“Bokake Emõn jen Katok”

SAUL ear kiñ eo jinointata ilo ailiñ in Israel. Meñe Anij ear kãlet e bwe en kiñ, ak tokelik Saul ear kiblia.

Ta men ko renana Saul ear kõmmani? Emaroñ ke kar bõprae e make jen an kõmmani men ko renana? Ewi wãwen jemaroñ bõk tokjen jen ad etale bwebwenato eo kin mour eo an Saul?

Jeova Ej Kwalok Kiñ eo Ear Kãlete

Mokta jen an kar Saul erom kiñ, Jeova ear kajerbal dri kanan Samuel ñan an tel dri Israel ro. Ilo ien in Samuel ear bwijwõlã, im lõmaro nejin rar jab tiljek ñan Jeova. Ilo ejja ien eo wõt, dri kijdrat ro an ailiñ in Israel rar bojak in tõrinaek ir. Eman ro reritto ilo Israel rar kebake Samuel im kajitõk ibben ñan kãlet juõn air kiñ bwe en ekajete ir im tel ir ilo tõrinae. Innem Jeova ear jiroñ Samuel bwe en kabit Saul einwõt eo im enaj tel ir im ear ba: “E naj lomoren armij ro Aõ jen pein ro dri Pilistia.”—1 Sam. 8:4-7, 20; 9:16.

Saul ear ‘emmõn drettan im kanuij wulio.’ Ejjab men in wot, ak ear bareinwõt juõn armij emmõn. Ear etã buruen. Ñan wanjoñok, Saul ear kajitõk ibben Samuel: “Ña ij jen bwijjin Benjamin, bwij eo edriktata ilo Israel, im family eo aõ ej family eo ettãtata ilo bwijjin Benjamin. Ak etke kwojam konono rot in ñõn iõ?” Saul ear jab lemnak bwe e im baamle eo an reutiejlok jen ro jet, meñe jemen etan Kish, ear kanuij “mweie im utiej ibben armij.”—1 Sam. 9:1, 2, 21, UBS.

Lemnak bareinwõt kin wãwen an kar Saul emakõt ke Samuel ear kalikar iman armij ro kin wõn eo Jeova ear kãlete bwe en kiñ in Israel. Ilo jinoin, Samuel ear kabiti Saul ilo ijo ejelok armij ie im ear ba ñan e: “Kwon kõmõn men eo peõm ej loe; bwe Anij ej ibõm.” Tokelik, Samuel ear kokweloktok armij ro ibben dron ñan kalikar ñan ir wõn eo Jeova ear kãlete bwe en kiñ. Bõtab, Saul ear jako jen ijo ke Samuel ear kwalok bwe Jeova ear kãlet e. Saul ear tilekek kin an kar jook. Jeova ear kwalok ia eo ear bed ie, im tokelik kar kajelã ñan aolep bwe Saul ej kiñ.—1 Sam. 10:7, 20-24.

Ilo Ien Tõrinae Ko

Ilo mõkaj, Saul ear kamol ñan armij ro bwe emaroñ iroij einwõt juõn kiñ emmõn. Ke dri Amon ro rar iten nitbwili juõn  bukwon ilo Israel, “[kajur eo an] Anij e ar itok ion Saul.” Innem ear kakien im kakobaiktok aolep dri tõrinae ro an Israel. Ear karõk ir im tokelik ear tel ir im rar anjo ion dri Amon ro. Ak Saul ear nebare Anij einwõt eo im ear tel ir bwe ren anjo ke ear ba: “Ranin Jeova e ar kõmõn lomor ñõn Israel.”—1 Sam. 11:1-13.

Ear lõñ men ko remmõn kin Saul im Anij ear kejerammõn e. Ear bareinwõt nebar im kautiej Jeova einwõt eo ear jibañ ir. Bõtab, ñan an dri Israel ro im kiñ eo air lo wõt jerammõn, ear wor juõn men elap an aurõk me rar aikwij kõmmane. Samuel ear jiroñ dri Israel ro: “Elañe komij mijõk Jeova, im korijer ñõn E, im eoroñ ainiken, im jab kabata nae kien Jeova, im kom kab bareinwõt kiñ eo ej iroij iomi naj ro dron Jeova ami Anij.” Dri Israel ro rar jelã bwe elañe rar tiljek wot ñan Anij, renaj bõk juõn jerammõn elap. Ta jerammõn in? Samuel ear ba: “Jeova e jamin illok jen armij ro dron, kin etan elap, bwe e buñburuen Jeova in kõmõn kom ro An dri ailiñ.”—1 Sam. 12:14, 22.

Bwe Anij en buñburuen kake ir, dri Israel ro rar aikwij bokake, im ejelok oktak ilo ran kein. Anij ej kejerammõn ro dri karejeran ñe rej bokake kien ko an. Ak ta elañe rejjab bokake Jeova?

“Kwar Kõmõn Men in Bwebwe”

Dri Pilistia ro rar kanuij illu ibben Saul kin juõn men ear kõmmane. Jar in tõrinae eo an rein im rar jutak nae Saul ear “einwõt bok i barijit kin air lõñ.” Kin men in, “ke ro dri Israel rar lo air uota, (bwe armij rar iñtan kake), innem armij ro rar tilekek ilo roñ ko, im ilo bukwõn wijki rekab, im ilo dreka ko, im ilo jukur ko, im ilo aibij ko.” (1 Sam. 13:5, 6) Ta eo Saul enaj kõmmane?

Samuel ear jiroñ Saul bwe en iione ilo Gilgal, ijo me dri kanan ro rej kõmman katok ko ie. Saul ear kõttar e, bõtab erumij an itok Samuel im dri tõrinae ro an Saul rar jino jibliklik. Kin men in, Saul ear make wõnmanlok im katok kin menin katok ko. Bõtab, elikin wõt an kõmmane men in, ejede Samuel. Elikin an kar Samuel roñ kin men eo Saul ear kõmmane, ear jiroñ e: “Kwar kõmõn men in bwebwe; kwar jab bokake kien Jeova am Anij, eo E ar jiroñ yuk; bwe kiõ E naj kar kabin am kiñ ion Israel ñõn in drio. A kiõ am kiñ e jamin eto: Jeova e ar kabukot juõn eman ekar ñõn buruen, im E ar likit e iroij ion armij ro dron, kin ke kwar jab bokake men eo Jeova e ar jiroñ yuk.”—1 Sam. 10:8; 13:8, 13, 14.

Saul ear wãlok ilo an kar jab bokake kien eo an Anij ñan kõttar Samuel bwe en katok kin menin katok ko. Men in ear kalikar bwe edriklok an liki Jeova. Men eo Saul ear kõmmane elap an oktak jen men eo juõn kapen in jar in tõrinae an Israel etan Gideon ear kõmmane! Gideon ear bokake ke Jeova ear jiroñ e ñan kaeietlok oran dri tõrinae ro jen 32,000 ñan 300 wõt. Etke ear bokake? Kinke ear liki Jeova. Kin jibañ eo jen Anij, ear maroñ anjo ion 135,000 dri kijdrat ro an Israel. (Ekaj. 7:1-7, 17-22; 8:10) Jeova emaroñ kar jibañ Saul bareinwõt. Bõtab, kinke Saul ear jab bokake Jeova, dri Pilistia ro rar nitbwili dri Israel ro im rakimi men ko mweier.—1 Sam. 13:17, 18.

Ta eo jej kõmmane ñe jej jelmae melejoñ ko rebin? Ñan ro im edrik air tõmak im liki Jeova, remaroñ lemnak bwe ejjab bwid ñan air kejekron nan in kakabilek ko jen Anij. Saul emaroñ kar lemnak bwe ejimwe men eo ear kõmmane kinke Samuel ear jako. Bõtab, ñan ro im rej kate ir ñan kabuñburuen Anij, rej lor wõt nan in kakabilek ko ilo Baibel ñe rej kõmman bebe ko.

Jeova Ej Karmijeteik Saul

Saul ear bar kõmman juõn jerawiwi elap ilo tõre ko dri Israel ro rar tõrinaeik dri Amelek  ro. Anij ear liakelok dri Amelek ro kin air nitbwili dri Israel ro elikin air kar drioijltok jen Ijipt. (Ex. 17:8; Dut. 25:17, 18) Bareinwõt, dri Amelek ro rar kobalok ibben dri ailiñ ko jet ñan bar nitbwili armij ro dron Anij ilo ien ko an dri Ekajet ro. (Ekaj. 3:12, 13; 6:1-3, 33) Innem Jeova ear ekajete dri Amelek ro im kakien Saul bwe en mõn ir aolep.—1 Sam. 15:1-3.

Jen an bokake kien eo an Jeova ñan mõn aolep dri Amelek ro im kokkure men ko mweier koba menin mour ko air, Saul ear jab mõn kiñ eo im ear bõk menin mour ko remmõntata. Ta eo ear walok ke Samuel ear konono ibben Saul kin men eo ear kõmmane? Saul ear kajeoñ in naruõn ro jet ke ear ba: “Armij ro rar kejbãrok ko remmõn ian jip ko, im ox ko, bwe ren katok kake ñõn Jeova.” Meñe Saul ear kõnan katok kin menin mour ko ak jab, ear kiblia. Ear jako an Saul ‘drik ilo mejen’ ak watõk e make ettãlok jen ro jet. Kin men in, dri kanan eo an Anij Samuel ear kalikar bwe Saul ear jab bokake Anij. Innem ear ba: “Jeova ej buñburuen kin men in katok kijeek, im men in katok ko, einwõt ilo bokake ainiken Jeova ke? Lo, bokake emõn jen katok . . . Kin am kar jolok nan in Jeova, E ar bareinwõt jolok yuk jen am ber im kiñ.”—1 Sam. 15:15, 17, 22, 23.

Ke Jeova ear bõk kajur eo an jen Saul im jako an kejerammõn e, ear nana tammwin. Innem ear nanalok lemnak ko im iñjake ko an Saul. Aolep ien ear ebanbane im lemnak nanaiki Devid, eo me tokelik Jeova ear kairoij e bwe en kiñ. Saul ear kajeoñ in mõn Devid elõñlok jen juõn alen. Baibel ej ba bwe ke “Saul e ar lo im kili bwe Jeova ej iben Devid . . . ej dri kijirãte Devid ien otemjej.” Saul ear lukworkwore Devid bwe en kajeoñ in mõn e im ear kakien bwe ren mõn 85 pris im ro jet. Eñin unin Jeova ear karmijeteik Saul!—1 Sam. 18:11, 25, 28, 29; 19:10,11; 20:32, 33; 22:16-19.

Ke dri Pilistia ro rar bar nitbwili dri Israel ro, Saul ear kabuk jibañ jen juõn dri anijnij ak ear jab lo tõbrak. Ilo ran eo tok juõn, ear kinejnej ilo tõrinae, innem ear mõn e make. (1 Sam. 28:4-8; 31:3, 4) Baibel eo ej ba kin kiñ eo moktata an dri Israel ro im ear kiblia: “Saul ear mij kinke ear jab tiljek ñõn Iroij. Ear jab bokake kien ko an Iroij. Ear bukõt nan in kabilõk jen ibben juõn eo ear katoke ro ri mij im ear jab bukõt nan in kabilõk jen Iroij.”—1 Kron. 10:13, 14, UBS.

Joñok eo enana an Saul ej kalikar bwe bokake Jeova emmõn jen katok. Dri jilik Jon ear je: “Bwe eñin yokwe Anij, bwe jen kejbãrok kien ko An: im kien ko An re jab erro.” (1 Jon 5:3) Jen jab meloklok men in: Elañe jekõnan jimjerãik Jeova, jej aikwij bokake e.

[Picture on page 21]

Ear etã buruen Saul ke ear jino kiñ

[Picture on page 23]

Etke Samuel ear jiroñ Saul bwe “bokake emõn jen katok”?