Y tõe n vɩɩmda tẽngã zug wakat sẽn kõn sa
AD YAA PƲLEN-NOOG TƐKẼ! Tõnd Naandã pʋlmame t’a na n kɩtame tɩ d vɩɩmd wakat sẽn kõn sa, tẽngã zug ka bala. La yaa toog ne neb wʋsg tɩ b tẽ. B yetame yaa: ‘Yõor fãa na n lemba kũum. Sẽn dog fãa wat n kiime, bala vɩɩmã meng la woto.’ Sãnda me yetame tɩ ninsaal tõe n vɩɩmda wakat sẽn kõn sa, la pa tẽngã zug ka ye. B yetame tɩ yɩl tɩ ned vɩɩmd wakat sẽn kõn sa, yaa tɩlɛ t’a ki n kẽng saasẽ. Yãmb yẽ tagsg yaa wãna?
Nand tɩ y togs y tagsgo, yɩta sõma tɩ y reng n bao n bãng Biiblã sẽn leokd sogs a tãabã sẽn pʋgdã to-to: Wẽnnaam sẽn naan ninsaal to-to wã wilgdame t’a ra ratame tɩ d vɩɩmd yʋʋm a wãn bal bɩ? Wẽnnaam sɩng n datame tɩ ãdem-biisã vɩɩm yɩ wãn-wãn tẽngã zugu? Maana wãn tɩ ninsaal yaa kiida?
NINSAAL KA TO TẼNGÃ ZUG YE
Bõn-vɩɩlɩ nins fãa Wẽnnaam sẽn naan tɩ be tẽngã zugã sʋka, ninsaal sɩd ka to ye. Bõe yĩnga? Biiblã yetame tɩ yaa ninsaal bal la Wẽnnaam naan n ‘wõneg a menga.’ (Sɩngre 1:26, 27) Woto rat n yeelame tɩ bõe? Rat n yeelame tɩ Wẽnnaam naana ninsaal t’a tõe n dɩk a togs-n-taare, n bɩɩs a zʋgdã sẽn yaa sõma zãngã, wala makre, nonglem la tɩrlem.
Sẽn paase, Wẽnnaam naana ninsaal t’a tõe n tags la a bʋgs neere, t’a tõe n bãng sõma ne wẽng n bake, la a tõe n bao Wẽnnaam. Rẽ n so tɩ ninsaal tõe n ges ãndũni wã sẽn labs to-to wã, la bõn-naandsã toor-toorã n pẽge, tɩ mizik la yɩɩl bɩ bõn-neer kõt-a sũ-noogo. La sẽn tar yõod n yɩɩdã, yaa ninsaal sẽn tõe n tũ a Naandã. Woto fãa kɩtame tɩ ninsaal yaa toor fasɩ ne bõn-vɩɩlɩ a taabã sẽn be tẽng zugã.
Bɩ d tags n gese: Rẽ yĩnga Wẽnnaam na n naana ninsaal n kõ-a tõod kãensã fãa, la a kɩt t’a tõe n bɩɩs zʋg-sõma woto, sã n da mik tɩ yaa yʋʋm a wãn bal la a rat t’a vɩɩmd sɩda? Togs sɩdã, Wẽnnaam sẽn naan ninsaal to-to wã yaa sẽn na yɩl t’a vɩɩmd wakat sẽn kõn sa, tẽng zug ka.
WẼNNAAM SẼN SƖNG N DATÃ
Neb kẽer yẽ yetame tɩ Wẽnnaam pa naan ninsaal n dat t’a vɩɩmd tẽngã zug wakat sẽn kõn sa ye. B tagsdame tɩ ninsaalbã segd n zĩnda tẽngã zug wakat a wãn bala, tɩ b mak-b n gese, n paam n yãk b rãmb nins sẽn tog n tɩ vɩɩmd saasẽ ne Wẽnnaam wakat sẽn kõn sa wã. La rẽ sã n yaa sɩda, pa rat n yeel tɩ wẽnemã la yel-kɛgã sẽn pid tẽngã yaa Wẽnnaam yell sɩda? Wẽnnaam yaool n pa tõe n maan a buud ye. Ad Biiblã sẽn yete: “Bãmb soayã fãa yaa tɩrse! Bãmb tʋʋmã zemsa zãnga! Bãmb yaa sɩd soab wakatã fãa! Zãmb ka be bãmb pʋgẽ ye. Bãmb yaa sɩda, la tɩrga.”—Tõodo 32:4.
Biiblã wilgda sẽn yaa bũmb ning yĩng la Wẽnnaam naan tẽngã. Ad b sẽn yeele: “Yĩngr yaa Sẽn-Ka-Saab n so, la b rɩka tẽngã n kõ ninsaalbã.” (Yɩɩn-sõamyã 115:16) Hakɩɩka, Wẽnnaam naana tẽngã t’a yaa neere, n ning bũmb nins sẽn yaa tɩlɛ vɩɩmã na yɩ noog yĩngã, n da rat tɩ ninsaalbã vɩɩmd a zug wakat fãa.—Sɩngre 2:8, 9.
“Yĩngr yaa Sẽn-Ka-Saab n so, la b rɩka tẽngã n kõ ninsaalbã.—Yɩɩn-sõamyã 115:16.”
Biiblã wilgda Wẽnnaam sẽn da rat tɩ ninsaalbã vɩɩm yɩ to-to wã me. A yeela d yaab a Ãdem ne a Awa yaa: “Rog-y kamb n fɩɩg n pid dũniyã, la y soog-a. . . . La y soog rũmsã sẽn vuud tẽn-gãongã zugã.” (Sɩngre 1:28) B sẽn da paam n na ges arzãnã yelle, la b sõng t’a yalg n ta dũniyã gillã ra yaa bark tɛkẽ! Dẽnd ra yaa tẽng zug ka la d yaab a Ãdem ne a Awa ra na n vɩɩmd ne b kambã la b yagensã wakat sẽn kõn sa. B ra pa na n wa kẽng saasẽ ye.
BÕE YĨNG TƖ D YAA KIIDBA?
La bõe yĩng tɩ d kiidẽ? Biiblã wilgdame tɩ yaa malɛk a ye n lebg tõata, n bao n na n maan tɩ Wẽnnaam daabã ra tõog n pids ye. Malɛg-kãng la b sẽn wa n boond t’a Sʋɩtãanã. Bõe la a maan-yã?
A belga d yaab a Ãdem ne a Awa tɩ bãmb me kɩɩs Wẽnnaam. A yeel-b lame tɩ Wẽnnaam sẽn pa kõ-b sor tɩ b tõe n yãk sõma ne wẽng b toorã, a mong-b-la bõn-sõngo. B tẽe a Sʋɩtãana, n yi Wẽnnaam poorẽ. Baasa wãna? B wa n kii wa Wẽnnaam sẽn da yeelã. B konga vɩɩm sẽn kõn sa wã.—Sɩngre 2:17; 3:1-6; 5:5.
A Ãdem ne a Awa kɩɩsgã la sẽn dɩt tõnd hal ne rũndã wã. Biiblã yeelame tɩ ‘yel-wẽnã waa dũni ned a yembr maasem yĩnga, tɩ yel-wẽnã wa ne kũum, tɩ nebã fãa kiidẽ.’ (Rom-dãmbã 5:12) Yaa a Ãdem ne a Awa yel-wẽndã sẽn long tõndã n kɩt tɩ d yaa yel-wẽn-maandb la kiidbã lakae, pa Wẽnnaam n pĩnd n yãk ned fãa ne a kũum daar ye.
Y TÕE N VƖƖMDA TẼNGÃ ZUG WAKAT SẼN KÕN SA
A Ãdem ne a Awa kɩɩsgã pa kɩt tɩ Wẽnnaam raabã na n vaal ye. Wẽnnaam nonglmã la a tɩrlmã sẽn ka to wã yĩnga, a maana bũmb n na n fãag tõnd ne yel-wẽnã la kũumã. Ad tʋm-tʋmd a Poll sẽn yeele: “Yel-wẽnã yaood yaa kũum, la kũun ning Wẽnnaam sẽn kõt zaalmã yaa vɩɩm sẽn kõn sa, tõnd Zu-soab a Zeezi Kiris pʋgẽ.” (Rom-dãmbã 6:23) Nonglem yĩnga, Wẽnnaam sakame n “kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) A Zeezi sẽn sak n ki tɩ yɩ maoongo, n dol yel-wẽnã, tõnd tõe n le paama bũmb nins fãa a Ãdem sẽn da kɩt tɩ d bõnã. a
Ka la bilfu, tẽngã gill na n lebga arzãna, wa Wẽnnaam sẽn pʋlmã. Saglg la a Zeezi kõ-yã, tɩ y sã n tũ ne y sũur fãa bɩ y na n wa paam n vɩɩmd arzãnã pʋgẽ. Ad a sẽn yeele: “Tũ-y zag-no-sẽkã n kẽ. Bala, zag-noor ning sẽn kẽesd sãoong zĩigẽ wã, ne sor ning sẽn dabd-a be wã yaa yalemse, la neb wʋsg n tũud be. La zag-noor ning sẽn kẽesd vɩɩm pʋgẽ wã yaa sẽka, tɩ sor ning sẽn dabd-a be wã yaa bãanega, la yaa neb bilf bal n yãt-a.” (Matye 7:13, 14) Hakɩɩka, y beoog vɩɩmã sẽn na n yɩ a soabã bee ne yãmba. Bõe la y na n maane?
a Y sã n dat n bãng a Zeezi sẽn ki n dol yel-wẽnã sẽn tõe n naf yãmb to-to, bɩ y ges Vɩɩmd-y wakat sẽn kõn sa! sebrã sak 27 wã. A Zeova Kaset rãmbã n yiis-a. Y tõe n paam-a-la www.isa4310.com pʋgẽ.
Découvrez aussi…
BIIBLÃ ZÃMSG SẼN TAR YÕOD WƲSGO
Bõe yĩng tɩ Wẽnnaam naan tẽngã?
Tẽngã pida ne bõn-neeb buud toor-toore. A zãrmã ne wĩntoogã kell n zemsa kɛpɩ, t’a sẽn yilimd tʋʋl-tʋʋl to-to wã me zemse. Bõe yĩng tɩ Wẽnnaam tʋm woto fãa n na n maan tẽngã?
GŨUSG GASGÃ
Tẽngã na n wa yɩɩ arzãna: Sɩd bɩ ziri?
Buud toɛy-toɛyã neb tara kibay sẽn gomd arzãn sẽn da zĩnd tẽng zug ka yelle. A buud na n le zĩndame bɩ?
