Jemaroñ Ke Kabuñbũruon Anij?

Kwõnañin ke riit kõn armej ro me Baibõl̦ el̦ap an nõbar er kõn aer kar jet armej ro im rem̦m̦an? Kwõmaroñ ba ippam̦ make: ‘Ijjab maroñ ãinwõt er! Ijjab juon eo eweeppãn, im ejjab aolep iien ij kõm̦m̦ani men ko rejim̦we.’

Baibõl̦ ej kwal̦o̦k bwe Job ear juon eo “eweeppãn im wãnõk.” (Job 1:1) Lot ear juon ‘armej em̦m̦an.’ (2 Piter 2:8) Im Devid ear juon eo ear “kõm̦m̦an wõt men eo ejim̦we” im̦aan mejãn Anij. (1 Kiiñ 14:8) Bõtab, em̦m̦an jen lale bwebwenatoun armej rein ilo Baibõl̦. Ilo ad naaj kõm̦m̦ane men in, jenaaj loe 3 men ko. M̦oktata, jenaaj loe bwe rar kõm̦m̦an bõd. Kein karuo, jenaaj loe bwe jemaroñ katak jãn waanjoñak ko aer. Im kein kajilu, jenaaj loe bwe meñe jejjab weeppãn, ak jemaroñ kabuñbũruon Anij.

RAR KÕM̦M̦AN BÕD

Job ear eñtaan kõn elõñ wãween ko rejjab jim̦we ear iiooni. Ear bõk juon l̦õmn̦ak ebõd bwe Anij ejjab kea jekdo̦o̦n ñe enaaj tõmak wõt ilo E ak jaab. (Job 9:20-22, UBS) Joñan an Job jel̦ã bwe ejim̦we men ko ej kõm̦m̦ani im̦aan mejãn Anij, ro jet rar ba bwe el̦ap an kowãnõk e make jãn Anij.​—Job 32:1, 2; 35:1, 2.

Lot ear jab m̦õkaj in kõm̦m̦ane juon pepe em̦m̦an im jim̦we. Ear l̦ap an inepata kõn an armej ro  ilo Sodom im Gomorra kõm̦m̦ani m̦anit ko rekajjõjõ. Joñan an kar inepata, ear “eñtaan” bũruon kõn kõm̦m̦an ko aer. (2 Piter 2:8) Anij ear kakkõl bwe enaaj kar ko̦kkure jikin kein me robrak kõn armej ro renana. Im ear lel̦o̦k iien ñan an Lot im baam̦le eo an maroñ el̦l̦ã im mour. Bõlen kwõmaroñ pijaikl̦o̦k an Lot naaj kar e eo m̦oktata ej ko. Bõtab, ilo iien in me ej aikuj kar ko, ear pãd aepedped. Enjel̦ ro me kar jilkinl̦o̦k er bwe ren lo̦mo̦o̦ren e im baam̦le eo an rar aikuj jibwe peier im kadiwõjl̦o̦k er jãn jikin eo bwe ren jab jorrããn.​—Jenesis 19:15, 16.

Ewõr juon iien Devid ear jaje dãpij kõn̦aan ko an im ear l̦õñ ippãn juon kõrã me ewõr pãleen. Kõn an kar Devid kajjioñ n̦ooje bõd in an, ear kõm̦m̦an bwe l̦eo pãleen kõrã eo en mej. (2 Samuel, jebta 11, UBS) Baibõl̦ ej ba bwe Jeova “ear jab buñbũruon kõn men eo Devid ear kõm̦m̦ane.”​—2 Samuel 11:27, UBS.

Job, Lot, im Devid rar aolep kõm̦m̦an bõd. Jet iaan bõd kein rar jet bõd ko rel̦l̦ap. Bõtab, ãinwõt ad naaj loe, aolepeer rar kõn̦aan karejar ñan Anij im pokake e jãn aolepen bũrueer. Rar ukel̦o̦k jãn bõd ko aer im kõm̦m̦an oktak. Im Anij ear buñbũruon ippãer. Eñin unin Baibõl̦ ej kwal̦o̦k bwe rar jet em̦m̦aan ro retiljek.

TA KO JEMAROÑ KATAK JÃN REIN?

Kõnke jejjab weeppãn, jenaaj baj kõm̦m̦an wõt bõd. (Rom 3:23) Bõtab, ñe jej kõm̦m̦an bõd, jej aikuj ukel̦o̦k im kate kõj ñan kõm̦m̦an oktak.

Ewi wãween an kar Job, Lot, im Devid bõjrak jãn bõd ko rar kõm̦m̦ani im kõm̦m̦an oktak? Job ear juon eo el̦ap an tiljek ñan Anij. Ãlikin an Anij kar kõnnaan ippãn, Job ear kajim̦we l̦õmn̦ak ko  an im jol̦o̦k an bõd kõn men ko ear ba m̦oktal̦o̦k. (Job 42:6, UBS) Wãween an Lot kar l̦õmn̦ak kõn kõm̦m̦an ko an armej ro ilo Sodom im Gomorra ear jejjet ñan kien ko an Anij. Kar apañ eo wõt an Lot ej ilo an kar aepedped. Bõtab, tokãlik ear pokake im ear ko jãn jikin ko Anij ear ko̦kkuri im ear el̦l̦ã im mour. Ke ear ko, ear pokake ilo an jab reilikl̦o̦k. Bareinwõt, meñe Devid ear kõm̦m̦ane juon bõd el̦ap ilo an kar rupe kien ko an Anij, ak ear m̦ool in ukel̦o̦k im kajjitõk ippãn Anij bwe en jol̦o̦k an bõd.​—Sam jebta 51.

An kar Anij buñbũruon ippãn em̦m̦aan rein ej kaalikkar bwe ejel̦ã joñan maroñ ko ad kõnke jejjab weeppãn. Baibõl̦ ej ba bwe Anij ‘ejel̦ã wãween kõm̦anm̦an kõj’ im ‘ej keememej bwe kõj bũñal.’ (Sam 103:14) Kõn men in, ñe Anij ejel̦ã bwe jenaaj baj kõm̦m̦an wõt bõd, ta eo ej kõtmãne jãn kõj?

EWI WÃWEEN AD MAROÑ KABUÑBŨRUON ANIJ MEÑE JEJJAB WEEPPÃN?

Naanin rõjañ ko an Devid ñan l̦eo nejin, Solomon, rej kwal̦o̦k wãween ad maroñ kabuñbũruon Anij. Ear ba: “Nejũ, ij rõjañ eok im bwe kwõn kile Anij eo an jem̦am̦ im kwõn jerbal ñane kõn bõro em̦ool im kõn m̦õn̦õn̦õ.” (1 Kronikel 28:9, UBS) Ta in bõro em̦ool? Ñe em̦ool bũruod, mel̦el̦ein bwe jej yokwe Anij im jekõn̦aan jel̦ã ankilaan im kõm̦m̦ane. Meñe jejjab weeppãn, bõtab ñe em̦ool bũruod, jelukkuun kõn̦aan karejar ñan Anij im pokake e, im jem̦õn̦õn̦õ in bõk kajjim̦we. Anij ear watõk Job ãinwõt “juon eo “eweeppãn im wãnõk,” Lot ãinwõt juon ‘armej em̦m̦an,’ im Devid ãinwõt juon eo ear “kõm̦m̦an wõt men eo ejim̦we” im̦aan mejãn. Ear watõk er ilo wãween kein kõn aer kar yokwe E im kõn̦aan pokake E. Meñe aolepeer rar kõm̦m̦an bõd, ak rar maroñ kabuñbũruon wõt Anij.

Kõn men in, ñe ewõr l̦õmn̦ak ko rejjab jim̦we ippãd me jediki, jej ba juon men me ekõm̦m̦an menin ad jook, ak kõm̦m̦ani men ko jej ajl̦o̦k kaki tokãlik, jej aikuj katak jãn waanjoñak ko an rein me ej kab m̦õj ad etali. Anij ejel̦ã bwe jejjab weeppãn. Bõtab, ekõn̦aan bwe jen yokwe e im kate kõj ñan pokake e. El̦aññe em̦ool ad yokwe im kõn̦aan pokake Anij, jemaroñ lõke bwe jemaroñ bar kabuñbũruon.

[Naan ko ilo peij 13]

Anij “ejel̦ã wãween kõm̦anm̦an kõm; Ej keememej bwe kõm bũñal.”​—Sam 103:14

[Naan ko ilo peij 14]

Ñe em̦ool bũruod, mel̦el̦ein bwe jej yokwe Anij im jekõn̦aan kõm̦anm̦an ankilaan im pokake e