UNIN AN ARMEJ JAB TÕMAK BWE ANIJ EKÕN̦AAN EPAAKE ER: Meñe elõñ armej rej tõmak ilo Anij, ak elõñ rej l̦õmn̦ak bwe ej ettol̦o̦k jãn er. Christina, juon kõrã jãn aelõñ in Ireland me aolep wiik ekõn etal ñan m̦õn jar eo an ej ba: “Ña iar jel̦ã bwe Anij ear kõm̦anm̦an men otemjej, ak iar jab jel̦ã kajjien im epaake e.”

KÕMEL̦EL̦E KO ILO BAIBÕL̦: Ñe jej ebbeer, Jeova ej wõnm̦aanl̦o̦k wõt im jipañ kõj, im eban bõjrak. Jijej ear kwal̦o̦k juon waanjoñak me ej kaalikkar an Jemãn yokwe im kaorõk kõj. Ear ba: ‘Ta eo juon armej enaaj kõm̦m̦ane ñe ewõr 100 an jiip innem ejako juon? Enaaj likũt ko 99 ijo rej m̦õñã ie ilo tol̦ eo im ilen pukot jiip eo ejebwãbwe.’ Ta eo men in ej katakin kõj kõn Jeova? Ej katakin kõj bwe ‘Jemãdwõj ilañ ejjab kõn̦aan bwe juon iaan rein reddik en jako.’​—Matu 18:12-14, UBS.

Aolep armej “rein reddik ” raorõk ippãn Anij. Bõtab, elemen an Anij ‘pukot eo ejebwãbwe’? Ekkar ñan eoon eo ej wal̦o̦k itulõñ, ej ba bwe Jeova ej kamaroñ ak jipañ er bwe ren jel̦ã kajjien.

Jen kiiõ lale ewi wãween an kar Anij kamaroñ ak jipañ ro jet bwe ren epaake e. Ilo iien ko an rijjilõk ro, Anij ear jilkinl̦o̦k Pilip bwe en wõnm̦ae RiItiopia eo ilo jariot eo waan ñan kõmel̦el̦eiki kanaan eo ilo Baibõl̦ me ej riiti. (Jerbal 8:26-39) Bar juon iien, Anij ear jilkinl̦o̦k rijjilõk Piter ñan m̦weo im̦õn juon rũttarin̦ae in Rom etan Korniliõs. L̦ein ekõn jar ñan Anij aolep iien im ear kõn̦aan jel̦ã kilen kabuñ ñane. (Jerbal 10:1-48) Bareinwõt, Anij ear tõl rijjilõk Paul im ro m̦õttan ñan juon iaan reba ko iturin Pilippai. Ilo ijin, rar iioone Lidia, eo me ej juon iaan ro rej ‘kabuñ ñan Anij.’ Ke rar kwal̦o̦k naan ñan Lidia, Anij ear “kepel̦l̦o̦k bũruon bwe en lukkuun roñjake” ak mel̦el̦e kõn men ko rar kwal̦o̦k kaki.​—Jerbal 16:9-15, UBS.