Колымыжо вашеш Иисус ныл тунемшыж дене мутланен налын — нуно Петр, Иаков, Иоанн да Андрей лийыныт. Иисус нунылан палдарен, могай пале-влак тудын пытартыш кечылаште Кугыжа семын вуйлаташ тӱҥалмыжым ончыктат. Вара тудо тыгай йодышым пуэн: «Моло тарзым вуйлаташ да нунылан шке жапыштыже кочкышым пуаш озан шогалтыме ӱшанле да ушан тарзыже кӧ лиеш?» (Матфейын 24:3, 45; Маркын 13:3, 4). Иисус тыглай кочкыш нерген огыл каласен. Кочкыш дене тудо Юмо нерген шинчымашым таҥастарен. Тыге тудо шке тунемшыж-влакым теве мо нерген ӱшандарен: «оза» семын тудо «тарзым» шогалта; тиде «тарзыже» осал саманын пытартыш кечылаштыже Иисус почеш кайыше-влаклан Юмо нерген шинчымашым чарныде пуэдаш тӱҥалеш. Тиде «тарзе» манме группыш кӧ пура?

Иисус почеш кайыше шӱрымӧ иза-влак гыч шогышо изирак группо. «Тарзе» — тиде Иегован Таныкше-влакын Вуйлатыше советышт. Тудо уло тӱнямбалне иза-ака-влаклан библийысе чыным шке жапыштыже умылаш полша. Тиде ӱшанле тарзе деч посна ме Юмо нерген кӱлешан шинчымашым да библийысе чыным «шке жапыштыже» пален налын она керт ыле (Лукан 12:42).

Юмын пӧртыштыжӧ озанлык вуйлатыше лияш шогалтыме (1 Тимофейлан 3:15). Иисус «тарзылан» кугу пашам ӱшандарен пуэн — мландыште Иегован калыкшым виктарен шогаш. «Тарзылан» материальный погым ончаш, таныклымаш пашам виктараш да погынымаш гоч мемнам туныкташ ӱшандарыме. Библийысе чыным «ӱшанле да ушан тарзе» мыланна публикаций, вашлиймаш да конгресс гоч умылтара.

«Тарзе» ӱшанле улеш — тудо библийысе чын туныктымаш деч огеш кораҥ да поро уверым шаркалымаште ӱшанле кодеш; тыгак тудо ушан, молан манаш гын Христосын мландыште улшо погыжым уш-акыл дене кучылтеш (Апост. пашашт 10:42). Иегова «тарзын» пашажым суапландара. Тиде теве кушеч коеш: Юмо утларак да утларак яндар шӱман еҥ-влакым шке калыкыш пога, а «тарзылан», Библий негызеш возымо шуко публикацийым лукташ вийым да ушым пуа (Исаия 60:22; 65:13).

• Тунемше-влаклан Юмо нерген шинчымашым пуэдаш Иисус кӧм шогалтен?

• Мо шотышто «тарзе» ӱшанле да ушан улеш?