ELUKKUUN m̦ool naan kein! El̦ap wõt ad “inepata im eñtaan” ilo mour in. Bõlen em̦õj am̦ kar kajjitõk ippam̦ make, ‘Jemaroñ ke m̦õn̦õn̦õ ilo mour in rainin?’

L̦õmn̦ak m̦õk kõn juon waanjoñak kõn juon kõrã etan Maria. Kõrã in ekar juon eo im el̦ap an jel̦ã jerbal im eowan. Bõtab, kõnke 84 an iiõ kiiõ, em̦õjn̦o̦ ñan an etetal jãn m̦weo im̦õn. Meñe ejjañin eppal̦, ak elukkuun m̦õjn̦o̦ ãnbwinnin. Ewi wãween lel̦l̦ap in emaroñ m̦õn̦õn̦õ ilo mour eo an?

Ak ta kõn kwe? Bõlen jet iien kwõj l̦õmn̦ak ippam̦ make el̦aññe men ko kwõj kõm̦m̦ani ilo mour eo am̦ ewõr tokjãer. Ñan waanjoñak, bõlen kwõlukkuun m̦õk kõn jikin jerbal eo am̦. Jet iien, armej ro rejjab kile ewi joñan am̦ kate eok ilo am̦ jerbal. Im meñe ewõr tõprak ko kwõj loi, bõtab bõlen kwõj inepata wõt kõn ta ko remaroñ wal̦o̦k ñan kwe ilju im jekl̦aj. Jet iien, kwõj eñjake am̦ make iaam̦ ak bũrom̦õj. Bõlen kwõj iioon apañ ko ilowaan baam̦le eo am̦. Ak bõlen emej juon iaan ro rejitõnbõro ippam̦. Juon em̦m̦aan etan André ear lukkuun epaake jemãn. Bõtab, ilo jidimkij jemãn ear nañinmej im mej. Joñan an André bũrom̦õj, ear l̦õmn̦ak bwe ejjel̦o̦k jabdewõt men emaroñ jol̦o̦k an bũrom̦õj.

Jekdo̦o̦n ta apañ ko jej iiooni, ewõr juon men eaorõk im jelukkuun kõn̦aan jel̦ã. Jekõn̦aan jel̦ã el̦aññe jemaroñ m̦õn̦õn̦õ ilo mour in. Bwe jen jel̦ã, jej aikuj etale bwebwenato eo kõn juon em̦m̦aan me ear mour ilo lal̦ in enañin 2,000 iiõ ko remootl̦o̦k. Etan em̦m̦aan in ej Jijej Kũraij. Meñe el̦ap an kar eñtaan ilo mour eo an, bõtab Jijej ear m̦õn̦õn̦õ wõt. Kõj bareinwõt jemaroñ m̦õn̦õn̦õ el̦aññe jej anõke joñak eo an.