayi 65:11, 12.

Yaa sɩd tɩ dũniyã babs kẽer pʋsẽ, par n bao ligdã reem nins sẽn zems ne laloa wã kẽesda ligd tɩ b tar n teend karengã, n tʋmd tẽngã na yidg laogã wɛɛngẽ yĩnga, la b maand bũmb a taab sẽn nafd nin-buiidã. La baa b sẽn tar ligdã n maand bõn-sõmã wã, b sẽn maan to-to n paam-a wã ket n yaa wẽnga. B tũnuga ne tʋʋm sẽn kɩtd tɩ ned lebg yão-be-neda, rat-m-ye soaba, la ned sẽn nong zaalem.

“Fo pa segd n tʋlg . . . bũmb nins fãa [f to] sẽn so ye.”—Yikri 20:17.

BIIBLÃ SẼN YETE

Biiblã yetame yaa: “Neb nins sẽn dat n lebg rakãag-rãmb ne b sũy fãa wã lʋɩta makr pʋgẽ, bẽdg la ratem wʋsg pʋgẽ sẽn yaa yalemd la sẽn sãamd bãmba, tɩ rẽ wat ne zu-loees la sãoongo.” (1 Tɩmote 6:9) Yaa yão-beed n kɩtd tɩ ned pard n baood ligdi. Yão-beedã yaa wẽng wʋsgo, hal tɩ Biiblã sõdg-a n naag zʋg-wẽns nins d sẽn segd n zãag d mens fasɩ ne wã.—Efɛɛz rãmbã 5:3.

Par n bao ligdã sẽn kɩtd tɩ ned tagsdẽ t’a tõe n paama ligd nana-nana wã yĩnga, a kɩtdame tɩ nebã nong ligdi. Biiblã yaool n wilgdame tɩ ligdã nonglem “yaa bõn-wẽns buud fãa yẽgre.” Ligdã baoobã tõe n wa lebga bũmb ning sẽn pak ned n tɩ yɩɩdã nana-nana, n kɩtdẽ t’a maand yɩɩr wʋsgo, la kɩt me t’a pa le tẽed Wẽnnaam ye. Biiblã yeelame tɩ yaa wa neb nins sẽn lʋɩ ligdã nonglem pʋgẽ wã ‘pogla b mens zĩig zãnga.’—1 Tɩmote 6:10.

Yão-beedã wata ne sũ-pa-noanga, a kɩtdame tɩ ned pa sekd a meng ne bũmb nins a sẽn tarã, la kɩtdẽ t’a pa tar sũ-noog ye. Biiblã yetame yaa: “Ned sã n nong wanzuri, wanzuri pa sekd-a ye. Ned sã n nong arzɛgs me, baa a paoongã paasda, pa sekd-a ye.”—Koɛɛg soaba 5:10.

Neb milyõ-rãmb sẽn sɩng par n bao ligdã wa n mikame tɩ b lebga bõn-kãng yembse. Yaa yell sẽn paam pãng wʋsgo. Etazĩni soolmẽ wã bala, b maana vaeesg n mik tɩ neb milyõ-rãmb n be yel-kãngã pʋgẽ.

Biiblã yetame yaa: “Ned sã n paam rogem-pʋɩɩr ne zãmbo, pa na n wa tall yõod ne-a ye.” (Yel-bũnã 20:21) Neb nins sẽn lebg par n bao ligdã yembsã kẽer kẽe sam pʋsẽ, sãnda bõna b sẽn da tar fãa, b wʋsg tʋʋm sãamame, b kãadem kaoome, wall b pa le tar zo-rãmb ye. Ned sã n tũud Biiblã saglsã, tõe n sõng-a lame t’a zãag a meng ne zu-loees nins par n bao ligdã sẽn wat ne wã.

“Neb nins sẽn dat n lebg rakãag-rãmb ne b sũy fãa wã lʋɩta makr pʋgẽ, bẽdg la ratem wʋsg pʋgẽ sẽn yaa yalemd la sẽn sãamd bãmba, tɩ rẽ wat ne zu-loees la sãoongo.”—1 Tɩmote 6:9.