Ewor Tokjen Air Kate Ir!

IEN kabuñ im katak Baibel an baamle elap an aurõk ñan katakin ajiri ro “ilo kaje im kowe an Iroij.” (Ep. 6:4) Elañe kwoj juõn jemen ak jinen, elap am jelã bwe ekkã an ajiri ro makoko ak mõk elañe rejjab itoklimo kin juõn men. Ewi wãwen bwe kwon kaitoklimoik ir? Jen etale ewi wãwen jet rar kõmmane men in.

George, jen California, ilo Amerika, ej ba, “Ke ajiri ro nejimro rar drik wõt, kimro lio beleiõ ar kate kimro ñan kõmman bwe ien katak eo an baamle eo am en kaitoktoklimo aolep ien, ilo am kõmman ukoktak kin katak ko kimij katak kaki im kõl ko kimij kõmmani ilo ien am katak. Jet ien kimij kõnõk nuknuk ko im arrin ro ilo Baibel eo ilo ien eo kimij riit jen buk eo Aõ Buk in Bwebwenato ko Jen Baibel. Kimij kõmman jãje, jokon, ieb im men ko eierlok wõt im kajerbali ilo ien kein. Kimij bareinwõt ikkure kin ikkure eo etan, ‘liñña liñña wõn ña’ kin Baibel eo, im kimij make kõmman amim ikkure kin Baibel eo ilo am kõmman kajitõk ko rebin im bidrodro jimor. Inem kimij ibben dron im kaleke juõn wa einwõt kar wa eo Noa ear kaleke, ak kõmmane juõn lajrak kin aolep bwebwenato ko ilo Baibel ñãt eo rar walok. Jet ien kimij jiñaik armij ro ilo Baibel eo ak bwebwenato ko ie. Kiõ, kimij lemnak in jiñaik kein tõrinae ko ilo book in Epesõs 6:11-17, im kajjojo iam ej kemelele kin ta ko men kein kajjojo rej jitõñlok ñani. Men kein rar jibañ kim ñan itoklimo in katak ibben dron einwõt juõn baamle.”

Debi, juõn kõrã ilo Michigan, Amerika, ej ba: “Ke ear jilu an ledrik eo nejimro yiõ, ekar bin amro leo beleiõ kõmman bwe en itoklimoen im lukkun roñjake ilo ien kimij katak. Inem juõn ran, ke kimij riiti bwebwenato eo kin Aisak im Rebeka jen Aõ Buk in Bwebwenato ko Jen Baibel, iar jibwe ruo dolly im kajerbali ñan arin rein ilo bwebwenato in. Im kiõ ej lukkun roñjake aolep nan ko! Kimar kajerbal dolly kein ruo iomin elõñ aliñ ko ñan arin ro ilo bwebwenato ko ilo Baibel eo. Elikin am riiti juõn bwebwenato jen Baibel eo, ledrik eo nejimro ej bukoti dolly ko ilo mweo ak men ko jet me kim maroñ kajerbali ñan arin rein ilo bwebwenato ko ilo Baibel. Ej einwõt ñe ej bukot juõn mweiuk eaurõk! Kimar kajerbal juõn box in juuj im juõn to bũrõrõ bwe ren einwõt mweo imõn Rehab im to eo ar kajerbale. Im kimar kajerbal juõn snake kein ikkure im ej lalem ne aitokõn im bauti ñan juõn alal in broom bwe en einwõt serpent jinibõrõrõ eo ilo buk in Bwinbwin 21:4-9. Kimar kakoni aolep men kein iloan juõn ieb ekilep. Kimro ar lukkun bwilõñ bwe ekkã an jijõt ilo etõñaak eo im edede loan ieb eo im bukoti kein ikkure ko. Kimij lañliñ ñe kimij loe an make kajerbal kein ikkure kein im anõke ro ilo bwebwenato ko ilo Baibel.”

Ejjab bidrodro ñan katakin ajiri ro. Ro jemen im jinen rej aikwij katakin ajiri ro bwe ren karejar ñan Jeova jen burueir. Rej aikwij kõmmane men in kajjojo ran im ilo elõñ wãwen ko. Ien kabuñ an baamle im katak Baibel aolep wik elap an aurõk ñan jibañ ro jemen im jinen bwe ren maroñ lo tõbrak ilo men in. Ejelok kajitõk bwe ewor tokjen air kate ir!