Ta eo Enaaj Wal̦o̦k ñan Kabuñ Ko?
Katak Jãn Naan In Anij
Ta eo Enaaj Wal̦o̦k ñan Kabuñ Ko?
Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.
1. Aolep kabuñ ko rem̦m̦an ke?
Ilo elõñ kabuñ ko ewõr armej ro rem̦m̦an im rekõn̦aan kabuñbũruon Anij im ej lo armej rein im ej yokwe er. Bõtab, ekabũrom̦õjm̦õj bwe elukkuun lõñ men ko renana rej wal̦o̦k ilo lal̦ in kõn wõt kabuñ ko. Ilo iien ko etto, jet ri tõl in kabuñ ko rar kaeñtaan ri kõjdat ro aer. (2 Korint 4:3, 4, UBS; 11:13-15, UBS) Rainin, ekkar ñan nuuj ko jãn ipel̦aakin lal̦ in, jet ri tõl in kabuñ ko rar jipañ ri nana ro m̦ane armej ro ejjel̦o̦k rueer. Ri tõl in kabuñ rein rar bõk kun̦aaer ilo tarin̦ae, im bar jet iaaer elukkuun nana aer kõm̦m̦an ñan ajri ro.—Riit Matu 24:3-5, 11, 12, UBS.
Baibõl̦ eo ej ba bwe ewõr ruo wõt kain kabuñ. Kabuñ eo em̦ool im kabuñ eo eriab. Kabuñ ko reriab rej kwal̦o̦k katak ko rejjab m̦ool kõn Anij. Bõtab, Jeova Anij ekõn̦aan bwe armej ro ren jel̦ã m̦ool eo kõn e.—Riit 1 Timote 2:3-5.
2. Ta eo enaaj wal̦o̦k ñan kabuñ ko?
Elõñ kabuñ ko rej ba bwe rej yokwe Anij bõtab rej kwal̦o̦k katak ko rejjab m̦ool kõn e. Anij ejjab kõn̦aan bwe kabuñ kein ren tõlpiloik armej ro. Ilo m̦ool, armej ro ilo kabuñ kein rekõn̦aan jem̦jerãik jukjuk im pãd in enana an Setan Tepil̦ eo. (Jemes 4:4; 1 Jon 5:19, UBS) Naan in Anij ej ba bwe kabuñ ko me rej lõke kien ko an armej ro im jab Anij rej ãinwõt juon kõrã ekijoñ. Baibõl̦ eo ej n̦aetan kõrã in “Babilon eo El̦ap.” Etke? Kõnke eñin ej etan jikin eo me kabuñ ko reriab rar jebar im wal̦o̦ktok jãne ãlikin kar ibwijleplep eo ilo raan ko an Noa. M̦õttan jidik Anij enaaj jol̦o̦k aolep kabuñ ko reriab me rej tõlpiloik im ko̦kkure armej ro.—Riit Revelesõn 17:1, 2, 5, 17; 18:8, 23, 24.
3. Ta eo Anij enaaj kõm̦m̦ane bwe aolep armej ro ioon lal̦ in ren m̦õn̦õn̦õ?
Jej m̦õn̦õn̦õ bwe m̦õttan jidik kabuñ ko reriab renaaj jako. Kabuñ kein renana reban bar kaeñtaan armej ro. Ejjel̦o̦k bar juon kabuñ eriab enaaj bar tõlpiloik im kõjepel armej ro. Aolep armej ro me renaaj mour renaaj bõrokuk ippãn doon ilo aer kabuñ ñan Anij eo em̦ool.—Riit Aiseia 11:9; Revelesõn 18:20, 21; 21:3, 4.
4. Ta ko armej ro em̦ool bũrueer rej aikuj kõm̦m̦ani?
Jeova ejjab mel̦o̦kl̦o̦k armej ro rem̦m̦an im em̦ool bũrueer me rej pãd ilo kabuñ ko reriab ilo pel̦aakin lal̦ in. Ej kadiwõjl̦o̦k armej rein jãn kabuñ ko reriab ilo an katakin er kõn m̦ool eo.—Riit Maika 4:2, 5.
Jeova ej karwaineneik armej ro me rekõn̦aan karejar ñan e ñan baam̦le eo an. Meñe ro m̦õttad ak ro nukũd remaroñ illu ñe jej karejar ñan Jeova, jejjab ebbeer kõnke elõñ jeraam̦m̦an ko rel̦l̦ap im jemaroñ bũki. Ñan waanjoñak, jej erom jeran Anij, jej m̦õttan baam̦le eo an me el̦ap yokwe ippãer im jemaroñ mour ñan indeeo.—Riit Mark 10:29, 30; 2 Korint 6:17, 18.
Ñan bõk mel̦el̦e ko rel̦l̦apl̦o̦k, jouj im lale katak 15 im 16 ilo bok in me ej an Ri Kõnnaan ro an Jeova. KATAK KO REM̦OOL JÃN BAIBÕL̦ EO
[Pija Credit Line ilo peij 26]
The Complete Encyclopedia of Illustration/J. G. Heck
