ZÃMSGÃ YĨNGA 35
YƖƖLL 123 D sak a Zeova sẽn sigl yɛlã to-to wã
Kãsem-dãmbã sẽn tõe n sõng neb nins b sẽn yiis tigingã pʋgẽ wã to-to
“Sũ-noog na n zĩnda saasẽ yel-wẽn-maand a ye sẽn tek yam n kos sugr yĩnga, n yɩɩd nin-tɩrs pis-wɛ la a wɛ sẽn pa baood sugr kosg yĩnga.”—LUK 15:7.
D SẼN NA N BÃNGE
D na n yãa bũmb ning sẽn kɩt tɩ mi n yaa tɩlɛ tɩ b yiis neb kẽer tigingã pʋgẽ wã, la kãsem-dãmbã sẽn tõe n sõng nin-kãens to-to sẽn na yɩl tɩ b tek yam n le paam a Zeova lohorem.
1-2. a) A Zeova tagsg yaa wãn ne ned sẽn maan yel-wẽnd ne yamleoogo? b) Bõe la a Zeova rat tɩ yel-wẽn-maandbã maane?
A ZEOVA pa Wẽnnaam sẽn basd nebã tɩ b maand yaar ye. A kisa yel-wẽndã. (Yɩɩn. 5:4-6) A ratame tɩ d tũud a noyã sẽn yaa tɩrsã a sẽn kɩt tɩ b gʋls Biiblã pʋgẽ wã. Yaa sɩd t’a Zeova miime tɩ d yaa neb sẽn pa zems zãnga, n pa tõe n tũ a noyã tɩ zems kɛpɩ ye. (Yɩɩn. 130:3, 4) La a kisa ‘wẽn-kɩɩsdbã sẽn tũnugd ne a barkã n pademd n tʋmd nin-yoolem tʋʋmã.’ (Ziid 4) Sɩd me Biiblã goma “wẽn-kɩɩsdbã sãoong” yelle. Na n yɩɩ Armagedõ sẽn yaa Wẽnnaam zabrã sasa.—2 Pɩy. 3:7; Vẽn. 16:16.
2 Baasgo, a Zeova pa rat tɩ ned baa a ye sãam ye. Biiblã wilgdame t’a “ratame tɩ nebã fãa tek yam n kos sugri,” wa d sẽn zoe n yã seb-kãngã pʋgẽ wã. (2 Pɩy. 3:9) Kãsem-dãmbã rɩkda a Zeova togs-n-taare, n sõngd sẽn maan-b yel-wẽn-kãsemsã ne sũ-mar sẽn na yɩl tɩ b tek yam n kos sugr n le paama a Zeova lohorem. La pa yel-wẽn-maandbã fãa n sakd n tek ye. (Eza. 6:9) Baa ne kãsem-dãmbã sẽn maand b sẽn tõe fãa n na n sõng yel-wẽn-maandbã, kẽer zãgsdame tɩ b kõn tek yam n kos sugr ye. Sã n wa yaa woto, kãsem-dãmbã maanda a wãna?
“YIIS-Y NIN-WẼNGÔ
3. a) Biiblã wilgame tɩ yel-wẽn-maand sã n pa rat n tek yam n kos sugri, bõe la b segd n maane? b) Yel-wẽn-maand sã n pa rat n tek yam n kos sugr tɩ b yiis-a tigingã pʋgẽ, bõe yĩng tɩ d tõe n yeel tɩ yaa yel-wẽn-maandã n dat rẽ?
3 Yel-wẽn-maand sã n pa rat n tek yam n kos sugri, yaa tɩlɛ tɩ kãsem-dãmbã tũ noor ning sẽn be 1 Korẽnt rãmb 5:13. Be b yeelame: “Yiis-y nin-wẽngã yãmb sʋka.” D tõe n yeelame tɩ yaa yel-wẽn-maandã n dat rẽ. A kẽebda bũmb ning yẽ meng sẽn bʋdã. (Gal. 6:7) Bõe yĩng tɩ d yet woto? Kãsem-dãmbã maka naoor wʋsg n na n sõng-a sẽn na yɩl t’a tek yam n kos sugr t’a zãgse. (2 Rĩm. 17:12-15) A manesmã wilgdame t’a yãka yam n pa rat n tũ a Zeova noyã ye.—Tõo. 30:19, 20.
4. B sã n yãk yam n na n yiis ned tigingã pʋgẽ, bõe yĩng tɩ b togsd tigingã taoore?
4 B sã n yãk yam n na n yiis yel-wẽn-maand sẽn pa rat n tek yam n kos sugr tigingã pʋgẽ, b togsda tigingã taoor t’a pa le yaa a Zeova Kaset soab ye. B sẽn maand woto wã, pa sẽn na n ning yel-wẽn-maandã yãnd ye. Yaa sẽn na yɩl tɩ tigingã neb tũ Biiblã saglgã, n ‘da le maan tũud-n-taar ne-a,’ la b ‘ra rɩ ne-a meng ye.’ (1 Kor. 5:9-11) Pa zaalem yĩng la a Zeova sẽn kõ no-kãngã ye. Tẽn-tʋmd a Poll yeelame yaa: “Rabɩll bilf wukda zom-nagdgã tõre.” (1 Kor. 5:6) Yel-wẽn-maand sã n pa tek yam n kos sugr tɩ b basa tigingã pʋgẽ, tigingã neb a taabã tõe n tagsame tɩ pa tɩlɛ tɩ b tũ a Zeova noyã ye.—Yel. 13:20; 1 Kor. 15:33.
5. D manesem segd n yɩ wãn ne ned b sẽn yiis tigingã pʋgẽ, la bõe yĩnga?
5 La b sã n yiis d tẽed-n-taag tigingã pʋgẽ, d tagsg segd n yɩɩ wãn ne-a? Baa d sẽn pa le maand tũud-n-taar ne-a wã, d tẽegdame t’a yellã tara tɩɩm. A yaa wa pesg sẽn meneme. Pesg sã n lak n bas bãgrã, a tõe n le wa waame. Tẽeg-y t’a yaa ned sẽn dɩk a meng n kõ a Zeova. A pa maand bũmb ning a sẽn pʋlem a Zeova n dɩk a meng n kõ-a wã rũndã-rũndã, tɩ tõe n baas wẽngã. (Eze. 18:31) La a Zeova nimbãan-zoeerã wakat sã n nan pa sa, d saagdame t’a na n lebg n waa a Zeova nengẽ. Wãn to la kãsem-dãmbã tõe n sõng yel-wẽn-maand b sẽn yiis tigingã pʋgẽ?
KÃSEM-DÃMBÃ SẼN SÕNGD NEB NINS B SẼN YIIS TIGINGÃ PƲGẼ WÃ TO-TO
6. Bõe la kãsem-dãmbã maand sẽn na yɩl n sõng ned b sẽn yiis tigingã pʋgẽ?
6 B sã n yiis yel-wẽn-maand tigingã pʋgẽ, b raagd-a lame n bas sẽn na yɩl t’a mao a toor n lebg n wa a Zeova nengẽ bɩ? Ayo. Kãsem-dãmb sullã sã n wa na n togs yel-wẽn-maand sẽn pa tek yam tɩ b na n yiis-a-la tigingã pʋgẽ, b wilgd-a-la bũmb nins a sẽn tõe n maan tɩ b lebs n deeg-a. La b maanda bũmb a to me. Naoor wʋsgo, b togsd-a lame tɩ b nongẽ lame tɩ b le tigim taab kiis a wãn poore, tɩ b bao n bãng a sã n toeema yam. Yel-wẽn-maandã sã n sake, b sã n wa seg taaba kãsem-dãmbã na n bao n sõng-a lame sẽn na yɩl t’a tek yam n kos sugr n lebg n wa a Zeova nengẽ. Sã n mik t’a nan pa toeem yam wakat kãnga, kãsem-dãmbã na n ket n kẽnd n kaagd-a-la wakat-wakate.
7. Wãn to la kãsem-dãmbã rɩkd a Zeova togs-n-taar nimbãan-zoeerã wɛɛngẽ, b sã n wa na n sõng ned b sẽn yiis tigingã pʋgẽ? (Zeremi 3:12)
7 Kãsem-dãmbã modgd n dɩkda a Zeova togs-n-taar nimbãan-zoeerã wɛɛngẽ, b sã n wa na n sõng ned b sẽn yiis tigingã pʋgẽ. Wala makre, a Zeova pa gũ tɩ Israyɛll nebã sẽn yaa a nin-buiidã tek yam t’a yaool n sɩng b sõngr ye. Nand meng tɩ b wilg tɩ b teka yam n kos sugri, a Zeova tʋma a no-rɛɛsdbã tɩ b sõng-ba. Seb-kãngã zãmsgã sõsg a yiib-n-soabã wilgame t’a Zeova sẽn wa n yeel a Ooze t’a kõ a pagã sugrã t’a ket n maanda yel-wẽn-kãsemse. (Ooze 3:1; Mal. 3:7) A Zeova yeela woto n na n wilg a nin-buiidã a nimbãan-zoeerã sẽn yaa kãseng to-to. Kãsem-dãmbã rɩkda a Zeova togs-n-taar n dat ne b sũur fãa tɩ ned sẽn maan yel-wẽn-kãseng tek yam n kos sugri. B pa na n sak n maan bũmb sẽn na n kɩt tɩ rẽ yɩ toog ne a soabã ye.—Karm-y Zeremi 3:12.
8. Wãn to la biig sẽn sãam a ba paoong yel-bũndã a Zeezi sẽn wẽ wã sõngd tõnd tɩ d bãng a Zeova nimbãan-zoeerã n paase? (Luk 15:7)
8 Tẽeg-y biig sẽn sãam a ba paoong yel-bũndã a Zeezi sẽn wẽ, tɩ d gom a yell seb-kãngã zãmsgã sõsg a yiib-n-soabã pʋgẽ wã yelle. Biigã ba wã sẽn wa n yã-a t’a ket yɩɩg n wat yiri, a “wudgame n tɩ mobg-a, la a mok-a sõma.” (Luk 15:20) Ba wã pa gũ tɩ biigã reng n kos-a sugr ye. A yɩɩ tao-tao n zoe n seg a biigã, a sẽn nong-a wã yĩnga. Kãsem-dãmbã me maanda woto ne neb nins b sẽn yiis tigingã pʋgẽ wã. B ratame tɩ nin-kãens “lebg n wa” a Zeova nengẽ. (Luk 15:22-24, 32) Yel-wẽn-maand sã n lebg n wa a Zeova nengẽ sũ-noog bee saasẽ la tẽngã zug me.—Karm-y Luk 15:7.
9. Bõe la a Zeova maand sẽn na yɩl tɩ yel-wẽn-maandbã rat n lebg n wa a nengẽ?
9 D sẽn yã bũmb ningã wilgdame t’a Zeova pa na n bas ned sẽn maan yel-wẽn-kãseng n pa rat n tek yam n kos sugr t’a kell n pa tigingã pʋgẽ ye. La a pa raagd yel-wẽn-maand n bas ye. A ratame t’a lebg n wa a nengẽ. Ooze 14:4 wilgda a Zeova manesem sẽn yaa to-to ne yel-wẽn-maandb nins sẽn tek yam n kos sugrã. Be a yeelame: “Mam na n sãoog-b lame tɩ b ra le yɩ neb sẽn pa maand sɩd ye. Mam na n nong-b-la ne yamleoogo, bala mam sũurã sẽn da yik ne-bã sigame.” Kãsem-dãmbã sẽn mi rẽ wã pa segd n kɩt tɩ b yaa gũusdba, tɩ b sã n yã baa yaa bõn-kɩdg sẽn wilgd tɩ yel-wẽn-maand sɩnga yam tekr bɩ b yɩ tao-tao n sõng-a sɩda? Pa segd n kɩt tɩ neb nins sẽn bas a Zeova wã neẽ t’a nong-b lame tɩ kɩt tɩ b rat n lebg n wa a nengẽ sɩda?
10-11. Wãn to la kãsem-dãmbã tõe n modg n sõng neb nins b sẽn yiis tigingã pʋgẽ wã?
10 La neb nins b sẽn yiis tigingã pʋgẽ tɩ kaoos wʋsgã yẽ? Tõe tɩ kẽer basa manesem-wẽng ning sẽn kɩt tɩ b yiis-b tigingã pʋgẽ wã. Wakat ninga, ned b sẽn yiis tigingã pʋgẽ tɩ kaoos wʋsg tõeeme n pa le tẽr bũmb ning sẽn kɩt tɩ b yiis-a wã meng ye. Sẽn yaa a soab fãa, kãsem-dãmbã na n bao n bãnga a zĩig n tɩ kaag-a. B sã n wa tɩ kaagd ned a woto, b tõe n naaga-a lame n pʋʋs la b sagl-a t’a lebg n wa tigingã pʋgẽ. La ned sã n lak a meng ne tigingã n kaoos wʋsgo, yaa vẽeneg t’a tẽebã pa le tar pãng ye. Woto wã, a soabã sã n yeel t’a rat n lebg n waa tigingã pʋgẽ, kãsem-dãmbã na n yãka ned t’a zãms Biiblã ne-a nand meng tɩ b lebs n deeg-a tigingã pʋgẽ. Yaa kãsem-dãmbã bal n segd n yãk ned ning sẽn na n zãms-a Biiblã.
11 Kãsem-dãmbã sẽn dɩkd a Zeova togs-n-taar nimbãan-zoeerã wɛɛngẽ wã yĩnga, b rat n maana b sẽn tõe n sõng neb wʋsg tɩ bãng tɩ b ket n tõe n lebg n wa a Zeova nengẽ. Yel-wẽn-maand sã n tek yam n kos sugr n bas a manesem-wẽngã, b tõe n lebs n deeg-a-la tigingã pʋgẽ n da bas tɩ kaoos ye.—2 Kor. 2:6-8.
12. a) Yel-bʋs wɛɛngẽ la kãsem-dãmbã segd n maan gũusg wʋsgo? b) Bõe yĩng tɩ d pa segd n tags tɩ neb nins sẽn maan yel-wẽn kẽerã pa tol n tõe n paam t’a Zeova zoe b nimbãanega? (Ges-y tẽngr notã me.)
12 Ned sã n maan yel-wẽn kẽer tɩ b yiis-a tigingã pʋgẽ, kãsem-dãmbã segd n maana gũusg wʋsg n yaool n lebs n deeg-a. Wala makre, sã n yaa ned sẽn da yõg biiga, sẽn yaa sɩdã kɩɩsda, pa rẽ bɩ ned sẽn maan sɩlem n kao a kãadem, kãsem-dãmbã segd n bao n bãnga a sã n sɩd teka yam n kos sugri. (Mal. 2:14; 2 Tɩm. 3:6) B segd n kogla bãgrã. La d segd n tẽegame me t’a Zeova na n sak n deeg-a yel-wẽn-maand ning fãa sẽn sɩd tek yam n kos sugr n bas a manesem-wẽngã. Rẽ n so tɩ baa kãsem-dãmbã sẽn maand gũusg wʋsg ne neb nins sẽn maan b taabã wẽng wʋsgã, b segd n gũusame me n da wa yeel tɩ yel-wẽn kẽer yaa wẽng wʋsg t’a Zeova pa na n tol n zoe neb nins sẽn maan yel-wẽn-kãensã nimbãaneg ye. a—1 Pɩy. 2:10.
TIGINGÃ NEB MANESEM SẼN SEGD N YƖ TO-TO
13. Welg-bʋg n be d manesem sẽn segd n yɩ to-to ne ned sẽn paam kiblgu, la ned b sẽn yiis tigingã pʋgẽ sʋka?
13 Sõsg ning sẽn loogã pʋgẽ d yãame tɩ wakat ninga, b togsda tigingã taoor tɩ ned paama kiblgu. Sã n wa yaa woto, d tõe n ket maanda tũud-n-taar ne-a n miẽ t’a teka yam n kos sugr n bas a manesem-wẽngã. (1 Tɩm. 5:20) A ket n yaa tigingã ned n dat tɩ tigingã neb a taabã keng a raoodo. (Ebre. 10:24, 25) La sã n yaa ned b sẽn yiis tigingã pʋgẽ, yɛlã yaa toor fasɩ. D pa “le maand tũud-n-taar” ne a soaba, n pa ‘rɩt ne ned a woto meng ye.’—1 Kor. 5:11.
14. Wãn to la kiris-nebã tõe n kelg b sũur-kasetã n bãng b manesem sẽn segd n yɩ a soab ne ned b sẽn yiis tigingã pʋgẽ? (Ges-y fotã me.)
14 D sẽn yã bũmb ningã rat n yeelame tɩ d segd n daaga ned b sẽn yiis tigingã pʋgẽ n bas zãng-zãng bɩ? Pa tɩlɛ tɩ yɩ woto ye. Yaa sɩd tɩ d pa le maand tũud-n-taar ne-a ye. La kiris-ned tõe n kelga a sũur-kasetã sẽn paam kiblg ne Biiblã maasmã, n yãk a sã n na n boola ned b sẽn yiis tigingã pʋgẽ t’a wa tigsga. Tõe n yaa ned a sẽn kĩ ne wall sẽn da yaa a zoa. Ned b sẽn yiis tigingã pʋgẽ sã n wa tigsga, d manesem segd n yɩɩ wãn ne-a? Sã n da yaa pĩndã, d pa na n pʋʋs ned a woto meng ye. Rẽ wɛɛngẽ me, yaa kiris-ned fãa n segd n kelg a sũur-kasetã n bãng a sẽn segd n maan yell a woto taoore. Kẽer tõe n getame tɩ pa wẽng tɩ b pʋʋs-a Rĩungã roogẽ ye. La d pa na n sõs ne ned a woto n kaoose, wall d maan tũud-n-taar ne-a ye.
Kiris-nebã tõe n kelga b sũur-kasetã n bãng b sã n na n boola ned b sẽn yiis tigingã pʋgẽ t’a wa tigsga, wall b sã n na n pʋʋs-a-la Rĩungã roogẽ bɩ b pa na n pʋʋs-a (Ges-y sull 14)
15. Yaa nin-bʋs buud yell la 2 Zã 9-11 gomda? (Ges-y zĩ-gũbrã me: “ Yel-wẽn nins yell a Zã ne a Poll sẽn gomã yaa ye bɩ?”)
15 Sãnda tõe n sokda b mens yaa: ‘Biiblã pa yeel tɩ kiris-ned sã n pʋʋs ned a woto a naagd-a-la a tʋʋm-wẽnsã pʋsẽ sɩda?’ (Karm-y 2 Zã 9-11.) D sã n karem a Zã lɛtrã vɛrse-rãmb a taabã, d mikdame tɩ yaa sɩdã kɩɩsdb la neb nins sẽn pirsd b taabã n dat tɩ b maan sẽn pa sõma wã yell la a gomda. (Vẽn. 2:20) Dẽnd ned sã n zãmsd nebã sɩdã kɩɩsdb zãmsg wall a pirsd a taabã n dat tɩ b maan sẽn pa sõma, kãsem-dãmbã pa na n tɩ kaag-a ye. Baasgo, d saagdame t’a yamã na n wa vẽnegame. La nand t’a tek yam, d pa segd n pʋʋs-a wall d bool-a t’a wa tigsg ye.
D RƖK A ZEOVA TOGS-N-TAAR NIMBÃAN-ZOEERÃ WƐƐNGẼ
16-17. a) Bõe la a Zeova rat tɩ yel-wẽn-maandbã maane? (Ezekɩyɛll 18:32) b) Wãn to la kãsem-dãmbã tõe n wilg tɩ b yaa a Zeova tʋmd-n-taase?
16 Bõe la tõnd bãng seb-kãngã pʋgẽ? D yãame t’a Zeova pa rat tɩ ned baa a ye sãam ye. (Karm-y Ezekɩyɛll 18:32.) A ratame tɩ yel-wẽn-maandbã maneg b yellã ne yẽ. (2 Kor. 5:20) Rẽ n so tɩ hal pĩnd wẽndẽ n tãag masã, a Zeova sagend neb nins sẽn bas-a wã n yɩlemdẽ tɩ b tek yam n lebg n wa a nengẽ. Kãsem-dãmbã sẽn paam n yaa a Zeova tʋmd-n-taase, n sõngd yel-wẽn-maandbã sẽn na yɩl tɩ b tek yam n kos sugrã yaa zu-zẽkre.—Rom. 2:4; 1 Kor. 3:9.
17 Mams-y sũ-noog ning sẽn be saasẽ, yel-wẽn-maand sã n wa tek yam n kos sugri. Ned sẽn lak n bas tigingã sã n lebg n wa fãa, d saasẽ Ba a Zeova sũur nooma wʋsgo. D sã n bʋgsd a Zeova nimbãan-zoeerã la a maan-neerã zugu, d sẽn nong-a to-to wã pãng na n paasdame.—Luk 1:78.
YƖƖLL 111 Bũmb wʋsg n kõt tõnd sũ-noogo
a Sã n yaa ne Biiblã, yel-wẽnd sẽn pa tõe n paam sugr pa yel-wẽnd takɩ ye. Yaa yel-wẽnd ned sẽn riglim a sũur n maane, yel-wẽnd sẽn kɩɩsd Wẽnnaam daabã vẽeneg-vẽenega. La pa tõnd n segd n bao n bãng ned sã n maana yel-wẽnd a woto ye.—Mark 3:29; Ebre. 10:26, 27.
