Пророкот Мојсеј рекол дека, ако сме им послушни на Божјите заповеди, Бог ќе нѐ благослови (5. Мојсеева 10:13; 11:27). Ние не сме му послушни на Бог од страв дека тој ќе нѐ казни. Напротив, тоа што има убави особини нѐ поттикнува да му бидеме послушни од љубов и да не направиме нешто со кое би го разочарале. Во Божјата Реч пишува: „Љубовта кон Бог значи да се држат неговите заповеди“ (1. Јованово 5:3).

На кој начин тоа што сме му послушни на Бог ни носи благослови? Да разгледаме два начина.

„Јас, Јехова, сум твој Бог, кој те учи да го правиш она што е за твое добро, кој те води по патот по кој треба да одиш“ (ИСАИЈА 48:17).

Јехова Бог, нашиот Творец, добро нѐ познава и ни го дава потребното водство. Ако сакаме неговите учења да ни помогнат да носиме мудри одлуки, мора да дознаеме од Светото писмо што сака Бог да правиме и потоа да постапуваме во склад со тоа.

„Среќни се оние што ја слушаат речта Божја и ја држат!“ (ЛУКА 11:28).

Денес, милиони луѓе кои се послушни на она што го пишува во Божјата Реч навистина се среќни. Размисли за примерот на еден маж од Шпанија кој лесно избувнувал и постапувал грубо со другите, дури и со својата жена. Еден ден, во списите што ги напишал пророкот Мојсеј, овој човек прочитал колку бил кроток Јосиф, синот на Јаков. Јосиф бил продаден како роб и неправедно затворен. Но и покрај тоа, тој останал кроток, мирољубив и им простувал на другите (1. Мојсеева, поглавја 37-45). Овој човек од Шпанија признава: „Тоа што размислував за примерот на Јосиф ми помогна да станам кроток, љубезен и да покажувам самоконтрола. Како резултат на тоа, сега сум вистински среќен“.

Во Светото писмо има и други совети за тоа како треба да постапуваме со другите. Во следната статија ќе разгледаме некои од нив.