Иегова чылажымат шот дене ышта (1 Коринфян-влаклан 14:33). Сандене христиан погынымаштат чылажат шот дене ышталтеш. Кузе Иегова Иисус гоч погынымашым виктара? Тушто чылажат шот дене ышталтше манын, кажныже мом ыштен кертеш?

1. Погынымашлан вуй кӧ улеш?

«Христос Черкылан [«погынымашлан», УТ] вуй улеш» (Ефесян-влаклан 5:23). Кава гычын Иисус Христос уло тӱня мучко илыше Иегован калыкшын пашажым виктара. Тудо «ӱшанле да ушан тарзым» шогалтен. Тиде опытан кугурак иза-влак гыч шогышо изи группо, кудыжо эше Вуйлатыше совет маналтеш. (Матфейын 24:45—47 лудын лекса.) Икымше курымышто христиан-влакын пашаштым Иерусалимыште улшо апостол ден кугурак иза-влак виктареныт. Таче чыла погынымашлан кӱштымаш-влакым Вуйлатыше совет пуа (Апост. пашашт 15:2). Но нине пӧръеҥ-влак организацийыштына вуйлатыше-влак огытыл. Нуно Иисусым колыштыт да иктаж-мо шотышто Иегован ончалтышыжым умылен налашлан келгын Библийым шымлат.

2. Кӧ тыгай кугурак иза-влак, да мом нуно ыштат?

Кугурак иза-влак — тиде христиан улшо опытан пӧръеҥ-влак. Нуно Библий почеш Иегован калыкшым туныктат да погынымаш верч тыршат. Нуно шке пашаштым оксам налде шуктат. Кугурак иза-влак шкаланышт пайдам огыт кычал, нуно служымаште уло кумылын тыршат (1 Петрын 5:1, 2). Нунылан служебный полышкалыше-влак полшат, кудышт, жап эртымеке, шкеат кугурак иза семын служитлен кертыт.

Южо кугурак иза-влакым Вуйлатыше совет районым эскерыше изалан шогалта. Нуно, тӱрлӧ погынымашыш миен, иза-ака-влаклан кӱштымашым пуат да нуным кумылаҥдат. Районым эскерыше иза-влак погынымаште пӧръеҥ-влакым кугурак изалан да служебный полышкалышылан шогалтат. Тыгай назначенийым налашлан нине пӧръеҥ-влак Библийыште возымо йодмашлан келшен толшаш улыт (1 Тимофейлан 3:1—10, 12; Титлан 1:5—9).

3. Кажне Иегован Таныкше мом ыштышаш?

Погынымаште чыланат «Юмын лӱмжым моктат»: вашлиймаш годым нуно комментарийым пуат, ойлымаш да диалог-влак дене лектыт, мурым мурат, тыгак нуно кертме семын таныклен коштыт. (Псалом 148:12, 13 лудын лекса.)

 КЕЛГЫНРАК ШЫМЛЕН НАЛЗА

4. Иисус — поро вуйлатыше

Иисус мемнан кокла гыч кажныжлан чапле ӱжмашым пуа. Матфейын 11:28—30 лудын лекса да вашмутым пуыза:

• Иисус могай вуйлатыше, да тудын вуйлатымыже йымалне еҥ-влак мом шижыт?

5. Кугурак иза-влак примерым ончыктат

1. А. Кугурак иза-влак шкеат Иегова деке лишемаш тыршат да лишылышт-влаклан тидым ышташ полшат

2. Б. Кугурак иза-влак погынымаште кажныже верч тыршат

3.  В. Кугурак иза-влак эре таныклат

4. Г. Кугурак иза-влак погынымаште туныктат, тыгак нуно Вашлиймаш залым эрыкташ да вес паша шотыштат полшат

6. Ме кугурак иза-влаклан полшен кертына

Библийыште кӱлешан амалым возымо, молан ме кугурак иза-влаклан полшышаш улына. Еврей-влаклан 13:17 лудын лекса да вашмутым пуыза:

• Молан Библий кугурак иза-влакым колышташ тарата? А те тидын нерген мом шонеда?

Лукан 16:10 лудын лекса да вашмутым пуыза:

• Молан кугурак иза-влакым эре колышташ кӱлеш, эсогыл изи йодышыштат?

 ТӰҤ ШОНЫМАШ

Иисус — погынымашлан вуй. Ме кугурак иза-влаклан полшаш ямде улына, вет нуно мемнан верч тыршат да чыла шотыштат Христос деч примерым налыт.

Ушештарымаш

• Погынымашлан вуй кӧ улеш?

• Погынымаште кугурак иза-влак мом ыштат?

• Кажне Иегован служитлышыже мом ыштышаш?