Jet armej rej ba bwe ñe juon ej m̦an e make, ej mej kõn juon apañ me en kar jidik wõt kitien an pãd. Meñe kwõmaroñ l̦õmn̦ak bwe apañ ko kwõj iiooni relukkuun l̦ap im kwõjjab maroñ kabõjraki, ak emaroñ ban to kitien aer pãd. Jet iien apañ ko jej iiooni rej oktak im pidodol̦o̦k ilo jidimkij.​—Lale bo̦o̦k eo itulal̦ etan  “Apañ ko Rar Iiooni Rar Etal im Jako.”

Meñe apañ ko jej iiooni rejjab em̦m̦anl̦o̦k, ak jejjab aikuj inepata kaki el̦ap jãn joñan. Jen kõm̦adm̦õdi juon ilo̦k juon. Jijej ear ba: “Kom̦win jab inepata kõn ilju; bwe ilju ebwe kõn inepata ko ie. Inepata ko an rainin rebwe ñan rainin.”​—Matu 6:34, UBS.

Ak ta ñe apañ ko jej iiooni reban oktak? Ñan waanjoñak, ta el̦aññe ewõr juon am̦ nañinmej ejjel̦o̦k unokan? Ak ta el̦aññe kwõjepel jãn eo pãleem̦, ak emej juon eo ejitõnbõro ippam̦?

Eokwe, ñe ej wal̦o̦k men kein ñan kwe, ewõr juon men kwõmaroñ kõm̦m̦ane. Kwõmaroñ ukot wãween am̦ l̦õmn̦ak kõn apañ eo ej wal̦o̦k ñan kwe. Ñe kwõnaaj katak ñan mel̦el̦e bwe ewõr jet apañ ko me ejjel̦o̦k ad maroñ ioer, enaaj em̦m̦anl̦o̦k wãween am̦ l̦õmn̦ak kõn men ko jet. (Jabõn Kõnnaan 15:15, UBS) Enaaj bar pidodo am̦ pukot wãween ko jet kwõmaroñ kõm̦m̦ani ñan kijenmej wõt ioon apañ ko kwõj iiooni, ijello̦kun am̦ l̦õmn̦ak bwe wãween eo wõt ñan kõm̦adm̦õd apañ ko am̦ ej ilo am̦ m̦an eok make. Im ilo am̦ jel̦a kijenmej, kwõnaaj jel̦ã kilen kõm̦adm̦õdi apañ ko am̦ me kwokõn kar l̦õmn̦ak bwe kwõjjab maroñ el̦l̦ã ioer.​—Job 2:10, UBS.

KEEMEMEJ MEN IN: Kwõban wanlõñe juon tol̦ kõn juon wõt buñtõn ne. Bõtab, ñe kwõnaaj kate eok, jidik kõn jidik kwõmaroñ wanlõñe tol̦ eo. Ejja ãindein wõt apañ ko kwõj iiooni. Jekdo̦o̦n ñe remaroñ lukkuun l̦ap ãinwõt tol̦ ko, bõtab jidik kõn jidik kwõmaroñ kõm̦adm̦õdi.

MEN EO KWÕMAROÑ KÕM̦M̦ANE KIIÕ: Kõnnaan ippãn juon m̦õttam̦ ak juon iaan ro ilo baam̦le eo am̦ kõn apañ eo ej wal̦o̦k ñan kwe. Armej in enaaj maroñ jipañ eok bwe en em̦m̦anl̦o̦k wãween am̦ l̦õmn̦ak kõn apañ n̦e am̦.​—Jabõn Kõnnaan 11:14.