1, 2. а) Ӱшанымаш, ӱшанен вучымаш да йӧратымаш нерген ойлен, молан Павел эн кугужо — йӧратымаш манын каласен? б) Могай йодыш-влакым ме ончен лектына?

 ӰШАНЫМАШ, ӱшанен вучымаш да йӧратымаш нерген ойлен, апостол Павел каласен: «Нунын кокла гыч эн кугужо — йӧратымаш» (1 Кор. 13:13). Молан тудо тыге шонен? Ончыкыжым у тӱня нерген Юмын сӧрымыжлан ӱшанымашым ончыкташ уже огеш кӱл. Вет чыла ӱшанен вучымына шукталтеш. А теве Иеговам да еҥ-влакым йӧраташ умбакыжат кӱлеш лиеш. Чын каласаш гын, нуным йӧратымашна курым-курымеш шукемеш веле.

² Кузе ме палемдышна, йӧратымаш эре кӱлеш лиеш. Сандене айста кум йодышым лончылен налына. Икымше, молан икте-весым йӧраташ кӱлеш? Кокымшо, иза-ака-влакым йӧратена манын, кузе нунылан ончыктен кертына? Кумшо, икте-весым йӧратымаш ынже йӱкшӧ манын, мом ышташ?

3. Икте-весым йӧраташ могай амал-влак улыт?

³ Молан икте-весым йӧраташ кӱлеш? Ик амалже тыгай: чын христиан-влак весе-влак деч йӧратымаш дене ойыртемалтыт. Иисус апостол-влаклан каласен: «Тендан  коклаште йӧратымаш лиеш гын, Мыйын тунемшем улмыдам чылан палат» (Иоан. 13:35). Тыгак йӧратымаш иктылыкым аралаш полша. Павел возен: «Йӧратымаш... уша» (Кол. 3:14). Но эше ик амал уло, молан мыланна икте-весым йӧраташ кӱлеш. Апостол Иоанн иза-ака-влаклан возен: «Юмым йӧратыше шке иза-шольыжымат йӧратышаш» (1 Иоан. 4:21). Икте-весым йӧратена гын, тыге Юмым йӧратена манын ончыктена.

4, 5. Юмым йӧратымашна иза-ака-влакым йӧратымаш дене кылдалтеш манын, могай пример ончыкта?

⁴ Юмым йӧратымашна иза-ака-влакым йӧратымашна дене кузе кылдалтеш? Шоналтыза, кузе шӱм капын вес органже-влак дене кылдалтеш. Кунам врач шӱмнан состоянийжым пален налнеже, тудо пульснам терга. Кузе тиде примерым лончылымо теме дене кылдаш лиеш?

⁵ Пульсым терген, врач пален налын кертеш: шӱмна таза але уке. Тидын семынак, мыняр чот ме Юмым йӧратена пален налнена гын, тергаш кӱлеш, мыняр чот ме весе-влакым йӧратена. Иза-ака-влакым йӧратымашна йӱкша манын ужына гын, тиде теве мом ончыкта: ме Юмым шагалрак йӧраташ тӱҥална. Но иза-ака-влакым паша дене ончыктен йӧратена гын, тиде теве мом палдара: Юмым йӧратымашна дене чыла сай.

6. Иза-ака-влакым йӧратымашна йӱкша гын, тиде мом ончыкта? (1 Иоаннын 4:7—9, 11).

⁶ Иза-ака-влакым йӧратымашна йӱкша манын ужына гын, нимат огыл манын шонаш огеш кӱл. Молан? Молан манаш гын, тиде теве мом ончыкта: Иегова дене кыл кучымашна лушкыдемын. Апостол Иоанн теве мом каласен: «Кӧ шке ужмо иза-шольыжым ок йӧрате, ужаш лийдыме Юмым кузе йӧратен кертеш?» (1 Иоан. 4:20). Тиде почеламут гыч шкаланна могай урокым налына? Иеговалан тунам гына йӧрышӧ лийына, кунам икте-весым йӧратена. (1 Иоаннын 4:7—9, 11 лудын лекса.)

7, 8. Кузе ме иза-ака-влаклан нуным йӧратена манын ончыктен кертына?

⁷ Юмын Мутшо мемнам икте-весым йӧраташ угыч да угыч тарата (Иоан. 15:12, 17; Рим. 13:8; 1 Фес. 4:9; 1 Пет. 1:22; 1 Иоан. 4:11). Но йӧратымаш шӱмыштӧ улеш, кушко ик айдемат ончалын огеш керт. Тугеже иза-ака-влак мемнан йӧратымашнам кузе ужыт? Ме тудым мут да паша дене ончыктен кертына.

⁸ Иза-ака-влакым йӧратена манын, тӱрлӧ семын ончыктен кертына. Теве икмыняр пример. «Икте-весыланда чыным ойлыза» (Зах. 8:16). «Икте-весе дене келшен илыза» (Мар. 9:50). «Пагалымаште икте-весыдам ончылтыза» (Рим. 12:10). «Приниматлыза икте-весым» (Рим. 15:7, У Сугынь, 1986). «Титакшым кудалтыза» (Кол. 3:13). «Икте-весыдан нелылыкым нумалза» (Гал. 6:2). «Икте-весыдам... лыпландарен шогыза» (1 Фес. 4:18, УТ). «Икте-весыдам... пеҥгыдемдыза» (1 Фес. 5:11). «Икте-весыда верч кумалза» (Иак. 5:16).

9. Весе-влакым лыпландарена гын, кузе тиде нуным йӧратымым ончыкта? (Тыгак сӱретым ончыза.)

⁹ Кодшо абзацыште ме икмыняр примерым палемдышна, кузе йӧратымашым ончыкташ лиеш. Айста иктыжым ончен лектына. Павел каласен: «Икте-весыдам... лыпландарен шогыза». Весе-влакым  лыпландарена гын, кузе тиде нуным йӧратымым ончыкта? Ик библийысе справочник дене келшышын, «лыпландараш» манын кусарыме мут кугу нелылыкыш логалше айдеме пелен лиймым ончыкта. Лектеш, кунам ме тыгай изам але акам лыпландарена, ме тудын кумылжым нӧлтена да тудлан Юмылан умбакыжат ӱшанлын служитлаш полшена. Кажне гана тыге ыштен, ме нуным йӧратымым ончыктена (2 Кор. 7:6, 7, 13).

10. Чаманымаш ден лыпландарымаш кузе кылдалтыт?

¹⁰ Лыпландарымаш чаманымаш дене чот кылдалтеш. Чаманыше айдеме весе-влакын шӱм-чон корштымыштым куштылемдашлан нуным лыпландараш тырша. Тугеже, кунам ме весе-влакым чаманена, тиде мыланна нуным лыпландараш полша. Айста Иегован, «чаманыше Ачан», примержым ончен лектына. «Тунемме Библийыште» возымо: «Юмо чаманымашын Ачаже, але Памашыже, маналтеш. Молан манаш гын, тудо еҥ-влакым чот чамана». Кузе памаш гыч вӱд тыгай айдемылан, кудыжын вӱдым чот йӱмыжӧ шуэш, вийым ешара, тыгакак Иегова орланыше айдемым лыпландарен да тудлан вийым пуэн кертеш. Санденак Иеговам «лыпландарымашын Юмыжо» манме, кудыжо «мемнам кеч-могай нелылык годымат лыпландара» (2 Кор. 1:3, 4). Иегова деч примерым налаш мыланна мо полша? Тидлан чаманаш да лыпландараш таратыше койыш-влакым куштыман. Тиде могай койыш-влак?

11. Весе-влакым йӧраташ да лыпландараш могай эше койыш-влак полшен кертыт? (Колоссян-влаклан 3:12; 1 Петрын 3:8).

¹¹ Икте-весым кажне кечын лыпландарашлан порылык да весе-влакын шижмашыштым умылымаш полша. (Колоссян-влаклан 3:12; 1 Петрын 3:8 лудын лекса.) Кунам ме иза-ака-влакым чот чаманена, тунам ойгышт годым нуным лыпландараш шукырак кумылна лектеш. Иисус каласен: «Айдемын шӱмжӧ мо дене темын, тудак йылмыж гыч лектеш. Поро еҥ шӱм поянлыкше гыч порым луктеш» (Матф. 12:34, 35). Иза-ака-влакым лыпландарен, нуным чынжымак йӧратена манын ончыктена.

12. а) Молан мыланна шекланыше лияш кӱлеш? б) Мом ме умбакыже лончылен налына?

¹² Мемнан чыланнан икте-весым йӧратымына шуэш (1 Иоан. 4:7). Но мыланна Иисусын шижтарымыжым шарнаш кӱлеш. Тудо каласен: «Шукыштын йӧратымашышт йӱкша» (Матф. 24:12). Но Иисус тидым тунемшыж-влак нерген ойлен огыл. Туге гынат мыланна шекланыман, вет шке нерген гына шонаш тиде тӱнян кумылжо мыланнат куснен кертеш. Тидын нерген шарнен, айста тыгай кӱлешан йодышым лончылен налына: мо мыланна пален налаш полша, мыняр чот ме иза-ака-влакым йӧратена?

13. Кузе пален налаш лиеш, мыняр чот ме иза-ака-влакым йӧратена?

¹³ Йӧратымашнам, мутлан, теве кузе терген налаш лиеш — ончалаш, кузе ме шкенам тӱрлӧ илыш ситуацийыште кучена (2 Кор. 8:8). Апостол Петр возен: «Эн ондак икте-весыдам тыршен йӧратыза, вет йӧратымаш шуко языкым леведеш» (1 Пет. 4:8). Кунам иза-ака-влак йоҥылышым ыштат але мемнам обижатлат,  ме шкенам тӱрлӧ семын кучен кертына. Шкенам кузе кучымына гыч коеш, мыняр чот ме нуным йӧратена.

14. 1 Петрын 4:8 дене келшышын, кузе мыланна иза-ака-влакым йӧраташ кӱлеш? Примерым кондыза.

¹⁴ Айста Петрын мутшым ончен налына. 8-ше почеламутын икымше ужаштыже возымо: «Икте-весыдам тыршен йӧратыза». «Тыршен» манын кусарыме мут буквально «шараш» манмым ончыкта. Почеламутын кокымшо ужаштыже тыгай йӧратымашын лектышыже нерген возымо. Тудо иза-ака-влакын языкыштым леведеш. Айста шоналтена, пуйто ме йӧратымашым налына да тудым шарлыше куэм семын шараш тыршена. Тидым ме икмыняр языкым гына огыл, а «шуко языкым» леведмешке ыштена. Кузе лавыра верым куэм дене петыраш лиеш, тыгак йӧратымашна весе-влакын йоҥылышыштым леведын але проститлен кертеш.

15. Кугу йӧратымаш мемнам мом ышташ тарата? (Колоссян-влаклан 3:13).

¹⁵ Иза-ака-влакын йоҥылышыштым проститлаш йӧсӧ гынат, кугу йӧратымаш  тидым ышташ тарата. (Колоссян-влаклан 3:13 лудын лекса.) Весе-влакым проститлен моштена гын, тугеже нуным чот йӧратена. Тыгак ме Иеговалан йӧрышӧ лийнена манын ончыктена. Весе-влакын йоҥылышыштым проститлаш да нунын ыштымышт верч шӱлыкаҥаш огыл мо эше полша?

16, 17. Весе-влакын изи йоҥылышыштым мондаш мыланна мо полша? Примерым кондыза. (Тыгак сӱретым ончыза.)

¹⁶ Иза-ака-влакын уда койышыштым огыл, а сай койышыштым ужаш тыршыза. Тыгай примерым ончен лектына. Шоналтыза, пуйто те йолташ-влак дене пырля погыненда. Те веселан жапым эртареда да фотографийым ыштеда. Те ик фотографийым гына огыл, а, мутлан, кумытым ыштеда. Ик фотографий сайын огеш лек гын, кокытшо кодеш. Но трук те ужыда ик фотографийыште иза мотор ыш лек. Мом те тиде фотографий дене ыштеда? Тудым кораҥдеда. Молан манаш гын, вес кок фотографийыште чылашт, тиде изат, сай лектыныт.

¹⁷ Тыгай фотографий-влакым шарнымашна-влак дене таҥастараш лиеш. Мыланна иза-акана-влак дене жапым эртараш келша. Но иктажше мыланна келшыдымым каласа але ышта гын, кузе лийман? Кузе ме саде фотографий-влак гыч удажым кораҥдена, тыгакак тиде случайым  ушна гыч кораҥдыман (Прит. 19:11; Еф. 4:32). Изан але акан изи йоҥылышыжым шарнаш огеш кӱл, вет мемнан тудын дене кылдалтше шуко сай шарнымаш уло. Лач тидым мыланна шарныман!

18. Тиде статья гыч йӧратымаш нерген мом пален налынна?

¹⁸ Молан икте-весым йӧраташ кӱлеш? Кузе ме лончыленна, иза-ака-влакым йӧратена гын, лектеш, Иеговам йӧратена. Кузе ме йӧратымашнам паша дене ончыктен кертына? Тӱрлӧ семын. Мутлан, иза-ака-влакым лыпландарен. Нуным уло шӱм дене чаманена гын, тунам икте-весым лыпландарен кертына. А икте-весым умбакыжат чот йӧраташ мыланна мо полша? Куштылго огыл гынат, весе-влакын йоҥылышыштым проститлыман.

19. Молан таче икте-весым йӧраташ чотак кӱлешан?

¹⁹ Молан таче икте-весым йӧраташ чотак кӱлешан? Ончалза, могай амалым апостол Петр конден: «Чылажынат мучашыже лишнак». Сандене тудо христиан-влакым таратен: «Икте-весыдам тыршен йӧратыза» (1 Пет. 4:7, 8). Чот вашке тиде тӱня пыта. Тидын деч ончыч мо дене ме тӱкнена? Иисус каласен: «Мыйын лӱмемлан кӧра тендам чыла калык ужмышудымо лиеш» (Матф. 24:9). Ужмышудымым чытен лекташлан мыланна иктылыкым аралаш кӱлеш. Тунам Сатана мемнам икте-весына деч ойырен огеш керт, вет мемнам йӧратымаш уша (Кол. 3:14; Флп. 2:1, 2).