A ZEEZI sẽn wa n zãmsd a karen-biisã b sẽn tog n moon Rĩungã koe-noogã to-to wã, a wilgame tɩ pa nebã fãa n na n sak n kelg ye. (Luk 10:3, 5, 6) D sã n wa moond koɛɛgã, d mi n sega neb sẽn pa reegd tõnd sõma, wall sẽn pʋd n yikd b sũur ne-do. Togs sɩdã, woto tõe n kɩtame tɩ yɩl n ket n kʋmd neb nins d sẽn taasd koɛɛgã lebg toogo.

Ned sã n kʋmd a taaba, a nee b zu-loeesã la sõngr ning b sẽn datã, tɩ b nimbãaneg sẽn tar-a wã kɩt t’a rat n sõng-ba. Tõnd sã n wa pa le kʋmd neb nins d sẽn taasd koɛɛgã, tõe n kɩtame tɩ d pa le moond sõma la ne yẽesem ye. La d sã n maood n bɩɩsd nimbãan-zoeere, yaa wa d sẽn paasd bugum raado. Na n kɩtame tɩ d yẽesmã ket n paasd koɛɛgã mooneg pʋgẽ.—1 Tes. 5:19.

Bõe n na n sõng-d tɩ d bɩɩs nimbãan-zoeer baa sã n wa pa nana? D na n goma a Zeova ne a Zeezi la tʋm-tʋmd a Poll yelle. B kõo mak-sõngo, tɩ d segd n dɩk b togs-n-taare.

Na maan yʋʋm tusa la woto nebã sẽn tar a Zeova yʋʋrã sãoongo. La baa ne rẽ, a ket n maanda “zɩ-beoog rãmbã ne nin-wẽnsã” neere. (Luk 6:35) A sẽn maand sũ-marã wilgdame t’a yaa maan-neer soaba. A raab yaa “nebã fãa paam fãagre.” (1 Tɩm. 2:3, 4) Baa ne Wẽnnaam sẽn kis wẽnemã, a nonga ninsaalbã wʋsgo, n pa rat tɩ ned baa a yembr sãam ye.—2 Pɩy. 3:9.

A Zeova miime t’a Sʋɩtãan tolg n luda neb nins sẽn pa mi yẽ wã yam. (2 Kor. 4:3, 4) Neb kẽer nengẽ, yaa hal b yãadmẽ la b zãms-b bũmb wʋgs sẽn pa sɩda, la manesem kẽer sẽn pa zemse. Rẽ kɩtame tɩ yaa toog tɩ b sak n deeg Biiblã sẽn yetã. A Zeova raab yaa a sõng neb a woto buudã. Bõe n wilgd rẽ?

D ges a Zeova manesem sẽn yɩ a soab ne pĩnd wẽndẽ Niniiv nebã. Baa ne b nen-kɛglmã, a Zeova yeela a Zonaas yaa: “Niniiv yaa tẽn-kãsenga. Neb sẽn vɩ a pʋgẽ sõor yɩɩda neb tus koabg la pisi . . . La tẽngã nebã ka tol n mi sẽn yaa sõamã ne wẽng n bak ye. Rẽ wã, mam na n yɩ a wãn n ka zoe tẽn-kãngã nimbãanega.” (Zon. 4:11) A Zeova ra miime tɩ Niniiv nebã ka paam tɩ b sõng-b tɩ b bãng yẽ ye. Rẽ n so t’a kʋm b nimbãanega, n tʋm a Zonaas t’a tɩ keoog-ba.

Tõnd me nonga nebã wa a Zeova. D sã n maood ne d sũur fãa n na n sõng ned buud fãa t’a kelg koɛɛgã, baa sã wõnd a ka na n sak n tũ, d rɩkda a Zeova togs-n-tare.

Baa ned pa rat n kelg koɛɛgã, d pa segd n ges ninã sẽn ne wã ye. D tags a sẽn pa rat n kelgã võore. Tõe tɩ yaa a sẽn tar tags-kɛg  Biiblã zug yĩnga, wall yaa kiris-neb ne yʋʋrã manesmã n sãamd a sũuri. Tõe me t’a wʋma bũmb kẽer sẽn pa sɩd a Zeova Kaset rãmbã zugu. Nina me zoeta a na reeg-d sõma t’a zakã neb wall a mitinsã wa yaal-a.

Neb kẽer me yãa nams wʋsgo, hal n pa tõe n yĩm ye. D sã n seg neb a woto, b tõeeme n pa sak n na n kelg-d ye. Misioneer-poak a ye yʋʋr sẽn boond t’a Kim yeelame: “Tõnd moonegã zĩis kẽere, neb wʋsg bõna b sẽn da tarã fãa zabr yĩnga. Kɩtame tɩ b pa le tẽed manegr ye. B lebga sũ-to-neba, n pa le sakd n kɩs ned sɩd ye. D sã n moond zĩ-kãense, d wae n segda neb sẽn pa nong d koɛɛgã baa bilfu. Daar a ye menga, neb n bao n na n maan-m yelle.”

Bõe n sõng a Kim t’a ket n kʋmd nebã nimbãaneg baa ne b sẽn maan-a woto wã? Ad a sẽn yeele: “Ned sã n yik a sũur ne-ma, m tẽegda Yel-bũn 19:11 wã. Be, b yetame tɩ ‘sẽn tar-a yam ka yikd a sũur tao-tao ye.’ M sã n tẽegd tõnd moonegã zĩigẽ nebã sẽn mao ne zu-loees ninsã, sõngd-m lame tɩ m kʋmd b nimbãanega. Rẽ me, pa nebã fãa n pa nong d koɛɛgã ye. Neb n pʋd n sak tɩ d lebgd n wat n sõsd ne-ba.”

D tõe n soka d meng yaa: ‘Sã n da yaa maam n be neb nins m sẽn taasd Rĩungã koɛɛgã zĩigẽ, m manesem da na n yɩɩ wãna?’ Wala makre, m sã n da wae n wʋmda goam sẽn pa sɩd a Zeova Kaset rãmbã zugu? Tõe tɩ tõnd me ra pa na n sak n kelg koɛɛgã, tɩ yaa tɩlɛ tɩ b zoe d nimbãaneg la b maan sũ-mar ne-do. D sã n tẽeg t’a Zeezi yeelame tɩ d sẽn dat tɩ nebã maan tõnd bũmb ningã bɩ tõnd me maan-b woto, na n sõngame tɩ d kʋmd nebã, baa sã n wa yaa toogo.—Mat. 7:12.

Tʋm-tʋmd a Poll ra kʋmda nebã nimbãanega, baa neb sẽn kɩɩs koɛɛgã ne toolem wʋsgo. Bõe yĩnga? A pa yĩm yẽ mengã sẽn da maanã ye. Ad a sẽn yeele: “Mam yaool n dag n yaa ned sẽn paoogd Wẽnnaam, la sẽn namsd Kiris tẽedbã, la ned sẽn maand a taab pãnga. La b zoee mam nimbãanega, bala, dag n yaa zɩɩlem la ka-tẽeb pʋgẽ la mam dag n maand rẽnda.” (1 Tɩm. 1:13) A gomdã wilgdame t’a sak n deegame t’a Zeova ne a Zeezi maana yẽ nimbãan-zoeer meng-menga. A ra tog n getame tɩ neb kẽer a sẽn taasd koɛɛgã yaa wa yẽ sẽn da yaa to-to pĩndã.

A Poll ra mi n sega neb sẽn tẽed yɛl sẽn pa sɩd ne b sũyã fãa. A manesem yɩɩ wãna? Wala makre, Tʋʋm 17:16 yeelame t’a sẽn wa n be Atɛnnã, a “sũurã sãama wʋsgo, a sẽn yã tɩ tẽngã pida ne wẽn-naandsã yĩnga.” La yɩɩ  bũmb ning meng sẽn sãam a sũurã la a kell n tik n paam n taas-b koe-noogã. (Tʋʋ. 17:22, 23) A ra toeemda a sẽn maand to-to n taasd koɛɛgã, tɩ zemsd ne neb buud toor-toore, sẽn na yɩl tɩ ‘sẽn wa n yaa neng ning fãa, bɩ a fãag neb kẽere.’—1 Kor. 9:20-23.

D rɩk a Poll togs-n-taare. D sã n seg ned sẽn tẽed yɛl sẽn pa sɩda, wall sẽn tar manesem sẽn pa sõma, bɩ d tags neer n ges d sẽn tõe n tik rẽ to-to, n paam n sɩng sõsga, n taas-a “sũ-noog koɛɛga.” (Eza. 52:7) Saam-bi-poak yʋʋr sẽn boond t’a Doroti yeelame: “Tõnd moonegã zĩigẽ, tũudmã taoor dãmb zãmsa nebã tɩ Wẽnnaam yaa dem-dem wʋsgo, la tɩ ned sã n beeg bala a sɩbgd-a lame. M sã n seg ned sẽn tẽed woto, m pẽgd-a-la a sẽn kɩs sɩd tɩ Wẽnnaam beeme wã, tɩ rẽ poor tɩ m karem Biiblã n wilg-a t’a Zeova yaa Wẽnnaam sẽn nong ninsaalbã, la m wilg-a a sẽn pʋlem t’a na n wa maaname wã.”

Yɩta sõma me tɩ koɛɛgã mooneg sasa bɩ d tags n ges d sẽn tõe n maan to-to, n kengd d tũud-n-taasã raoodo. A Zesika yeelame: “Maam wall m to wã sã n wa rat n sõs ne ned t’a pa sak n kelge, m maanda m sẽn tõe tɩ d ra tall rẽ yell goam ye. M toeemda sõsga, n gom yel-noog yelle. Wala makre, d sẽn tõogd n maand bũmb nins ne koe-moonegã maasem, baa ne kẽer sẽn pa sakd n kelgã.”

A Zeova nee bũmb nins fãa sẽn kɩt tɩ koɛɛgã mooneg pa nana wã. Dẽnd d sẽn dɩkd a togs-n-taar n kʋmd nebã baa ne rẽ fãa wã noom-a lame. (Luk 6:36) Yaa vẽeneg t’a Zeova nimbãan-zoeerã tara tɛka. D kɩsa sɩd t’a yãka wakat sẽn zemse, n na n wa sãam dũniyã. La nananda, koe-moonegã yaa tʋʋm-yãgdem. (2 Tɩm. 4:2) Bɩ d ket n wɩngd ne koe-moonegã, n kʋmd ned buud fãa nimbãanega!