Kamb nins sẽn lebg kãsembã tara zɩɩb-kãsenga. B segd n gesa b roagdb nins sẽn kʋʋlã yelle. Kamb nins sẽn lebg kãsembã segd n “gesa b zakã rãmb yell n wilg b wẽn-sakrã. B segd n kõo b ba-rãmbã la b ma-rãmbã ne b yaab-rãmbã bũmb nins b sẽn segd n kõ-bã, bala rẽ nooma Wẽnnaam.” (1 Tɩmote 5:4) B sã n get b roagdb nins sẽn kʋʋlã yelle, b tũuda Biiblã noor ning sẽn yet tɩ b waoog b roagdbã me wã.—Efɛɛz rãmbã 6:2, 3.

 Biiblã pa kõ noy takɩ, d roagdb nins sẽn kʋʋlã yell ges wɛɛngẽ ye. La a gomda rap la pagb sẽn da tar tẽeb sẽn ges b roagdb sẽn kʋʋl yelle. Sẽn paase, a kõta sagls sẽn tõe n sõng sẽn get-b b roagdb nins sẽn kʋʋlã yellã.

•  Pĩnd wẽndẽ, wãn to la zags kẽer neb ges b roagdb sẽn kʋʋl yelle?

•  Biiblã sagl-bʋs n tõe n sõng neb sẽn get b roagdb sẽn kʋʋl yelle?

•  Biiblã yetame tɩ d segd n gesa d roagdbã sẽn kʋʋlã yell zakẽ bɩ?

 B sẽn ges b roagdbã yell to-to wã pa yembr ye. Ra bee ne yɛlã sẽn da yaa to-to.

•   A Zozɛf ra vɩɩ zĩig sẽn zãr wʋsg ne a Ba a Zakoob sẽn da kʋʋlã. A sẽn wa n paam segbã, a kɩtame t’a Zakoob yi a sẽn da beẽ wã n wa pẽneg-a. Rẽ poore, a Zozɛf gesame t’a Ba wã paam zĩiga. A rɩlg-a lame, la a kogl-a.—Sɩngre 45:9-11; 47:11, 12.

•   A Rut tũu a sɩdã ma n kẽng a ba-yirã, la a tʋm ne a sũur fãa n ges a yelle.—Rut 1:16; 2:2, 17, 18, 23.

•   Bilf nand t’a Zeezi ki, a yãka ned sẽn na n ges a ma a Maari yelle. Wõnda a Maari lebga yaa pʋg-kõor wakat kãnga.—Zã 19:26, 27. a

 Biiblã kõta sagls sẽn tõe n sõng neb nins sẽn get b roagdb nins sẽn kʋʋlã yellã, tɩ b tõog n mao ne yaamsã la sũ-sãamsã rẽ sẽn mi n wat ne wã.

•   Waoog-y y roagdbã.

   Biiblã yetame yaa: “Waoog f ba la f ma.”—Yikri 20:12.

   Wãn to la y tõe n tũ saglgã? Bas-y tɩ y roagdbã yãkd b toorẽ yam bũmb nins b sẽn maandã wɛɛngẽ, tɩ wilg tɩ y waoog-b lame. Sã n tõe bɩ y bas tɩ b yãk b toorẽ yam, b sẽn dat tɩ b ges b yell to-to wã wɛɛngẽ. Wilg-y me tɩ y waoogd-b lame, n maand y sẽn tõe fãa n sõngd-ba.

•   Yɩ-y wʋmdba, la y kõt sugri.

   Biiblã yetame yaa: “Ned sã n tar yam-vẽenem, kɩtdame t’a sũur pa yikd tao-tao ye. B sã n maan-a wẽng t’a kõ sugri, kɩtdame t’a paam pẽgre.”—Yel-bũnã 19:11.

   Wãn to la y tõe n tũ saglgã? Yãmb roagd sẽn kʋʋl sã n yeel bũmb sẽn sãamd sũuri, bɩ sẽn wilgd t’a sũur pa noom ne yãmb sẽn get a yell to-to wã, bɩ y sok y meng yaa: ‘Mam tagsg ra na n yɩɩ wãna, m sã n da bee a zĩigẽ, n pa tõe n maan bũmb kẽere?’ Y sã n modg n yɩ wʋmd la y kõt sugri, na n sõngame tɩ y ra zẽn yell ning ye.

•   Gom-y ne neb a taaba.

   Biiblã yetame yaa: “Yẽsg sã n kae, magb pa yãkd neng ye. La sagendb sã n yaa wʋsgo, yãkda nenga.”—Yel-bũnã 15:22.

   Wãn to la y tõe n tũ saglgã? Maan-y vaeesgo, y sẽn tõe n ges y roagdbã laafɩ wã zu-loees yell to-to wã wɛɛngẽ. Bao-y n bãng-y sõngr nins sẽn be yãmb tẽngẽ wã, tɩ tõe n kɩt tɩ y roagdbã yell gesg yɩ nana. Sõs-y ne neb a taab sẽn zoe n ges b roagdb sẽn kʋʋl yelle. Y sã n tara kẽem-dãmb wall yapa, modg-y n naag-y taab n zĩnd n sõs y roagdbã sẽn dat sõngr ning buudã zugu, y sẽn na n ges b yell to-to, la ned fãa sẽn na n maane.

•   Yɩ-y sik-m-mens rãmba.

   Biiblã yetame yaa: “Yam bee ne sik-m-mens rãmba.”—Yel-bũnã 11:2.

   Wãn to la y tõe n tũ saglgã? Sak-y n deeg-y tɩ pa bũmba fãa la y tõe n maan ye. Wala makre, ned fãa sẽk la a pãng pa wa a to rẽnd ye. Woto tõe n kɩtame tɩ y sẽn tõe n maan bũmb nins y roagdbã yĩngã pa yɩ wa yãmb sẽn datã ye. Y sã n neẽ tɩ y roagdbã yell gesg yɩɩda y pãnga, kos-y y kẽem-dãmbã wall y yapã, pa rẽ bɩ neb sẽn mi sẽn kʋʋl-bã yell gesg sõngre.

•   Ges-y y mengã yelle.

   Biiblã yetame yaa: “Ned zɩ n kisg a meng a bada. A rɩlgda a meng la a get a meng yell sõma.”—Efɛɛz rãmbã 5:29.

   Wãn to la y tõe n tũ saglgã? Baa ne y sẽn segd n ges y roagdbã yellã, y segdame me n ges y meng yelle, la y zakã neb a taabã yelle, sã n mikame tɩ y kẽe kãadem. Yaa tɩlɛ tɩ y rɩt sõma. Vʋʋsd-y sõma, la y gõe tɩ sekdẽ. (Koɛɛg soaba 4:6) Sã n tõe bɩ y bao sẽk n kokd pemsem. Y sã n maand bõn-kãensã, na n sõng-y lame tɩ y tõog n ges y roagdbã yell sõma.

 Biiblã pa wilgd kambã sẽn segd n ges b roagdbã yell to-to wã takɩ ye. Zags kẽer neb yãkda yam n na n kɩt tɩ b roagdb sẽn kʋʋl kell n pa zakẽ n kaoos wa a sẽn tõe tɛka. La b tõe n wa getame tɩ b sã n tall-b n kẽng zĩis b sẽn get sẽn kʋʋl-bã yell n são. Zakã neb segd n tigma taaba, n yãk b sẽn na n maan tɩ yɩ sõma ne ned fãa.—Galat-rãmbã 6:4, 5.