Армагеддон сар — тиде Юмо ден мландысе правительстве-влак коклаште пытартыш сар. Нине правительстве-влак да нунын могырыштышт шогышо чыла еҥ Юмым ынешт колышт да тыге Юмо ваштареш шогымыштым ончыктат (Псалом 2:2). Армагеддон сар еҥ-влакын вуйлатымыштлан мучашым пышта (Даниил 2:44).

 «Армагеддон» мут Библийыште ик гана веле вашлиялтеш, Почмаш 16:16 почеламутышто. Тиде книгаште возымо ончылгоч каласымаш дене келшышын, «уло тӱнян кугыжаж-влак» «Чылакучышо Юмын... кугу кечынже кредалмашыш» «еврейла Армагеддон манме верыш» погымо лийыт (Почмаш 16:14).

 Армагеддонышто кӧ кредалаш тӱҥалеш? Иисус Христос кавасе войскам Юмын тушманже-влакым сеҥаш наҥгая (Почмаш 19:11—16, 19—21). Нине тушман-влак коклаште Юмын вуйлатымыже ваштареш шогышо да Юмым пагалыдыме-влак улыт (Иезекииль 39:7).

 Армагеддон сар Лишыл Эрвелыште лиеш мо? Уке. Армагеддон сар ала-могай лӱмын ойырымо верыште огыл, а уло тӱня мучко лиеш (Иеремия 25:32—34; Иезекииль 39:17—20).

 Армагеддон южгунам «Хар-Магедон» семын кусаралтеш (еврейла Хар-Мегиддон). Тудо «Мегиддо курык» манмым ончыкта. Мегиддо акрет годсо Израильын кундемыштыже ола лийын. Историй дене келшышын, тиде ола воктене шуко кугу кредалмаш лийын. Нунын гыч южышт нерген Библийыште возымо (Судей 5:19, 20; 2 Царей 9:27; 23:29). Туге гынат Армагеддон акрет годсо Мегиддо воктенысе вер лийын огеш керт. Тушто кугу курык уке. А воктенже Изреель лап верыште Юмо ваштареш чыла шогалше-влак огыт шыҥе. Армагеддон тӱнямбалысе ситуацийым ончыкта, кунам калык-влак, пырля погынен, пытартыш гана Юмын вуйлатымыже ваштареш шогалыт.

 Армагеддон сар годым мо лиеш? Ме она пале, кузе Юмо шке вийжым кучылташ тӱҥалеш. Но раш палена: тудо ожнысо гаяк шолемым, мланде чытырналтмашым, кугу йӱрым, йӱлышӧ кишым, волгенчым да чер-влакым кучылтын кертеш (Иов 38:22, 23; Иезекииль 38:19, 22; Аввакум 3:10, 11; Захария 14:12). Юмын южо тушманже-влак икте-весыштым пушташ тӱҥалыт, но вара нуно умылат: нунын дене чынжымак Юмо кредалеш (Иезекииль 38:21, 23; Захария 14:13).

 Армагеддонышто тӱня пытарыме лиеш мо? Мемнан планетна пытарыме огеш лий, вет мланде айдеме тукымлан эре пӧрт семын лиеш (Псалом 36:29; 95:10; Экклезиаст 1:4). Армагеддонышто еҥ-влак пытарыме огыт лий, а, мӧҥгешла, утарыме лийыт, вет тиде сарым «моткоч шуко» Юмын служитлышыже илен лектеш (Почмаш 7:9, 14; Псалом 36:34).

 Библийыште «тӱня» манме мут мландым гына огыл, тыгак Юмо ваштареш шогышо чыла еҥым ончыкта (1 Иоаннын 2:15—17). Армагеддонышто нине еҥ-влак пытарыме лийыт, вес семынже «кызытсе курымлан [тӱнялан]» мучаш толеш (Матфейын 24:3).

 Кунам Армагеддон лиеш? «Кугу азап» Армагеддон сар дене пыта. Тиде «кугу азап» нерген Иисус каласен: «Тиде кече да шагат кунам толын шуэш, нигӧ ок пале: пылпомышсо Суксо-влакат огыт пале, тидым ик Ачам гына пала» (Матфейын 24:21, 36). Туге гынат Библий палдара: Армагеддон Иисусын каваште вуйлатымыж годым лиеш, а вуйлаташ тудо 1914 ийыште тӱҥалын (Матфейын 24:37—39).