Kajjitõk Ko Baibõl̦ Ej Uwaaki
Ta eo Jijej enaaj kõm̦m̦ane ilo raan ko rej pedotok?
Ilo iiõ eo 33, Jijej ear mej, jerkakpeje im wanlõñl̦o̦k ñan lañ. Tokãlik, kar lel̦o̦k maroñ ñan Jijej bwe en Irooj ak Kiiñ. (Daniel 7:13, 14) Ilo raan ko im̦aan, Jijej enaaj bõktok aenõm̦m̦an ñan ioon lal̦ in im enaaj kõm̦m̦an bwe en ejjel̦o̦k jeram̦õl.—Riit Sam 72:7, 8, 13.
Kõnke Jijej ej juon Kiiñ, enaaj jol̦o̦k nana otemjej ilo lal̦ in
Elõñ men ko rem̦m̦an Jijej enaaj kõm̦m̦ani ãinwõt juon Irooj. Enaaj kõjerbal maroñ eo an me Jemãn ear lel̦o̦k ñane bwe en kõm̦m̦an bwe armej ro ren bar weeppãn. Armej ro renaaj m̦õn̦õn̦õ kõn wãween mour ioon lal̦ in im rejãmin bwijwol̦ãl̦o̦k im mej.—Riit Jon 5:26-29; 1 Korint 15:25, 26.
Ta eo Jijej ej kõm̦m̦ane kiiõ?
Jijej ej tõl im loloorjake jerbal in kwal̦o̦k naan eo ipel̦aakin lal̦ in me rũkal̦oor ro an rem̦ool rej kõm̦m̦ane. Rein rej lol̦o̦k armej ro ñan kwal̦o̦k kõn ta eo Baibõl̦ ej ba kõn Aelõñ eo an Anij. Jijej ear ba bwe enaaj wõnm̦aanl̦o̦k im pãd ippãn rũkal̦oor ro an m̦ae iien kien ak Aelõñ eo an Anij enaaj bõktok jem̦l̦o̦kin aolep kien ko an lal̦.—Riit Matu 24:14; 28:19, 20.
Ilo raan kein, Jijej ej tõl Kũrjin ro ñan jipañ armej ro bwe ren lo m̦õn̦õn̦õ ilo mour ko aer. Enaaj wõnm̦aanl̦o̦k wõt im tõl armej rein l̦ak ñan iien eo naaj ko̦kkure jukjukun pãd in enana. Im enaaj bar tõl armej ro ilo jukjukun pãd eo ekããl me Anij ear kallim̦ur kake.—Riit 2 Piter 3:7, 13; Revelesõn 7:17.
