Tõod sebre 17:1-20
17 “Yãmb pa segd n kʋ loalg wall pesg sẽn tar zanga, bɩ sẽn tar bũmb sẽn pa sõma n kõ yãmb Wẽnnaam a Zeova ye. Bala rẽ na n yɩɩ bũmb yãmb Wẽnnaam a Zeova sẽn kisi.+
2 “B sã n wa yã rao wall pag y sʋkã, tẽng ning fãa yãmb Wẽnnaam a Zeova sẽn na n kõ yãmbã pʋgẽ, t’a maand bũmb sẽn yaa wẽng y Wẽnnaam a Zeova nifẽ, n kɩɩsd a kaoolã,+
3 la a bʋdg n tɩ waoogd wẽnnaam-dãmb a taaba, n wõgemded b taoore, pa rẽ bɩ a wõgemded wĩntoogã bɩ kiuugã, wall ãdsã sẽn be saasẽ wã taoore,+ rẽ yaa bũmb mam sẽn pa wilg yãmba.+
4 B sã n taasa yãmb yellã wall y wʋmame tɩ b gomda, yãmb segd n vaeesa yellã sõma. La sã n yaa sɩd+ tɩ bõn-wẽn-kãngã maana Israyɛlle,
5 y segd n talla raoã bɩ pag ning sẽn maan bõn-wẽngã n kẽng tẽngã rignoorẽ. B segd n loba raoã bɩ pagã kug t’a ki.+
6 B segd n tika neb a yiib bɩ a tãab kaset*+ zug n kʋ sẽn segd-a ne kũumã. B pa segd n tik nin-yend kaset zug n kʋ-a ye.+
7 Sẽn na yɩl n kʋ-a, yaa kaset rãmbã n segd n yɩ pipi n lobg-a kugri, tɩ nin-buiidã fãa yaool n wa naag n lob-a. Yãmb segd n yiisa bũmb ning fãa sẽn yaa wẽng yãmb sʋka.+
8 “Yell sã n maan yãmb tẽnsã a yembr pʋgẽ, tɩ yaa zɩɩm la b raag-yã,+ wall ned ne a to n takd taab bũmb poorẽ, pa rẽ bɩ nen-kɛglem tʋʋm la b tʋm-yã, wall yaa yell sẽn wa ne zabre, tɩ bʋʋdã kaoob yaa toog wʋsg ne yãmba, yãmb segd n yik n kẽnga zĩig ning yãmb Wẽnnaam a Zeova sẽn na n yãkã.+
9 Kẽng-y maan-kʋʋdbã sẽn yaa Levi buudã nebã nengẽ, la bʋ-kaood+ ning sẽn tʋmd wakat kãngã nengẽ, n tɩ togs-b yellã. Bãmb na n wilga yãmb y sẽn segd n maanega.+
10 Rẽ poore, yãmb segd n maana wa sẽn zems bũmb ning b sẽn na n wilg yãmb zĩig ning a Zeova sẽn na n yãkã. Gũus-y neer n tũ bũmb nins fãa b sẽn na n yeel yãmbã.
11 Yãmb segd n maana wa sẽn zems tõogã b sẽn na n wilg yãmbã, la tɩ zems ne bũmb ning b sẽn na n togs yãmbã.+ Ra bʋdg-y rɩtg wall goabg n bas bũmb ning b sẽn na n wilg yãmbã ye.+
12 Ned ning sẽn wuk a meng n pa kelg maan-kʋʋdã sẽn tʋmd yãmb Wẽnnaam a Zeova tʋʋmdã bɩ bʋ-kaoodã, a segd n kiime.+ Y segd n yiisa bũmb ning sẽn yaa wẽng Israyɛlle.+
13 Woto, nin-buiidã fãa na n wʋmame n yɛɛse. La b kõn tol n le wuk b mens ye.+
14 “Yãmb sã n wa kẽ soolem ning yãmb Wẽnnaam a Zeova sẽn na n kõ yãmbã pʋgẽ n soog-a, n vɩ be, n wa yeel yaa: ‘Bɩ d yãk rĩm t’a rɩ naam d zug wa buudã fãa sẽn gũbg tõndã,’+
15 yãmb segd n yãka rĩm ning yãmb Wẽnnaam a Zeova sẽn na n wilgã.+ Yãmb segd n yãka rĩm yãmb saam-biisã sʋka. Yãmb pa tar sor n na n yãk sãan sẽn pa yãmb saam-biig t’a yɩ yãmb rĩm ye.
16 La rĩmã pa segd n bao wed-moos wʋsgo,+ bɩ n kɩt tɩ nin-buiidã lebg n leb Ezɩpt soolmẽ wã sẽn na yɩl n bao wed-moos n paas ye.+ Bala a Zeova yeelame: ‘Yãmb pa segd n le tũ so-kãngã n leb poorẽ a bada.’
17 Sẽn paase, a pa segd n dɩgs pagb wʋsgo, t’a sũurã wa lak n bas Wẽnnaam ye.+ A pa segd me n bao wanzuri ne sãnem wʋsg ye.+
18 A sã n wa zĩnd a geerã zugu, a segd n lebs n gʋlsa Tõogã sebr* a to zugu. Yaa tõod nins maan-kʋʋdbã sẽn yaa Levi buudã nebã sẽn bĩngã.+
19 “Sebrã segd n paa a nengẽ, t’a karemd-a a vɩɩmã tõr fãa,+ sẽn na yɩl n zãms Wẽnnaam a Zeova zoeese, la a tũ Tõ-kãens goamã fãa, la noyã, n sak-ba.+
20 A sã n maan dẽ, a pa na n zẽk a meng ne a saam-biisã ye. Sẽn paase, a pa na n bʋdg rɩtg bɩ goabg n bas noyã ye. Woto, a na n kell n dɩɩ naam a rĩungã pʋgẽ n kaoose, yẽ ne a kom-dibli wã sẽn be Israyɛll nebã sʋkã.
