Иисус Юмын ӱшанле служитлышыже-влакым тӱлен налаш да утарашлан шке илышыжым пуэн (Матфейын 20:28). Сандене Библийыште Иисусым «тӱням Утарыше» манме (1 Иоаннын 4:14). Тыгак тушто возымо: «Нигӧ весе утарен огеш керт, мемнам утарен кертше вес лӱмым тӱняште еҥ-влаклан пуымо огыл» (Апост. пашашт 4:11, 12).

 Иисус тудлан ӱшаныше чыла еҥ верч колен (Еврей-влаклан 2:9; Иоаннын 3:16). Вара «Юмо Тудым колымаш гыч ылыжтен», да Иисус шӱлыш семын кавашке пӧртылын (Апост. пашашт 3:15). Каваште лийын, Иисус «Тудын гоч Юмо деке толшо-влакым тӱрыс утарен кертеш, вет Тудо нунын верч кумалаш [йодаш] эре ила» (Еврей-влаклан 7:25).

Молан Иисус мемнан верч йодшаш?

 Ме чылан языкым ыштена (Римлян-влаклан 3:23). Язык мемнан ден Юмо коклаште чарак семын. Языклан кӧра еҥ-влак колат (Римлян-влаклан 6:23). Но Иисус Христос тудын тӱлен налмыжлан ӱшаныше-влак верч Ачаже ончылно арален ойла (1 Иоаннын 2:1). Тудо Юмым кумалтыш мутнам колышташ да языкнам кудалташ йодеш (Матфейын 1:21; Римлян-влаклан 8:34, УТ). Иисусын чыла тыгай йодмашыже Юмын эрыкшылан келшен толеш, сандене Иегова нуным шукта. Тудо Иисусым «мландӱмбаке... тӱня Тудын гоч утаралтше манын колтен» (Иоаннын 3:17).

Утаралташлан Христослан ӱшанаш гына сита мо?

 Уке. Мутат уке, утаралташлан Христослан ӱшанаш кӱлеш, но тидым гына ышташ ок сите (Апост. пашашт 16:30, 31). Библийыште возымо: «Кузе чон деч посна кап колышо, тугак поро паша деч посна ӱшанымашат колышо» (Иаковын 2:26). Утаралташлан мыланна теве мом ыштыман:

•   Иисус ден Иегова Ачаже нерген шинчымашым налаш (Иоаннын 17:3).

•   Иегова ден Иисуслан ӱшанымашым пеҥгыдемдаш (Иоаннын 12:44; 14:1).

•   Юмо да Христосын кӱштымышт почеш илыме дене ӱшанымашым паша дене ончыкташ (Лукан 6:46; 1 Иоаннын 2:17). Иисусын туныктымыж дене келшышын, тудым «Господь» манше-влак кокла гыч чыланжак огыл, а «Пылпомышсо Ача[жын] эрыкшым шуктышо-влак веле» утаралтыт (Матфейын 7:21).

•   Нелылыкым ончыде, ӱшанымаште пеҥгыдын шогаш, вет Иисус каласен: «Мучаш марте чытыше утаралтеш» (Матфейын 24:13).