Ro Rej Riiti Bok ko Ad Rej Kajjitõk . . .

Anij ej Ke Kalijekl̦o̦k?

▪ Jaab. Anij ejjab kalijekl̦o̦k. Baibõl̦ eo ej kalikkar men in: “Anij ej kõmmõn ñõn armij otemjej ilo ejjelok kalijiklok. Jabdrewõt eo ej kautieje im kõmmõn jimwe, ej kabuñburuen, jekdron ri ailiñ et.”​​—Jerbal 10:​34, 35, UBS.

L̦õmn̦ak eo an Anij eoktak jãn l̦õmn̦ak ko an armej ro rejjab weeppãn. Elõñ armej rej tõmak bwe aelõñ ko aer rem̦m̦anl̦o̦k jãn aelõñ ko jet. L̦õmn̦ak ko an armej ro ilo raan kein rej ãinl̦o̦k wõt l̦õmn̦ak ko an kar Charles Darwin. L̦ein ej ba bwe ilju im jekl̦aj armej ro jãn aelõñ ko me rem̦m̦anl̦o̦k im rekajoorl̦o̦k renaaj ko̦kkure im jol̦o̦k ro jet jãn aelõñ ko rettãl̦o̦k jãn er. Em̦õj an jejjet men in kiiõ.

Ekkar ke bwe armej ren l̦õmn̦ak bwe jet aelõñ rem̦m̦anl̦o̦k jãn aelõñ ko jet? Ñan waanjoñak, ewõr ke kein kam̦ool ko im rej kalikkar bwe armej ro ilo jet aelõñ rem̦m̦anl̦o̦k jãn armej ro ilo aelõñ ko jet? Juon ri kaki ilo juon college, Bryan Sykes, ej ba bwe ejjel̦o̦k juon men ej pãd ippãn armej ro im ej kõm̦m̦an bwe ren utiejlok jãn ro jet. Ej ba bwe jekdo̦o̦n ia eo rar l̦otak ie ak itok jãne, kõj aolep jej armej im jej juon wõt.

Mel̦el̦e kein an l̦ein rej errã ilo naan ko jej riiti ilo Baibõl̦ eo. Baibõl̦ eo ej ba bwe Anij ear kõm̦anm̦an juon wõt em̦m̦aan im juon wõt kõrã im aolep armej rar itok jãn armej rein ruo. (Jenesis 3:⁠20; Jerbal 17:​26, UBS) Im̦aan mejen Anij, aolep armej rej juon wõt ippãn im ejjel̦o̦k juon ej utiejlok jãn bar juon.

Jeova ejjab lale okõtan kilin armej ak jekjekin mejeir. Bõtab, men eo el̦ap an kaorõke ej ta eo ilo kobban bũrueer. Jeova ej ba: “Armij ej kalimjek tulik, ak ña ij kalimjek buruen armij.” (1 Samuel 16:​7, UBS) L̦õmn̦ak in an Anij emaroñ lukkuun kakajoor kõj. Etke?

Jekdo̦o̦n ia eo jaar l̦õtak ak dik im rũttol̦o̦k ie, elõñ iaadwõj jejjab m̦õn̦õn̦õ kõn wãween pao tokid. Bõtab, jejjab maroñ in ukote men in. Ak, ewõr jet men ko jemaroñ ukote. Ta kein? Eokwe, jemaroñ kakõm̦m̦anm̦anl̦o̦k bũruod im l̦õmn̦ak ko ad. (Kolosse 3:​9-​11) Em̦ool bwe jet iien jemaroñ l̦õmn̦ak bwe jej utiejl̦o̦k ak ettãl̦o̦k jãn ro jet. Bõtab, l̦õmn̦ak rot in ejjab jim̦we ippãn Anij. Kõn men in, jej aikuj in jol̦o̦ke jãn bũruod.​​—Sam 139:​23, 24.

Jeova enaaj jipañ kõj el̦aññe jej l̦oore joñak eo an ñan jab kalijekl̦o̦k. Naan eo An ej kakeememej kõj: ‘Mejen Jeova rej ettõrl̦o̦k im ettõrtok ilo aolepen lal̦, im make kwal̦o̦k E kajoor in jipañ ro bũrueer re weeppãn ñan E,’ ak ro rej kabuñ ñan E kõn aolepen bũrueer. (2 Kronikel 16:⁠9) Eoon in ej lukkuun kalikkar bwe Jeova ejjab kalijekl̦o̦k jekdo̦o̦n aelõñ ta eo jej itok jãne.