Men ko Jisõs Ear Katakin Kaki kin Anij

“Eo wõt ejela kin Jemen ej Nejin. Ak Nejin ekõnan jiroñ ro jet kin Jemen, bwe ren bareinwõt jela kin e.”​—LUK 10:22, CONTEMPORARY ENGLISH VERSION.

MOKTA jen an kar ber ion lõl, manje eo Nejin Anij ear ber iben Jemen ilõñ iomin elõñ billion yiõ ko. (Dri Kolosse 1:​15) Kin men in, Nejin ear maroñ in lukkun jela kin lemnok, iñjake, im wãwen ko an Jemen. Tokelik, ke Jisõs ear itok ñõn lõl in einwõt juõn armij, ear lukkun mõnõnõ in katakin ro jet mol eo kin Jemen. Elõñ men ko jemaroñ katak kaki kin Anij ilo ar roñjake men ko Jisõs ear ba.

Etan Anij Ãt eo ekwojarjar, Jeova, ear lukkun aurõk iben Jisõs. In ejitenburu Nejin ear kõnan bwe ro jet ren jela im kajerbale ãt eo etan Jemen. Etan Jisõs mõke ej melelen “Jeova ej Dri Lomor.” Ilo boñin eo mokta jen an kar mij, Jisõs ear maroñ ba ilo jar eo an ñõn Jeova: “I ar kwalok etõm.” (Jon 17:26) Jejjab bwilõñ bwe Jisõs ear kajerbale etan Anij im kwaloke ñõn ro jet. Men in ej eindrein kinke ewi wãwen dri roñjake ro an Jisõs remaroñ melele kin mol eo kin Jeova elañe rejjab jela ãt eo etan im ta eo ej jutõk kake? *

Yokwe eo elap an Anij Jisõs ear ba ilo jar eo an ñõn Anij: “Jema, . . . Kw’ar yokwe Iõ mokta jen jinoin kõmõnmõn lõl.” (Jon 17:24) Ilo an kar lo yokwe eo an Anij ilõñ, ke Jisõs ear ber ion lõl, ear kajeoñ in kwalok kin wãwen ko relõñ im aibujuij kin yokwe eo an Jeova.

Jisõs ear kwalok bwe elukkun lap an Jeova yokwe. Ear ba: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:​16) Nan in Grik eo kar ukote “lõl” ejjab jitõñlok ñõn lukkun lõl in brij, ak ej jitõñlok ñõn armij ro ion lõl. Joñõn an lap an Jeova yokwe armij ro, ear letok Nejin ejitenburu iben bwe armij ro retiljek ren maroñ bõk anemkwoj jen jerawiwi im mij, im bõk kejatrikrik eo ñõn mour indrio. Jejjab maroñ lukkun melele kin joñõn mulõlin yokwe in elap an Anij.​—Dri Rom 8:​38, 39.

Jisõs ear kalikar mol in me elap an kainemõn: Jeova ej lukkun yokwe dri korijer ro an kajjojo. Jisõs ear katakin bwe Jeova ej einwõt juõn s̃eperd eo ej kaurõk im ejela kajen kajjojo s̃ip ro an. (Matu 18:12-​14) Jisõs ear ba bwe ejelok juõn bao sparro enaj wutlok ion brij im Jeova ejaje kake. Ear bareinwõt ba: “Emwij bwini kolan bõrõmi otemjelok.” (Matu 10:29-​31) Elañe eor an Jeova maroñ ñõn jela ñe juõn bao sparro ejoko jen el eo an, inem ejamin naj laplok ke an kile im kea kin dri korijer ro an kajjojo? Elañe Jeova ejela kin oran kolan bõrar, inem eor ke jabrewõt men ko ilo mour eo ar, einwõt aikwij ko, abañ ko, im inebata ko ar, me ejjab jela kaki?

Jememuij ilõñ Einwõt ar kar etale ilo katak eo lok, Jisõs ej mõke wõt Nejin Anij ear keutak. Inem jejjab bwilõñ bwe ekkã an Nejin ejitenburu iben ãñiñin Jeova ak konono kin E einwõt “Jema.” Ilo mol, ilo nan ko jinoin an Jisõs me kar je ilo Baibel eo, ko ear kwaloki ilo tempel eo ke ear 12 an yiõ, ear konono kin Jeova einwõt “Jema.” (Luk 2:49) Nan eo “Jema” ej walok enañin 190 alen ilo Gospel ko. Jisõs ear  kajerbal nan in ilo elõñ wãwen ko, einwõt “Jememi,” “Jememuij,” im “Jema.” (Matu 5:​16; 6:9; 7:​21) Ilo an kar jab ãliklik in kajerbal nan kein, Jisõs ear kwalok bwe armij ro rejjab wãppen im rejerawiwi remaroñ bõk juõn kõtan emõn iben Jeova, eo remaroñ liki.

Etiriamokake im mõnõnõ in jeorlok bwir Jisõs ear jela bwe armij ro rejjab wãppen rej aikwiji an Jeova tiriamokake ir. Ilo wanjoñok eo an kin likao eo ejerwan, Jisõs ear keiri Jeova ñõn juõn jemen etiriamokake im ej jeorlok bwir, eo ear mõnõnõ in kajeblaktok ladrik eo nejin ear ukwelok. (Luk 15:11-​32) Inem nan kein an Jisõs rej kalikar ñõn kij bwe Jeova ej bukot jabrewõt eo ej ukwelok jen jerawiwi ko an me enaj berberin An kwalok tiriamokake ñõn e. Elap an Jeova kijorur in jeorlok bwir ko an eo ej ukwelok jen jerawiwi ko an. Jisõs ear kemelele im ba: “Ij ba ñõn kom, bwe ein drein e naj or lõñliñ ilõñ kin juõn dri jerawiwi eo ej ukwelok iben, elap jen kin druatimjuõn-ñoul im druatimjuõn ro dru wãnik, im ejelok air aikwij in ukwelok.” (Luk 15:7) Inem wõn ejamin kõnan druaklok ñõn juõn Anij etiriamokake?

Dri roñjake jar ko Ke ear ber ilõñ mokta jen an kar itok ñõn lõl, Jisõs ear lo bwe Jeova ej ‘Dri roñjake jar’ ko im bwe Ej lõñliñ kin jar ko an dri korijer ro an retiljek. (Sam 65:2) Kin men in, ilo ien jerbal in kwalok nan eo an, Jisõs ear katakin dri roñjake ro an kin kilen jar im kin men ko remaroñ jar kaki. Ear kakabilek ir im ba: “Komin jab elij bata.” Ear rejañ dri roñjake ro an ñõn air jar bwe ankilan Anij en jejit kitien “einwõt i lõñ, bareinwõt ion lõl.” Jemaroñ bareinwõt jar kin mõña ko kijed aolep ran, ñõn bõk jeorlok bwir kin jerawiwi ko ar, im ñõn ar maroñ jumae menin kabo ko. (Matu 6:​5-​13) Jisõs ear katakin bwe Jeova, einwõt juõn jemen eyokwe, ej emakõt ñõn jar ko an dri korijer ro An ilo an uake kajitõk ko rar kwaloki ilo tõmak.​—Matu 7:​7-​11.

Alikar, Jisõs ear kate e ñõn katakin mol eo kin Jeova im kin kain Anij rõt e. Ear bareinwõt kijorur in kwalok kin wãwen eo Jeova enaj kõmõn oktõk ko ibelakin lõl ñõn kajejite karõk eo An kin lõl in im armij ro rej jokwe ion. Ilo mol, men in ear unin tel eo elap ilo jerbal in kwalok nan eo an Jisõs.

[Kamelele itulõl]