ШЫМЛЫШАШ СТАТЬЯ 29
А те кугу азаплан ямде улыда?
«Ямде лийза» (МАТФ. 24:44).
150 МУРО Утаралташлан Иеговам кычал
МОМ ШЫМЛЕН ЛЕКТЫНА a
1. Пӱртӱс вий ден лийше эҥгеклан молан ямдылалташ кӱлеш?
МЕ ИКТАЖ-МОЛАН ямдылалтме улына гын, тиде илышнам утарен кертеш. Мутлан, пӱртӱс вий ден лийше эҥгеклан ямдылалтше еҥ-влак, очыни, шкат утаралтыт да весе-влаклан полшен кертыт. Еҥ-влаклан полшышо ик европысо организаций теве мом каласен: «Сай ямдылалтмаш илышым утарен кертеш».
2. Молан мыланна кугу азаплан ямдылалташ кӱлеш? (Матфейын 24:44).
2 «Кугу азап» вучыдымын тӱҥалеш (Матф. 24:21). Но моло азап деч тудо чот ойыртемалтеш, вет ме тудын толмыжо нерген палена. 2 000 ий наре ончыч Иисус тунемшыж-влаклан тиде кечылан ямде лияш каласен. (Матфейын 24:44 лудын лекса.) Ямдылалтме улына гын, ту неле жапыште пеҥгыде кодаш да весе-влаклан полшаш мыланна куштылгырак лиеш (Лук. 21:36).
3. Кузе пеҥгыдын шогымаш, чаманымаш да йӧратымаш мыланна кугу азаплан ямдылалташ полшат?
3 Айста кугу азаплан ямдылалташ полшышо кум койышым ончен лектына. Кунам мыланна судитлымаш уверым каласкалаш кӱштымӧ лиеш, а ӱшаныдыме еҥ-влак мемнам поктылаш тӱҥалыт, тунам ме мом ышташ тӱҥалына? (Почм. 16:21). Иеговам колышташлан мыланна пеҥгыдын шогаш кӱлеш. Тудо мемнам утара манын ӱшанышаш улына. Иза-акана-влак погыштым йомдарат гын, тыгай годым мом ме ыштена? (Авв. 3:17, 18). Нунылан полшашлан мыланна чаманыше лийман. Наций-влакын коалицийыштын кержалтмыж верч мыланна иза-акана-влак дене пырля изи пӧлемыште лияш логалеш гын, тугодым ме шкенам кузе кучаш тӱҥалына? (Иез. 38:10—12). Тиде неле жапым пырля чытен лекташлан мыланна нуным чот йӧраташ кӱлеш.
4. Пеҥгыдын шогымашым, чаманымашым да йӧратымашым вияҥдаш кӱлмӧ нерген Библий мом ойла?
4 Юмын Мутшо мемнам пеҥгыдын шогаш, чаманыше лияш да йӧраташ тарата. Лукан 21:19 почеламутышто возымо: «Чытымыда дене шке чондам утарыза». Колоссян-влаклан 3:12 тарата: «Чаманымаш... дене вӱдылалтса». А 1 Фессалоникысе-влаклан 4:9, 10 почеламут-влак палдарат: «Те шкеат туныктымо улыда Юмо дене икте-весыдам йӧраташ... Но ме ӱжына тендам, изай-влак, эша утларак сеҥымашке шуаш» (У Сугынь, 1986). Чыла нине мут-влак пеҥгыдын шогышо, чаманыше да йӧратыше христиан-влаклан каласыме лийыныт. Туге гынат нунылан нине койыш-влакым умбакыжат вияҥдаш кӱлын. Тидымак мыланнат ыштыман. Мо мыланна полшен кертеш? Айста ончалына, кузе икымше курымысо христиан-влак нине койыш-влак гыч кажныжым ончыктеныт, а вара лончылен налына, кузе ме нине иза-ака-влак деч примерым налын кертына. Тыге ме ужына: кугу азаплан ямде улына але уке.
ПЕҤГЫДЫН ШОГЫЗА
5. Икымше христиан-влаклан нелылык годым пеҥгыдын шогаш мо полшен?
5 Икымше христиан-влаклан пеҥгыдын шогаш кӱлын (Евр. 10:36). Илыш проблеме деч моло нунын эше вес нелылык лийын. Христиан-влак гыч шукыштым иудейысе религиозный вуйлатыше-влак ден римысе вуйлатыше-влак гына огыл, тыгак родыштат поктылыныт (Матф. 10:21). А эше погынымаш кӧргыштӧ отступник-влак туныктымашыштым шаркаленыт да иктылыкым пудырташ тыршеныт, сандене христиан-влаклан нунын туныктымашышт деч шекланыман ыле (Ап. паш. 20:29, 30). Саде христиан-влак пеҥгыде кодыныт (Почм. 2:3). Нунылан мо полшен? Нуно пеҥгыдын шогымаш шотышто библийысе пример-влак нерген шонкаленыт, мутлан, Иов нерген (Иак. 5:10, 11). Тыгак нуно вий нерген кумалыныт (Ап. паш. 4:29—31). А эше нине христиан-влак шарненыт: нуно чытен лектыт гын, Иегова нуным суапландара (Ап. паш. 5:41).
6. Поктылмым чытен лекме шотышто Меритан примерже гыч мо́лан тунемыда?
6 Меат чытен лектын кертына. Тидлан мыланна пеҥгыдын шогышо еҥ-влакын примерышт нерген шонкалаш кӱлеш, кудышт нерген Библийыште да публикацийыштына возымо. Лач тиде Албаний гыч Мери́талан ешын поктылмыжым чытен лекташ полшен. Тудо ойла: «Иовын примерже шӱмемым чот тарватен. Иов тынар чот орланен, тудо паленат огыл, кӧ нелылыкыштыже титакан лийын. Но садак каласен: „Колымешкемак Юмылан ӱшанле кодам!“ Мый шоналтенам, а вет мыйын нелылыкем Иовын нелылыкше дене таҥастарымаште путырак изи. Иов пален огыл, а мый палем, кӧ орлыкыштем титакан» (Иов 27:5).
7. Кугу нелылык дене огыда тӱкнӧ гынат, мом тыланда кызытак ышташ тунемаш кӱлеш?
7 Ме Иеговалан тургыжланымына нерген чӱчкыдын да чон почын ойлена гын, тидыжат мыланна пеҥгыдын шогаш полша (Флп. 4:6; 1 Фес. 5:17). Очыни, кызыт те кугу нелылык дене огыда тӱкнӧ. Но шке деч йодса: «Кунам мый шӱлыкаҥынам але мом ышташ ом пале, тунам мый Иегова деч полышым кычалам мо?» Кеч-могай нелылык годым те уже кызытак Юмылан кумалыда гын, тунам кугу нелылык дене тӱкнымӧ годымат тыланда тудын деч полышым йодаш куштылго лиеш. Тунам ӱшанда пеҥгыде лиеш: кунам да кузе тыланда полшаш, Юмо чынжымак пала (Пс. 26:1, 3).
ПЕҤГЫДЫН ШОГЫМАШ
Кызыт нелылыкыште пеҥгыдын шогена гын, вес нелылыкыште пеҥгыдын шогаш куштылгырак лиеш (8 абзацым ончыза.)
8. Уже кызытак пеҥгыдын шогена гын, ончыкыжым нелылыкым чытен кертына манын, Миран примерже кузе ончыкта? (Иаковын 1:2—4) (Тыгак сӱретым ончыза.)
8 Ме уже кызытак пеҥгыдын шогена гын, тиде мыланна кугу азапым чытен лекташ полша (Рим. 5:3). Молан тыге каласаш лиеш? Шуко иза-ака ужын: кунам нуно ик нелылык годым пеҥгыдын шогеныт, тидлан кӧра нунылан вес нелылыкым чытен лекташ куштылгырак лийын. Иегова воктене да эре полшаш ямде улеш манын, нунын ӱшанымашышт пеҥгыдемын. А тиде ӱшанымаш вес нелылык годым пеҥгыдын шогаш полшен. (Иаковын 1:2—4 лудын лекса.) Албаний гыч Ми́ра лӱман пионер акалан илыш опытшо пеҥгыдын шогаш полша. Южгунам тудлан чучеш, пуйто тудын гына тынар шуко проблемыже. Но тунам тудо шарналта, пытартыш 20 ий мучко мыняр чот Иегова тудлан полшен. Тудо шкаланже ойла: «Кидетым ит волто! Ит мондо, мом Иегова тыланет ыштен. Шарне, мыняр гана тый Иегован полшымыж дене пеҥгыдын шогенат». Теат шарнен кертыда, кузе Иегова тыланда иктаж-могай нелылыкым чытен лекташ полшен. Тунам кугу азап тӱҥалме деч ончыч тендан опытда лиеш, кузе нелылыкым чыташ, да умбакыжат пеҥгыдын шогаш кумылаҥдыме лийыда. Палыза: Иегова ужеш, кузе те кажне нелылыкым чытеда, да тендам пеҥгыдын шогымыланда суапландара (Матф. 5:10—12).
ЧАМАНЫШЕ ЛИЙЗА
9. Сирийысе Антиохийыште илыше христиан-влак чаманымашым кузе ончыктеныт?
9 Ончен лектына, мо лийын, кунам Иудейыште кугу шужымаш тӱҥалын. Кунам сирийысе Антиохийыште илыше христиан-влак тидын нерген колыныт, нуно, мутат уке, иудейысе изашт-влак деке чаманымашым шижыныт. Но нине христиан-влак чаманымыштым эше паша дене ончыктеныт. Нуно, «кажныже кертмыж семын, Иудейысе иза-шольо-влаклан полышым колташ» шонен пыштеныт (Ап. паш. 11:27—30). Антиохийыште илыше христиан-влак Иудей деч мӱндырнӧ иленыт гынат, нунын изашт-влаклан чот полшымышт шуын (1 Иоан. 3:17, 18).
ЧАМАНЫМАШ
Пӱртӱс вий ден лийше эҥгек годым чаманымашым ончыкташ йӧн лектеш (10 абзацым ончыза.)
10. Кузе ме энгекыш логалше иза-ака-влаклан чаманымашым ончыктен кертына? (Тыгак сӱретым ончыза.)
10 Меат таче пӱртӱс вий ден лийше эҥгекыш але вес энгекыш логалше иза-ака-влаклан чаманымашым ончыктен кертына. Ме вигак полшаш тыршена. Мутлан, ме кугурак иза-влаклан полшаш кумылна нерген ойлена b, тӱнямбалысе пашалан окса надырым пуэна але нелылыкыш логалше-влак верч кумалына (Прит. 17:17). COVID-19 пандемий верч орланыше-влаклан полшашлан 2020 ийыште тӱня мучко 950 утла полыш комитет чумырымо лийын. Тиде комитет-влак дене пырля тыршыше иза-ака-влаклан таум ойлена. Чаманымаш нуным тарата иза-ака-влаклан гуманитарный полышым колташ, нунын ӱшанымашыштым пеҥгыдемдаш, а южгунам Вашлиймаш зал ден иза-ака-влакын пӧртыштым ачалаш але угыч чоҥаш (2 Коринфян-влаклан 8:1—4 дене таҥастарыза.)
11. Кузе поро пашана-влак кавасе Ачанам чапландарат?
11 Кунам ме пӱртӱс вий ден лийше эҥгек деч вара иза-акана-влаклан полшена, еҥ-влак тидым ужыт. Мутлан, 2019 ийыште «До́риан» тӱтан мардеж Бага́мыште Вашлиймаш залым шалатен. Вашлиймаш залым угыч чоҥымо годым изана-влак Танык огыл подрядчик деч йодыныт, мыняр оксам тудо пашажлан налеш. Тидлан тудо каласен: «Мый тыланда оборудованийым, пашазе-влакым да материалым яра пуэм. Тендан организацийланда чот полшымем шуэш. Икте-весе нерген тыршымыда шӱмемым чот тарватен». Шуко еҥ Иеговам огеш пале. Но нунын гыч шукышт Иегован Таныкше-влакын пашаштым ончат. Поро пашана-влак еҥ-влакым «порылыклан поян» Юмо деке лишемаш кумылаҥден кертыт. Тиде мемнам чот куандара! (Еф. 2:4).
12. Тачак чаманымашым ончыкташ тунемына гын, кузе тиде кугу азаплан мемнам ямдыла? (Почмаш 13:16, 17).
12 Кугу азап годым молан мыланна чаманыше лияш кӱлеш? Библий раш палдара: кӧ тиде политический системын могырыштыжо огеш шого, тыгай еҥ-влакын мемнан жапыштат, кугу азап годымат нелылык лиеш. (Почмаш 13:16, 17 лудын лекса.) Иза-акана-влак, очыни, эн кӱлешанже деч поснат кодын кертыт. Вашке Кугыжана, Иисус Христос, тиде тӱнялан Юмын приговоржым шукташ толеш. Тугодым тек тудо ужеш, кузе ме иза-акана-влак деке чаманымашнам ончыктена! Тунам тудо мыланна каласа: «Кугыжанышым... наследник семын налза» (Матф. 25:34—40).
ЙӦРАТЫМАШЫМ ВИЯҤДЫЗА
13. Кузе Римлян-влаклан 15:7 гыч Павелын каҥашыже икымше христиан-влаклан икте-весым йӧратымым вияҥдаш полшен?
13 Икымше курымышто чыланат паленыт, кузе христиан-влак икте-весыштым йӧратеныт. Но нунылан икте-весым йӧраташ куштылго лийын мо? Айста римысе христиан погынымаш нерген шарналтена. Тудо тӱрлӧ еҥ гыч шоген. Тушто изинек Моисейын закон почеш илыше еврей-влак, тыгак пӱтынек вес условийыште кушшо язычник-влакат лийыныт. Христиан-влак коклаште, очыни, кул-влак, эрыкан-влак, эсогыл кул оза-влакат лийыныт. Кузе нуно, тӱрлӧ улмыштым ончыде, йӧратымашыштым вияҥден кертыныт? Апостол Павел нуным таратен: «Сандене приниматлыза икте-весым, кузе и Христос тендам приниматлен, Юмын чапшылан» (Римлян-влаклан 15:7, У Сугынь, 1986). Мом тудо каласынеже ыле? «Приниматлыза» кусарыме мут «иктаж-кӧм уло кумылын уналыкеш пурташ» але «иктаж-кӧ дене лишыл йолташ лияш» манмым ончыкта. Мутлан, Павел Филимоным тудын деч куржын кайыше Онисим кулжым шке декше уло кумылын пурташ таратен (Флм. 17). А Прискилла ден Акила шкешт дек Аполлосым ӱжыныт, кудыжо христианстве нерген нунын деч шагалрак пален (Ап. паш. 18:26). Ту христиан-влак пеш тӱрлӧ лийыныт гынат, икте-весе деч торлен огытыл, а мӧҥгешла, икте-весым уло кумылын йӧратеныт.
ЙӦРАТЫМАШ
Нелылык годым иза-ака-влакын йӧратымашышт мыланна пеҥгыдын шогаш полша (15 абзацым ончыза.)
14. Кузе Анна ден марийже йӧратымашым ончыктеныт?
14 Иза-акана-влак дене йолташ лийын, ме нунылан йӧратымашнам ончыктена. Нунат вашеш мемнам йӧраташ тӱҥалыт (2 Кор. 6:11—13). Теве Аннан примерже. Тудым марийже дене пырля касвел Африкыш миссионер семын служитлаш колтеныт. Тидын деч вара COVID-19 пандемий тӱҥалын. Сандене нуно у погынымаш гыч иза-ака-влак дене вашлиялт кертын огытыл. Тугеже Анна ден марийже нунын дек йӧратымашым кузе ончыктен кертыныт? Нуно иза-ака-влаклан видеосвязь дене йыҥгыртеныт да нунын дене лишылрак лияш кумылышт нерген ойленыт. Нине миссионер-влакын йӧратымашышт шукыштын шӱмыштым тарватен. Сандене иза-ака-влак вашешышт йыҥгыртеныт да сообщений-влакым колтеденыт. Нине миссионер-влак у погынымаш дене молан тынар чот лишыл лияш тыршеныт? Анна ойла: «Иза-ака-влак ешемлан шуко гана йӧратымашыштым ончыктеныт — ойго годымат, сай годымат. Тиде шӱмышкем возын, сандене мыйынат тыгаяк йӧратымашым ончыктымем шуэш».
15. Чыла иза-акам йӧратыме шотышто Ванессан примерже гыч мо́лан тунемыда? (Тыгак сӱретым ончыза.)
15 Погынымаште тӱрлӧ культур гыч да тӱрлӧ койышан иза-ака-влак улыт. Нунын сай койышыштым ужаш тыршыман. Тунам нуным йӧраташ мыланна куштылгырак лиеш. У Зеландийыште служышо Ване́ссалан погынымаште южо иза-ака-влак дене сай кылым кучаш йӧсӧ лийын. Но вара тудо нунын деч торлаш огыл, а мӧҥгешла, нунын дене шукырак жапым эртараш шонен пыштен. Тидлан кӧра тудо ужын, молан Иегова нуным йӧрата. Тудо ойла: «Кунам марием районым эскерыше иза семын служитлаш тӱҥалын, ме эше шукырак тӱрлӧ койышан иза-ака-влак дене палыме лийынна. Но мыланем тиде уже проблеме лийын огыл. Ындыжым иза-ака-влакын тӱрлӧ улмышт мыланем келша. Иеговаланат тиде келша, вет тудо шкеж дек тӱрлӧ-тӱрлӧ еҥым ӱжын конден». Весе-влакым Иегова семын ончаш тыршена гын, нуным йӧратена манын ончыктена (2 Кор. 8:24).
Иза-акана-влак дене пырля лийына гын, Иегова мемнам кугу азап годым арала (16 абзацым ончыза.)
16. Молан кугу азап годым иза-ака-влакым йӧраташ чотак кӱлешан лиеш? (Тыгак сӱретым ончыза.)
16 Иза-ака-влакым йӧраташ поснак кугу азап годым чотак кӱлешан лиеш. Тудын тӱҥалмыж годым Иегова мемнам кузе арала? Кунам мидо-перс войска акрет годсо Вавилон ӱмбак кержалтын, Иегова шке служитлышыже-влаклан теве мом ышташ кӱштен: «Мыйын калыкем, кӧргысӧ пӧлемышкет пуро да омсатым тӱкылӧ. Шыде пытымешке, кӱчык жаплан шыл» (Ис. 26:20). Очыни, мыланнат кугу азап годым тыгаяк кӱштымаш пуымо лиеш. «Кӧргысӧ пӧлем» семын мемнан погынымаш-влак лийын кертыт. Духовный ешна дене пырля лийына гын, Иегова мемнам кугу азап годым арала. Сандене мыланна кызытак иза-ака-влакым чыташ гына огыл, а нуным йӧраташ тыршыман. Тыге веле утаралт кертына!
КЫЗЫТАК ЯМДЫЛАЛТСА
17. Кызытак ямдылалтына гын, кугу азап годым мом ыштен кертына?
17 Иегован кугу кечыж годым чыла еҥлан неле лиеш (Соф. 1:14, 15). Иегован служитлышыже-влакланат куштылго огеш лий. Но кызытак ямдылалтына гын, шӱм-чоныштына тыныс лиеш да ме весе-влаклан полшен кертына. Нелылык дене тӱкнен, ме пеҥгыдын шогаш тӱҥалына. А иза-акана-влак эҥгекыш логалыт гын, нуным чаманаш да нунылан полшашлан мом кертына, чылажымат ыштена. Кызытак иза-акана-влакым йӧраташ тунемына гын, ончыкыжымат нуным йӧратена. Тунам Иегова мыланна курымашлык илышым пӧлекла да чыла ойго курымешлан мондалтеш (Ис. 65:17).
144 МУРО Ончыкылык суапым вучо!
a Кугу азап вашке толеш. Тудлан ямдылалташлан мыланна пеҥгыдын шогаш, чаманыше лияш да икте-весым йӧраташ кӱлеш. Айста лончылен налына, кузе тиде койыш-влак икымше курымышто христиан-влаклан полшеныт, кузе нуно мыланна кызыт полшат да кузе кугу азаплан ямдылалташ полшат.
b Полыш комитет дене пырля тыршымыда шуэш гын, «Заявление на служение добровольцем в программе местного проектно-строительного отдела» (DC-50) але «Заявление на добровольное служение» (A-19) анкетым возыза да вучыза, кунам тендам ӱжыт.