KAMBʼAL 13
Kʼuʼ a Kichʼpan Pektzil Tupach a Religion?
1. Laj kiʼooʼ wa a religion?
Ichil tulakal a religion yan a kristiyaano a jajooʼ. Kichʼpan u pektzil ti walak u ilbʼilooʼ a kristiyaano abʼeʼe u men a Dʼios y walakooʼ u känänbʼäl. Pero u yajil, yaabʼ a religion tan u bʼetik a kʼas. (2 Corintios 4:3, 4; 11:13-15) Yan aj adʼaj pektzil tanooʼ u yadʼik ti yan a religion okaʼanooʼ ichil a kimsaj a tan, y okaʼanooʼ ichil a kʼasil pʼisbʼaj y yaabʼ a tanooʼ u bʼetik a yaj tiʼijooʼ tzʼubʼ. Walak u yajtal u yool a mak a jaj u kʼati u tzʼokes a Dʼioso. Xoko Mateo 24:3-5, 11, 12.
A religion a jaj walak u nakʼsik u yanil a Dʼios, leʼek a religion a maʼ jaj maʼ kiʼ tuwich a Dʼios. Walakooʼ u kaʼansik a tukul a maʼ yan ich Bʼibʼle tupach a Dʼios etel u pektzil a kimen. Pero a Jehovah u kʼati kaʼ u yeeltooʼ a jaj a kristiyaano tupach. Xoko Romanos 6:23; 1 Timoteo 2:3-5, NWT.
2. Kʼuʼ a kichʼpan pektzil tupach a religion?
U kiʼil, a Dʼios maʼ walak u choʼbʼol u men a religion a tanooʼ u yadʼik ti yajooʼ u yubʼi a Dʼioso, pero u yokʼolkabʼ a Kisin a mas yaj u yubʼooʼ. (Santiago 4:4) Ti yan u kʼabʼaʼ tulakal a religion a maʼ jajooʼ ichil u Tʼan a Dʼios «A Noxiʼ kaj Babilonia.» Tupach a Noxiʼ Tudaʼan jaʼil ichil u kʼin a Noej, yanaji a noxiʼ kaj a Babilonia leʼek tubʼaj kaji a religion a maʼ jaj. A Dʼioso seebʼaʼan u talesik a jobʼol tiʼijooʼ a religion a walak u tus y choʼikooʼ a kristiyaano y junpʼerato ti talak. Xoko Apocalipsis 17:1, 2, 5, 16, 17; 18:8.
Yanto a kichʼpan pektzil. A Jehovah maʼ tubʼen ti a kristiyaano a jajooʼ a keʼenooʼ tuyaam a religion a maʼ toj ichil a junpeet ti yokʼolkabʼ. Tan u muchʼkintikooʼ a kristiyaano adʼaʼa tanil u kaʼansik a jaj tiʼijooʼ. Xoko Juan 6:45.
3. Kʼuʼ a kaʼ u bʼeteʼ a kristiyaano a jajooʼ?
A jajil religion tan u muchʼkintikooʼ a kristiyaano
A Jehovah walak u känäntik a kristiyaano a yaj u yubʼi a jaj y a kiʼi. Tan u yadʼik tiʼijooʼ kaʼ jokʼokooʼ ichil a religion a maʼ jaj, kaʼ u pʼätooʼ pachil. A kristiyaano a yaj u yubʼi a Dʼioso yan u yool u jeleʼ u kuxtal tiʼi kaʼ u kiʼkunte u yool a Dʼioso. Xoko Apocalipsis 18:4.
Ichil u kʼin a Jesus, leʼek a kristiyaano a jajooʼ kaʼ u yubʼajooʼ a kichʼpan pektzil etelooʼ u yaj kambʼal, mil kiʼooʼ u yool. U känajooʼ a tumulbʼen kuxtal etel Jehovah, u bʼejnil a kiʼil kuxtal a yan u nukul y a walak u yooltikooʼ. Kiʼ ejemplojooʼ tiʼi toʼon u men u tzʼajooʼ taanil kʼuʼ u kʼati a Jehovah ichilooʼ u kuxtal. Xoko 1 Tesalonicenses 1:8, 9; 2:13.
Leʼek mak walak u jokʼol ichil a religion a maʼ jaj, a Jehovah walak u kʼämʼooltikooʼ ichil u familia. Wa kaʼ a kʼämʼoolte a Jehovah bʼel a kaʼa a ʼamiigojte y bʼel a kaʼa käxte a tumul familia a yan u yakunaj a walak u tzʼeek u yanil a Jehovah y kuxtal ti bʼebʼeel. Xoko Marcos 10:29, 30; 2 Corintios 6:17, 18.
4. Bʼikiʼ ti bʼel u kaʼa u tales a kiʼolal a Dʼios tuwich a yokʼolkabʼ?
Kichʼpan u pektzil ti seebʼaʼan u tzʼabʼäl ichil u sipʼil a religion a maʼ jaj. Tulakal a yokʼolkabʼ kiʼak u yool ti maʼ kaʼ keʼenakooʼ yalam a kʼas. Maʼax kaʼ bʼikʼin bʼel u kaʼa ti choʼ y kaʼ u jäpʼooʼ a mak a religion a maʼ jaj. Tulakal mak a kuxaʼanakooʼ ich komonil tanakooʼ u tzʼeek u yanil a Dʼios a jaj. Xoko Apocalipsis 18:20, 21; 21:3, 4.
