Мый пӱртӱсым изинек йӧратем. Ювяскюля шочмо олам воктене (Центральный Финляндий) сылне чодыра ден ер-влак улыт. Тушко ме еш дене пырля чӱчкыдын канаш коштынна. Тыгак мый янлык-влакым чот йӧратем. Йоча лиймем годым кажне вашлиялтше пий ден пырысым ӧндалымем шуын. Кугурак лиймеке, мый ужынам, кузе еҥ-влак янлык-влакым удан онченыт. Тиде мыйым чот шӱлыкаҥден. Жап эртымеке, мый янлыкым аралымаш организацийыш ушненам. Тушто мый икшонышан еҥ-влакым вашлийынам.

Ме янлык-влакын правашт верч чот кучедалынна. Мутлан, тиде теме почеш ме информацийым шаркаленна. Тыгак коваште чиемым ужалымаш да янлык-влак ӱмбач эртаралтме опыт-влак ваштареш марш ден демонстраций-влак дене лектынна. Янлык-влакым аралашлан ме эсогыл шке организацийым почна. Шукыж годым ме власть-влаклан келшыдыме метод-влакым кучылтынна. Тидлан кӧра мемнан шуко нелылык лийын. Икмыняр гана мыйым арестоватлен судитленыт.

Но мыйым янлык-влак верч гына огыл, вес тӱнямбалысе проблеме-влакат тургыжландареныт. Жап эртымеке, мый икмыняр организаций деке ушненам, ты шотыштак «Тӱнямбалысе амнистийыш» да «Гринписыш». Нине организаций-влаклан полшаш манын, мый уло вийым пыштенам. Мый йорло, шужен коштшо да нимо деч посна кодшо еҥ-влакым аралыме верч шогенам.

Но эркын-эркын умылаш тӱҥалынам: мый тиде тӱням вашталтен ом керт. Тидын гаяк организаций-влак южо изи проблемым кораҥден кертыныт гынат, кугу проблемыже вияҥын веле. Тыгай шижмаш лийын, пуйто осал уло тӱням авалтен да нигӧланат нимо кӱлын огыл. Мый шкемым вийдымылан шижын колтенам.

Вийдымылыкемым шижын, мый Юмо да Библий нерген шонкалаш тӱҥалынам. Ончыч мый Иегован Таныкше-влак дене Библийым шымленам. Танык-влак поро лийыныт да мый денем сайрак палыме лияш тыршеныт. Тиде мыланем келшен гынат, тугодым мый илышемым вашталташ ямде лийын омыл. Но ындыжым чылажат вес семын лийын.

Мый Библиемым кычал муынам да тудым лудаш тӱҥалынам. Тиде сусыргышо шӱм-чонемлан эм семын лийын. Библий янлык-влакым сайын ончаш тарата манын, мый ужынам. Мутлан, Притчи 12:10 возымо: «Чын ыштыше айдеме шке вольыкшо верч тырша». Тыгак мый умылен налынам: Юмо айдеме тукымын орланымаштыже титакан огыл. Еҥ-влак гыч шукыжо Юмын кӱштымыжӧ почеш огеш иле, сандене проблеме-влак шукемыт гына. Мый Иегован йӧратымашыж ден чытымыжым пален налынам. Тиде шӱмемым чот тарватен (Псалом 102:8—14).

Тиде жапыштырак «Чему на самом деле учит Библия?» манме книгалан купоным муын, заказым колтенам. Вашке мый декем кок Танык толын, да нуно мыланем Библийым шымлаш темленыт. Шымлаш тӱҥалмеке, мый христиан вашлиймашышкат кошташ тӱҥалынам. Библий гыч пален налме мыланем чот келшен.

Библийлан кӧра мый илышемым вашталтен кертынам. Мый тамакым шупшмым да аракам йӱмым кудалтенам, тӱжвал тӱсемым вашталтенам да уда мутым ойлымым чарненам. Тыгак мый властьым кучышо-влакым вес семын ончаш тӱҥалынам (Римлян-влаклан 13:1). А эше мый яжарланымаш илышым коденам. Ончыч тиде шотышто мый шкемым кучен омыл.

Эн йӧсыракше мыланем лийын — айдемым да янлыкым аралыше организаций-влак шотышто ончалтышым вашталташ. Тидлан жап кӱлын. Эн ончыч мыйын тыгай шонымаш лийын, пуйто нине организаций-влак гычын лектам гын, нуным ужалыше семын лиям. Но жап эртымеке, мый умылен налынам: Юмын Кугыжанышыже веле тӱнялан чын ӱшаным пуэн кертеш. Сандене уло вий дене тиде Кугыжаныш верч тыршаш да еҥ-влаклан тудын нерген каласкалаш кугу кумылем лектын (Матфейын 6:33).

Активист лийын, мый еҥ-влакым сай да уда-влаклан ойыркалаш тунемынам да шонымаштем уда улшо еҥ-влак дене кучедалаш ямде лийынам. Ончыч мый еҥ-влакым ужмышудымо лийынам, а ындыжым, мӧҥгешла, Библийлан кӧра чыла еҥ деке христиан йӧратымашым вияҥдаш тыршем (Матфейын 5:44). Мутлан, мый нунылан Юмын Кугыжаныш нерген поро уверым каласкалем. Мый чот йывыртем, кунам ужам, кузе тиде паша еҥ-влаклан тынысым да пиалым конда да чын ӱшаным нунылан пуа.

Иеговалан ӱшанаш тунеммеке, мый шӱм-чон тыныслыкым налынам. Мый ӱшанем: Юмо еҥ-влакым да вольык-янлыкым мучашдымын индыраш да сылне планетнам пытараш огеш пу, вет тудо Чылажымат Ыштыше. Вашке тудо мланде ден еҥ-влаклан кондымо чыла эҥгекым кораҥда (Исаия 11:1—9). Нине чын шинчымашым палымаш да тидын нерген еҥ-влаклан каласкалымаш мыланем моткоч кугу куаным конда. Ындыжым мый тӱням вашталташ ом тырше.