Kajjitõk ko jãn Ro Rej Riit

Jemaroñ ke lukkuun jel̦ã awa eo rar totoik Jijej ioon al̦al̦ in eñtaan eo?

Kajjitõk in kar bõklõñtak kõnke mel̦el̦e ko kõn iien mej eo an Jijej ilo bwebwenato ko an ri jeje Mark im rijjelõk Jon ãinwõt rej idaptõk ippãn doon. Mark ej ba: “Ruatimjuõn awa jibboñõn eo [ri tarin̦ae ro] rar dilaik.” (Mark 15:​25, UBS) Bõtab ekkar ñan Jon, “e nañin joñoul im ruo awa” ke Pailat ear kõtl̦o̦ke Jijej bwe Ri Ju ro ren katotoiki ioon al̦al̦ in eñtaan eo. (Jon 19:​14-​16) Jet armej rar kwal̦o̦k elõñ kain mel̦el̦e ko ñan kõmel̦el̦eiki idaptõk in. Ak Baibõl̦ eo ejjab kwal̦o̦k etke bwebwenato kein ruo reoktak jãn doon. Bareinwõt, wãween an armej ro etto lale awa eoktakl̦o̦k jidik jãn koj rainin. Innem ñe jenaaj etale men in emaroñ jipañ kõj.

Ilo kar iien ko etto ekar ejjel̦o̦k kein aer lale awa ko ñan kajejjet iien. Rar kaawawa kõn al̦ im lale ia eo epãd ie bwe ren jel̦ã jete awa. Kõn men in, awa ko aer rej oktak ilowaan juon iiõ, kõnke an tak im tulo̦k al̦ ej oktak jãn iien ñan iien. Innem, armej rej an̦to̦o̦ne awa ko ekkar ñan ia eo al̦ ej pãd ie. Kõnke rejjab lukkuun jel̦ã jete awa ko ilo iien kein, ekkã an ri jeje ro ilo Baibõl̦ an̦to̦o̦nel̦o̦k im kõjerbal awa kein ãinwõt 9 awa ilo jibboñ, 12 awa ilo raelep im 3 awa ãlikin raelep.​​​—Matu 20:​3, 5; Jerbal 10:​3, 9, 30.

Bwebwenato ko ilo bok in Matu, Mark, Luk im Jon kõn raan in mour eo an Jijej ãliktata ioon lal̦ in rej errã ippãn doon. Aolep bwebwenato kein emãn rej ba bwe ke ejibboñtata, pris ro rel̦ap otemjej im ri utiej ro an Ri Ju ro rar pepe ippãn doon im bõkl̦o̦k Jijej ñan Pailat, komja eo an Rom. (Matu 27:1; Mark 15:1; Luk 22:66; Jon 18:​28) Bareinwõt, Matu, Mark, im Luk rej ba bwe jãn joñoul ruo awa, ke em̦õj totoik Jijej ioon al̦al̦ in eñtaan eo, ear marok ioon aolepen ãne eo ium̦win “jilu awa.”​​​—Matu 27:​45, 46; Mark 15:​33, 34; Luk 23:⁠44.

Ewõr bar juon men jej aikuj l̦õmn̦ak kake m̦okta jãn ad kõm̦m̦an jem̦l̦o̦k kõn awa eo rar jinoe im totoik Jijej. Rekõn m̦okta deñõte im kaeñtaane juon armej m̦okta jãn aer totoiki. Joñan an kar l̦ap aer deñõte im m̦ane Jijej, juon em̦m̦aan ear aikuj kotake al̦al̦ in eñtaan eo ñan e. (Luk 23:26; Jon 19:​17) Kõnke jejjab jel̦ã ewi toõn aer kar deñl̦o̦ke im kaeñtaane Jijej, jejjab jel̦ã kõn lukkuun awa eo me rar totoiki ilo al̦al̦ eo. Bõlen eñin unin eoktak awa ko ri jeje Mark im rijjelõk Jon rej ba kõn iien eo rar totoik Jijej ioon al̦al̦ in eñtaan eo.

Rijjelõk Jon ear je bok in Jon elõñ iiõ ko ãlikin an kar Matu, Mark im Luk kar je bok ko aer. Kõn men in ear wõr ippãn bok kein aer. Im em̦ool bwe Jon ear je juon awa eo me emaroñ kar oktak jãn eo Mark ear ba. Men in ej kalikkare bwe Jon ear jab anõke bwebwenato eo an Mark. Bwebwenato ko jim̦or an Jon im Mark kar kakũrm̦ool jãn Anij. Meñe ejabwe mel̦el̦e ko ñan kõmel̦el̦eiki oktak kein, ak jemaroñ lõke bwebwenato ko ilo bok kein.