KATAK KO KÕN TAITÕL̦IN BOK IN | WÕN REIN RI KÕNNAAN RO AN JEOVA?
Kain Armej Rot Ri Kõnnaan ro an Jeova?
Kõmij juon kumi el̦ap jãn aelõñ otemjej ipel̦aakin lal̦ im kõmij jab kobal̦o̦k ippãn jabdewõt kabuñ. Meñe ra eo ammim el̦ap (headquarter) ej pãd ilo Amedka, ak enañin aolep armej ro rej uwaan kabuñ in rej jokwe ilo aelõñ ko jet. Enañin 8 milien uwaamim rej katak ippãn armej kõn Baibõl̦ ilo elõñl̦o̦k jãn 230 aelõñ ko. Kõmij l̦oore naan ko an Jijej ke ear ba: “Naaj kwal̦o̦k gospel in an aelõñ in lañ iaolepen lal̦ kõn menin kõnnaan ñan aelõñ otemjel̦o̦k.”—Matu 24:14.
Kõmij bar kate kõm ñan l̦oore kien ko an aelõñ eo kõmij pãd ie. Bõtab, kõmij jab bõk kun̦aam ilo m̦akũtkũt ko an kien. Unin ej kõnke kõmij pokake naan eo an Jijej ñan Kũrjin ro bwe ‘rejjab m̦õttan lal̦ in.’ Kõn men in, kõmij jab bõk kun̦aam ilo jabdewõt aitwerõk im m̦akũtkũt ko an kien ekoba tarin̦ae. (Jon 15:19, UBS; 17:16) Eñin unin elõñ Ri Kõnnaan ro an Jeova rar kalbuuj, kar kaeñtaan er, im rar m̦ane er ilo kar Pata eo an Lal̦ Kein Karuo. Juon iaan kar rũkaki l̦apl̦ap eo an kabuñ in Bũrotijen eo ilo Jãmne, ear ba bwe Ri Kõnnaan ro an Jeova rar kanooj jutak pen kõn tõmak eo aer im rar jab bõk kun̦aaer ilo tarin̦ae ilo kar tõre ko an Hitler.
“El̦ap an m̦ool im jim̦we mour ko an [Ri Kõnnaan ro an Jeova.] Jekõn̦aan kajijet rein ilo jea ko reutiej an kien kõnke ejjab utiej bũrueer ak jeban lo tõprak ñan jidik. . . . Em̦ool bwe rej kwal̦o̦k aer kile im kautiej kien, bõtab el̦apl̦o̦k aer tõmak bwe kien eo wõt an Anij enaaj n̦amejal̦an aolep apañ ko an armej.”—Juon nuujpeba (Nová Svoboda) ilo Czech Republic.
Bõtab, kõmij jab kamakel̦o̦k iaam im mour ilo juon wõt jikin. Ke Jijej ear jar ñan Anij kõn rũkal̦oor ro an, ear ba: “Ijjab kajjitõk bwe kwõn bõk er jãn lal̦ in.” (Jon 17:15, UBS) Kõmij bar mour ibwiljimi. Kwõmaroñ lo kõm ilo jikin jerbal ko, jikin kaikujkuj ko, im ilo jikin jikuul̦ ko.
