A Bebe ra nonga a ba wã wʋsgo. Sẽn togs-a gomdã yaa ned a Bebe zakã rãmb sẽn da nong sõma. La a gomdã pa keng a Bebe raood ye. Pʋd n sãama a sũur wʋsgo. A ra yeta a meng wakat fãa t’a ba wã kũumã pa bũmb sẽn yaa sõma ye. Yʋʋm a wãn poore, a Bebe gʋlsa sebr n wilg a ba wã kũum sẽn yɩ to-to. La a sẽn yeel sebrã pʋgẽ wã wilgda vẽeneg tɩ yellã ra ket n namsd-a lame.

Nina sũ-sãang tõe n kaoosa wʋsg wa a Bebe nengẽ wã. Sẽn yɩɩd fãa sã n yaa ned a sẽn nong wʋsg n maan kaalem. Biiblã pʋgẽ, b boola kũum tɩ “yaoolem bɛ.” (1 Korẽnt-rãmbã 15:26) Sɩd me, kũumã tiigd n dɩka neda, tɩ d pa tar d sẽn maand ye. Tõnd baa a ye pa tõe n gil sũ-sãang ning kũum sẽn wat ne wã ye. Dẽnd nina ned sẽn mi n maan kaalem t’a pa mi a sẽn na n mao ne a toogã to-to wã pa lingr ye.

La tõe tɩ y sokda y meng woto: ‘Ned sã n maan kaalem, a nebã sũ-sãang kaoosda wakat a wãna? Wãn to la b tõe n mao ne b sũ-sãangã? Bõe la d tõe n maan n bels-ba? Koe-noog n be d neb nins sẽn maan kaalmã yĩng bɩ?’