Ajri ro Rej Aikuj Ke Katak kõn Anij?

“Elõñ kabuñ ko rej kõm̦m̦an bwe armej ro ren jab yokwe doon ak rej kõm̦m̦an bwe ren kõjdate doon.”​​—JONATHAN SWIFT, JUON RI JEJE JÃN IÑLEN.

JONATHAN SWIFT ear kwal̦o̦k kõn l̦õmn̦ak in an enañin jilu buki iiõ ko remootl̦o̦k. Bõtab, elõñ armej ro rainin rej errã ippãn. Elõñ rej tõmak bwe jemen im jinen ajri ro rejjab aikuj in katakin ajri ro nejier kõn Anij. Rej l̦õmn̦ak bwe ajri ro renaaj jerata el̦aññe rej rũttol̦o̦k ilo baam̦le ko me rej tõmak ilo Anij im ekkã aer etal ñan m̦õn jar ko.

Ak ta baj l̦õmn̦ak eo am̦? Ewi iaan men kein kwõj errã ie?

● Ejjab mãlim an jemen im jinen ajri ro katakin ro nejier kõn Anij.

● Jemen im jinen ajri ro rej aikuj kõttar m̦ae iien eo ajri ro rej rũtto, m̦okta jãn aer katakin er kõn Anij.

● Ilo tõre eo ajri ro rej dik wõt, jemen im jinen ajri ro rej aikuj katakin er tõmak ko aer kõn Anij. Bõtab, ñe ajri ro rej rũttol̦o̦k, remaroñ rõjañ ajri ro bwe ren make kããlõte tõmak ko aer.

● Jekdo̦o̦n ta ak ajri ro rej aikuj errã ippãn jemãer im jineer ilo tõmak ko aer kõn Anij.

Ajri ro Remaroñ ke Jorrããn El̦aññe Rej Kabuñ ak Tõmak ilo Anij?

Rũtto ro me el̦ap yokwe ippãer reban ko̦kkure ak kajorrããn ro nejier. Meñe ej ãindein, ak elõñ armej ro rejjab kõn̦aan bwe ajri ro ren katak kõn Anij. Innem, m̦ool ke bwe ajri ro renaaj jorrããn el̦aññe rej katak kõn Anij? Ium̦win elõñ iiõ ko, elõñ armej rar etale wãween an tõmak ko an rũtto ro jelõt ro nejier. Ta jem̦l̦o̦kin ekkatak kein?

Katak kein rej kwal̦o̦k bwe em̦m̦an ñe ajri ro rej katak kõn Anij im men in eban ko̦kkure er. Ilo kar 2008 eo, juon ripoot jãn Amedka * ear kwal̦o̦k bwe “katak kõn Anij emaroñ karuakl̦o̦k ajri ro ñan jemãer im jineer. Kabuñ im kõtaan eo an ippãn Anij ej juon men elukkuun aorõk ilo mour eo an ajri eo. Ebar aorõk ñan kõtaan eo an ippãn baam̦le eo an.” L̦õmn̦ak in ebar jejjet ñan l̦õmn̦ak eo an Jijej ke ear ba: “El̦apl̦o̦k an m̦õn̦õn̦õ ro rej eo̦roñ naan in Anij, im kõjparok e.”​​—Luk 11:⁠28.

Jet armej rej l̦õmn̦ak bwe rũtto ro rej aikuj kõttar m̦ae iien eo ajri ro rej rũtto m̦okta jãn aer katakin er kõn Anij. Ejim̦we ke l̦õmn̦ak in? Eokwe, kõmãlij eo an juon ajri ej ãinwõt juon “bakõj” ejjel̦o̦k kobban im epojak ñan kanne. El̦aññe rũtto ro rejjab kanne “bakõj” in kõn katak ko an Anij im men ko rem̦m̦an, ajri ro renaaj make teiñi “bakõj” in kõn jabdewõt men ko rej katak im roñ jãn armej ro jet.

Ewi Wãween Jemen im Jinen Ajri Ro Remaroñ Jipañ Ro Nejier?

Bwebwenato ko jãn etto rej kalikkar bwe wãween an jet armej kabuñ emaroñ kõm̦m̦an bwe en wõr kõjdat im kalijekl̦o̦k. Innem, ewi wãween jemen im jinen ajri ro remaroñ katakin ro nejier kwal̦o̦k yokwe ñan ro jet?

Rej aikuj etale kajjitõk kein jilu: (1) Ta men ko ajri ro rej aikuj katak? (2) Wõn eo ej aikuj katakin er? (3) Ta wãween ko rem̦m̦antata ñan katakin er?

[Kamelele eo itulal]