Devid ear je im ba bwe ejjañin “lo an Irooj el̦l̦o̦k jãn juon armej em̦m̦an, ak an ajri ro nejin owar kijeer.” Unin an kar ba naan kein ej kõnke ekar iioone wãween in ilo mour eo an. Ear jel̦ã kõn wãween an Anij kõjparoke. (Sam 37:25, UBS) Bõtab, ejjab mel̦el̦ein naan kein an Devid bwe ejjel̦o̦k juon rũkarejeran Anij ear pãd ilo aikuj ak bwe reban pãd ilo aikuj.

Ewõr iien Devid ear pãd ilo aikuj im iiooni apañ ko reppen. Juon iaaer ej iien eo ke ear ko jãn Saul. Ilo tõrein, Devid ear aikuj jipañ kõnke ejabwe m̦õñã ippãn. Kõn men in, ear kajjitõk pilawã bwe en wõr kijen im ro m̦õttan. (1 Samuel 21:1-6) Meñe Devid ear ‘owar’ kijen ak Baibõl̦ ejjab kwal̦o̦k bwe ear l̦e jãn joñan an aikuj ñan tõre eo me ear lukkuun jerata. Ear jel̦ã bwe Jeova enaaj jipañe im eban ilo̦k jãne.

Ilo Matu 6:33, Jijej ej kallim̦ur bwe Anij enaaj kabwe aikuj ko an rũkarejar ro me rej likũt Aelõñ eo An m̦oktata ilo mour ko aer. Jijej ear ba: “Kom̦win pukot m̦okta aelõñ in Anij, im kwõjarjar eo An, im naaj koorl̦o̦k men kein otemjej [m̦õñã, dãn, im nuknuk] ñan kom̦.” Bõtab, Jijej ear bar ba bwe ‘ro jatin’ renaaj iioon eñtaan kõn tõmak eo aer. Kõn men in, remaroñ pãd ilo aikuj kõn m̦õñã. (Matu 25:35, 37, 40) Jet iien rijjilõk Paul ear iioone wãween in ke ear kwõle im maro.​—2 Korint 11:27, UBS.

Jeova ear ba bwe ro jet renaaj jum̦ae kõj im jenaaj iiooni elõñ kain mãlejjoñ ko. Im emaroñ kõtl̦o̦k bwe jen pãd ilo aikuj, im ilo iien kein jej kam̦ool bwe Tepil̦ eo eriab. (Job 2:3-5) Ñan waanjoñak, jet iaan rũttõmak ro m̦õttad, ãinwõt ro ilo iien ko an Hitler, rar pãd ilo jerata kõn wõt tõmak eo aer. Kar likũti er ilo jikin kalbuuj ko me rar kaeñtaan armej ro ie. Im juon iaan men ko renana rar kõm̦m̦ane ñan kabbeer rũttõmak rein ej ke rar jab lel̦o̦k m̦õñã ñan er. Bõtab, Ri Kõnnaan ro retiljek an Jeova rar pokake wõt E. Innem, Jeova ear jab ilo̦k jãn er. Em̦ool bwe Jeova ear kõtl̦o̦k bwe ren iioone mãlejjoñ kein, ãinwõt an bar kõm̦m̦ane ñan aolep rũkarejar ro an. Bõtab, jejel̦ã bwe Jeova ej jipañ aolep ro me rej iioon mãlejjoñ ko kõn etan bwe ren maroñ kijenmej wõt. (1 Korint 10:13, UBS) Jen keememej eoon eo ilo Pilippai 1:29 me ej ba: “Em̦õj lewaj ñan kom̦ kõn Kũraij, jab bwe kom̦win lõke E wõt, a bareinwõt bwe kom̦win eñtaan kõn E.”

Jeova ej kallim̦ur bwe enaaj jipañ rũkarejar ro an im kõjparok er. Bokin Aiseia 54:17, (UBS) ej ba: “Ejjel̦o̦k kein tarin̦ae naaj ko̦kkure eok.” Kallim̦ur in kab kallim̦ur ko jet an Jeova rej kaalikkar bwe eban kõtl̦o̦k bwe aolep rũkarejar ro an ren jorrããn im mej. Bõtab, kajjojo iaaer remaroñ iioone mãlejjoñ ko im jet iien remaroñ pãd ilo kauwõtata, ak remaroñ mej.