Ejjel̦o̦k pere bwe armej ro renaaj wõnm̦aanl̦o̦k wõt im kõm̦m̦an elõñ wõnm̦aanl̦o̦k ko im kein jerbal ko rekapeel. Ak remaroñ ke make kajutak juon jukjukun pãd in armej ro me relukkuun yokwe im kea kake doon? Jaab. Rainin, el̦ap an armej ro ilo lal̦ in l̦õmn̦ak wõt kõn er make im kũbbon̦. Bõtab, em̦õj an Anij karõk bwe en wõr juon ilju im jekl̦aj em̦m̦an ñan kõj armej.​—Riit 2 Piter 3:13.

Naanin Anij ej kwal̦o̦k bwe ilo naaj ilju im jekl̦aj, aolep armej ro ipel̦aakin lal̦ in renaaj yokwe doon. Armej ro reban mour ilo uwõta, im ejjel̦o̦k juon enaaj kõm̦m̦ani men ko renana ñan er.​—Riit Maika 4:3, 4.

Anij ear kõm̦anm̦an kõj bwe jen jab l̦õmn̦ak wõt kõn kõj make. Bõtab, ke armej eo m̦oktata ear kããlõt ñan jab pokake Anij, ear jako an weeppãn. Kõn men in, kõn̦aan in ñan l̦õmn̦ak kõn kõj make ej wal̦o̦k ippãd kõnke jej bõdañe armej eo m̦oktata. Meñe ãindein, ak Anij enaaj kõjerbal Jijej ñan kõm̦m̦an bwe armej ro ren weeppãn ãinwõt kar jinoin.​—Riit Rom 7:21, 24, 25.

Bwe en jejjet karõk in an Anij, Jijej ear mej im ajel̦o̦k mour eo an bwe en jol̦o̦k aolep men ko rej wal̦o̦k itok wõt jãn an kar armej eo m̦oktata jab pokake. (Rom 5:19, UBS) Ilo an kar Jijej kõm̦m̦ane men in, ear kõm̦m̦an bwe en wõr juon ilju im jekl̦aj em̦m̦an ñan armej ro. Ilo naaj tõre en̦, eban bar wõr ippãn armej ro kõn̦aan eo ñan l̦õmn̦ak kõn er make im kõm̦m̦ani men ko renana.​—Riit Sam 37:9-11.