Библий «кызытсе курымын пытымыжым» але тиде тӱнян мучашыжым ончыктышо событий ден условий-влакым палдара (Матфейын 24:3). Библийыште тиде жапым «пытартыш кечыла» але «мучашын жапше» манме (2 Тимофейлан 3:1; Даниил 8:19).

 Библийыште шуко событий ден лиймаш-влак нерген ончылгоч каласыме, кудышт чылан пырля пытартыш кече-влакым ончыктышо палдарыше пале улыт (Лукан 21:7). Теве нунын гыч икмынярже.

 Тӱня мучко сар-влак. Иисус Христос ончылгоч каласен: «Калык ӱмбаке калык кынелеш, кугыжаныш ӱмбаке — кугыжаныш» (Матфейын 24:7). А Почмаш 6:4 почеламутышто символический имнешкылан, кудыжо сар-влакым ончыкта, «мланде ӱмбач тыныслыкым налаш вийым пуэныт».

 Шужымаш. Иисус ончылгоч каласен: «Верын-верын шужымаш... лиеш» (Матфейын 24:7). А Почмаш книгаште эше ик символический имнешке нерген ойлалтеш. Тудын лекмыж деч вара мландыште тӱрлӧ вере кугу шужымаш тӱҥалеш (Почмаш 6:5, 6).

 Кугу мланде чытырналтмаш-влак. Шуко вере мланде чытырналтмаш лиеш манын, Иисус каласен (Матфейын 24:7; Лукан 21:11). Тыгай кугу мланде чытырналтмаш-влак ончыч лийдыме орланымашым да колымашым кондат.

 Чер-влак. Иисусын мутшо почеш «мор», вес семынже эпидемий-влак, лийыт (Лукан 21:11).

 Законым пудыртымаш. Еҥ-влак шуко курым мучко закон-влакым пудыртеныт. Но пытартыш кече-влак нерген Иисус каласен: «Закондымылык чыла вере шукемеш» (Матфейын 24:12).

 Мландым пытарымаш. Еҥ-влак мландым пытараш тӱҥалыт манын, Почмаш 11:18 почеламутышто ончылгоч каласыме лийын. Нуно тидым тӱрлӧ семын ыштат. Тӱняште виешлымаш да торжалык гына огыл, тыгак пӱртӱсым амыртымаш шукемеш.

 Еҥ-влакын койышышт пужла. 2 Тимофейлан 3:1—4 почеламутлаште Библий ончылгоч ойла: «Еҥ-влак... таум ыштыдыме... йӧратыдыме, келшыде илыше, еҥ ӱмбаке ойлышо, шкем кучен моштыдымо, торжа, порым ужмышудымо, предатель, вожылдымо [ӱскырт], чот кугешныше... лийыт». Еҥ-влакын койышышт тынар чот пужла, тиде пагытым чынжымак чот «неле жап» манаш лиеш.

 Ешым шалатымаш. 2 Тимофейлан 3:2, 3 почеламутышто ончылгоч каласыме лийын: шукышт шке мӧҥгысӧ-влакымат йӧраташ огыт тӱҥал да йоча-влак «ача-авам колыштдымо» лийыт.

 Юмо дек йӧратымаш йӱкша. Иисус ончылгоч каласен: «Шукыштын йӧратымашышт йӱкша» (Матфейын 24:12). Вес семынже, шуко еҥ-влак Юмым йӧратымым чарнат манын, Иисус каласынеже ыле. Тыгак 2 Тимофейлан 3:4 почеш, еҥ-влак «Юмым йӧратыме олмеш шке шерыштым темаш йӧратыше лийыт».

 Юмылан ӱшанле кояш тӧчышӧ лийыт. 2 Тимофейлан 3:5 почеламутышто каласыме дене келшышын, еҥ-влак «Юмым пагалышыла кояш» тӧчаш тӱҥалыт. Но чынжым нуно Юмын нормыж-влак почеш огыл, а шке шонымышт почеш илат.

 Библий гыч ончылгоч каласымаш-влакым умылымаш кушкеш. Даниил книгаште ончылгоч каласыме дене келшышын, мучаш жапыште шуко еҥ-влак библийысе чыным, тыгак пророкла ойлымаш-влакымат, сайрак умылаш тӱҥалыт (Даниил 12:4).

 Тӱнямбалысе таныклымаш паша. Иисус ончылгоч каласен: «Кугыжанышын тиде Поро Увержым тӱня мучко каласкалат» (Матфейын 24:14).

 Еҥ-влак Библийым шотыш огыт нал да мыскылаш тӱҥалыт. Мучаш лишеммым ончыктышо доказательстве-влакым еҥ-влак шотыш налаш огыт тӱҥал (Матфейын 24:37—39). А 2 Петрын 3:3, 4 дене келшышын, южо еҥ-влак кондымо доказательствым мыскылен воштылаш да ойлаш тӱҥалыт: «Ожнысек эре тыге лийын, нимат вашталтын огыл».

 Чыла ончылгоч каласымаш-влак шукталтыт. Нине ончылгоч каласымаш-влак ик жапыште шукталтыт манын, Иисус каласен. Посна икмынярже гына огыл, а чылан пырля шукталтыт. Тугеже иканаште нине ончылгоч каласымаш-влакын пырля шукталтмышт — тиде пытартыш кече-влакым палдарыше пале (Матфейын 24:33).

 Туге. Тӱняште лийше событий-влак да Библийыште возымо хронологий ончыктат: пытартыш кече-влак 1914 йыште тӱҥалыныт, кунам Икымше тӱнямбалысе сар тӱҥалын. Пытартыш кечылаште илена манын, шукырак доказательствым тиде видеороликыште ужаш лиеш.

 1914 ийыште Юмын Кугыжаныш каваште вуйлаташ тӱҥалын. Да икымше, мом тудо ыштен — Сатана Дьявол ден демонжо-влакым кава гыч поктен луктын. Тиде жап гыч тӱҥалын, Сатана ден демон-влак мландыште илыше-влаклан гына осалым ыштен кертыт (Почмаш 12:7—12). Еҥ-влак чот вашталтыныт да койышышт уда улыт. Тидыже ончыкта: Сатана таче чыла еҥ-влаклан чот влиятла. Теве молан пытартыш кече-влак чот неле улыт (2 Тимофейлан 3:1).

 Кызытсе илышлан кӧра шукышт чот тургыжланат. Вет таче еҥ-влак ваш келшен илен огыт керт. Айдеме тукым шкенжым шке пытара манын, южышт лӱдыт.

 Но тыгай еҥ-влак улыт, кудышт тӱнясе ситуацийым вес семын ончат. Мландыште мо ышталтме верч тыгак тургыжланат гынат, нуно ончыко ӱшан дене ончат. Нуно пеҥгыдын ӱшанат: вашке Юмын Кугыжаныш мландыште чыла нелылыкым кораҥдашлан чылажымат ышта (Даниил 2:44; Почмаш 21:3, 4). А кызыт нуно чытен вучат, кунам Юмын сӧрымашыже-влак шукталтыт да нуным Иисусын каласыме мутшо лыпландара: «Мучаш марте чытыше утаралтеш» (Матфейын 24:13; Михей 7:7).