Anij enaaj ke kõtl̦o̦k bwe armej ro ren wõnm̦aanl̦o̦k wõt im ko̦kkure ro jet im kõm̦m̦an bwe en jorrããn ilju im jekl̦aj eo an armej ro? Eban, ãinwõt ad kar etale ilo katak eo m̦oktal̦o̦k, Anij enaaj bõktok jem̦l̦o̦kin nana otemjej. Eo ear kõm̦anm̦an armej ro im lal̦ in ekõn̦aan bwe kwõn jel̦ã bwe epaak an itok jem̦l̦o̦kin. Ewi wãween an jipañ kõj ñan jel̦ã kõn men in el̦ap an aorõk?

L̦õmn̦ak m̦õk kõn waanjoñak in: M̦okta jãn am̦ ettõrl̦o̦k ñan juon jikin ettol̦o̦k kõn wa eo waam̦, kwõmaroñ kappok mel̦el̦e ko ilo Internet, lale mab ko, im kein jipañ ko me rej kaalikkar jikin eo kwõj jibadeke. Innem, kwõl̦ak ettõr kwõj loe kakõl̦l̦e ko me rar wal̦o̦k ilo mab ko im kein jipañ ko kwaar lali, kiiõ kwõjel̦ã bwe m̦õttan jidik kwõtõpar ijo kwõj jibadeke. Ilo ejja wãween in wõt, em̦õj an Anij letok naan ko an ilo Baibõl̦ ñan jipañ kõj kile men ko rej wal̦o̦k ilo lal̦ in. Ilo ad loi aolep men kein rej wal̦o̦k, jejel̦ã bwe epaaktok jem̦l̦o̦kin.

Baibõl̦ ej kaalikkar bwe ilo an epaaktok jem̦l̦o̦kin, jenaaj tõpar juon tõre me ejjañin kar ãinwõt m̦okta. Etke? Kõnke jenaaj lo an wal̦o̦k elõñ jorrããn ko ipel̦aakin lal̦ in im an oktakl̦o̦k wãween ko rej wal̦o̦k jãn kar m̦okta. Jen lale jet iaan men ko Naanin Anij ej kwal̦o̦k kaki.

1. JORRÃÃN KO IPEL̦AAKIN LAL̦ IN Kanaan eo ilo bokin Matu 24 jebta ej kõllaajraki men ko renaaj kar wal̦o̦k ilo lal̦ in me rej m̦õttan kakõl̦l̦e eo kõn “iien eo enaaj itok jem̦l̦o̦kin.”(Eoon 3, 14) Men kein rekitibuj tarin̦ae ko rel̦l̦ap, ñũta, m̦akũtkũt lal̦, an l̦apl̦o̦k nana, dikl̦o̦k yokwe doon, im an rũtõl in kabuñ ko tõlpiloik armej ro. (Eoon 6-26) M̦ool bwe elõñ iaan men kein em̦õj aer wal̦o̦k ilo jet jikin ium̦win elõñ bukwi iiõ ko m̦oktal̦o̦k. Bõtab, ilo an epaaktok jem̦l̦o̦kin, aolep men kein renaaj wal̦o̦k ipel̦aakin lal̦ in. Men kein rej bar m̦õttan kakõl̦l̦e ko jilu me jenaaj etali.

2. M̦WILIN ARMEJ RO Baibõl̦ ej kwal̦o̦k bwe ilo “raan ko ãliktata” ak m̦okta jãn an itok jem̦l̦o̦kin, enaaj kanooj nana m̦wilin armej ro im kõm̦m̦an ko aer. Ej ba: “Bwe armej ro renaaj yokwe er make, im renaaj riarõk m̦weiuk, im rijuwal̦õñl̦õñ, im rũkajjirere, im ro rej kipiliia ñan jemãer im jineer, im ro rejjab kam̦m̦oolol, im rinana, Im ro rejjab yokwe ro nukwier, im ro rellãj, im ro rej kõnnaan naan in riab, ro rejjab kõmmaanwa, rawiia, ro rej dike em̦m̦an, Ro rũketak, ro rej kõm̦m̦an jet men m̦okta jãn aer l̦õmn̦ak kake, ro rũkõmmejãje, im ro rej yokwe menin kabuñbũrueer el̦ap jãn aer yokwe Anij.” (2 Timote 3:1-4) M̦ool bwe jãn jem̦aan in ad lo an armej ro kõm̦m̦ani men ko renana. Bõtab, Baibõl̦ ear kanaan bwe ilo “raan ko ãliktata,” enaaj lukkuun l̦apl̦o̦k an nana kõm̦m̦an ko an armej ro. Eñin unin an ba bwe “iien ko renana renaaj wal̦o̦ktok.” Kwõj ke kile an nanal̦o̦k wõt m̦wilin armej ro im kõm̦m̦an ko aer?

3. AN JORRÃÃN LAL̦ IN Baibõl̦ ej ba bwe Anij enaaj “ko̦kkure ro rej ko̦kkure lal̦.” (Revelesõn 11:18) Ewi wãween an armej ro ko̦kkure lal̦ in? Ej ãinl̦o̦kwõt tõre ko an Noa. Baibõl̦ ej ba: “Im lal̦ ettoon im̦aan mejãn Anij, im lal̦ eobrak kõn kowadoñ. Im Anij ej reilo̦k ioon lal̦, im lo, ettoon.” Im Anij ear ba: “Inaaj ko̦kkure er.” (Jenesis 6:11-13) Kwõj ke kile bwe el̦apl̦o̦k wõt nana im kowadoñ ilo lal̦ in? Bareinwõt, armej ro kiiõ remaroñ ko̦kkure aolepen lal̦ in im m̦an aolep armej ro ie kõnke elõñ kain kein tarin̦ae ko em̦õj aer kõm̦m̦ani. Ebar wõr juon wãween rej ko̦kkure lal̦ in. Aolep men ko jej aikuji ñan mour ãinwõt mejatoto eo jej emmenonoiki, menninmour im mennin eddek ko, im lo̦jet, rejorrããnl̦o̦k kõn wõt an armej ro ko̦kkuri im kattooni.

 Kajjitõk ippam̦ make, ‘Enañin 100 iiõ ko remootl̦o̦k, ekar ke wõr an armej maroñ ñan ko̦kkure men ko ilo lal̦ in ekoba armej?’ Rainin, ewõr kiiõ maroñ in ippãn armej kõnke elõñ kein tarin̦ae ko rekapeel em̦õj aer kõm̦m̦ani im el̦ap an jorrããn lal̦ in. Joñan an kapeell̦o̦k kein jerbal ko raan kein, reitõn kapeell̦o̦k jãn armej ro im jel̦ãl̦o̦k kilen kõm̦adm̦õdi apañ ko. Bõtab, ejjel̦o̦k an armej ro maroñ ñan peek ta eo enaaj wal̦o̦k ñan lal̦ in. M̦okta jãn an naaj lukkuun jorrããn lal̦ in, Anij enaaj ko̦kkure ro rej ko̦kkure lal̦. Kallim̦ur in ej an Anij!

4. JERBALIN KWAL̦O̦K NAAN IPEL̦AAKIN LAL̦ IN Bar juon iaan kakõl̦l̦e ko kõn an naaj itok jem̦l̦o̦kin ej bwe naaj kõm̦m̦ane juon jerbal eaorõk. Baibõl̦ ej ba: “Naaj kwal̦o̦k gospel in an aelõñ in lañ iaolepen lal̦ kõn menin kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.” (Matu 24:14) Jerbal in elukkuun oktak jãn jerbalin kwal̦o̦k naan ko an kabuñ ko jet me elõñ bukwi iiõ in aer kõm̦m̦ani. Kar kanaan bwe ilo naaj raan ko ãliktata, naaj kwal̦o̦k kõn ennaan eo em̦m̦an kõn Aelõñ eo an Anij. Ewõr ke juon kabuñ me ej kwal̦o̦k kõn ennaan in? Im meñe emaroñ wõr jet rej kwal̦o̦k kõn ennaan in, ak renañin ke kajeeded ennaan in ñan “iaolepen lal̦” in ak aelõñ otemjel̦o̦k?

Weep jait eo www.isa4310.com ej bar kõnnaan kõn ennaan eo em̦m̦an kõn Aelõñ eo. Im bok ko ilo Weep jait in rej kwal̦o̦k kõn ennaan in ilo elõñl̦o̦k jãn 700 kajin ko. Ewõr ke juon doulul kwõjel̦ã kake me rej bar kõm̦m̦ane jerbal in ñan kwal̦o̦k kõn ennaan eo em̦m̦an kõn Aelõñ eo an Anij ipel̦aakin lal̦ in? M̦okta jãn an kar wõr Internet, elõñ rar jel̦ã kajjien Ri Kõnnaan ro an Jeova kõn aer kate er ñan kajeeded ennaan eo em̦m̦an kõn Aelõñ eo an Anij. Jãn iiõ eo 1939, kilin bok eo etan Naan in Keeañ ej kwal̦o̦k naan kein “Naan in Keeañ kõn Aelõñ eo an Jeova.” Juon bok me ej kõnnaan kõn kabuñ ej ba bwe jerbalin kwal̦o̦k naan eo an Ri Kõnnaan ro an Jeova “elukkuun l̦ap im ajeeded.” An ajeeded jerbal in ej kaalikkar bwe epaak “iien eo enaaj itok jem̦l̦o̦kin.” Im enaaj jejjet kitien men in ikijjeen Aelõñ eo an Anij.

Kwõj ke kile bwe aolep kakõl̦l̦e kein emãn me jaar etali rej wal̦o̦k ilo tõre in kwõj mour ie? Elõñl̦o̦k jãn 100 iiõ in an bok eo etan Naan in Keeañ kaalikkar ñan ro rej riit kõn men ko rej wal̦o̦k ipel̦aakin lal̦ in bwe ren make kile bwe epaak an  itok jem̦l̦o̦kin. Jet rej ba bwe men kein rej itok jãn l̦õmn̦ak im eñjake ko an kajjojo armej, im remaroñ kõm̦adm̦õdi. Rej bar ba bwe kõn an lõñl̦o̦k wãween ñan tõpar im kõnnaan ippãn ro me repãd ilo aelõñ ko rettol̦o̦k, ekõm̦m̦an bwe en l̦apl̦o̦k wõt nana ilo lal̦ in. Meñe ãindein, ak jej lo men kein im kile bwe jepãd ilo juon tõre ejejuwaan kõnke epaaktok jem̦l̦o̦kin.

Jet rũmmãlõtlõt ro rej ba bwe el̦ap oktak ko rej jino wal̦o̦k ilo lal̦ in. Ñan waanjoñak, ilo 2014 eo, juon doulul an rũmmãlõtlõt ro (Science and Security Board of the Bulletin of the Atomic Scientists) ear kakkõl kumi in kõjparok eo an United Nations kõn ta kauwõtata ko me remaroñ kõm̦m̦an bwe aolep armej ilo lal̦ in ren jako. Rũmmãlõtlõt rein rar ba: “Ad lukkuun etali men kein rekauwõtata renaaj jipañ kõj ñan kile bwe elukkuun kauwõtata kein tarin̦ae im kein jerbal ko rekapeel kõnke men kein remaroñ m̦an aolep armej ro ilo lal̦ in.” Elõñ armej el̦apl̦o̦k aer tõmak bwe jej pãd ilo juon tõre ejejuwaan. Ro rar kõm̦m̦ane bok in im armej ro rej riiti, rejel̦ã bwe jej kiiõ pãd ilo raan ko ãliktata im epaak jem̦l̦o̦kin. Bõtab, ijello̦kun am̦ mijak kõn ta eo enaaj wal̦o̦k ilju im jekl̦aj, kwõj aikuj m̦õn̦õn̦õ. Etke? Eokwe kõnke kwõmaroñ el̦l̦ã im mour!