Eaorõk Ke ñan Ad Jel̦ã Uwaak Ko?

“Kom̦ naaj jel̦ã m̦ool eo, im m̦ool eo enaaj kanemkwoj kom̦.”​—JON 8:32, UBS.

M̦OOl eo ilo Baibõl̦ emaroñ kanemkwoj kõj jãn katak ko kõn Jijej me rekapokpok im rej tõlpiloik kõj. Bõtab, eaorõk ke ta eo jej tõmak kake kõn Jijej? Aet. Men eo jej tõmak kake kõn Jijej eaorõk ippãn Jeova im ippãn bar Jijej. Innem, ej aikuj in bar aorõk ippãd.

● Etke eaorõk ippãn Jeova? Un eo unin an aorõk ippãn ej kõnke Jeova ej ‘Anij in yokwe.’ (1 Jon 4:8) Jeova ekõn̦aan bwe jen mour im m̦õn̦õn̦õ ñan indeeo. Jijej ear ba: “Joñan an Anij yokwe lal̦ [armej ro], ear letok Nejin eo ej make wõt, bwe jabdewõt eo ej tõmak ilo e . . . en mour indeeo.” (Jon 3:16, UBS) Anij ear jilkintok Nejin ñan lo̦mo̦o̦ren kõj im ñan kepel̦l̦o̦k juon ial̦ ñan ad maroñ mour indeeo ilo naaj Pedetaij eo ioon lal̦ in. Eñin kar ankilaan Anij jãn kar jinoin. (Jenesis 1:28) Anij em̦õn̦õn̦õ in lel̦o̦k menin letok eo an kõn mour indeeo ñan ro im rej katak kake m̦ool eo kõn Nejin im rej jerbali katak kein ilo mour ko aer.​—Rom 6:23.

● Etke eaorõk ippãn Jijej? Jijej bareinwõt el̦ap an yokwe armej. Yokwe in an ear kõm̦akũt e bwe en kaarmejjete emake. Ewi wãween? Ear kõm̦m̦ane men in ilo an kar m̦õn̦õn̦õ in mej kõn kõj armej. (Jon 15:13) Jijej ear mel̦el̦e bwe ilo an kar kõm̦m̦ane men in, ear kepel̦l̦o̦k juon ial̦ me ej ial̦ eo wõt ñan ad maroñ bõk lo̦mo̦o̦r. (Jon 14:6) Jijej elukkuun kõn̦aan bwe aolep armej ren bõk tokjãn jãn on̦ean mej eo an. Jejjab aikuj in bwilõñ kõn men in. Etke? Kõnke eñin unin an kar Jijej kakien rũkal̦oor ro an rem̦ool bwe ren katakin armej ro ipel̦aakin lal̦ in kõn ankilaan Anij.​—Matu 24:14; 28:19, 20.

● Etke ej aikuj in bar aorõk ippãd? Bõjrak m̦õk jidik im l̦õmn̦ak kõn men ko me el̦ap aer aorõk ippam̦. Ejjel̦o̦k pere bwe jet iaan men kein ej ãjmour eo am̦ im baam̦le eo am̦. El̦ap am̦ kõn̦aan ke bwe ãjmour eo am̦ en em̦m̦an im bwe kwe im ro kwõj yokwe er en em̦m̦an ami mour? Eokwe, Jeova ej kõjerbal Jijej ñan lewõj ñan kwe im ro rejitõnbõro ippam̦ juon kõjatdikdik em̦m̦an. Kõjatdikdik in ej ñan mour indeeo ilo jukjuk im pãd eo ekããl me ejjel̦o̦k nañinmej im eñtaan kab bũrom̦õj ie. (Sam 37:11, 29; Revelesõn 21:3, 4) Kwõnaaj ke kõn̦aan mour ilo jukjuk im pãd in ekããl? El̦aññe kokõn̦aan, eokwe ewõr juon men me kwõj aikuj kõm̦m̦ane.

Jen bar lale eoon eo me ej pãd tulal̦ in wõt taitõl̦ eo. Eoon eo ej ba: “Kom̦ naaj jel̦ã m̦ool eo, im m̦ool eo enaaj kanemkwoj kom̦.” M̦ool eo kõn Jijej im kõn jerbal eo an ñan kajejjete ankilaan Anij emaroñ kanemkwoj kõj jãn ad kam̦akoko ñan jerawiwi im mej. Eñin kain kam̦akoko eo ekanooj in nana. Bõtab, jej aikuj “jel̦ã m̦ool eo” bwe jen maroñ bõk anemkwoj. Innem, kokõn̦aan ke kal̦apl̦o̦k am̦ jel̦ã kõn m̦ool in im kõn ewi wãween kwe im ro kwõj yokwe er kom̦ maroñ bõk tokjãn jãne? Ri Kõnnaan ro an Jeova renaaj m̦õn̦õn̦õ in jipañ eok.