Ro Rej Riiti Buk ko Ar Rej Kajitõk

Dri Kennan ro an Jeova Rej ke Tõmak Bwe Ir Wõt Renaj Bõk Lomor?

Dri Kennan ro an Jeova rej lemnok bwe emwij air lo kabuñ eo emol. Elañe en kar jab eindrein air lemnok, renaj kar ukot kabuñ eo air. Dri Kennan ro an Jeova rej kejatrikrik ñõn bõk lomor einwõt elõñ ian ro uan kabuñ ko jet. Bõtab, rej bareinwõt tõmak bwe ejjab kunair ñõn ekajete wõn eo en bõk lomor. Ilõñin men otemjej, Anij ej dri Ekajet eo. E eo ej kãlet.​—Aiseia 33:22.

Nan in Anij ej kwalok bwe ro renaj mour rejjab aikwij kõnan wõt bõk lomor ak rej aikwij bareinwõt bokake dri Lomor eo. Ñõn wanjoñok: Jen ba bwe wa eo waan juõn dri añwõr ej iten tuññũlallok. Im dri añwõr eo ejjab kõnan mij. Enaj mij ke ak enaj mour? Jemlok eo ej wawa ion wãwen ej emmakit ñe rej lelok jibõñ ñõn e. Kin an utiej buru emaroñ makoko in bõk jibõñ jen eo enaj lomoren e. Ilo ijo turãjet emaroñ kõtãik e ilo an mõnõnõ in bõk jibõñ im ilo jemlokõn bõk lomor.

Ilo ejja wãwen in wõt, ro rej bokake dri Lomor eo, Jeova Anij, naj lomoren ir. Lomor ej juõn menin letok jen Anij, bõtab ejjab aolep armij renaj bõke. Nejin Anij, Jisõs, ear ba: “Jab otemjej rej ba ñõn Iõ, Iroij, Iroij, re naj dreloñtok ilo ailiñ in lõñ; a eo ej kõmõnmõn ankil an Jema ej ber i lõñ.”​—Matu 7:​21.

Dri Kennan ro an Jeova rej tõmak bwe Anij ej lomoren wõt ro rej jerbale tõmak eo air ilo katok in binmour eo an Jisõs im lukkun lore katak ko an. (Jerbal 4:10-12) Jen etale menin aikwij ko jilu raurõk ñõn bõk lomor me rej walok ilo Nan in Anij.

(1) Jisõs ear ba ñõn ro mõtõn: “Ilo men in armij otemjej re naj jela bwe komij dri kalora, elañe komij yokwe dron.” (Jon 13:35) Joñok eo an Jisõs mõke ikijen an kar lelok mour eo an kin ro jet ej kwalok aurõkin yokwe. Ro rej yokwe ro jet rej kwalok juõn karkar me eaurõk ñõn bõk lomor.

(2) Jisõs ear ba ñõn jemen ilo jar: “I ar kwalok etõm ñõn ir.” (Jon 17:26) Jisõs ear jela bwe ãt eo etan Anij, Jeova, elukkun aurõk iben Jemen. Jisõs ear jar bwe ãt eo etan Jemen “En kwojarjar.” (Matu 6:9) Kokwojarjar ãt eo etan Anij ej kitibuj ar jela etan, im watõke einwõt juõn men eaurõk im ekwojarjar. Einwõt Jisõs, ro rej bukot lomor rej aikwij kajerbal etan Anij. Bareinwõt rej aikwij katakin ro jet kin ãt eo etan Anij im karkar ko karkarin. (Matu 28:19, 20) Ilo mol, ro wõt rej kir etan Anij renaj bõk lomor.​—Dri Rom 10:13.

(3) Jisõs ear ba ñõn Pontiõs Pailat: “Ailiñ eo Aõ e jab jen lõl in.” (Jon 18:36) Ranin jet wõt rej kwalok air tõmak ilo Ailiñ eo an Anij, ak kien eo me Jisõs ej Kiñ ie. Jen an eindrein, rej likit air kejatrikrik ion rolul ko kõmõn in armij. Bõtab, ro renaj bõk lomor rej tiljek ilo air rejetake Ailiñ eo an Anij im rej katakin ro jet kin wãwen enaj kanemkwoj aolep armij ro retiljek.​—Matu 4:​17.

Elikin air kar katak kin jet ian men ko rej aikwij kõmõni ñõn bõk lomor, dri kalor ro an Jisõs rar ba: “Wõn e naj maroñ in mour?” Jisõs ear uak: “Men ko armij rebani, Anij ej maroñ kaki.” (Luk 18:18-​30) Dri Kennan ro an Jeova rej kate ir ilo air kajeoñ kajejit menin aikwij kein ñõn bõk lomor. Bareinwõt rej kate ir ilo air jibõñ ro jet bwe ren bõk lomor.