Elõñ milien armej ro ipel̦aakin lal̦ in rej likũt aer kõjatdikdik ilo Aelõñ eo an Anij bwe enaaj jipañ er ilju im jekl̦aj. Rej l̦oore joñak eo an Jijej, eo me ear katakin rũkal̦oor ro an kilen aer jar ke ear ba: “En itok am̦ Aelõñ; kõmin kõm̦anm̦an ankilaam̦ ilal̦.”​—Matu 6:10, UBS.

Meñe elõñ armej rekõn̦aan jel̦ã kõn Aelõñ eo an Anij, ak ejeja an elõñ kabuñ ko katakin armej ro kake. Juon rijeje in bwebwenatoun etto etan Herbert George Wells ear jeje kake men in. Ear ba bwe ebwilõñ kõnke meñe elukkuun l̦ap an kar Jijej katakin armej kõn Aelõñ in Lañ, ak ejeja an enañin aolep kabuñ ko me er Kũrjin katakin armej ro kõn Aelõñ in.

Ri Kõnnaan ro an Jeova reoktak jãn kabuñ kein kõnke el̦ap aer kate er ñan katakin ro jet kõn Aelõñ eo an Anij. L̦õmn̦ak m̦õk kõn bok in an Ri Kõnnaan ro an Jeova me kwõj riiti kiiõ. Kar kõm̦m̦ane bok in ilo 220 kajin ko, im oran ekepaake 46 milien. Elõñl̦o̦k oran bok in jãn jabdewõt bok ko (magazine) armej ro rej kõm̦m̦ani ipel̦aakin lal̦. Ta ennaan eo eaorõktata me bok in ej katakin kõj kake? Eokwe, etan bok in ej, Naan in Keeañ kõn Aelõñ eo an Jeova.  * (Lale kõmel̦el̦e eo itulal̦.) Eñin ej ennaan eo eaorõktata me bok in ej katakin armej ro kake.

Etke Ri Kõnnaan ro an Jeova rej kate er ñan keeañ ak kwal̦o̦k kõn Aelõñ eo an Anij? Juon iaan un ko ej kõnke kõmij tõmak bwe ennaan eo el̦aptata me Baibõl̦ ej kwal̦o̦k kake ej kõn Aelõñ eo an Anij. Im Baibõl̦ eo ej bok eo eaorõktata iaan aolep bok ko ijoko otemjej. Bareinwõt, kõmij tõmak bwe Aelõñ eo wõt an Anij enaaj kõm̦adm̦õdi aolep apañ ko armej ro rej iiooni ilo raan kein.

Unin an Ri Kõnnaan ro an Jeova katakin armej ro kõn Aelõñ eo an Anij, ej kõnke rej kate er ñan l̦oore joñak eo an Jijej. Aelõñ eo an Anij ear aorõktata ilo mour eo an Jijej ke ear pãd ijin ioon lal̦. Im el̦ap an kar kwal̦o̦k naan kake. (Luk 4:43, UBS) Etke Aelõñ in ear kanooj aorõk ippãn Jijej? Ta ko Aelõñ in enaaj kõm̦m̦ani ñan jipañ eok? Eokwe, katak ko tok jet rej kwal̦o̦k uwaakin kajjitõk kein jãn Baibõl̦. Kõmij rõjañ eok ñan lale uwaakier.