Мый Саксоний кундемын ик ялыштыже шочынам. Тугодым тиде Германий Демократий Республикын территорийже лийын (ГДР). Мемнан ешна пиалан лийын да ача-ава мыйым нравственный принцип-влаклан туныктеныт. ГДР коммунистический государстве лийын, сандене мемнан кундемыштына шукышт Юмылан ӱшанен огытыл. Мый шкежат Юмын улмыжлан ӱшанен омыл. 18 ий теммешке атеизм ден коммунизм туныктымаш мыйын илышыштем кугу рольым модыныт.

Коммунист-влак туныктеныт: чыла еҥ иктӧр улеш. Тиде шонымаш мыланем келшен. Тыгак мый шоненам: государствын чыла поянлыкшым еҥ-влак коклаште пайлаш гын, тунам йорло ден поян-влак огыт лий. Сандене мый коммунистический молодёжный организацийыш ушненам. 14 ияш годым мый ик экологий проектыште тыршенам. Ауэ лӱман верысе олан вуйлатышыже-влак тыршымемлан эсогыл наградым пуэныт. Самырык лийынам гынат, мый ГДР-ын южо политик еҥ дене уже палыме лийынам. Мый ӱшаненам: илышыштем чын цель-влакым ойырен налынам да ончыкыжым мыйым волгыдо илыш вуча.

Но кенета мыйын илышем вашталтын. 1989-ше ийыште Берлин пырдыжым сӱмыреныт. Тыгак Эрвел Европысо эл-влакын коммунистический стройышт шаланен. Тиде гына огыл мыйын шӱм-чонемлан корштымашым конден. ГДР-ыште чот шуко чын огыл ыштымаш лийын улмаш. Мутлан, кӧ коммунистический строй могырышто шоген огыл, тыгай еҥым кокымшо сортлан шотленыт. Кузе тыге лийын кертын? Вет ме, коммунист-влак, чыла еҥ иктӧр улеш манын ӱшаненна. Лектеш, коммунизм — тиде иллюзий веле лийын? Мыйым кугу тургыжланымаш авалтен.

Мый цель-влакемым вашталтенам да илышемым музык да искусство дене кылдаш шонен пыштенам. Музыкальный училищ деч вара университетыш тунемаш пураш мыйын шуко йӧнем лийын. Мый художник да музыкант лийнем ыле. Ача-авамын туныктымо нравственный принцип-влакым мый мондаш тӱҥалынам. Уло яра жапым мый веселан эртаренам, мутлан, иканаште икмыняр ӱдыр дене коштынам. Но музык, искусство да яжар илыш тургыжланымым шагалемден огытыл. Сӱретыштемат лӱдмаш ден тургыжланымемым ужаш лиеш ыле. Вуйыштем эре тыгай шонымаш пӧрдын: мо ончыкыжым лиеш? Молан мый илем?

Вашке мый тургыжландарыше йодышем-влаклан вашмутым пален налынам. Икана кастене занятий деч вара ме тунемше-влак дене пырля ончыкылык нерген мутланен шинчышна. Мемнан коклаште Иегован Таныкше улшо Манди * лӱман ик ӱдыр лийын. Ту кастене тудо мыланем сай каҥашым пуэн. Тудо каласен: «Андреас, йодышет-влаклан вашмутым пален налнет гын, Библийыш ончал».

Кокыте шонымашем лийын гынат, вашмутым пален налмем чот шуын. Манди мыланем Даниил книган 2-шо ужаш гыч ончылгоч каласымашым ончыктен. Тушечын пален налме мыйым чот ӧрыктарен. Тиде ончылгоч каласымаш тӱнямбалысе кугыжаныш-влак нерген палдара. Нуно икмыняр курым мучко, мемнан кече-влак марте, икте-весыштым алмаштен шогеныт. Тыгак Манди мыланем ончыкылык нерген вес библийысе ончылгоч каласымаш-влакым ончыктен. Ындыжым шке йодышем-влаклан вашмутым мый муынам. Но кӧ ончыкылык нерген тынар раш ончылгочак каласен кертын? Ала Юмо чынжымак уло?

Манди мыйым Танык-влак улшо Хорст да Ангелика дене палымым ыштен. Тиде еш мужыр мый денем Библийым шымлаш тӱҥалын. Мый вашке умылен налынам: религиозный организаций-влак кокла гыч Иегован Таныкше-влак веле Юмын лӱмжым, Иегова, эре кучылтыт да тудын нерген весе-влаклан каласкалат (Псалом 82:19; Матфейын 6:9). Мый пален налынам: Иегова Юмо еҥ-влаклан рай мландыште курымашлык илышым пӧлеклаш сӧра. Псаломышто 36:9 (У Сугынь, 1986) ойлалтеш: «Господьлан ӱшаныше-влак мландым налыт». Юмын нормыжо почеш илаш тыршыше кажне еҥын тыгай йӧнжӧ уло улмаш. Тиде мыланем чот келшен.

Но илышемым вашталташ куштылго лийын огыл. Музык ден искусствышто кӱкшытыш шуымылан кӧра мый кугешныше лийынам, сандене эн ончыч мыланем ӱҥышӧ лияш тунемаш кӱлын. Яжар илышым кодаш чотак неле лийын. Иеговалан кугу тау, вет тудо библийысе принцип почеш илаш тыршыше еҥ-влакым чыта, чамана да умыла.

18 ий марте мыйын ончалтышем-влак коммунизм ден атеизм дене негызлыме лийыныт, а ындыжым илышемым Библий виктара. Библийлан кӧра мый ончыкылык нерген тургыжланымым чарненам да молан илымемым раш умылен налынам. 1993-шо ийыште мый тынеш пуренам да Иегован Таныкше лийынам, а 2000-ше ийыште мый Иеговалан служитлаш йӧратыше Табита лӱман христианкым марлан налынам. Еҥ-влаклан Библий дене палыме лияш полшаш манын, ме шуко жапым ойырена. Таныклен, ме чӱчкыдын мыйын гаяк лийше еҥ-влакым вашлийына. Нунат коммунизм ден атеизм жапыште кушкыныт. Мыланем тыгай еҥ-влакым Иегова дене палымым ышташ чот келша.

Кунам мый Иегован Таныкше-влак дене Библийым шымлаш тӱҥалынам, ача-авам кугу лӱдмаш авалтен. Но вара нуно ужыныт могай пайдам илышемлан Танык-влак дене кыл кучымаш конден. Ындыжым нуно Библийым лудыт да Иегован Таныкше-влакын вашлиймашышкышт коштыт. Мый тидлан чот куанем.

Ме Табита дене пиалан улына, вет еш илыш шотышто Библийын каҥашыже-влакым кучылташ тыршена. Мутлан, икте-весылан ӱшанле лияш каҥаш кыл кучымашнам пеҥгыдемдаш полша (Еврей-влаклан 13:4).

Ындыжым мый ончыкылык нерген ом тургыжлане. Мыйын кугу тӱнямбалысе еш уло. Нуно тыныслык ден иктылыкым чот аклат. Тиде духовный ешыште ме чыланат иктӧр улына. Лач тыгай иктылыкыш мый ӱмыр мучко шуаш тыршенам.