N-ye. Bala, sõngr hakɩɩkã yita “Wẽnnaam sẽn belsd sũ-sãang rãmbã” nengẽ.—2 Korẽnt-rãmbã 7:6.

•   Pãnga. B sẽn yeel tɩ Wẽnnaam “belsda” yãmbã pa rat n yeel t’a na n kɩtame tɩ y zu-loeesã fãa sa ye. La y sã n pʋʋs-a, a na n kõ-y-la pãng tɩ y tõog n mao. (Filip-rãmbã 4:13) Y tõe n kɩsa sɩd t’a na n sak n kelga yãmba, bala Biiblã yetame: “Sẽn-Ka-Saab pẽe sũ-sãang rãmbã, la b fãagda sũ-pa-noaang rãmbã.” (Yɩɩn-sõamyã 34:19) Sɩd-sɩda, baa yãmb sã n wa pa mi y sẽn na n bilg yell sẽn namsd-y to-to wã takɩ, Wẽnnaam tõe n wʋma y kosgã.—Rom-dãmbã 8:26, 27.

•   Mak-sõmse. Biibl-gʋlsd a ye pʋʋsa Wẽnnaam n yeele: “Mam bee zĩ-zulumsẽ n boond yãmba.” Yɩɩn-gʋlsdã ra bẽeda yam-ka-m-meng bãaga, la a tẽegame tɩ Wẽnnaam rat n kõo tõnd yel-wẽnã sugr tɩ sõng-a t’a tõog n mao ne a zu-loɛɛgã. A yeela Wẽnnaam yaa: “Yãmb sã n dag n tẽegdẽ tõnd kongrã, ãnda soab n na n põse? La sugr bee yãmb nengẽ, tɩ nebã tõe n zoe yãmba.”—Yɩɩn-sõamyã 130:1, 3, 4.

•   Saagre. Wẽnnaam sẽn kõt belsg rũndã-rũndã wã toog sẽn ka be, a pʋlmame t’a na n wa kɩtame tɩ zu-loees nins fãa sẽn wat ne yam-ka-m-mengã sa. A sã n wa pids pʋlen-kãnga, nebã “kõn tol n leb n tẽeg sẽn zĩnd pĩnda [wala makre, yam-ka-m-meng bãagã] yell ye, b kõn leb n tags a yell ye.”—Ezayi 65:17.

 Vẽnegre: Baa a Zeova Kaset rãmbã sẽn mi tɩ Wẽnnaam sõngda sẽn dat-b sõngrã, b sã n wa bẽed bãag wala yam-ka-m-meng bãaga, b baooda logtor sõngr me. (Mark 2:17) La a Zeova Kaset rãmbã pa sagend ned t’a sak tɩɩm takɩ ye. D miime tɩ yaa ned kam fãa n segd n yãk yam yel-kãensã wɛɛngẽ.