“Kom̦win Ekil”—Etke Ekanooj Aorõk Men In?

“TA EO kakõl̦l̦an am̦ naaj itok im jem̦l̦o̦kõn lal̦?” (Matu 24:⁠3) Ke Jijej ear uwaake kajjitõk in an rũkal̦oor ro an, uwaak eo an ear alikkar, kab ear tibriki l̦o̦k men ko renaaj kar wal̦o̦k im enaaj pidodo an armej kile. Jemaroñ loe men in ilo Matu jebta 24, Mark jebta 13, im Luk jebta 21. Ear bareinwõt ba: “Kom̦win ekil.”​​—Matu 24:⁠42.

El̦aññe uwaak eo an Jijej enaaj kar lukkuun alikkar, etke ear aikuj bar ba “kom̦win ekil”? Jen etale ruo un ko. Un eo kein kajuon ej kõnke menin karreelel im kam̦ad ko remaroñ kõm̦m̦an bwe jet ren kajekdo̦o̦ne kakõl̦l̦en raan ko ãliktata. Tokjãn men in, emaroñ jako aer ekil im jorrããn kõtaan eo aer ippãn Jeova. Kein karuo, juon emaroñ kile bwe jej pãd ilo raan ko ãliktata ak kõnke em̦m̦an kõjeãn emaroñ jab ekil. Emaroñ bar l̦õmn̦ak bwe eñtaan eo el̦ap me Jijej ej kõnono kake ej to wõt. Eñin unin armej eo ej l̦õmn̦ak bwe ejjab lukkuun aorõk ñan “ekil” wõt.​​—Matu 24:⁠21.

Rar Jab Ekil

Jijej ear kakeememej rũkal̦oor ro an kõn armej ro ilo kar raan ko an Noa. Armej ro ilo tõre eo rar loe an Noa kwal̦o̦k naan im kõm̦m̦ane wa eo. Rar bar lo bwe el̦ap lãj ilo tõre eo, bõtab rar jab ekil. (Matu 24:​37-​39) Ejjel̦o̦k oktak jãn armej ro ilo raan kein. Rej loe men ko im rej kakõl̦l̦en raan ko ãliktata ak rej kajekdo̦o̦ni. Ñan waanjoñak, ilo tõreren ial̦ ko, em̦õj kajutak juon kakõl̦l̦e im kar je joñan eo wa ko rej aikuj bõke ñe rej ettõr. Ak meñe ãindein, elõñ rej kajekdo̦o̦ne men in. Ekkã an kien ko kõm̦m̦ani ekkaj ko ilo ial̦ ko bwe ri kattõr ro ren kadikdik aer ettõr. Ãindein, juon Kũrjin emaroñ lo kakõl̦l̦e eo bwe jej pãd ilo raan ko ãliktata ak ej wõnm̦aanl̦o̦k im bõk kun̦aan ilo men ko remaroñ kam̦ad e. Men in ear wal̦o̦k ñan juon jodrikdrik etan Arielle im ej pãd ilo juon jikin ilo Africa.

Arielle ekõn alwõje an kõrã ro iukkure handball ilo TV. Ej juon iukkure ãinl̦o̦k wõt tennis bõtab rej deñl̦o̦ke bo̦o̦l̦ eo kõn peier. Ke jikuul̦ eo an ear ekkãlel ri iukkure ro, ear kõn̦aan iukkure ippãer. Ak ear jab kile bwe an naaj kobal̦o̦k ilo team in enaaj ko̦kkure jem̦jerã eo an ippãn Jeova. Innem, ear kobal̦o̦k im iukkure ippãn team eo. Ta eo ear wal̦o̦k? Ej ba: “Jet iaan ri iukkure ro m̦õtta ewõr jerãer. L̦õm̦aro jerãer rar kõbaatat im bõk uno ko rekajoor. Rar kajjirere kake eõ kõn aõ oktak jãn er. Iar l̦õmn̦ak bwe pepe eo aõ eban jelõt eõ. Bõtab, kõnke men eo iar l̦õmn̦ake aolep iien ej iukkure, ear jino m̦õjn̦o̦l̦o̦k jem̦jerã eo aõ ippãn Jeova. Iar jab kõtmãne bwe men in enaaj kar wal̦o̦k. Ilo iien kweilo̦k ko, ij pãd ilo im̦õn kweilo̦k eo ak aõ emootl̦o̦k ippãn jikin iukkure eo. Iar jino oktak. M̦okta iar baj kõn̦aan iukkure wõt ak tokãlik iar kõn̦aan wõt wiin. Joñan aõ kar kõn̦aan jiãe wõt, iar jol̦o̦k el̦ap iien bwe in tijem̦l̦o̦k ilo iukkure in. Ear l̦ap aõ poub im inepata. Im ear jako aõ epaake ro m̦õtta kõn aõ poub in iukkure.

Bõtab, juon men ear wal̦o̦k im ear kõm̦m̦an bwe in l̦õmn̦ak. Juon iien ke kõmar iukkure,  team eo kõmar jiãe ippãn ear pojak in jotok bo̦o̦l̦ eo. Ak ilo iien eo ij iten bũl̦ake, iar jar ñan Jeova bwe en jipañ eõ. Men in ear kailbõk eõ. Kõn men in, iar kile ewi joñan an kar jorrããn jem̦jerã eo aõ ippãn Jeova. Innem, ta eo iar kõm̦m̦ane ñan bar kakajoor kõtaan eo aõ ippãn?

“Eokwe, em̦õj aõ kar alwõje pija in jodrikdrik eo me ej ba Jodrikdrik Ro Rej Kajjitõk – Ta eo Inaj Kõm̦m̦ane kõn Mour eo Aõ? (Young People Ask​—What Will I Do With My Life?) * Ak ilo tõre in iar bar alwõje. Im iar kanooj kõl̦mãnl̦o̦kjen̦ kake. Iar kile bwe ña im l̦addik eo ilo pija eo me etan in Andre, kõmro ej ãinwõt juon. Elukkuun em̦m̦an ippa men eo l̦al̦l̦ap eo ear ba ñan Andre bwe en kõm̦m̦ane. Ear ba en riiti Pilippai 3:8 im kõl̦mãnl̦o̦kjen̦ kake. Kõn men in, iar jol̦o̦k aõ iukkure ippãn team eo.

“Men in ear lukkuun jipañ eõ! Ear jako aõ kõn̦aan jiãe im bareinwõt aõ inepata. Ear l̦apl̦o̦k aõ m̦õn̦õn̦õ im epaakel̦o̦k ro m̦õtta ilo congregation eo. El̦apl̦o̦k aõ kaorõke aõ karejar ñan Jeova. Iar kanooj roñjake ilo kweilo̦k ko im m̦õn̦õn̦õ kõn katak ko. Iar jel̦ãl̦o̦k kilen kwal̦o̦k naan. Kiiõ ij auxiliary pioneer aolep allõñ.”

El̦aññe kwõj m̦ad im kajekdo̦o̦n naan ko an Jijej ñan ekil wõt, kwõn etale kwe make im kõm̦m̦an oktak ãinwõt kar Arielle. Ewi wãween? Kwõmaroñ lale Taitõl̦ in Katak ko rej wal̦o̦k ilo Imõniaroñroñ eo an allõñ in Tijemba. Ej kwal̦o̦k katak ko im kwõmaroñ lo naan in kakapilõk ko im bwebwenato ko an ro jet me rar bar iion ejja apañ eo kwõj iione. Kwõn kapojak ñan kweilo̦k ko im je katak ko, innem enaaj l̦ap am̦ bõk tokjãn jãn kweilo̦k ko. Jet rar lo bwe ilo aer jijet ilo jea ko im̦aantata ilo im̦õn kweilo̦k eo, men in ear lukkuun jipañ er. Ñe ri kweilo̦k ro rej uwaak, kwõn kate eok ñan uwaak ilo jinointata. Bareinwõt, kwõn ekil wõt kõn men ko rej wal̦o̦k ilo nuuj me rejejjet im rej kalikkar bwe jej pãd ilo “raan ko ãliktata.”​​—2 Timote 3:​1-5; 2 Piter 3:​3, 4; Revelesõn 6:​1-8.

“Komij Aikwij Bojak”

Kakõl̦l̦e eo kõn raan ko ãliktata ej pãdjake aolepen lal̦ in. (Matu 24:​7, 14) Elõñ milien armej rej jokwe ilo jikin ko el̦ap nañinmej ko rekapopo, ñũta, im m̦akũtkũt lal̦ ie. Ej bar wal̦o̦k men ko jet me Baibõl̦ ear kanaan kaki. Ilo jikin ko jet, armej ro jet rej aenõm̦m̦an im jab inepata kõn men kein. El̦aññe wãween kein me rej kakõl̦l̦en raan ko ãliktata rejañin jelõt eok, kwõj aikuj ke l̦õmn̦ak bwe ej to wõt an naaj itok eñtaan eo el̦ap? Eokwe ejjab jim̦we l̦õmn̦ak rot in.

L̦õmn̦ak m̦õk kõn ta eo Jijej ear kanaan kake kõn an naaj wõr “ñũta, im nañinmej ko rel̦ap.” (Luk 21:​11) M̦oktata, ear jab ba bwe men kein renaaj wal̦o̦k ilo aolepen lal̦ in ilo juon wõt iien. Im ear jab ba bwe jorrããn ko renaaj joñan wõt juon. Jãn an ãindein, ear ba bwe men kein renaaj wal̦o̦k bõtab jãn jikin ñan jikin. Innem, jejjab aikuj kõtmãne bwe men kein renaaj wal̦o̦k aolep jikin ilo juon wõt iien. Kein karuo, ãlikin wõt an kar Jijej kwal̦o̦k kõn an naaj wõr ñũta, ear ba bwe jet iaan rũkal̦oor ro an rej aikuj kõjparok bwe ren jab bũrooklep im tõr. Ear ba: “Kom̦win kõjparok kom̦ ñe ab obrak bũruemi kõn tõr.” (Luk 21:​34) Kõn men in, aolep Kũrjin ro ren jab kõtmãne bwe renaaj ioon aolep men ko im rej kakõl̦l̦en raan ko ãliktata. Bõtab, Jijej ear ba: “Ñe kom̦ij lo men kein re wal̦o̦k, kom̦win jel̦ã bwe aelõñ in  Anij epaak.” (Luk 21:​31) Meñe jejjab loe jorrããn kein ilo ijo jikid im rej kakõl̦l̦en jem̦l̦o̦kin ak jej maroñ loi ilo TV ak computer ko.

Bareinwõt, keememej bwe Jeova em̦õj an karõk “raan eo im awa eo” ñe enaaj jino eñtaan eo el̦ap. (Matu 24:​36) Aolep men ko rej wal̦o̦k ilo lal̦ in reban ukote ak kabõjrake iien in em̦õj an Jeova karõke.

Jijej ear rõjañ Kũrjin ro ilo jabdewõt jikin: “Komij aikwij bojak ien otemjej.” (Matu 24:​44, UBS) Innem, jej aikuj pojak iien otemjej. Alikkar bwe jejjab maroñ kwal̦o̦k naan im kõm̦m̦ani m̦akũtkũt ko jet an Kũrjin aolep raan im jãn jibboñ ñan boñ. Ilo m̦ool, ejjel̦o̦k juon ejel̦ã ta eo enaaj kõm̦m̦ane ilo tõre eo enaaj wal̦o̦k eñtaan eo el̦ap. Bõlen, jet renaaj pãd ilo jikin jerbal ak kõm̦m̦ane jerbal ko ilo m̦weo. (Matu 24:​40, 41) Innem, ta eo jemaroñ kõm̦m̦ane bwe jen pojak iien otemjej?

Emmanuel, Victorine, im leddik ro 6 nejierro rej jokwe ilo juon jikin ilo Africa. Ilo ijo jikier, ejjab kanooj l̦ap aer iion jorrããn ko im rej kakõl̦l̦en raan ko ãliktata. Kõn men in, baam̦le eo aer ear pepe ñan kõm̦m̦an iien raan otemjej ñan katak Baibõl̦ ippãn doon im kakajoorl̦o̦k kõtaan eo aer ippãn Jeova. Emmanuel ej ba: “Ebwe an kar pen ñan pukot juon iien em̦m̦an ñan kõm aolep. Kõmar pepe ñan katak ippãn doon ium̦win 30 minit, jãn 6 awa ñan 6 jimattan jibboñtata. Ãlikin amim lale unin tõl in raan eo, kõmij etale jet pãrokõrããp ilo juon iaan bok ko bwe kõmin pojak ñan kweilo̦k.” Wãween in ear ke jipañ er ñan pojak im ekkõl wõt? Aet! Emmanuel ej juon elder im ej loloorjake laajrak ko an kumi in elder ro. Victorine ekutkut an auxiliary pioneer im elõñ armej ear jipañ er ñan jel̦ã m̦ool eo. Aolep leddik ro nejierro em̦m̦an aer kate er im wõnm̦aanl̦o̦k ilo congregation eo.

Jijej ej rõjañ kõj: “Komin ekkõl im bojak.” (Mark 13:​33, UBS) Kwõn jab kõtl̦o̦k bwe juon menin karreelel ak kam̦ad en kam̦õjn̦o̦ik kõtaan eo am̦ ippãn Jeova im kõm̦m̦an bwe kwõn jab ekkõl. Kwõn loi naan in kakapilõk ko ilo bok ko ad im ilo kweilo̦k ko im jerbali ãinwõt kar Arielle. Im ãinwõt Emmanuel im baam̦le eo an, kwõn kate eok ñan kõm̦m̦ane juon men kajjojo raan me enaaj jipañ eok ñan pojak iien otemjej im “ekil” wõt.

[Kamelele eo itulal]

[Pija ilo peij 4]

An Emmanuel im baam̦le eo an katak Baibõl̦ ippãn doon kajjojo raan ej jipañ er ñan “bojak ien otemjej”