NAANIN KAKAPILÕK JÃN BAIBÕL̦: “Kom̦win jol̦o̦k an doon bõd ãinwõt Anij ear jol̦o̦k ami bõd ilo Kũraij.”​—Epesõs 4:32, UBS.

Ta mel̦el̦ein naan kein? Baibõl̦ ej keidi eo ej jerawiwi ak eo ej bõd n̦ae bar juon armej ñan juon eo ej m̦uri. Innem jol̦o̦k bõd ej ãinwõt ñe jej jol̦o̦k m̦uri eo an armej eo. (Luk 11:4) Juon bok ej kõmel̦el̦e bwe naanin Grik eo ñan “jol̦o̦k bõd” ej kaalikkar bwe kwõj jol̦o̦k bõd eo im jab kõtmãne bwe armej eo ej aikuj kõm̦m̦ane juon men ñan kwe m̦okta innem kwõnaaj jol̦o̦k an bõd. Ãindein wãween ad aikuj jol̦o̦k bõd. Ñe jej jol̦o̦k an juon bõd ejjab mel̦el̦ein bwe em̦m̦an ippãd men eo ear kõm̦m̦ane ak enaaj dikl̦o̦k ad metak kake. Bõtab, jej pepe ñan jab illu m̦aanl̦o̦k wõt kake meñe ear bõd n̦ae kõj.

Ej ke jerbal ñan kõj ilo raan kein? Kõnke jejjab weeppãn, jenaaj baj jerawiwi wõt ak kõm̦m̦an bõd. (Rom 3:23) Innem em̦m̦an ñan jol̦o̦k an ro jet bõd kõnke juon iien jenaaj bar aikuji aer jol̦o̦k ad bõd. El̦aññe jej pepe ñan jol̦o̦k an ro jet bõd, men in ebar em̦m̦an ñan kõj. Etke jej ba men in?

Ñe jej dãpij ad illu im dike ro jet im jejjab jol̦o̦k aer bõd, jej ko̦kkure kõj make. Eñjake rot kein enaaj kõm̦m̦an bwe jen jab m̦õn̦õn̦õ, jen jab kõn̦aan kõm̦m̦an jabdewõt, im ej bar kõm̦m̦an bwe en lukkuun nana ad mour. Eñjake rot kein rebar kauwõtata ñan ãjmour eo ad. Ewõr jet ripoot ilo juon bok (Journal of the American College of Cardiology) jãn juon taktõ etan Yoichi Chida kab juon eo ej ekkatak kõn eñjake ko an armej etan, Andrew Steptoe. Ekkar ñan ripoot ko aerro, erro ej ba: “Em̦õj ekkatak im lo bwe ekauwõtata ñe juon ej illulu im bar dike ro jet kõnke men in emaroñ jelõt menono eo an im enaaj bõk juon kain nañinmej in menono (coronary heart disease).”

Baj l̦õmn̦ak m̦õk kõn men ko rem̦m̦an renaaj wal̦o̦k ñe juon ej jol̦o̦k bõd. Enaaj wõr wõt bõrokuk im aenõm̦m̦an innem eban jorrããn jem̦jerã eo ad ippãn ro jet. El̦aptata jenaaj kaalikkar bwe jej anõke joñak eo an Anij. Etke? Kõnke Anij em̦õn̦õn̦õ in jol̦o̦k an ro jet bõd el̦aññe rej m̦ool ilo aer kajjitõk jol̦o̦k bõd. Ekõn̦aan bwe jen bar kõm̦m̦ane ejja wãween in wõt.​—Mark 11:25, UBS; Epesõs 4:32, UBS; 5:1.